Ermənistanda totalitar diktatura qurulur

İşğalçı ölkədə daxili qarşıdurma daha gərgin mərhələyə qədəm qoyur

Ermənistanda baş nazir Nikol Paşinyanın rəqiblərinə qarşı repressiyası davam edir. Amma onun indi əsas rəqiblərdən biri kimi gördüyü "Çiçəklənən Ermənistan” partiyasının lideri, iş adamı Qaqik Tsarukyanın həbsini reallaşdırması müşkülə çevrilib. Belə ki, Yerevan məhkəməsi "Çiçəklənən Ermənistan” partiyasının liderinin həbsi barədə qərar qəbul etməkdən imtina edib. Tsarukyanın vəkili Erem Sarkisyan bu xüsusda bildirib: "Məhkəmə Tsarukyanın həbsi ilə bağlı ittihamı rədd etdi. Sevinirəm ki, məhkəmə özündə güc tapdı və siyasi proseslərdən yuxarıda dayandı”.

Qeyd edək ki, bundan əvvəl Ermənistan parlamenti Tsarukyanın deputat toxunulmazlığını ləğv etmişdi. Tsarukyan üç cinayət işində təqsirli bilinir. Bura onun şirkətlərinin vergidən yayınması, seçiciləri pulla ələ alması və qanunsuz olaraq torpaq sahələrinin mənimsənilməsi daxildir. Partiya sədri həm də dövlətə 685 min dollar ziyan vurmaqda günahlandırılır.

Tsarukyan hakimiyyətin hərəkətlərini siyasi təqib adlandırıb. O, jurnalistlərə deyib ki, bu maddə ilə heç kim tutulmayıb, ola bilsin ki, cərimə qərarı olsun: "Ancaq onlar müxalifət partiyasının rəhbərini, Milli Olimpiya Komitəsinin prezidentini həbs etmək istəyirlər. Əgər ölkənin indi uçurumda olmasına görə mən günahkaramsa, barmaqlıqlar arxasında oturmağa hazıram. Ancaq mənim üçün bütün bunlar anlaşılmazdır”.

Erməni siyasi-ictimai xadimi Samvel Farmanyan isə bildirir ki, baş verənlər Ermənistanın demokratik və beynəlxalq nüfuzunun sarsılmasıdır: "Addım-addım başqa bir ağır problem yetişir: beynəlxalq ictimaiyyətin qavrayışlarında Ermənistan demokratiyaya, insan hüquqlarına və qanunun aliliyinə müharibə elan etmiş dövlət kimi təsvir olunmağa başlayır”.

Ekspertlər qeyd edirlər ki, Nikol Paşinyan koronavirus pandemiyası dövründə vətəndaşların sosial-iqtisadi problemlərini həll etməkdə ciddi çətinliklərlə qarşılaşır, xəstəliyin yoluxma sayının artmasının qarşısını ala bilməməsi səbəbilə sürətlə sosial dayaqlarını itirir. Təsadüfi deyil ki, erməni mətbuatı da N.Paşinyanın aqoniya vəziyyətində olduğunu iddia edir, bunun əsas səbəbini isə parlament müxalifətinin, xüsusilə də "Çiçəklənən Ermənistan” partiyasının açıq şəkildə hökumətin tam tərkibdə istefasını tələb etməsi göstərilir.

Belə vəziyyətdə Paşinyan rəqiblərə qarşı gücü işə salır. Ümumiyyətlə, Paşinyanın tapşırığı ilə indiyədək Ermənistanın keçmiş rəhbərliyinə qarşı silsilə cinayət işləri açılıb və hazırda istintaq davam edir. Gələcəkdə özünə rəqib olacaq və ya rəqib olmaq ehtimalı olan istənilən şəxsi korrupsiya ilə mübarizə ittihamı ilə həbs etmək tam gözləniləndir. Ölkədə siyasi repressiyalar həyata keçirilir və Paşinyanın yeganə məqsədi öz hakimiyyətinin müddətini uzatmaqdır.

Bu durumda Ermənistanda totalitar diktatura qurulub. Bu ölkənin Milli Təhlükəsizlik Xidmətinin keçmiş direktoru, "Vətən” partiyasının sədri Artur Vanetsyan bildirib ki, Ermənistanda yaranmış bugünkü vəziyyət hökumətin və şəxsən Paşinyanın yol verdiyi taleyüklü səhvlərin nəticəsidir: "Onlar on minlərlə xəstəliyə, yüzlərlə ölüm, hələ də dayanmayan faciəyə səbəb olan bu səhvləri başa düşməyə və qəbul etməyə hazırdırlar? Paşinyan siyasi marağını vətəndaşlarımızın həyatından üstün tutur”.

Bu vəziyyətdə Ermənistanın siyasi həyatında müxaliflər birləşirlər. "Çiçəklənən Ermənistan” partiyası, "Vətən” partiyası və "Daşnaksütun” partiyası artıq bir blokdadır. Ermənistanın keçmiş fövqəladə hallar naziri Hraçya Rostomyan isə bildirir: "Ermənistan cəmiyyəti sürətli həllər tapmasa, ölkə Paşinyan komandasının səriştəsiz idarəetməsinin xarabalıqları altında qala bilər”.

Ermənistanda yaranmış gərgin daxili siyasi vəziyyət barədə keçmiş erməni nazirin fikirlərinə "analitik.am” xəbər saytının təsisçi-redaktoru Ani Hohannisyan da dəstək verib: "Çox pis yerə gedirik, dövlətimizi itirə bilərik”.

Bütün bunlar Ermənistanda yeni bir çöküşün yaşandığını göstərir.

Elçin CƏFƏROV

Azərbaycan.- 2020.- 23 iyun.- S. 7.