Ermənistanda növbəti diktatura formalaşıb

Paşinyan hakimiyyətini möhkəmləndirmək üçün siyasi təqibləri artırıb

Ermənistanda ictimai-siyasi müstəvidə vəziyyət yenidən pisləşməyə başlayıb. Xatırladaq ki, bu günlərdə Ermənistan parlamentindəki çoxluq "Çiçəklənən Ermənistan” Partiyasının sədri və eyniadlı fraksiyanın lideri Qaqik Tsarukyanın təqsirləndirilən şəxs qismində məsuliyyətə cəlb edilməsinə razılıq verib və faktiki olaraq onu deputat toxunulmazlığından məhrum edib.

Səsvermədə yalnız "Mənim addımım” hökumətyönümlü blokun üzvləri iştirak ediblər. Belə ki, iki müxalif fraksiya səsvermədə iştirak etməkdən imtina edib və baş verənləri məzhəkə adlandırıb. Tsarukyanın özü isə həmin vaxt Milli Təhlükəsizlik Xidmətində dindirilib.

Artıq Tsarukyanın həbsinə hazırlıq gedir. Bu fonda "Çiçəklənən Ermənistan” Partiyasının parlamentdəki "Tsarukyan” fraksiyasının üzvü olan deputatlar qanunverici orqanın iyunun 17-dəki iclasını boykot edərək zaldan çıxıblar. Müxalif deputatlar Tsarukyanın qeyri-qanuni şəkildə deputat toxunulmazlığından məhrum edilməsinə etiraz olaraq bu addımı atıblar. Fraksiyanın deputatı Arman Abovyan deyib: "Təəssüf edirəm ki, demokratik dəyərlərin bərpası üçün söz və fikir azadlığı şüarları ilə toplananlar siyasi opponentlərin ağzını yummağa çalışırlar”.

Tsarukyanın adı üç cinayət işində hallanır. Birincisi, Tsarukyanın qumar biznesi sahəsindəki şirkətlərinin qanunsuz fəaliyyəti nəticəsində dövlət büdcəsi 60 milyon dollara yaxın vəsait itirib.

İkinci cinayət işi "Çiçəklənən Ermənistan” Partiyasının 2017-ci il parlament seçkiləri zamanı ehtimal olunan rüşvət vermə halları ilə bağlıdır. Söhbət yüz milyonlarla dramdan gedir. Daha bir cinayət işinə görə partiyanın sədrinə bağlı şirkət qanunsuz olaraq torpaq sahələrini mənimsəyib. Dövlətə 342 milyon dram, təxminən 685 min dollar ziyan dəyib.

Tsarukyan özü hakimiyyətin hərəkətlərini siyasi təqib kimi qiymətləndirir. Ermənistanın "Qraparak” nəşri isə baş verənlərlə bağlı olaraq yazır ki, artıq Ermənistan diktaturadır. Qeyd olunur ki, Milli Təhlükəsizlik Xidməti isə Nikol Paşinyanın əlində siyasi dəyənəkdir: "Ermənistanda parlamentin əksəriyyətini təşkil edən fraksiyanın rəhbərinin rolu həmişə çox böyük olub. Bu gün yalnız kiçik məsələlərdə Ermənistanın baş naziri Nikol Paşinyan ermənilərin rədd etdiyi keçmiş vəzifəli şəxslərdən fərqlənir. Paşinyan bəzi məsələlərdə hətta onları üstələyib. Məsələn, Ermənistanın əvvəlki hakimiyyətləri dövlət büdcəsini "inqilabçı”lar kimi maneəsiz və özbaşına şəkildə xərcləmirdi. Əvvəlkilər bu qədər açıq şəkildə siyasi təqiblər həyata keçirmirdilər, ən azından formal olaraq qanuna əməl edirdilər. Ermənistanda hakimiyyət güc strukturlarını siyasi rəqiblərinə qarşı istifadə etdiyi küt alətə çevirib”.

"Çiçəklənən Ermənistan” fraksiyasının deputatı Arman Abovyan isə bildirir ki, inqilab etmiş qüvvə yalan və aldatmaya əsaslanan genişmiqyaslı siyasi təqiblərlə faktiki olaraq öz prinsiplərinə xəyanət etdi. Qeyd edib ki, bu yalan və aldatma onları bir gündə kor və kar olmağa, açıq zorakılığı "görməməyə” və adi insanların səsini "eşitməməyə” məcbur etdi: "Dodaqlarında "insan ən böyük dəyərdir” şüarı olanları ədalət və həqiqəti palçığa atmağa nə məcbur etdi? Deyirlər ki, bütün inqilablar öz övladlarını yeyir, bəlkə də səbəb budur, düzünü desəm, bilmirəm. Qorxmuram və susmayacam”.

Ermənistanın "Vətən” Partiyasının sədri, Ermənistan Milli Təhlükəsizlik Xidmətinin keçmiş direktoru Artur Vanetsyan isə bildirir ki, Paşinyanın hakimiyyət dövrü Ermənistan tarixində qeyri-müəyyənlik, təbii dağılma və bədbəxtlik dövrü kimi qalacaq. Qeyd edib ki, hökm sürən hakimiyyətsizlik şəraitində demək olar bütün sahələrdə biabırçı uğursuzluqlar qeydə alınmağa davam edir: "Ancaq mövcud hakimiyyətin uğursuzluqlarından və məhvolmalarından daha vacib məsələ var. Dağılmış iqtisadiyyatı bərpa etmək, məhv olan təhsil və sosial sistemləri yenidən yaratmağa keçmək mümkündür. Yəni Paşinyan tərəfindən məhv edilmiş istənilən sahəni yalnız iradə, idarəetmə qabiliyyəti və düzgün insanların mövcudluğu ilə bərpa etmək mümkündür”.

"Vətən” Partiyası Şurasının üzvü Ara Saakyan isə bildirir ki, Ermənistan hakimiyyətinin öz ssenariləri var və bunlar cəmiyyətdə parçalanmanı daha da kəskinləşdirmək adlanır: "Hakimiyyət artıq adekvat anlayış qabiliyyətini itirib və indi ölkədə bir nəfərin hakimiyyəti bərqərar olub. Bu, bizi bir sıra ölkələrin artıq geridə qoyduğu keçmişdəki vəziyyətə qaytaracaq”. Onun sözlərinə görə, Tsarukyana qarşı edilən hərəkətlər tamamilə siyasi motivlərlə idarə olunur: "Əgər Qaqik Tsarukyan həbsxanaya salınsa, bu, onun təcrid edilməsi məqsədinə əlavə dəlil olacaq. Müxalifət liderini həbsxanaya göndərmək hər hansı bir dialoq imkanından imtina etmək deməkdir. Hakimiyyət nümayəndələri dialoqdan imtina etdilər, bundan sonra gərginliyin daha da artmasında özləri günahkar olacaqlar”.

Bütün bunlar Ermənistanda ictimai-siyasi gərginliyi daha da artırır.

Elçin CƏFƏROV

Azərbaycan.-2020.- 18 iyun.- S.1;7.