Dövlət proqramlarının icrası regionların inkişafında başlıca rol oynayır

Regionların sosial-itisadi inkişafı Dövlət Proqramında nəzərdə tutulmuş tədbirlərin icrası nəticəsində Göygöl rayonunun iqtisadiyyatı da inkişaf edir. Təkcə keçən il rayonda 11 istehsal obyekti istifadəyə verilmiş, iqtisadiyyatın əsas sahələrində istehsal edilən məhsul və xidmətlərin ümumi həcmi 208 milyon manatdan çox olmuşdur.

Rayonda sahibkarlığın inkişafına yaradılmış münbit şərait sayəsində hüquqi şəxslərin sayı 596-ya çatmışdır. Ötən il 24 iş adamına 1 milyon 532 min manat güzəştli kredit verilmiş, 79 yeni iş yeri yaradılmışdır.

İqtisadiyyat yüksəldikcə abadlıq və quruculuq işlərinin həcmi də genişlənir. Keçən il rayon statistika idarəsi üçün yeni inzibati bina istifadəyə verilmiş, məcburi köçkünlərin yaşayış şəraitini yaxşılaşdırmaq üçün 130 mənzillik 5 mərtəbəli 3 binanın tikintisi başa çatdırılmışdır. Hazırda Səfərbərlik və Hərbi Xidmətə Çağırış üzrə Dövlət Xidmətinin Göygöl rayon şöbəsi üçün inzibati binada və "Qafqaz” hotelində tikinti işləri davam etdirilir.

Yol infrastrukturunda da bir sıra yeniliklər edilmişdir. Toğanalı, Əzgilli, Nadil, Zurnabad avtomobil yollarında, Çaykənd, Qarabulaq, Quşçu, Quşqara kənddaxili yollarda təmir işləri aparılmış, 8 yaşayış məntəqəsini birləşdirən, 42,3 kilometrlik Gəncə-Kəlbəcər-Laçın avtomobil yolunun yenidən qurulmasına başlanılmışdır.

Aqrar sahəyə göstərilən dövlət qayğısı sayəsində kənd təsərrüfatı məhsulları istehsalı da nəzərəçarpacaq dərəcədə artmışdır. Keçən il rayonda 14946 ton buğda, 5854 ton arpa istehsal edilmişdir.

Rayonda kənd təsərrüfatı təyinatlı torpaqlardan, xüsusilə də pay torpaqlarından təyinatı üzrə səmərəli istifadə olunmasına nəzarət artırılmış, torpaqların təyinatının dəyişdirilərək tikililər aparılmaması və digər məqsədlər üçün istifadəyə qarşı mübarizə gücləndirilmişdir.

Əvvəlki illərdə olduğu kimi, keçən il də fermerlər dövlət yardımlarından layiqincə yararlanmışlar. 1530 nəfər toxum və kənd təsərrüfatı məhsulları istehsalçılarına dövlət büdcəsindən 728 min 263 manat subsidiya və yardım ödənilmişdir. 730 kənd təsərrüfatı məhsulları istehsalçısına 70 faiz güzəştlə 1326 ton mineral gübrə, 3973 litr kimyəvi preparat satılmışdır.

Heyvandarlar da uğurlarını ildən-ilə artırırlar. Hazırda rayonda 324 baş cins heyvan bəslənilir. Süni yolla mayalandırılmış 1136 baş inəkdən 432 baş cins bala alınmış, heyvan sahiblərinə ümumilikdə 42 min 900 manat məbləğində subsidiya ödənilmişdir. Mal-qaranın artımı hesabına keçən il əvvəlki illə müqayisədə süd istehsalı 213 ton, ət istehsalı isə 14,8 ton çox olmuşdur.

Əkin sahələrini suvarma suyu ilə təminatda yaranan çətinlikləri aradan qaldırmaq üçün də bir sıra məqsədyönlü işlər həyata keçirilir. Əkin sahələrinin suvarılmasında istifadə edilən subartezian quyularının 248-də cari, üçündə əsaslı təmir işləri aparılmış, Yeni Qızılca kəndində iki, Balçılı, Qırıxlı, Xaqani, Quşqara və Səmədli kəndlərinin hərəsində bir subartezian quyusu istifadəyə verilmişdir.

Əhalinin təbii qaz təchizatını daha da yaxşılaşdırmaq məqsədilə Göygöl şəhərinin A.Şəmşir küçəsində, Üçtəpə, Nadil kəndlərində və Qızılqaya qəsəbəsində köhnə borular yenisi ilə əvəz edilmişdir. Aşağı Zurnabad qəsəbəsinin qazlaşdırılması üçün daşıyıcı və paylayıcı qaz xətləri çəkilmiş, mənzillərə qaz sayğacı quraşdırılmışdır. Hazırda bu iş davam etdirilir.

Sabir ƏLİYEV

Azərbaycan.-2020.- 11 mart.- S.7.