Ölkəmiz COVID-19-a qarşı mövcud imkanlarını daha da genişləndirir

Qlobal formada pandemiya ilə mübarizə davam edir. Dünya COVID-19-u birdəfəlik məhv etməyin hələlik mümkün olmadığını anlayaraq, hər an ayıq-sayıq dayanaraq onunla bərabər yaşamağa məcburdur. Çünki ani bir sərvaxtlıq bütöv xalqları, ümumilikdə insanlığı yer üzündən silə bilər. Gözəgörünməz bəla çox təhlükəli, aqressiv və səhv bağışlamazdır...

Ölkələr üçün virusdan qorunmağın ən təsirli mexanizmi isə sərt karantin rejimidir. COVID-19-un sürətlə yayıldığı birinci dalğasında, demək olar ki, dünyanın hər yerində ondan qorunmaq üçün məhz bu yol seçildi. Bəlkə də sərt karantin rejimi tətbiq olunmasaydı, hazırkından daha dəhşətli vəziyyətlə üz-üzə qalardıq...

Amma o da reallıqdır ki, ömür boyu karantin rejimində yaşamağın nəticəsi də elə dünyanı sona sürükləmək anlamına gəlir... Çıxış yolu isə qızıl ortanı tapmaqdır. Ya vaksin tapılana qədər tələb olunan qaydalar əsasında yaşamımızı davam etdirməliyik, ya da...

Vətənimizdə koronavirusa yoluxanlara ən düzgün, ən humanist yanaşma sərgilənir

Qlobal bəla Azərbaycandan da yan keçməyib və ölkəmizdə koronavirusla mübarizə çərçivəsində mərhələli şəkildə mühüm addımlar atılır. COVID-19-un yol açacağı mümkün faciələrdən sığortalanmaq üçün zəruri tədbirlər görülür. Prezident İlham Əliyevin rəhbərliyi altında qlobal böhrana qarşı həyata keçirilən sosial-iqtisadi model özünü doğrultdu. Qabaqlayıcı tədbirlər pandemiyanın geniş vüsət almasının qarşısını almağa, onu nəzarətdə saxlamağa imkan verdi.

Hazırda Azərbaycanda mövcud olan səhiyyə imkanları da buna kömək etdi. Belə ki, son 16 il ərzində ölkəmizdə bütövlükdə 700-dən çox tibb müəssisəsi ya yenidən tikilib, ya da əsaslı təmir edilib. Koronavirus xəstələrini müalicə etmək üçün ən qabaqcıl 20 xəstəxana ayrılıb, ümumi sayı 20-dən çox yeni laboratoriyalar alınıb. Azərbaycan dünya miqyasında nadir ölkələrdəndir ki, koronavirusa yoluxan bütün xəstələr tibbi müəssisələrdə müalicə alır. Ölkəmizdə koronavirusdan ölənlərin sayının az olmasının əsas səbəblərindən biri də məhz odur ki, yoluxmuş bütün xəstələr tibbi müəssisələrə qəbul edilir və onlara lazımi xidmət göstərilir.

Göründüyü kimi, Azərbaycanda koronavirusa yoluxanlara yanaşma ən düzgün, ən humanist yanaşmadır. Digər tərəfdən, dövlət başçısının tapşırıq və tövsiyələrinə əsasən həssas təbəqələrə sosial dəstək verildi, onlara 190 manat birdəfəlik ödənişlər ayrıldı və bu dəstəyin əhatə etdiyi insanların sayı xeyli genişləndirildi. Dövlətimiz hər zaman olduğu kimi, bu çətin dövrdə də bütün səylərini vətəndaşının sağlamlığı, təhlükəsizliyi və yaşam şərtlərinin yaxşılaşdırılması istiqamətinə yönəltdi.

Sanitar-epidemioloji vəziyyət nəzarətdədir

Amma koronavirus təhlükəsi bitməyib və hər an yenidən alovlana bilər. Elə yumşalmalar ərəfəsində müəyyən qaydalara əməl edilməməsi səbəbindən yoluxma sayında artımın müşahidə olunması bunu təsdiqləyir.

Buna görə də yeni növ koronavirus xəstəliyi ilə bağlı mövcud sanitar-epidemioloji vəziyyət təhlil edilmiş və xəstəliyin yayılma dinamikası nəzərə alınaraq ölkə üzrə xüsusi karantin rejiminin 1 iyul 2020-ci il saat 00:00-dək uzadılmasına qərar verilib.

Ölkə üzrə sanitar-epidemioloji vəziyyətin təhlilinə əsasən, son günlər Yevlax, İsmayıllı, Kürdəmir və Salyan rayonlarında yüksək yoluxma faktları aşkar edilmişdir. Bu baxımdan COVID-19 virusunun yayılma sürətinin azaldılması, eləcə də onun törədə biləcəyi fəsadların minimuma endirilməsi məqsədilə 2020-ci il 14 iyun saat 00:00-dan 16 iyun saat 06:00-dək Bakı, Gəncə, Lənkəran və Sumqayıt şəhərlərinin, Abşeron, Yevlax, İsmayıllı, Kürdəmir və Salyan rayonlarının ərazisində sərtləşdirilmiş karantin rejimi tətbiq ediləcək.

Bu ərazilərdə bütün iş, xidmət və ticarət sahələri üzrə fəaliyyət, eyni zamanda ictimai nəqliyyatın və avtomobillərin hərəkəti dayandırılır (xüsusi təyinatlı, qəza-bərpa, təcili tibbi yardım avtomobillərinin və fəaliyyətinə icazə verilən orqanların (qurumların) və təşkilatların xidməti, həmçinin onların əməkdaşlarına məxsus şəxsi avtomobillərin, eyni zamanda yaxın qohumlarının dəfnində iştirakla əlaqədar vətəndaşların şəxsi avtomobillərinin hərəkəti istisna olmaqla);

Bu müddətdə əhalinin yaşayış yerlərini və ya olduğu yerləri tərk etməsi qadağan edilir.

Xüsusi karantin rejiminin tələblərinin pozulmasına görə fiziki, hüquqi və vəzifəli şəxslər Azərbaycan Respublikasının qanunvericiliyi ilə nəzərdə tutulmuş qaydada inzibati və cinayət məsuliyyəti daşıyır.

Mövcud sanitar-epidemioloji vəziyyətə uyğun olaraq digər günlərdə 65 yaşdan yuxarı insanların ciddi zərurət olmadan yaşayış yerlərindən və ya olduğu yerlərdən çıxmamaları tövsiyə olunur. Eyni zamanda kütləvi yoluxma hallarının qarşısının alınması məqsədilə xüsusi karantin rejimi müddətində respublika üzrə ictimai yerlərdə, bulvarlarda və parklarda, ictimai iaşə obyektlərində insanların bir yerdə 10 nəfərdən artıq qruplarda cəmləşməsi qadağasına, qoruyucu vasitələrdən istifadə edilməsi qaydalarına ciddi əməl olunması tələb edilir.

Həftəsonu sərtləşmənin qonşu ölkələrdəki praktikaya əsaslandığını söyləyən TƏBİB-in xəstəliklərin profilaktikası və nəzarəti şöbəsinin müdiri Yaqut Qarayeva bildirib ki, Türkiyədə həftəsonu sərtləşmə təcrübəsi araşdırılıb: "Orada bunun nəticələri 10 faiz azalma ilə özünü göstərir. Amma bu, 1-2 gün daxilində özünü göstərə bilməz. Bu xəstəliyin 14 günlük inkubasiya dövrü var. Həftəsonu karantinin nəticəsini ən azı 10 gün sonra görəcəyimizə ümid edirik”.

Pandemiya dövründə hava nəqliyyatı ilə sərnişin daşımaları

Bununla yanaşı, iyunun 15-dən daxili uçuşların bərpası nəzərdə tutulur və ilkin mərhələdə Naxçıvana həftədə iki uçuşun olması planlaşdırılır. Nazirlər Kabineti tərəfindən təsdiqlənən "Koronavirus (COVID-19) pandemiyası dövründə Azərbaycan Respublikasında uçuşların və hava nəqliyyatı ilə sərnişin daşımalarının təşkili üzrə müvəqqəti Qaydalar”da göstərilir ki, sərnişinlər uçuşdan ən azı 4 saat əvvəl aerovağzal kompleksinə gəlməlidirlər.

Qaydalara əsasən, aviaşirkətlərin bütün reyslərində əl yükünün daşınmasına icazə verilmir. Aviaşirkətlərin qaydalarına əsasən, müəyyən edilən yalnız şəxsi istifadə əşyalarının (noutbuk, portfel, qadın çantası və s.) daşınması mümkündür.

Həmçinin, əhali sıxlığının qarşısının alınması məqsədilə qarşılayan və yola salan şəxslərin terminala girişi qadağandır.

Sərnişinlər Azərbaycan Respublikasının hava limanlarında tətbiq edilən xüsusi qayda, prosedur, məhdudiyyət və göstərişlər barədə uçuşu icra edən aviadaşıyıcı tərəfindən əvvəlcədən xəbərdar ediləcəkdir.

Bu tələbləri pozan şəxslər qanunvericiliyin tələblərinə uyğun olaraq məsuliyyətə cəlb olunacaqlar.

Cəmiyyətimiz yeni davranış qaydaları çərçivəsində yaşamağa öyrəşməlidir

Bəli, indi cəmiyyətimiz yeni davranış qaydaları çərçivəsində yaşamağa öyrəşməlidir. Koronavirusa yoluxmamaq üçün bütün qapalı yerlərdə, ictimai nəqliyyatda, ofislərdə, alış-veriş mərkəzlərində və digər yerlərdə maskadan istifadə mütləqdir. Hər kəs məsafə saxlamalı, şəxsi gigiyena qaydalarına riayət etməlidir. Tibbi maska, bir yarım-iki metr məsafə və dezinfeksiya vasitələri - insanları 95 faiz yoluxmadan qoruyur.

Artıq bu bir reallıqdır ki, koronavirus həyatımızın bir parçasına çevrilib. Onu yox kimi saymaq, ondan qorxmamaq əvəzinə ona qarşı davranışları, mübarizə qaydalarını öyrənmək lazımdır. Sərt karantin rejiminin yumşaldılması COVID-19 təhlükəsinin sovuşması anlamına gəlmir. Bütün tədbirlərə baxmayaraq, virus bizimlədir və yox olmayıb. Yaxın zamanda isə vaksinin əldə edilməsi gözlənilmir. Bu isə o deməkdir ki, yeni qaydalar çərçivəsində yaşamağa alışmaq lazımdır, özü də tezliklə...

Yasəmən MUSAYEVA

Azərbaycan.-2020.- 13 iyun.- S.5.