Ermənistanda siyasi terror güclənir
Paşinyanın qurduğu totalitar inqilabi diktaturaya Qərb təşkilatları səssiz
yanaşırlar
Son dövrlərdə Ermənistanda baş verənlərin demokratiya ilə heç bir əlaqəsi yoxdur. Söhbət faktiki olaraq
güc yolundan, şantajdan istifadə edərək hakimiyyətin
zorla əldə saxlanılmasından gedir.
Ölkədə cərəyan edən
son hadisələr bir
daha göstərir ki, populizmə üstünlük verən,
xalqın emosional əhvalından istifadə
edən Paşinyan hakimiyyətə gəldikdən
sonra siyasi kursu daha da
despotik şəkildə
davam etdirir. Məsələ bundadır ki,
Paşinyan rüşvətxorluğa,
bürokratiyaya qarşı
"müharibə” elan
olunduğunu iddia etsə də, əslində, müharibə
onun siyasi rəqiblərinə qarşı
aparılır. Ölkədə siyasi repressiyaların və təqiblərin genişlənməsi müşahidə
edilir.
Son olaraq işğalçı
ölkədə vəziyyətin
gərginləşməsinə səbəb isə Ermənistan Milli Təhlükəsizlik Xidmətinin
(MTX) "Çiçəklənən Ermənistan” Partiyasının
sədri Qaqik Tsarukyana qarşı üç maddə üzrə cinayət işi açması və parlament tərəfindən onun deputat toxunulmazlığının
ləğv edilməsidir. Q. Tsarukyanın
həbs ediləcəyi
istisna olunmur. Partiya sədrinin məhz Paşinyan hakimiyyətini tənqid etməsindən sonra təzyiqlərə məruz qalması baş verənlərin siyasi təqib olduğunu sübut edir. Elə bu da Paşinyanın indidən
diktatora çevrildiyini
aydın surətdə
nümayiş etdirir.
Bu gün Ermənistanda
sosial-iqtisadi, eləcə
də ictimai-siyasi müstəvidə xaotik vəziyyət davam edir. Əvvəla, real durum koronavirusun ölkəni diz çökdürdüyünü göstərir. Bunu "Çiçəklənən
Ermənistan” Partiyasının
deputatı Mikayel Melkumyan da xüsusi
olaraq qeyd edir: "Koronavirus vəziyyətinin qeydə
alınmasına qədər
bu ölkədə iqtisadi inqilab olduğu bildirilirdi, ancaq həyat bunun nəticəsində hər hansı müqavimət olmadığını
göstərdi”.
O qeyd edib ki,
iqtisadi siyasət bu templərlə davam edərsə, avqustda ölkədə tamamilə kollaps vəziyyət olacaq. Deputat bu durumda "Çiçəklənən Ermənistan”
Partiyasının və
onun liderinin hədəf olmasını
da fəlakətli hal sayıb.
Ermənistanın üçüncü prezidenti,
Respublika Partiyasının
sədri Serj Sarkisyan da Avropa
Xalqları Partiyasının
"Şərq Tərəfdaşlığı”
liderlərinin videokonfransında
çıxışı zamanı
siyasi virusa yoluxmuş Nikol Paşinyan hakimiyyətinin
səriştəsiz idarəetməsi
və populizmindən danışıb. Sarkisyan koronavirus pandemiyası
kontekstində ölkədə
səhiyyə və sosial-iqtisadi sahədə
son dərəcə təhlükəli
vəziyyətin yarandığını
bildirib. Sabiq prezident
vurğulayıb ki, Ermənistan hakimiyyətinin
siyasi virusa yoluxmuş populizmi nəticəsində səriştəsiz
idarəçiliyi ölkədə
təhlükəli daxili
siyasi vəziyyət yaradıb. O, eyni zamanda Ermənistanla Avropa İttifaqı arasında 2017-ci ildə imzalanmış tərəfdaşlıq
sazişinin yerinə yetirilməsində hazırkı
hakimiyyətin heç
bir təsirli addım atmadığını
deyib.
Həqiqətən də, Ermənistanın baş naziri Nikol Paşinyan COVID-19-a qarşı mübarizədə
aciz olduqlarını müxtəlif açıqlamalarla
bildirib. Onun "indi cəhənnəmdə
addımlayırıq” ifadəsi
ölkədə koronavirusla
bağlı yaranmış
vəziyyəti tam əks
etdirir. Ölkə beynəlxalq ictimaiyyətdən
yardım istəyib.
Müxalifət və vətəndaş cəmiyyəti isə Nikol Paşinyanın pandemiya ilə mübarizəsinə inanmır. Onlar hesab
edirlər ki, hökumət başçısı
fövqəladə vəziyyət
rejimindən rəqiblərinə
qarşı dəyənək
kimi istifadə edir. Məhz elə bu fonda Ermənistan parlamentinin iyunun 16-da qəbul etdiyi qərarla "Çiçəklənən
Ermənistan” Partiyasının
sədri, milyonçu
siyasətçi Qaqik
Tsarukyan deputat toxunulmazlığından məhrum
edildi.
Bundan əvvəl isə Tsarukyan parlamentdə çıxış edəndə
hökuməti hədələmişdi:
"Narazılıq artır,
bütün bunlar 1-2 aya başa çatacaq”.
O, çıxışında Nikol Paşinyanın başçılıq etdiyi
hakim "Mənim addımım”
Partiyasını ittiham
edib. Vurğulayıb ki, hökumət başçısı inqilab
zamanı verdiyi vədləri yerinə yetirməyib: "Paşinyan
əməkdaşlıq etməyə
razılıq vermədi.
İnvestisiya siyasətini və
koronavirusa qarşı
mübarizəni uğursuzluğa
düçar etdi”.
O, paşinyançıların inqilabının artıq sonunun gəldiyini də bildirib.
Nikol Paşinyan
isə koronavirusla bağlı yaranmış
fövqəladə vəziyyət
rejimindən istifadə
edərək milyonçu
deputat sahibkara zərbə endirdi. Ermənistanın baş naziri indi də deyir
ki, "Çiçəklənən
Ermənistan” Partiyasının
üzvlərinə və
Qaqik Tsarukyanın qohumlarına qarşı cinayət işləri
2018-ci ildə açılıb.
O, çıxışı zamanı Tsarukyanın partiyasının bağlanması
ehtimalına da eyham vurub: "2017-ci ildə sistemli şəkildə rüşvət
paylanmasında, saxtalaşdırmada
iştirak edən partiyaların buraxılmasına
dair qanun layihəsi hazırlanmışdı.
Bu qanun layihəsini
geri qaytarmaq və belə partiyaları qadağan etmək barədə düşünmək lazımdır”.
Xatırladaq ki, Tsarukyanın adı daha 3 cinayət işində hallanır. Birinci iş seçki saxtakarlığı ilə bağlıdır. O, 2017-ci ilin aprelində keçirilən parlament seçkiləri zamanı seçicilərin səsini rüşvətlə almaqda, gizli səsverməni pozmaqda ittiham olunur. Bu saxtakarlığın iştirakçısı olmaqda şübhəli bilinən 250 nəfər polis bölməsinə aparılıb. Partiya sədri Ermənistanın Qeqarkunik vilayətində özünün və başçılıq etdiyi blokun xeyrinə 17 min 194 seçicinin bülleteninə 355 min 200 ABŞ dolları xərcləyib. İkinci iş vergidən yayınmaqla bağlıdır. Bu milyonçu deputat biznes fəaliyyəti ilə məşğul olduğu müddətdə dövlət büdcəsindən 60 milyon ABŞ dolları gizlədib. Tsarukyana qarşı üçüncü ittiham isə qanunsuz yolla torpaq zəbt etməkdir. O, bu əməli ilə dövlətə 685 min ABŞ dolları ziyan vurub.
Beləliklə Paşinyan Ermənistanda rəqiblərini sıxışdırır. Burada qeyd edək ki, populist çıxışları ilə tanınan Nikol Paşinyan hakimiyyətə gəldikdən sonra onun "demokratiya” adı altında ölkənin tanınmış siyasi və ictimai xadimlərinə qarşı repressiv vasitələrdən geniş şəkildə istifadə etməsi və onları bir-bir sıradan çıxararaq zərərsizləşdirməsi hər kəsə məlumdur. Ermənistanın baş naziri öz siyasi rəqiblərini bir-bir həbsə atır, onları hətta "asfalta uzatmaqla” hədələyir.
Paşinyan tərəfindən indiyədək Ermənistanın keçmiş rəhbərliyinə qarşı silsilə cinayət işləri açılıb və hazırda istintaq davam edir. Ölkədə faktiki olaraq siyasi repressiyalar həyata keçirilir. Ekspertlər bildirirlər ki, Ermənistanda totalitar inqilabi diktatura qurulub. Amma Tsarukyanla bağlı son hadisələr fonunda "azadlıq carçısı” olan bəzi beynəlxalq təşkilatların, beynəlxalq QHT-lərin, ümumən bir sıra Qərb təşkilatlarının səssizliyi də diqqətdən yayınmır. Məsələn, ABŞ Dövlət Departamenti, Avropa Şurasının Parlament Assambleyası, ATƏT-in Media Azadlığı üzrə nümayəndəsi, ABŞ-ın Ermənistandakı səfiri, Qərb ölkələrinin Ermənistandakı səfirlikləri hələ də məsələyə laqeyd yanaşırlar.
Bəzi ekspertlər hesab edirlər ki, Paşinyana qarşı sərgilənən bu mövqenin arxasında onun amerikalı iş adamı Corc Soros tərəfindən dəstəklənməsi də müəyyən rol oynayır. Bu durumda Paşinyan siyasi rəqiblərini güc yolu ilə sıradan çıxarmaqda davam edir. Prosesin getdikcə daha gərgin vüsət alması da tamamilə gözləniləndir.
Elçin CƏFƏROV
Azərbaycan.-2020.-
19 iyun.- S.1;7.