Azərbaycanın yeni siyasi konfiqurasiyası Prezident İlham Əliyevin iradəsinin nəticəsidir

ASRP sədrinin birinci müavini Əsli Kazımova: "Yeni siyasi dialoq təşəbbüsü iqtidarın müxalif partiyaların fikir və təkliflərini öyrənmək niyyətini təsdiq edir”

Azərbaycanda siyasi həyat son dövrlər mühüm yeniliklərlə əlamətdardır. Bunlardan biri iqtidar-müxalifət dialoqunun yeni müstəviyə keçməsidir. Müxalifət və iqtidaryönlü cərəyanların təmsilçiləri bu amili respublikamızda yeni siyasi münasibətlərin formalaşması baxımından mühüm hadisə kimi dəyərləndirirlər. Azərbaycan Sosial Rifah Partiyası (ASRP) sədrinin birinci müavini Əsli Kazımova ilə söhbətimiz də bu barədə oldu.

İlham Əliyevin tətbiq etdiyi yeni idarəçilik modelinin alternativi yoxdur

Əsli Kazımovanın sözlərinə görə, Ümummilli Lider Heydər Əliyev tərəfindən əsası qoyulmuş azərbaycançılıq ideologiyasının güclü təməli nəzərə alınmaqla ölkədə Prezident İlham Əliyevin rəhbərliyi ilə modern dövlət idarəçiliyi modelinin tətbiq olunması Azərbaycanı uğurlu inkişafa aparan yoldur: "Respublikamızın siyasi sisteminin yeni dizaynı Prezident İlham Əliyev tərəfindən iqtisadi və sosial tərəqqiyə, demokratiyaya və insan kapitalının hərtərəfli inkişafına istiqamətləndirilib. Azərbaycanda yeni tipli dövlət hakimiyyətinin formalaşması, həm ölkəmizin tarixi təcrübəsinə, həm də demokratik dövlətçiliyin təşəkkülü və inkişafı sahəsində dünya təcrübəsinə əsaslanan dövlət qurulması məsələsini bütün kəskinliyi və zəruriliyi ilə qarşıya qoymuşdur. Hesab edirəm ki, həyat fəaliyyətinin bütün sahələrini əhatə edən qlobal proseslər bəşəriyyətin ilk növbədə siyasi sahədə axtarış imkanlarının səfərbər edilməsinə gətirib çıxaracaq”.

Qeyd olundu ki, müasir dövrün yeni lideri olan İlham Əliyevin dövlətimizə rəhbərlik illərində ictimai-siyasi, sosial-iqtisadi, mədəni sahələrdə imza atdığı çoxsaylı uğurlar, Azərbaycanın regionda nüfuz, güc sahibinə çevrilməsi, modernləşməsi Ulu Öndər Heydər Əliyevin uzaqgörənlik nümunəsi olmasının növbəti təsdiqidir.

"Dövlət başçısının rəhbərliyi ilə həyata keçirilən uğurlu siyasət nəticəsində Azərbaycan iqtisadi, siyasi, mədəni, sosial və digər sahələrdə çox mühüm nailiyyətlər əldə etdi, ölkəmizin beynəlxalq mövqeyi daha da möhkəmləndi. Azərbaycanın dünyada mövqeyi, onun gündən-günə qüdrətli dövlətə çevrilməsi önəmli faktordur. İlham Əliyevin sosialyönümlü dövlət quruculuğunun təmin olunması istiqamətində apardığı uğurlu siyasət və ölkədə tətbiq etdiyi yeni idarəçilik modeli əhalinin sosial rifah halının yaxşılaşmasına, işsizliyin və yoxsulluğun aradan qaldırılmasına öz töhfəsini vermişdir. Bu siyasətin mərkəzində isə Azərbaycan vətəndaşının dayanması olduqca sevindirici haldır. Cənab Prezidentin də vurğuladığı kimi, son illər ərzində müxtəlif mərhələlərdə islahatlar aparılıb və bu islahatlar nəticəsində ölkəmiz inkişaf edib. Bunu ölkədə aparılan islahatların nəticəsi olaraq, əldə edilmiş sosial və iqtisadi uğurlarımız da təsdiq edir. Bu isə bir daha cənab Prezidentin tətbiq etdiyi yeni idarəçilik modelinin başqa uğurlu alternativinin olmamasının sübutudur.

Qeyd etmək gərəkdir ki, son 17 il ərzində iqtisadi baxımdan dünyada Azərbaycan qədər inkişaf edən ikinci ölkə yoxdur. Bunu hətta biz COVID-19 pandemiyası ilə mübarizə mərhələsində, sözün əsl mənasında, Azərbaycan iqtisadiyyatı ilə inkişaf etmiş ölkələrin iqtisadi vəziyyətini müqayisə edərkən də görə bilərik. Hesab edirəm, qısa bir zamanda müharibə şəraitində yaşayan bir ölkə üçün bu olduqca böyük uğurdur. Bu zaman kəsiyində Azərbaycan böyükmiqyaslı layihələrə imza atmağa müvəffəq oldu. Bakı-Tbilisi-Ceyhan, Bakı-Tbilisi-Ərzurum, "Cənub qaz dəhlizi”, Bakı-Tbilisi-Qars, "Şimal-Cənub Nəqliyyat Dəhlizi” kimi önəmli layihələr həyata keçirməyə müvəffəq oldu. Bütün bunlar bizə respublikamızın gələcək inkişafı üçün möhkəm zəmindir, deməyə əsas verir”.

Hakimiyyət müxalifətin təklif və istəklərini dinlədi

ASRP sədrinin birinci müavini ilə partiyanın fəaliyyəti, xüsusən cəmiyyətin müasirləşən siyasi həyatında təşəbbüs, proqram və təkliflərlə çıxış etməsi barədə də söhbətləşdik. Bu barədə danışan Əsli Kazımova öncə onu bildirdi ki, ASRP son illərdə beynəlxalq əlaqələrini gücləndirməyə nail olmuşdur və cəmiyyətin müasirləşən siyasi həyatında diaspor və lobbiçilik istiqamətində mühüm addımlar atmaqdadır: "Hesab edirik ki, beynəlxalq media cəbhələri quraraq, başqa ölkələrin mətbuatında Azərbaycan həqiqətlərinin duyurulması üçün xarici jurnalistlərin fəaliyyətini izləmək gözəl təəssüratdır. Düşünürəm ki, ASRP-nin imza atdığı bu kimi önəmli layihələr, dövlətimizin milli və mənəvi idealogiyasına dayanaraq həyata keçirilir və bu tendensiyaya dayanan bütün istiqamətlərin hər gün daha dinamik şəkildə inkişafını görmək mümkündür. Bu tendensiya isə müxalif partiya olaraq Dövlətə, Xalqa və Vətənə xidmət etməyə bizə maneə olmamalıdır”.

Respublikamızın yeniləşən siyasi sisteminin ən mühüm göstəricilərindən biri siyasi komponentləri arasında yeni müzakirələrin - dialoqun başlamasıdır. ASRP da bu prosesdə ilk gündən fəal iştirak edən partiyalardan biridir. Əsli Kazımova bu barədə danışaraq dedi: "Siyasi sistemin başlıca funksiyası cəmiyyəti səmərəli idarə etməkdir. İdarəetmə müvafiq dövlət orqanları tərəfindən qərarların qəbul edilməsi və yerinə yetirilməsi prosesidir ki, bu gün bu proses siyasi partiyaların mərkəzləşdirilmiş şəkildə, ictimai funksiyanın hüquqi normalarının tənzimlənməsi ilə həyata keçirilir. Bu gün ölkədə demokratiyanın prinsiplərindən biri olan uzlaşma prinsipinə əsasən iqtidarla müxalif partiyalar arasında dialoqun reallaşması ölkədaxili siyasi sabitliyin təmin olunması adına önəmli bir addım kimi dəyərləndirilə bilər.

Bir çox müxalif partiyalar iqtidarla danışıqlara getməyi satqınçılıq adlandırır. Amma bu cür yanaşma olduqca yanlışdır. Necə olur, işğalçı Ermənistanla danışıqlar aparmaq mümkün olur, amma dövlətlə ölkədəki sabitlik adına, gənclərin xaricdən qrant ala bilmək üçün istifadə olunmasına son qoymaq adına danışıqlara getmək olmur? Digər tərəfdən bu cür yanaşma birmənalı olaraq qeyri-politik yanaşma deməkdir. Dövlət başçısının təşəbbüsü və Prezident Administrasiyasının yeni yaradılmış Siyasi partiyalar və qanunvericilik hakimiyyəti ilə əlaqələr şöbəsinin müdiri Ədalət Vəliyevin iştirakı ilə individual olaraq ölkədə fəaliyyət göstərən 50-yə yaxın partiya rəhbəri ilə görüşlər keçirildi. Bu isə birmənalı olaraq iqtidarın müxalif partiyalarla demokratikləşmə yolunda dialoqunun baş tutması deməkdir. Yeni siyasi dialoq təşəbbüsü iqtidarın müxalif partiyaların fikir və təkliflərini öyrənmək niyyətini təsdiq edir.

Bu görüşlər çərçivəsində hakimiyyət müxalif partiyaların təklif və istəklərini dinlədi. Azərbaycan Sosial Rifah Partiyası iqtidar və müxalif partiyalarının dialoqunun baş tutmasını hakimiyyətin müxalif partiyaların fikir və təkliflərini dinləmək üçün fürsət kimi dəyərləndirir. Əslində, Azərbaycan iqtidarı dialoq üçün hər zaman açıq olub. Dəfələrlə də hakim partiyanın nümayəndələri bu barədə fikirlərini açıq şəkildə ifadə ediblər. Məqsədi dövlətə və xalqa xidmət etmək olan müxalif partiyalar iqtidarla dialoqa getdi. Lakin müxalifətin radikal qanadını təmsil edən partiyalar belə görüşlərə maraq göstərmədikləri üçün özlərini təcrid etmək mövqeyində qaldılar”.

Əsli Kazımovanın, fikrincə, həmin partiyaların özlərini təcrid etmələrinin sadə bir səbəbi var ki, bu da ölkədə sabitliyi pozmaq kimi mövqe nümayiş etdirməklə xaricdən diqqəti özlərinə cəlb etmək və maliyyə yardımı ala bilməkdir. Amma müxalifətin digər qanadı ilə, o cümlədən Milli Məclisdə təmsil olunan partiyalarla iqtidarın ən müxtəlif səviyyələrdə görüşlərinin davamlı olaraq keçirilməsi Azərbaycanın daxili siyasi sabitliyinə öz töhfəsini verəcək. Ümumiyyətlə, ölkə rəhbərinin bütün istiqamətlərdə fəaliyyətinin əsas məqsədinin xalqımızın rifahının yüksəldilməsindən ibarət olması Azərbaycanda dövlət-xalq birliyini daha da gücləndirir. "Qardaş Türkiyəyə baxın. Müxalif partiyaları var. Amma savaş meydanında müxalifət və iqtidar partiyalarının birgə dialoqu ilə düşmənə anında cavab da verilir. Hər bir xarici təzyiq qarşısında müxalif və iqtidar partiyalar güclərini düşmənə qarşı birləşdirməyi bacarır. Biz də bunu bacarmalıyıq! Demokratiya budur. Yeri gələndə iqtidarla həmfikir olub xarici təzyiqlərə qarşı birgə fəaliyyət göstərməkdir demokratiya”, - deyə o bildirdi.

Dialoqdan qaçmaq demokratiya deyil

Təbii ki, yeniləşən siyasi sistemdə müxalifətin iştirakı, rolu, funksiyası, fəaliyyəti də fəal olmalıdır. Bu baxımdan müxalifət partiyalarının fəaliyyətində təkmilləşməyə ehtiyac olduğu da birmənalıdır. ASRP də partiyaların fəaliyyətinin təkmilləşməsinin vacibliyi qənaətindədir: "Bunu məcburiyyət tələb edir! Azərbaycanda əvvəl yeni siyasi mərhələ başlayıb. Ölkədə köklü islahatlar aparmaq o qədər də asan hal deyil. Bilirsiniz, islahat aparmağa nə hər lider müvəffəq olur, nə də hər xalq bunu qəbul edir. Misal üçün Fransa təcrübəsinə baxaq. Fransız xalqını hər kəs dünyada hər hansısa dəyişikliyə qarşı çıxan xalq kimi tanıyır. Makron nə qədər ölkədə köklü islahatlar aparmaq niyyətini ortaya qoysa da, fransız xalqı bunu qəbul etmək istəmir. Azərbaycan Prezidenti İlham Əliyevin apardığı köklü islahatları Makron Fransada həyata keçirə bilmir. Amma Azərbaycan buna müvəffəq oldu. Bu çox mühüm faktordur.

Müxalifət, xüsusən də radikal müxalifət Azərbaycanın ilk müstəqillik qazandığı illərdəki siyasi psixoloji təfəkkürdə qalıb. Heç bir inkişaf və təkmilləşmə üçün iş görülmür. Hesab edirəm, müxalifət necə radikal olursa olsun, bu gün fikir və təfəkkür olaraq bir çox məqamda iqtidarla birləşməyi bacarmalıdır. Dağlıq Qarabağ məsələsi sadəcə iqtidarın problemi deyil, bütün dünyanın mübarizə apardığı COVID-19 pandemiyası sadəcə iqtidarın qayğısı və işi deyil. Ölkədə milli idealogiyaya xidmət edən, xarici qrantlara satılmayan sağlam gəncliyin yetişdirilməsi üçün çalışmaq sadəcə iqtidarın işi deyil. Azərbaycan həqiqətlərini dünya iştimaiyyətinə çatdırmaq, lobbiçilik, beynəlxalq mətbuatda işğalçı ermənilərə qarşı cəbhə qurmaq sadəcə iqtidarın işi deyil. Bu gün dünyadakı mövcud siyasi mexanizmlər müxalifətdən də bunları tələb edir”.

ASRP sədrinin birinci müavininin fikrincə, özünü sağlam siyasi proseslərdən təcrid edən, marginallaşan radikal müxalif partiyaların neondertal təfəkkürlə, gəncləri xaricdən qrant almaq adına istifadə edib, onları qanun pozuntularına sövq etməsi müxalifətçilik demək deyil: "İqtidarla dialoqdan qaçmaq, gəncləri öz maraqları çərçivəsində istifadə edərək, ictimai asayişi pozduraraq, onlara "qorxma, bir həbslə heç nə olmaz, siyasi mühacir adı ilə xaricdə yaşayacaqsan” kimi vədlərlə dövlətə qarşı çıxmağa məcbur etmək demokratiya deyil. Bunun adı ölkədaxili xaosun yaradılması üçün xaricdən əldə edilən qrantların silinməsi prosesidir”.

Müxalif deputatların irəli çəkilməsi yeni siyasi mərhələnin başlanğıcıdır

Hazırda müxalifət partiyalarının ölkənin siyasi həyatında iştirakına gəldikdə Əsli Kazımova qeyd etdi ki, Prezident İlham Əliyev Milli Məclisdə çıxış edərkən pozitiv fəaliyyətdə olan bütün partiyaların ölkədə baş verən hadisələrə yaxından cəlb olunmasının mütləqliyini vurğuladı: "Bu gün Milli Məclisdə 8 müxalif partiya və bir iqtidar partiyası təmsil olunur. Müxalif deputatlar rəhbər strukturlara seçiliblər. Bunlar partiyaların Azərbaycanın ictimai və siyasi həyatında aktiv və fəal rol oynaması üçün gərəkli addımlardır.

Milli Məclisdə çoxlu sayda partiyanın təmsil olunması və müxalif deputatların rəhbərlikdə irəli çəkilməsi birmənalı olaraq, yeni siyasi mərhələnin başlangıcıdır. Çünki cəmiyyətdə qanunverici hakimiyyət sahəsində yeniləşməyə, parlamentin qanunyaratma fəaliyyətinin daha da təkmilləşdirilməsinə, ümumiyyətlə, parlamentin öz işini islahatlar strategiyasına uyğun olaraq təşkil etməsinə ehtiyac vardı. Bu baxımdan bütün bunlar siyasi islahatların məntiqi davamı kimi qiymətləndirilməlidir”.

Daxili sabitliyin qorunması üçün güclü siyasi iradə var

Bu gün bütün dünyanın əsas problemi koronavirus təhlükəsidir. Bu infeksiyanın sürətlə yayılması dünyanın ən qabaqcıl dövlətlərinin səhiyyə sistemlərini çətin vəziyyətə saldı. Azərbaycan isə pandemiya ilə mübarizədə uğurlu nümunələrdən birini göstərir.

Bu barədə danışan ASRP sədrinin birinci müavini dedi: "Cənab Prezidentin təşəbbüsü ilə ölkədə hələ pandemiya yeni başlayanda həyata keçirilən tədbirlər proqramı Azərbaycana zaman və uğur qazandırdı. Avropanın ən inkişaf etmiş ölkələri pandemiya qarşısında, sözün əsil mənasında, diz çökdü. Ermənistanın pandemiya adı altında yardım istəmədiyi ölkə yoxdur. Bu gün ölkəmizdə koronavirus infeksiyasının yayılmasının qarşısının alınması ilə bağlı tədbirlər proqramı, birmənalı olaraq, cənab Prezidentin güclü və mütəşəkkil daxili siyasətinin bəhrəsidir. İlham Əliyevin hər bir sərəncamı birbaşa ölkədəki sabitliyin qorunması və xalqın təhlükəsizliyinin təmin olunmasına xidmət edir. Digər ölkələrdəki vəziyyəti görürük. Hətta çox vaxt Avropaya inteqrasiya deyirdik. Yəni Avropa ölkələrini daha inkişaf etmiş hesab edirdik. Amma koronavirus pandemiyası göstərdi ki, onların ölkədaxili sabitliyin qorunması baxımından heç də təcrübələri yoxdur. Azərbaycanda isə daxili sabitliyin qorunması üçün güclü siyasi iradə var. İnsanların təhlükəsizliyi üçün çalışan dövlət rəhbərimiz var.

Hesab edirəm, dünyanı bürüyən COVID-19 pandemiyası dövründə cənab Prezidentin rəhbərliyi ilə ölkəmizdə bərqərar olan mövcud sabitlik və xalqın sosial təminatı Avropanın ən inkişaf etmiş ölkələrində müşahidə olunmadı. Məndə olan məlumatlara görə, bir çox dövlətlərin Azərbaycanda olan nümayəndələri öz ölkələrinə getməkdən imtina edib və pandemiya dövründə Azərbaycanda qalmağın daha təhlükəsiz olduğunu bildirirlər”.

Hər bir məmur tutduğu vəzifənin məsuliyyətini dərk etməlidir

Əsli Kazımovadan ölkədə korrupsiyaya qarşı mübarizə tədbirləri ilə bağlı ASRP-nin mövqeyini də öyrəndik. Onun sözlərinə görə, Prezident İlham Əliyev dəfələrlə məmurlara "siz xalqın xidmətçisisiniz” deyə tapşırıb və dövlət başçısı üçün xalqın maraqları hər şeydən üstündür: "Cənab Prezident bunu dəfələrlə verdiyi qərarlarla sübuta yetirmişdir. İlham Əliyevin nümunəvi dövlət idarəçilik modeli birmənalı olaraq xalqa sədaqətlə xidmət etmək məqsədi daşıyır. Bu siyasət xalqın rifahının yaxşılaşdırılması və vətəndaş məmnunluğunun hər gün bir az daha artırılmasına hesablanıb. Dəfələrlə dövlət başçısı dövlət qulluqçularının, məmurların şəffaf fəaliyyət göstərməsinin gərəkliyini bildirərək, vətəndaş-məmur münasibətlərinin daha sağlam prinsiplər əsasında qurulması üçün səylərin artırılmasını tövsiyə edib.

Təəssüflər olsun ki, məmurlar tərəfindən bir sıra neqativ halların təkrarlanması faktları hələ də müşahidə olunur və cənab Prezident tərəfindən aparılan islahatların geniş vüsət alması ilə bir çox neqativ əməllərin də üstü açıldı. Buna misal olaraq Dövlət Təhlükəsizliyi Xidməti tərəfindən Yevlax şəhərinin və Ağstafa, Biləsuvar, İmişli və Neftçala rayonlarının icra hakimiyyəti başçılarının və icra nümayəndələrinin cinayət məsuliyyətinə cəlb olunaraq həbsini göstərmək olar. Mədəniyyət Nazirliyində yüksək vəzifəli şəxslərin öz səlahiyyətlərindən sui-istifadə edərək cəmiyyətin və dövlətin qanunla qorunan mənafelərinə mühüm zərər vuran çoxsaylı qanunazidd əməllərinin ifşa olunması və hüquqi məsuliyyətə cəlb olunmasını müşahidə etdik. Mədəniyyətdə korrupsiyaya yol vermək, mədəniyyəti məhv etmək deməkdir. Onsuz da işğalçı Ermənistan Azərbaycan mədəniyyətinə yetəri qədər zərər verib və hələ də davam edir. Bizlər erməni vandalizmi ilə öz mədəni irsimizi qorumaq üçün mübarizə apardığımız halda, ölkənin mədəniyyət sahəsində bu kimi yolverilməz halların qarşısı ən sərt şəkildə alınmalıdır.

Tamahkar və məsuliyyətsiz məmurların fəaliyyəti Prezidentin apardığı siyasətə zidd olaraq geniş əhali qruplarını narazı salmağa yönəlmiş əməllərə xidmət edir. Göründüyü kimi, dövlət başçısı kimliyindən asılı olmayaraq xalqın rifahına, göstərilən etimada xəyanət edən hər kəsin ədalət qarşısında cavab verməsi üçün əlindən gələni edir. Xalqına, vətəninə, mənəviyyatına və məsləyinə müxalif olan heç kəs dövlətinə xeyir verə bilməz!”

Əsli Kazımova onu da bildirdi ki, hər bir məmur tutduğu vəzifənin məsuliyyətini dərk etməli, daşıdığı məsuliyyəti anlamalı və ölkə başçısının apardığı islahatlara uyğun fəaliyyət göstərməlidir: "Məmurlar unutmamalıdır ki, oturduqları kürsü onların şəxsi maraqlarına xidmət edən nə ayrı respublika, nə də ayrı bir dövlət deyil. Cənab İlham Əliyevin yeni dövlət modeli proqramının əsas mahiyyəti qanunvericiliyə uyğun olaraq demokratik prinsiplər əsasında dövlət idarəçiliyinin həyata keçirilməsidir. Hər birimiz isə bu müqqəddəs yolda Cənab Prezidentin köməkçisi olmalıyıq”.

Azərbaycanı qüdrətləndirmək məqsədi konkret icra mexanizmləri ilə özünü göstərir

Son illər Azərbaycan öz iqtisadiyyatını yeni müstəvidə inkişaf etdirməyə nail olub. Bu gün milli iqtisadiyyatımız kompleks və tarazlı şəkildə inkişaf edir. Bu barədə danışan Əsli Kazımova dedi: "Dövlət başçısının gerçəkləşdirdiyi uğurlu diplomatiya son 17 ildə Azərbaycanın bölgədə və dünyada layiqli yerini tapmasını, regional liderliyini təmin etmişdir. Bakı-Tbilisi-Ceyhan Əsas İxrac Neft Boru Kəməri, Bakı-Tbilisi-Ərzurum qaz kəmərinin istismara verilməsi, TAP, TANAP layihələrinin reallaşdırılması, üç süni peykin orbitə buraxılması Azərbaycanın beynəlxalq münasibətlər sistemindəki mövqelərini daha da gücləndirmişdir. Azərbaycanın sosial-iqtisadi sahədə həyata keçirdiyi siyasətin uğurlarını şərtləndirən əsas amillərdən biri də məhz inkişafın mərkəz və regionlar üzrə tarazlı xarakter daşıması, rentabelli istehsal sahələrinin ölkənin bütün regionlarını əhatə etməsi, yerli resurslardan istifadənin səmərəliliyinin artırılması, infrastrukturun yeniləşdirilməsi tədbirləri ilə sıx şəkildə bağlı olmasıdır. Məhz bu iqtisadi strategiya regionlarda sahibkarlığın inkişafını sürətləndirməklə, oradakı əmək ehtiyatlarından, təbii və iqtisadi potensialdan səmərəli istifadə edilməsinə şərait yaradır. Ölkədə sosial-iqtisadi inkişaf proqramlarının tətbiqi regionların iqtisadi inkişafında tamamilə yeni səhifə açmış, insanların kəndlərdən şəhərlərə axınının qarşısını almış, xüsusilə də qeyri-neft sektorunun, sahibkarlığın inkişafına xüsusi təkan vermişdir.

Cənab İlham Əliyevin Azərbaycanı müasir və qüdrətli dövlətə çevirmək məqsədi öz əksini sadəcə bəyanatlarda tapmır, eyni zamanda konkret icra mexanizmləri ilə özünü göstərir və konkret addımlar atılır. "Azərbaycan 2020: gələcəyə baxış” İnkişaf Konsepsiyası və "Milli iqtisadiyyat və iqtisadiyyatın əsas sektorları üzrə strateji yol xəritələri” kimi konseptual əhəmiyyətli böyükmiqyaslı layihələr vasitəsilə cənab Prezident ölkənin inkişaf strategiyasının dərin elmi proqnozlarla hazırlanmasına və nəticə etibarilə yeni dövlət idarəçiliyi modelini tətbiq etməyə müvəffəq olmuşdur. Bu gün dövlət başçısının siyasi iradəsilə həyata keçirilən sistemli islahatlar - imzalanan fərman və sərəncamlar respublikamızın postneft dövrünə uyğunlaşdırılması, sahibkarların hərtərəfli dəstəklənməsi yolu ilə qeyri-neft sektorunun inkişafının sürətləndirilməsi məqsədi daşıyır”.

ASRP sədrinin birinci müavini Əsli Kazımova bildirdi ki, Azərbaycanda demokratik cəmiyyətin inkişafı Prezident İlham Əliyevin siyasi iradəsinin bəhrəsidir. Eyni zamanda İlham Əliyev tərəfindən aparılan köklü islahatlar ölkənin həyatının bütün sahələrini əhatə etməklə yanaşı, inkişafın yeni mərhələsinə keçid üçün əlverişli şəraitin yaradılması kimi də dəyərləndirilməlidir.

Söhbəti yazdı:

Rəşad CƏFƏRLİ

Azərbaycan.- 2020.- 25 iyun.- S.1; 8.