Ölkədə növbəti sərtləşdirilmiş karantin rejimi tətbiq ediləcək

Vətəndaşlar həmrəylik nümayiş etdirməsələr, çox ciddi fəsadlar yarana bilər

Azərbaycanda yeni növ koronavirusun qarşısının alınması istiqamətində dövlət tərəfindən həyata keçirilən zəruri tədbirlər davam etdirilməkdədir. Ötən gün üç modul tipli xəstəxananın açılması da COVID-19-un ölkəmizdə yayılması ilə mübarizədə olduqca mühüm əhəmiyyət kəsb edir. Modul tipli xəstəxanaların quraşdırılması ilə ölkənin səhiyyə sisteminin əlavə 2000 çarpayılıq ehtiyatı yaranır. Bu da koronaviruslu xəstələrin müalicəsi istiqamətində səhiyyənin imkanlarını daha da genişləndirəcək. Çünki xüsusi karantin rejimi yumşaldılandan və sərt qadağalar aradan qaldırılandan sonra ölkədə yeni yoluxma hallarının sayı artmaqdadır.

Elə bu səbəbdən də mövcud sanitar-epidemioloji vəziyyət təhlil edilərək, son günlərdə virusa yoluxma sayı, xəstəliyin yayılma dinamikası nəzərə alınaraq ölkə üzrə xüsusi karantin rejiminin iyulun 1-dək uzadılmasına qərar verildi. Eyni zamanda, infeksiyanın geniş yayılmasının qarşısının alınması üzrə həyata keçirilən tədbirlər çərçivəsində dövlət sərhədində giriş-çıxışa müvəqqəti olaraq tətbiq edilən məhdudiyyətin və beynəlxalq uçuşların təxirə salınma müddəti artırıldı. COVID-19 pandemiyası ilə bağlı dünyadakı vəziyyət təhlil edilərək yükdaşımaları və çarter reysləri istisna olmaqla, Azərbaycan ərazisinə yerüstü və hava yolu ilə giriş-çıxışa tətbiq olunan məhdudiyyət 1 iyuladək uzadıldı.

Daha iki gün evdən çıxma qadağası tətbiq ediləcək

Son günlər Yevlax, İsmayıllı, Kürdəmir və Salyan rayonlarında yüksək yoluxma faktları aşkar edildiyindən COVID-19 virusunun yayılma sürətinin azaldılması, eləcə də onun törədə biləcəyi fəsadların minimuma endirilməsi məqsədilə 14 iyun saat 00:00-dan 16 iyun saat 06:00-dək adıçəkilən dörd bölgənin, eləcə də Bakı, Gəncə, Lənkəran və Sumqayıt şəhərlərinin, Abşeron rayonunun ərazisində növbəti dəfə sərtləşdirilmiş karantin rejimi tətbiq ediləcək. İki gün ərzində bütün iş, xidmət və ticarət sahələri üzrə fəaliyyət, eyni zamanda ictimai nəqliyyatın və avtomobillərin hərəkəti dayandırılacaq, əhalinin yaşayış yerlərini və ya olduğu yerləri tərk etməsi qadağan ediləcək. Sakinlər qeyd olunan müddətdə yaşayış yerlərini və ya olduğu yerləri həyat və sağlamlığa bilavasitə təhlükəli vəziyyət yarandığı halda, eləcə də təxirəsalınmaz tibbi yardıma ehtiyac olduqda yalnız təcili tibbi yardım xidməti vasitəsilə, habelə yaxın qohumların dəfnində iştirak etmək üçün Daxili İşlər Nazirliyinin Növbətçi Hissələri İdarəetmə Xidmətinin 102 Xidməti - Zəng Mərkəzi vasitəsilə icazə almaqla tərk edə biləcək.

Müəyyən olunmuş tarixlər üzrə fəaliyyətinə icazə verilən iş və xidmət sahələrində işləyən şəxslər, onların xidməti və şəxsi avtomobillərinin hərəkətinə işəgötürən tərəfindən məlumatlar elektron imzadan istifadə edilməklə "icaze.e-gov.az” portalına daxil edildikdən sonra yol veriləcək. Fəaliyyətinə icazə verilən qurumların, eyni zamanda dövlət əhəmiyyətli, həyat təminatlı müəssisələrin və qurumların, həmçinin fasiləsiz işləyən qurumların fəaliyyətləri zəruri hesab edilən işçilərini məhdud sayda cəlb etməklə tənzimlənəcək.

Xüsusi karantin rejiminin tələblərinin pozulmasına görə fiziki, hüquqi və vəzifəli şəxslər Azərbaycan Respublikasının qanunvericiliyi ilə nəzərdə tutulmuş qaydada inzibati və cinayət məsuliyyəti daşıyır.

Ehtiyatda 11,6 milyon maska var

Tibbi Ərazi Bölmələrini İdarəetmə Birliyinin (TƏBİB) İdarə Heyətinin sədri Ramin Bayramlı Nazirlər Kabineti yanında Operativ Qərargahın brifinqində çıxışı zamanı qadağa günlərində çox az halda narazılıq müşahidə olunduğunu bildirib: "Ciddi neqativ hallar olmadı. Müəyyən yerlərdə çörək satışı növbələrində problem yaşandı. Sonradan tullantı qablarında atılan çörəkləri gördük. Güman edirik ki, ilk qərar olduğundan təşviş yaşandı. Təcrübənin olduğunu düşünür və inanırıq ki, növbəti dəfə belə olmayacaq”.

TƏBİB sədri qeyd edib ki, yeni açılan üç modul tipli xəstəxana ilə çarpayı ehtiyatımız 600 yataq yeri genişlənib. İndiki dövrdə həftədə 200-500 xəstəni qəbul etmək mümkündür. Xəstə sayı çoxaldıqca tibbi personalın sayı da artırılır: "İki xəstəyə ən yaxşı halda bir tibb işçisi qulluq edir. Bu gün üçün tibb müəssisələrində hər hansı çatışmazlıq yoxdur. Depomuzda bütün lazımlı vasitələr kifayət qədərdir. Dünyada istifadə olunan bütün dərman preparatları ölkəmizdə mövcuddur. Olmayan dərman yoxdur və hər hansı qıtlıq yaşanmır. Gələcəkdə bununla bağlı problem olmayacaq”.

Nazirlər Kabinetinin Mətbuat Xidmətinin rəhbəri İbrahim Məmmədov isə Operativ Qərargahın brifinqində Azərbaycanda tibbi maskaların satışının artdığını qeyd edib. Onun sözlərinə görə, ehtiyatda 11,6 milyon maska var. Ölkədə bir gündə 200 minədək maska istehsal olunur. İyunun 4-də 524 min, iyunun 5-də 950 min, iyunun 8-də 575 min tibbi maska satılıb.

Yoluxma daha çox ictimai nəqliyyatda və iaşə obyektlərində qeydə alınır

Ölkədə koronavirusa yoluxma hallarının böyük hissəsi paytaxtın payına düşür - bu göstərici 50 faizin üzərindədir. Bu da yoluxma saylarının artması ilə əlaqədardır. Sabunçu rayonunda bu göstərici 12.4, Yasamalda 12.3, Xətaidə 11.6, Nəsimi rayonunda 11 faiz təşkil edib. İyunun 1-dən 7-dək Azərbaycanda 2059 nəfər koronavirusa yoluxub. "Xəstəlikdən sağalanlarla virusa yoluxanların sayı arasındakı fərq narahatedicidir. Son 10 günün nəticəsinə görə, həmin fərq arzuolunan səviyyədə deyil”, - deyə R.Bayramlı qeyd edib.

Dövlət strukturlarında çalışanlar arasında da koronavirusa yoluxma halları var.

Azərbaycanda koronavirusa yoluxanların yaş qruplarına gəlincə, bu göstərici 50-59 yaş arası 21, 30-39 yaş arası 18, 40-49 yaş arası 15 faiz təşkil edir. TƏBİB sədrinin sözlərinə görə, müşahidələr artan dinamikada gənclərin payının çox olduğunu göstərir: "Gənc yaşda olan insanların virusa yoluxması artıb və onlar xəstəliyi ağır keçirirlər. Əvvəl ağır xəstələr əsasən yanaşı gedən xəstəliyi olanlar idisə, bu gün gənc yaşda olanlar da xəstəliyi ağır keçirir. Bu da evdə özünü müalicəyə cəhd edənlər arasında müşahidə olunur. Qadınlar arasında yoluxma 54 faiz, kişilərdə isə 46 faizdir”.

O da qeyd olunub ki, yoluxma faktları daha çox ictimai nəqliyyatda və ictimai iaşə obyektlərində qeydə alınır. Çünki həmin yerlərdə sosial məsafə qorunmur. Marketlərdə də yoluxma sayı artır: "Siyəzən rayonunda 12 yoluxma halı aşkar edildi ki, onların da hamısı qadınlardır. Onların hamısı yas yerində yoluxublar”.

R.Bayramlı qeyd edib ki, tibb müəssisələri virusu vaxtında aşkarlamağa, vətəndaşlar isə mövcud qaydalara əməl etməyə borcludur: "Əgər vətəndaşlar həmrəylik nümayiş etdirməsələr, çox ciddi fəsadlar yarana bilər”.

Məhz bu səbəbdən ictimai yerlərdə, qapalı məkanlarda şəxsi gigiyena, eləcə də tibbi-profilaktik qaydalara əməl etmək, sosial məsafə gözləmək, kənar şəxslərlə minimum kontaktda olmaq, sanitar-epidemioloji vəziyyətə uyğun olaraq müəyyən edilmiş yerlərdə qoruyucu vasitələrdən istifadə mütləqdir. Dövlətin vəzifəsi insanları bu xəstəlikdən qorumaq, onların həyatını xilas etməkdir. Vətəndaşların vəsifəsi isə dövlətin qoyduğu qanunlara riayət etməkdir. Gəlin COVID-19 virusu ilə mübarizədə, insanların sağlamlığı və təhlükəsizliyinin qorunması istiqamətində dövlət tərəfindən həyata keçirilən tədbirlərdə həmrəylik göstərək. Özümüzün, yaxınlarımızın səhhəti, sağlamlığı naminə Nazirlər Kabineti yanında Operativ Qərargahın tələb və qaydalarına əməl edək. Maska taxaq, sosial məsafəni gözləyək, gərək olmadığı təqdirdə evdən çıxmayaq. Hazırkı dövrdə pandemiya ilə səmərəli mübarizə bilavasitə vətəndaşların intizamlı davranışı və məsuliyyətindən asılıdır. Ona görə də bir olaq, birlikdə olaq ki, gözəgörünməz virusa qalib gələk. Çünki biz birlikdə güclüyük.

Xəyalə MURADLI

Azərbaycan.-2020.- 11 iyun.- S.6.