Həyat o zaman gözəl olur ki...
Dünya koronavirus pandemiyası ilə mübarizəyə
başlayandan cansağlığı
bütün maddi-mənəvi
sərvətlərdən daha
vacib hesab edildi
14 İyun Ümumdünya Qan Donoru Günüdür
Sağlamlıq insana təbiət və yaradan tərəfindən verilsə
də, onun qorunması həm şəxslərin özləri,
həm də ictimaiyyət tərəfindən
birmənalı şəkildə
həyat məqsədinə
çevrilməlidir. Təəssüf ki, sağlamlığını
qorumadığına görə
milyonlarla insan həyatını vaxtsız
və yaxud uzunmüddətli xəstəliklərdən
itirməli olur.
Qan və onun komponentlərinin
köçürülməsi isə hər il milyonlarla
insanın həyatını
xilas etməyə imkan verir. Müxtəlif vaxtlarda "Başqalarını
düşün, qan ver, həyatla bölüş” devizi ilə keçirilən ümumdünya qan donoru kampaniyası da ictimaiyyətin diqqətini bu istiqamətə yönəltmək
məqsədi daşıyır.
Çünki qan donorluğu
insan həyatını
xilas edən xeyirxah addımdır.
14 iyun 2005-ci il
tarixində Ümumdünya
Səhiyyə Təşkilatının
Cenevrədə keçirilmiş
58-ci Assambleyasında ildə
bir dəfə donorluq gününün qeyd edilməsi ilə bağlı qərar qəbul edilib. Bu da öz kəşfi ilə donorluq işinə böyük töhfə vermiş Karl Landşteynerin doğum günü ilə bağlıdır.
Uzun illər hematoloji xəstələrin müalicəsi
ilə məşğul
olmuş, hematologiya və səhiyyənin təşkili üzrə fəlsəfə doktoru, qan xəstəlikləri üzrə mütəxəssis
kimi bir çox beynəlxalq konfransların (ABŞ, Fransa,
Türkiyə, Kanada və s.) iştirakçısı
və məruzəçisi
olan doktor Mehparə Kazımova qeyd edir ki,
insan orqanizmində qanın müəyyən
kritik həddi mövcuddur. Bu həddi aşdıqda qan ehtiyatını artırmaq
lazımdır: "...Əgər
bu ehtiyat olmazsa, o zaman insan həyatını itirə bilər. Buna görə də
donorun 300-400 milliqram qanı ilə insan həyatını xilas etməsi tamamilə doğrudur.
Hər kəs həyatı boyunca qan köçürülməsinin
zəruri olduğu hallar ilə üzləşə bilər.
Qan insan orqanizmi üçün həyati
əhəmiyyət kəsb
edir, o, trofik funksiya daşıyır, toxuma və orqanların qaz mübadiləsini təmin
edir.
Ciddi xəsarət,
əməliyyat, kəskin
qanaxma, hematoloji və onkoloji xəstəliklər, ağır
doğuşlar, mürəkkəb
əməliyyatların icrası
zamanı qan və onun komponentləri
insan həyatını
xilas edir. Qanı
heç bir başqa preparatla əvəz etmək mümkün deyil, onu yalnız sağlam donordan əldə etmək olar...”
Ən təhlükəsiz olan məhz könüllü donorların qanıdır
Bu tarixi gün bütün dünyada qeyd olunaraq, Ümumdünya Səhiyyə
Təşkilatı, Beynəlxalq
Qırmızı Xaç
və Qızıl Aypara Cəmiyyəti, bir sıra digər
qurumlar tərəfindən
dəstəklənir. Təəssüflə qeyd etməliyik ki, bütün dünyada təhlükəsiz
donor qanına ehtiyac artmaqdadır. Təcrübə göstərir ki, ən təhlükəsiz
olan məhz könüllü təmənnasız
donorların qanıdır.
Təhlükəsiz qan,
onun komponentləri və preparatları hər il
hamiləlik və doğuş zamanı ağırlaşması olan
minlərlə ananı,
körpə uşaqları,
xəsarət alanları
və digərlərini
ölümdən xilas
etməyə kömək
edir.
Doktor M.Kazımova onu da qeyd etməyi
vacib saydı ki, ölkəmizdə yayılmış hemofiliya
və talassemiya xəstələrinin müalicəsində
qan komponentlərinin və preparatlarının
istənilən vaxtda əlçatan olması çox vacibdir və bu, donor qanına tələbatı
artırır: "Azərbaycan
Respublikasının Səhiyyə
Nazirliyinin "2011-2015-ci illər
üçün qanın,
qan komponentlərinin donorluğu və qan xidmətinin inkişafına dair Tədbirlər Proqramının
həyata keçirilməsi”
və "Qan xidməti müəssisələrinin
şəbəkəsinin optimallaşdırılması
və fəaliyyətinin
təkmilləşdirilməsi” barədə əmrləri
də donor qanına tələbatın ödənilməsinə
yönəldilib. Lakin donorluğun
inkişafı üçün
yalnız Səhiyyə
Nazirliyi deyil, müxtəlif dövlət
və qeyri-hökumət
qurumları, görkəmli
xadimlər, KİV də
öz töhfəsini
verməlidir. Hazırda dünyanın
60-dan çox ölkəsində
sırf könüllü
donorluq əsasında
qanvermə xidmətləri
fəaliyyət göstərir.
Hansı
ki, 2002-ci ildə belə xidmətlər yalnız 39 ölkədə
qeydə alınmışdı”.
Yeri gəlmişkən,
2009-cu ildə qəbul
edilmiş Melburn Bəyannaməsi ölkələrə
2020-ci ilədək 100 faiz
könüllülük əsasında
təmənnasız donor qanı
ilə təmin etmək, qanköçürmənin
həyat üçün
əhəmiyyətli rolu
barədə maarifləndirmə
işlərinin səviyyəsini
yüksəltməklə donorluğun
miqyasını genişləndirmək
çağırışı da edib. Ümumdünya Səhiyyə Təşkilatının
dünya ölkələrinin
ictimaiyyətini Ümumdünya
Qan Donoru Günündə "Dünyanı
qırmızı rəngə
boyayaq” kampaniyasına
qoşulmağa çağırışı
da təsadüfi deyil. Hər il bütün
dünyada insanların
həyatını xilas
etmək və sağlamlığını yaxşılaşdırmaq
məqsədilə ən
azı 100 milyon doza qan verilir.
Buna baxmayaraq, köçürmək üçün
qana tələbat durmadan artır. Təəssüf ki, hələ
də bir çox ölkələr
mövcud tələbatın
öhdəsindən gələ
bilmir.
Donorlar dünyanın 70-dən artıq
ölkəsində yaşayırlar
Qan və qan məhsulları planda nəzərdə tutulmuş və təcili cərrahiyyə əməliyyatları, o cümlədən
artmaqda olan yol-nəqliyyat qəzaları
nəticəsində xəsarət
almış insanların,
habelə anadangəlmə
bəzi xəstəliklərin
müalicəsi üçün
zəruridir. Donorların, ümumiyyətlə, dünyada
sayının az olması, yəni əhalinin ümumi sayının cəmi 1 faizini təşkil etməsi ürəkaçan göstərici
deyil. Onlar da cəmi 70-dən bir az artıq ölkədə yaşayırlar. Bu göstərici də qana olan əsas
tələbat üçün
zəruri səviyyədən
aşağıdır.
Qan və onun komponentlərinin donorluğu problemi ölkəmiz üçün
əhəmiyyətli və
milli səhiyyə sistemimiz üçün vacib məsələlərdən
biri hesab olunur. Sülh dövründə
və fövqəladə
hallarda yüksək texnoloji tibbi yardımın göstərilməsi
imkanları və xidmətlərin keyfiyyəti
məhz sözügedən
problemin həllindən
asılıdır: "Hazırda
tibbin elə bir sahəsini tapmaq çətindir ki, orada insan
sağlamlığının və həyatının xilas olunması üçün qan komponentlərinin köçürülməsindən
istifadə edilməsin.
Onu da qeyd edək
ki, Azərbaycanda donor
qanının və onun komponentlərinin təmin edilməsi üzrə milli siyasətin əsas prinsipləri artıq formalaşdırılıb. Azərbaycanın Birinci vitse-prezidenti,
Heydər Əliyev Fondunun prezidenti, UNESKO və ISESCO-nun xoşməramlı
səfiri Mehriban xanım Əliyeva tərəfindən 2005-ci ildə
Azərbaycanda "Talassemiyasız
həyat naminə” layihəsinin icrasına başlanılması ilə
ölkədə səhiyyənin
bu vacib sahəsində əhəmiyyətli
müsbət dəyişikliklər
müşahidə edilməyə
başlandı. Sözügedən proqram Azərbaycanda qeyd edilən xəstəliyə qarşı
mübarizə sahəsində
dönüş nöqtəsi
oldu. Bu proqramın
həyata keçirilməsi
çərçivəsində 2009-cu ildə Bakı şəhərində Talassemiya
Mərkəzi istifadəyə
verildi. Mərkəzdə talassemiyadan əziyyət
çəkən xəstələr
pulsuz zəruri dərman preparatları və ixtısaslı tibbi xidmətlər əldə edirlər.
Milli Məclisin
qəbul etdiyi "Qanın, qan komponentlərinin donorluğu
və qan xidməti haqqında” Azərbaycan Respublikasının
Qanunu 2005-ci ilin may ayında Azərbaycan Prezidenti tərəfindən
təsdiqlənib. 2006-cı ildə Azərbaycan Respublikasının Nazirlər
Kabineti tərəfindən
təsdiqlənmiş "Qanın,
qan komponentlərinin donorluğu və qan xidmətinin inkişafına dair Dövlət Proqramı”
(2006-2010 və 2011-2015) da
bu qəbildən olan sənədlər sırasına daxildir.
Qeyd edilən proqramlar çərçivəsində qan xidməti göstərən müəssisələrin
dövlət tərəfindən
zəruri avadanlıqlar,
qanın saxlanılması
üçün konteynerlər
və qanın testi üçün reaktivlər ilə təchizatı məsələləri
həll edilib. Ölkə ictimaiyyəti isə çox mühüm bir məsələnin - qan donorluğu probleminin həllinə fəal şəkildə qoşulub.
Səhiyyə Nazirliyi qan xidməti müəssisələri şəbəkəsinin fəaliyyətinin optimallaşdırılması və təkmilləşdirilməsi istiqamətində əhəmiyyətli işlər görməkdədir. Qan xidməti müəssisələrinin strukturunun müasirləşdirilməsi tədbirləri nəticəsində səmərəlilik səviyyəsi aşağı olan qan xidməti müəssisələri sıradan çıxarılıb ki, bu da donorlardan daha rasional şəkildə istifadə etməyə, donor qanlarında olan və qan vasitəsilə ötürülən keçici xəstəliklərin marker üzrə müayinəsinin yaxşılaşdırılmasına imkan verir. Bütün bu donorlar isə ödənişsiz könüllülər olub.
Qanvermə aksiyaları genişlənir
Donorluğun təbliği sahəsində müasir üsullardan istifadə edilməsi (MQB-nin veb.saytının yaradılması, videokliplərin çəkilməsi, plakatların və kitabçaların çap edilməsi, KİV vasitəsilə çoxsaylı çıxışlar, donorların forumlarının keçirilməsi və s.) ilbəil donorların sayının və tədarük edilmiş qan və onun komponentlərinin miqdarının artmasına gətirib çıxarıb. M.Kazımova onu da əlavə etdi ki, Heydər Əliyev Fondunun çağırışına uyğun olaraq, təkcə Bakı şəhərində deyil, ölkənin digər regionlarında fəaliyyət göstərən müəssisə və təşkilatlarda könüllü qanvermə aksiyaları təşkil olunmağa başlandı: "Donorluq aksiyalarının təşkilində tibb işçiləri daha çox fəallıq nümayiş etdirirlər. Onlar Səhiyyə Nazirliyinin müəyyən etdiyi qrafik əsasında müntəzəm olaraq qan verirlər.
Bütün bu tədbirlər qan komponenti ehtiyatının toplanmasına və təmin edilməsinə gətirib çıxarır. Donorlar ən dəyərli, heç bir texnologiya ilə əldə edilməyən, satın alına və əvəz oluna bilməyən nemət sayılan cansağlığının bərpası üçün başqalarına öz qanını verirlər. Təsadüfi deyil ki, donor sözü qədim latınca "donore”, yəni "bəxş etmək” deməkdir. Bir çox hallarda onların hədiyyəsi digər insanın həyatını xilas edir”.
Bu gün artıq bütün dünyanı çənginə alan koronavirus (COVID-19) pandemiyasının qarşısının alınması istiqamətində aparılan mübarizə tədbirlərində də qanvermənin necə əhəmiyyətli olması faktoru özünü qabarıq şəkildə göstərdi. Hətta virusa yoluxub, onunla döyüşərək qalib gəlmiş pasiyentlərin sağaldıqdan sonra verdikləri qan digər belə xəstələrin həyatlarını xilas edəcək qədər dəyərli hesab edilir. Buna görə də donorluq bir könüllülük hərəkatı kimi genişləndirilməli, daha çox ictimaiyyəti özünə cəlb etməlidir.
Məhəmməd
NƏRİMANOĞLU
Azərbaycan.-2020.- 14 iyun.- S.11.