Prezidentin səfərləri regionların inkişafına əlavə stimul verir

Xəbər verildiyi kimi, Prezident İlham Əliyev martın 3-də Goranboy, Şəmkir və Qazax, martın 4-də isə Ağstafa və Tovuz rayonlarında səfərdə olub. Dövlət başçısı həmin rayonlarda bir sıra sosial-iqtisadi obyektlərin açılışında iştirak edib, rayon ictimaiyyətinin nümayəndələri ilə görüşüb, onların istək və arzularını öyrənib.

Qızılhacılı-Goranboy-Goran-Rəhimli-Veysəlli-Qazanbulaq-Borsunlu avtomobil yolunun yenidən qurulmasından və bərpasından sonrakı açılışında iştirak edən dövlət başçısına məlumat verilib ki, uzunluğu 40 kilometr olan yol üçüncü və dördüncü texniki dərəcəlidir, hərəkət hissəsinin eni 7-8 metr arasında dəyişən yolda iki hərəkətli zolaq var. 32 min əhalisi olan 15 yaşayış məntəqəsini birləşdirən yol əhalinin rahatlığını təmin etməklə yanaşı, regionun iqtisadi inkişafına təkan verəcək, istehsal edilən məhsulların ölkənin müxtəlif ərazilərinə rahatlıqla daşınmasına şərait yaradacaq.

Dövlətin həyata keçirdiyi sosial siyasət sayəsində son 16 ildə səhiyyənin inkişafı yüksək səviyyəyə çatıb. Paytaxtla yanaşı, bölgələrdə də müasir tələblərə cavab verən yeni xəstəxanalar tikilərək əhalinin ixtiyarına verilib. Prezidentin sözügedən səfəri çərçivəsində iştirakı ilə açılışı olan 130 çarpayılıq Goranboy Rayon Mərkəzi Xəstəxanası da bu siyahıya daxil olub. Cərrahiyyə, terapiya, pediatriya, fizioterapiya, funksional diaqnostika, poliklinika, hemodializ şöbələrinin fəaliyyət göstərdiyi xəstəxanada xaricdə istehsal olunan müasir tibb avadanlıqları quraşdırılıb. Bununla yanaşı, tibb müəssisəsində şüa-diaqnostika, reanimasiya, qəbul, laboratoriya, təcili tibbi yardım və digər şöbələr, yoluxucu xəstəliklər korpusu, Məhkəmə Tibb Ekspertiza və Patoloji Anatomiya Birliyinin Goranboy rayon şöbəsi fəaliyyət göstərir.

Prezident İlham Əliyev xəstəxananın kollektivi ilə görüşündə səhiyyə sahəsində görülən işlərdən danışarkən demişdir: "Son 16 ildə Azərbaycanın ancaq bölgələrində 22 yeni xəstəxana, 15 diaqnostika müalicə mərkəzi inşa edilib, 28 mərkəzi rayon xəstəxanası əsaslı təmir olunub. Beş xəstəxananın tikintisi isə davam edir. Beləliklə, ancaq bölgələrdə 70 müasir tibb ocağı istifadəyə verilib. Əlbəttə ki, bu tibb ocaqları insanların sağlamlığına xidmət göstərir. Bakı şəhərində də bir çox xəstəxanaların tikintisi, təmiri artıq yekunlaşıb. Bütövlükdə son 16 ildə ölkəmizdə 700-dən çox tibb müəssisəsi tikilib və əsaslı təmir olunub”.

Dövlət başçısının göstərişi ilə ölkədə xalçaçılığın inkişafı istiqamətində görülən işlər bölgə əhalisi tərəfindən rəğbətlə qarşılanır. Bu isə səbəbsiz deyil. İlk növbədə xalqımız üçün ənənəvi olan sahə dirçəldilir, digər tərəfdən xüsusilə qadınlar arasında işsizlik aradan qaldırılır. Eyni zamanda xalçaçılığın inkişafı fermerlər üçün də sərfəlidir. Çünki onlar istehsal etdikləri yunu həmin müəssisələrə satmaq imkanı qazanırlar. Prezidentin "Azərxalça” Açıq Səhmdar Cəmiyyətinin Goranboy filialının fəaliyyəti ilə tanış olması da xalçaçılığın inkişafına göstərilən diqqətdən irəli gəlir.

Prezident İlham Əliyev Qazax rayonuna səfəri zamanı Qazax Əhəng Zavodunun açılış mərasimində də iştirak edib. Dövlət başçısına məlumat verilib ki, "Mətanət A” şirkətinə məxsus "Azerlime” əhəng zavodu ölkənin tikinti-quruculuq işlərində mühüm rol oynayır. 20 ildir inşaat materiallarının istehsalı ilə məşğul olan şirkətin tərkibinə quru inşaat qarışıqları, gips əsaslı məhsulların buraxılışı, boya, beton qatqıları, avadanlıq və dəzgahların istehsalı, açar təhvili sahəsində ixtisaslaşmış zavodlar daxildir.

Dövlət başçısına şirkətin hazırda icra edilməkdə olan və perspektiv layihələri barədə də məlumat verilib. Bildirilib ki, daş yunu və gips lövhə zavodları artıq icra olunma mərhələsindədir. Bununla yanaşı, perspektiv layihələrdə illik istehsal gücü 300 min ton olan zənginləşdirilmiş kvars qum və illik istehsal gücü 200 min kubmetr olan yüngül bloklar zavodlarının tikintisi nəzərdə tutulur. Həmin müəssisələrin yaradılmasına 90 milyon manat investisiya qoyulacaq ki, burada dövlətin güzəştli kreditlərindən də istifadə olunacaq. Müəssisələrin yaradılması sayəsində 1000-ə yaxın daimi iş yeri açılacaq ki, bu da bölgədə məşğulluğun təmin edilməsinə töhfə verəcək.

Prezident İlham Əliyev müəssisənin açılış mərasimindəki çıxışında sahibkarlığın inkişafına yüksək önəm verdiyini vurğulayaraq demişdir: "Bu gün bu zavodun açılışı bir daha onu göstərdi ki, ölkəmizdə düzgün iqtisadi siyasət aparılır. Biz sahibkarlıqla bağlı həyata keçirilən tədbirlərin real nəticəsini görürük. Çünki bizim iqtisadiyyatımız özəl sektor hesabına inkişaf etməlidir. Dövlət sadəcə olaraq şərait yaratmalı, infrastruktur layihələri həyata keçirməlidir ki, sahibkarlar da bu işlə həvəslə məşğul olsunlar”.

Rüstəm KAMAL

Azərbaycan.-2020.- 6 mart.- S.1;8.