Parlament Prezident İlham Əliyevin təqdimatına razılıq verdi

Mayın 1-də Milli Məclisin növbəti plenar iclası keçirildi. İclasda ilk olaraq Azərbaycan Respublikası Baş prokurorunun vəzifəyə təyin edilməsinə razılıq verilməsi haqqında məsələyə baxıldı.

Yeni Baş prokurorun namizədliyi müsbət qiymətləndirildi

Məsələ ilə bağlı Azərbaycan Respublikası Prezidentinin Administrasiyasının Siyasi partiyalar və qanunvericilik hakimiyyəti ilə əlaqələr şöbəsinin müdiri Ədalət Vəliyev məlumat verdi. Bildirildi ki, Prezident İlham Əliyevin təqdimatına əsasən, Baş prokuror vəzifəsinə Baş prokurorun müavini - Azərbaycan Respublikasının Baş prokuroru yanında Korrupsiyaya qarşı Mübarizə Baş İdarəsinin rəisi Kamran Əliyevin namizədliyi irəli sürülüb.

Ədalət Vəliyev Kamran Əliyevin bioqrafiyası, prokurorluq orqanlarında keçdiyi xidmət yolu barədə ətraflı məlumat verdi. Qeyd olundu ki, Kamran Əliyev Kadrlar idarəsinin prokuroru, Elm-Tədris Mərkəzinin rəisi, Baş Prokurorluğun İstintaq və ağır cinayətlərə dair işlər üzrə istintaq idarələrində müstəntiq və böyük müstəntiq, Baş prokurorun köməkçisi və böyük köməkçisi, Baş Prokurorluğun Dövlət İttihamının müdafiəsi idarəsinin rəisi vəzifələrində işləyib.

2007-ci ildə Azərbaycan Respublikasının Baş prokuroru yanında Korrupsiyaya qarşı Mübarizə Baş İdarəsinin rəisi vəzifəsinə təyin edilib. 2014-cü ildə isə Azərbaycan Respublikası Baş prokurorunun müavini - Azərbaycan Respublikasının Baş prokuroru yanında Korrupsiyaya qarşı Mübarizə Baş İdarəsinin rəisi təyin olunub. Onun fəaliyyəti dövlət tərəfindən yüksək qiymətləndirilib. Azərbaycan Respublikası Prezidentinin sərəncamları ilə 2008-ci ildə "Azərbaycan bayrağı” ordeni, 2018-ci ildə isə 2-ci dərəcəli "Vətənə xidmətə görə” ordeni ilə təltif edilib.

Milli Məclis Sədrinin birinci müavini, parlamentin Hüquq siyasəti və dövlət quruculuğu komitəsinin sədri Əli Hüseynli dedi ki, Kamran Əliyevin Azərbaycan Respublikası Baş prokuroru vəzifəsinə namizədliyi Hüquq siyasəti və dövlət quruculuğu komitəsinin onlayn iclasında müzakirə edilib. Komitə üzvləri Kamran Əliyevin namizədliyini dəstəkləyərək müsbət rəy veriblər. Əli Hüseynli Kamran Əliyevin Baş prokuror vəzifəsinə namizədliyinin irəli sürülməsinin hüquq ictimaiyyəti tərəfindən də müsbət qarşılandığını, onun dövlətçilik ideyalarına və milli maraqlara sadiq olduğunu diqqətə çatdırdı.

Milli Məclisin Sədri Sahibə Qafarova əmin olduğunu bildirdi ki, Kamran Əliyev Azərbaycan dövlətinə ləyaqətlə xidmət edəcək. Çıxışlar zamanı deputatlardan Vahid Əhmədov və Eldar İbrahimov Kamran Əliyevin Baş prokuror vəzifəsinə namizədliyini müsbət qiymətləndirdilər.

Yekunda məsələ səsə qoyuldu və Milli Məclis Kamran Əliyevin Azərbaycan Respublikası Baş prokuroru vəzifəsinə təyin edilməsinə razılığını verdi.

Kamran Əliyev namizədliyinin irəli sürülməsinə və dəstəklənməsinə görə ölkə rəhbərliyinə və Milli Məclisə təşəkkürünü bildirdi. "Prezident İlham Əliyev və Mehriban Əliyevanın rəhbərliyi ilə həyata keçirilən islahatlar nəticəsində ölkəmizdə sabitlik təmin edilib. Xalqın maraqlarının qorunmasının dövlət siyasətində prioritet olması hazırda dünyada mövcud olan pandemiya şəraitində özünü daha çox göstərməkdədir. Bunlarla yanaşı, hazırda ölkəmizdə iqtisadi və sosial inkişafı hədəfləyən islahatlar keçirilir. Məhkəmə-hüquq sistemində həyata keçirilən islahatlar da bu qəbildəndir. Prezidenti, Birinci vitse-prezidenti və Azərbaycan xalqını əmin etmək istəyirəm ki, bundan sonra da prokurorluq orqanları dövlətimizə və xalqımıza ləyaqətlə xidmət edəcək”, - deyə o vurğuladı.

Hesablama Palatası hesabat verdi

Sonra iclasda Azərbaycan Respublikası Hesablama Palatasının illik hesabatı haqqında məsələ müzakirəyə çıxarıldı. Hesabatla Palatanın sədri Vüqar Gülməmmədov çıxış etdi. Qeyd olundu ki, sənəd qanunun tələblərinə uyğun hazırlanıb. Mütərəqqi təcrübə öyrənilib, hesabatda 2018-2020-ci illər üzrə qəbul edilmiş Strateji İnkişaf Planı ilə nəzərdə tutulmuş məqsədlərə dair tədbirlər, Hesablama Palatasının ötən ildəki həm nəzarət, həm də inzibati fəaliyyəti üzrə əsas nəticələr əks etdirilib.

Vüqar Gülməmmədov həyata keçirilmiş nəzarət tədbirləri, müxtəlif büdcə və hesablara bərpa edilmiş vəsaitlər, nöqsanlara yol vermiş vəzifəli şəxslərə tətbiq edilən inzibati tənbeh tədbirləri, səmərəlilik auditləri nəticəsində aşkar olunmuş səmərəsiz xərclər və s. barədə məlumat verdi. Qeyd olundu ki, 2019-cu ildə 47 audit və 6 analitik fəaliyyət həyata keçirilib. İlk dəfə olaraq 4 səmərəlilik auditi aparılıb. Hesabatda 43 maliyyə və uyğunluq auditinin nəticələri icmallaşdırılıb, yol verilən pozuntular təsnifləşdirilib. Ötən il Hesablama Palatası 561 nöqsan müəyyən edib. Hesablama Palatasının sədri auditlərlə yanaşı, Hesablama Palatasının analitik və monitorinq fəaliyyətinin nəticələrini diqqətə çatdırmaqla nəzarət tədbirlərinin əhatə dairəsi ilə bağlı məlumat verdi.

O da bildirildi ki, Hesablama Palatasının verdiyi rəylərdə həm icra, həm də layihə sənədləri ciddi təhlil edilib, mümkün risklər sadalanıb, problemlər göstərilib və onların aradan qaldırılması məqsədilə tövsiyələr verilib. Həmin tövsiyələrin 19-u büdcə qanunvericiliyi, 16-sı gəlirlərin inzibatçılığı, 18-i maliyyə inzibatçılığı və hesabatlılıqla bağlı olub.

Hesabatla bağlı parlamentin İqtisadi siyasət, sənaye və sahibkarlıq komitəsinin rəyi dinlənildi. Rəyi diqqətə çatdıran komitənin sədri Tahir Mirkişili hesabatın məqbul olduğunu bildirdi.

Milli Məclisin komitə sədrləri Sadiq Qurbanov, Zahid Oruc, Siyavuş Novruzov, Qənirə Paşayeva, deputatlardan Fazil Mustafa, Vahid Əhmədov, Malik Həsənov, Qüdrət Həsənquliyev, Əli Məsimli, Sahib Alıyev, Vüqar Bayramov, Erkin Qədirli, Razi Nurullayev, Sədaqət Vəliyeva hesabata münasibət bildirdilər, təkliflərlə çıxış etdilər. Qaldırılan məsələlərə Milli Məclis Sədrinin birinci müavini Əli Hüseynli də münasibət bildirdi.

Yekunda Milli Məclisin Sədri Sahibə Qafarova hesabatın yüksək səviyyədə hazırlandığını bildirdi. Hesabat səsə qoyularaq nəzərə alındı.

Fasilədən sonra öz işini davam etdirən Milli Məclisdə öncə "Azərbaycan Respublikasının Nəqliyyat, Rabitə və Yüksək Texnologiyalar Nazirliyi ilə İordaniya Dəniz Komissiyası arasında Dənizçilərin hazırlanmasına, onlara diplom verilməsinə və növbə çəkməyə dair (DHDNÇ) 1978-ci il tarixli Beynəlxalq Konvensiyanın (əlavələrlə) I/10-cu qaydasına uyğun olaraq sertifikatların (diplomların) tanınması haqqında” Anlaşma Memorandumunun təsdiq edilməsi barədə qanun layihəsi təsdiqləndi.

Deputatlar həmçinin "Müstəqil Dövlətlər Birliyinin iştirakçısı olan dövlətlər arasında vergi inzibatçılığının həyata keçirilməsi üçün elektron formada məlumat mübadiləsi haqqında” Protokolun təsdiq edilməsi barədə qanun layihəsinə müsbət münasibət bildirdilər.

Cərimə və cəza müddəti ilə bağlı yeni qaydalar təsdiqlənir

Milli Məclisin Sədri Sahibə Qafarova bildirdi ki, gündəlikdəki 5-7-ci məsələ (Cinayət, İnzibati Xətalar məcəllələrində, "Azərbaycan Respublikasının vətəndaşlığı haqqında” qanunlarda dəyişiklik edilməsi barədə qanun layihələri) Prezident İlham Əliyevin bir məktubu ilə parlamentə daxil olub.

Sənədlərlə bağlı məlumat verən parlamentin Hüquq siyasəti və dövlət quruculuğu komitəsinin üzvü Kamal Cəfərov bildirdi ki, dəyişikliklər Prezident İlham Əliyevin cəza siyasətinin humanistləşdirilməsi və cinayətlərin dekriminallaşdırılması siyasəti ilə bağlıdır.

Dəyişikliyə əsasən, Cinayət Məcəlləsinə törədilmiş cinayətin ağırlığı və məhkumun əmlak vəziyyəti nəzərə alınmaqla cərimənin yeni müəyyənləşdirilməsi qaydası əlavə edilib. Qüvvədə olan Cinayət Məcəlləsinə əsasən, törədilmiş cinayətin ağırlığı və məhkumun əmlak vəziyyəti nəzərə alınmaqla, 20 min manatadək miqdarda və ya cinayət nəticəsində vurulmuş ziyanın (əldə edilmiş gəlirin) 1 mislindən 10 mislinədək miqdarda cərimə müəyyən olunub. Təklif edilən dəyişikliyə əsasən cərimə, törədilmiş cinayətin ağırlığı və məhkumun əmlak vəziyyəti nəzərə alınmaqla müəyyən olunur.

Dəyişiklikdə cinayətlərin dekriminallaşdırılması təklif edilir, 10 cinayət əməli Cinayət Məcəlləsindən çıxarılır, 25 cinayət əməlinə görə məsuliyyət yaradan hədd artırılır, 3 cinayətə görə zərərçəkmiş şəxslə barışma və ziyanın ödənilməsi şərti ilə cinayət məsuliyyətindən azad etmə müəyyən olunur. Eyni zamanda 30 cinayətə görə azadlıqdan məhrum etməyə alternativ cəzalar (cərimə, islah işləri və azadlığın məhdudlaşdırılması) daxil edilir. 60 cinayətə görə cərimə və ya azadlıqdan məhrumetmə cəzasının yüngülləşdirilməsi nəzərdə tutulur.

İnzibati Xətalar Məcəlləsinə edilən dəyişikliyə gəlincə bildirildi ki, sənədə yeni 41-ci fəsil əlavə edilir. Yeni fəslin 610-cu maddəsində (rəisin, yaxud hərbi qulluq vəzifəsini yerinə yetirən digər şəxsin şərəf və ləyaqətini alçaltma) qeyd edilib ki, rəisin, yaxud hərbi qulluq vəzifəsini yerinə yetirən digər şəxsin hərbi xidmət üzrə öz vəzifəsini yerinə yetirməsi zamanı və ya belə vəzifələrin yerinə yetirilməsi ilə əlaqədar şərəf və ləyaqətini alçaltmaya görə 10 gündən 20 günədək müddətə inzibati həbs tətbiq olunacaq. Sənədin yeni 611-ci maddəsində (tabelikdə olan hərbi qulluqçunun şərəf və ləyaqətini alçaltma) isə bildirilib ki, hərbi xidmət üzrə vəzifələrin yerinə yetirilməsi zamanı və ya belə vəzifələrin yerinə yetirilməsi ilə əlaqədar rəisin öz tabeliyində olan şəxsin şərəf və ləyaqətini alçaltmaya görə on gündən iyirmi günədək müddətə inzibati həbs tətbiq olunacaq.

"Azərbaycan Respublikasının vətəndaşlığı haqqında” qanuna təklif edilən dəyişikliyə əsasən isə xarici dövlətin vətəndaşlığını qəbul etmiş Azərbaycan vətəndaşının məlumat verməməsinə görə cinayət məsuliyyəti ləğv edilir. Qanuna əsasən, xarici dövlətin vətəndaşlığını qəbul etmiş Azərbaycan vətəndaşı bir ay müddətində bu barədə Xarici İşlər Nazirliyi və Dövlət Miqrasiya Xidmətinə yazılı məlumat verməlidir.

Dəyişikliklər səsverməyə çıxarılaraq III oxunuşda qəbul edildi.

Peşə təhsili alan əcnəbilərə də ölkəmizdə müvəqqəti yaşamaq hüququ veriləcək

Deputatlar üçüncü oxunuşda müzakirəyə çıxarılan Əmək, Torpaq, Vergi, Gömrük, Şəhərsalma və Tikinti və Miqrasiya məcəllələrində dəyişiklik edilməsi haqqında qanun layihəsinə müsbət münasibət bildirdilər.

Miqrasiya Məcəlləsinə edilən dəyişikliyə əsasən, Azərbaycanda əcnəbilərə və vətəndaşlığı olmayan şəxslərə ölkəmizin ərazisində müvəqqəti yaşamaq üçün icazə verildiyi hallar genişləndirilir. Dəyişikliyə əsasən, peşə təhsili alan əcnəbilərə və vətəndaşlığı olmayan şəxslərə də Azərbaycan ərazisində müvəqqəti yaşamaq hüququ veriləcək.

İclasda həmçinin "Dövlət rüsumu haqqında”, "Dövlət satınalmaları haqqında”, Azərbaycan Respublikasının 2001-ci il 12 iyun tarixli 141-IIQ nömrəli Qanunu ilə təsdiq edilmiş "Dövlət vergi orqanlarında xidmət haqqında Əsasnamə”də, "Nağdsız hesablaşmalar haqqında” Qanunda dəyişiklik edilməsi barədə qanun layihələri üçüncü oxunuşda səsverməyə çıxarılaraq qəbul edildi.

"Dövlət rüsumu haqqında” qanuna (üçüncü oxunuş) təklif edilən dəyişiklikdə isə peşə təhsili və ümumi təhsil müəssisələrində təhsil alan əcnəbilərə və vətəndaşlığı olmayan şəxslərdən ölkəmizdə müvəqqəti yaşamaq üçün icazə vəsiqəsinin verilməsinə və müddətinin uzadılmasına görə dövlət rüsumu tutulması təklif edilib. Dəyişikliyə əsasən, peşə təhsili və ümumi təhsili müəssisələrində təhsil alan əcnəbilərə və vətəndaşlığı olmayan şəxslərə ölkədə müvəqqəti yaşamaq üçün icazə vəsiqəsinin verilməsinə və müddətinin uzadılmasına görə dövlət rüsumu tutulacaq.

İclasda həmçinin "Kimyəvi silahın hazırlanması, istehsalı, artırılması (yığılması) və tətbiq edilməsinin qadağan olunması və onun məhv edilməsi haqqında” qanun layihəsi ikinci oxunuşda təsdiqləndi.

Valideyn himayəsindən məhrum olmuş uşaqlara yaşayış sahələri veriləcək

Gündəlikdəki Mənzil Məcəlləsində, İnzibati Xətalar Məcəlləsində, "Uşaq hüquqları haqqında”, "Valideynlərini itirmiş və valideyn himayəsindən məhrum olmuş uşaqların sosial müdafiəsi haqqında”, "Qeyri-hökumət təşkilatları (ictimai birliklər və fondlar) haqqında”, "Gənclər siyasəti haqqında”, "Penitensiar müəssisələrdə cəza çəkməkdən azad edilmiş şəxslərin sosial adaptasiyası haqqında”, "Könüllü fəaliyyət haqqında”, "Bədən tərbiyəsi və idman haqqında”, "Reklam haqqında” və "Uşaqların zərərli informasiyadan qorunması haqqında” qanunlarda dəyişiklik edilməsi barədə qanun layihəsi ikinci oxunuşda geniş müzakirə edildi.

Milli Məclis Sədrinin müavini, parlamentin Gənclər və idman komitəsinin sədri Adil Əliyev bildirdi ki, bu dəyişikliklərlə yetkinlik yaşına çatmayanların idman mərc oyunlarında iştirakı məhdudlaşdırılacaq. Eyni zamanda buna şərait yaradacaq şəxs 500 manat məbləğində cərimələnəcək. Mövcud layihələr gənclərin milli mənəvi dəyərlərə bağlı şəkildə yetişdirilməsinə şərait yaradacaq. Çünki bu oyunlarda iştirak edən gənclər bəzən bir ailənin faciəsinə səbəb olur.

"Valideynlərini itirmiş və valideyn himayəsindən məhrum olmuş uşaqların sosial müdafiəsi haqqında” qanuna edilən dəyişikliyə görə valideyn himayəsindən məhrum olmuş uşaqlara yaşayış sahələri veriləcək. Dəyişikliklə sosial müdafiəyə ehtiyacı olan aztəminatlı gənclərə aid olan valideynlərini itirmiş və valideyn himayəsindən məhrum olmuş uşaqlara Mənzil Məcəlləsi ilə müəyyən edilmiş qaydada sosial kirayə müqaviləsi əsasında yaşayış sahələri veriləcək.

"Reklam haqqında” qanuna edilən dəyişikliyə əsasən isə uşaq verilişləri zamanı energetik içkilərin reklamı qadağan edilir. Belə ki, energetik içkilərdən istifadə olunması ilə bağlı yetkinlik yaşına çatmayanlara müraciət edilməsi, uşaqlar üçün proqramların (verilişlərin) energetik içkilərin reklamı ilə kəsilməsi qadağan olunur.

Bu ay cəzasının az hissəsi qalan daha 300-dək şəxs zadlığa çıxa bilər

Müzakirələrdə çıxış edən parlamentin Regional məsələlər komitəsinin sədri Siyavuş Novruzov bildirdi ki, hazırda Azərbaycanda 3000-ə yaxın qeyri-hökumət təşkilatı Ədliyyə Nazirliyində qeydiyyatdan keçib. Bölgələrdə isə cəmi 202 qeyri-hökumət təşkilatı var. Komitə sədri hesab edir ki, bu təşkilatların regionlarda sayı artırılmalıdır.

Siyavuş Novruzov çıxışı zamanı digər bir məsələyə də toxundu. Vurğuladı ki, Ulu Öndər Heydər Əliyevin humanist siyasəti bu gün də davam etdirilir. Bu günə qədər 68 əfv sərəncamı imzalanıb, 11 Amnistiya Aktı qəbul edilib: "Bunlar kifayət qədər insana şamil olunub. Koronavirusla əlaqədar dövlət başçısı tərəfindən son əfv sərəncamı da kifayət qədər insanı əhatə etdi. May ayı ərzində cəzasının az hissəsi qalan daha 300-dək şəxsin azadlığa çıxması nəzərdə tutulur. Azadlığa çıxan insanların sosial adaptasiyası problemi mövcuddur. Bu insanların 60 faizi yenidən həbsə qayıdır. Çünki adaptasiya prosesində problemlər var. Bu problemi azadlığa çıxandan sonra yox, ona qədər yerində həll etməliyik. Elə cəzalar var ki, onların ictimai təhlükəsi yoxdur. Belə cəzaları kənd təsərrüfatı, inşaat və s. sahələrə yönləndirə bilərik. Bu şəxslər həbs psixologiyası ilə azadlığa çıxır, bir müddətdən sonra yenə hansısa əməlinə görə həbsə qayıdır. Avropa ölkələrinin bu təcrübəsindən istifadə etmək lazımdır. Məsələn, yüngül avtomobil qəzaları və s. kimi cəzalar törətmiş şəxslərə şamil olunan cəza tədbirlərinin müvafiq forması tapılmalıdır. Avropa ölkələrində bu cəzaları törədən şəxslər həftənin 5 günü işləyib evində qalır, həftə sonunu isə həbsxanada keçirir”.

Dövlət dili normalarının pozulmasına görə cərimələr müəyyən edilir

İclasda həmçinin "İnformasiya, informasiyalaşdırma və informasiyanın mühafizəsi haqqında”, "Kütləvi informasiya vasitələri haqqında”, "Televiziya və radio yayımı haqqında”, "Azərbaycan Respublikasında dövlət dili haqqında” və "İctimai televiziya və radio yayımı haqqında” qanunlarda dəyişiklik edilməsi barədə qanun layihəsi ikinci oxunuşda müzakirəyə çıxarıldı.

Parlamentin İnsan hüquqları komitəsinin sədri Zahid Oruc dəyişikliklə bağlı məlumat verərək bildirdi ki, "Kütləvi informasiya vasitələri haqqında” qanuna edilən dəyişikliyə əsasən, Azərbaycanda dövlət dili normalarının pozulmasına görə cərimələr müəyyən edilir. Yəni kütləvi informasiya vasitələrində dövlət dili normalarına riayət edilməlidir.

İnzibati Xətalar Məcəlləsinə təklif edilən dəyişikliyə əsasən isə kütləvi informasiya vasitələrində, internet informasiya resurslarında və reklam daşıyıcılarında dövlət dili normalarının pozulmasına görə fiziki şəxslər 100 manatdan 200 manatadək, vəzifəli şəxslər 300 manatdan 400 yüz manatadək, hüquqi şəxslər 500 manatdan 1000 manatadək məbləğində cərimə ediləcəklər. Müzakirələrdən sonra dəyişiklik səsə qoyularaq qəbul edildi.

Deputatlar həmçinin "Tarix və mədəniyyət abidələrinin qorunması haqqında” və "Azərbaycan Respublikasında dövlət dili haqqında” qanunlarda dəyişiklik edilməsi barədə sənədlərə də ikinci oxunuşda müsbət münasibət bildirdilər.

Dövlət sahibkara güzəştlər edir

Gündəliyin son 5 məsələsi birinci oxunuşda müzakirəyə çıxarılan sənədlər idi. "Sosial sığorta haqqında” və Vergi Məcəlləsində dəyişiklik edilməsi haqqında qanunun layihəsi (birinci oxunuş) dövlət başçısı tərəfindən bir paketdə parlamentə qədim edilib.

Sənədləri təqdim edən Milli Məclisin Əmək və sosial siyasət komitəsinin sədri Musa Quliyev bildirdi ki, bu qanun layihəsi "Koronavirus (COVID-19) pandemiyasının və bundan irəli gələrək dünya enerji və səhm bazarlarında baş verən kəskin dalğalanmaların Azərbaycan Respublikasının iqtisadiyyatına, makroiqtisadi sabitliyə, ölkədə məşğulluq məsələlərinə və sahibkarlıq subyektlərinə mənfi təsirinin azaldılması ilə bağlı bir sıra tədbirlər haqqında” Azərbaycan Respublikası Prezidentinin 2020-ci il 19 mart tarixli sərəncamına uyğun olaraq Nazirlər Kabinetinin 2020-ci il 4 aprel tarixli sərəncamı ilə təsdiq edilmiş Tədbirlər Planı ilə əlaqədar hazırlanıb. Əlavə və dəyişikliklər mütərəqqi xarakteri daşıyır. Sənəd iqtisadi fəallığın artırılmasına, sahibkarlıq subyektlərinin fəaliyyətinin stimullaşdırılmasına xidmət edəcək.

Müzakirələrdə çıxış edən deputatlardan Əli Məsimli, Jalə Əliyeva bildirdilər ki, bu dəyişikliklər aztəminatlı ailələrin sosial durumunun yaxşılaşdırılmasına, sahibkarların fəaliyyətinə mühüm töhfə vermiş olacaq.

Vergi Məcəlləsində dəyişiklik edilməsi haqqında qanun layihəsi barədə məlumat verən parlamentin İqtisadi siyasət, sənaye və sahibkarlıq komitəsinin sədri Tahir Mirkişili bildirdi ki, qlobal pandemiyaya qarşı aparılan mübarizədə dövlətin gördüyü işlər göz önündədir. Məcəlləyə təklif edilən dəyişikliklər pandemiyadan zərər çəkmiş sahələrdə fəaliyyət göstərən sahibkarlıq subyektlərinə (o cümlədən kiçik və orta sahibkarlığa) bir sıra istiqamətləri əhatə edən vergi güzəştlərinin və tətillərinin verilməsini nəzərdə tutur. Mikro sahibkarlıq subyektlərinə sadələşdirilmiş vergi üzrə 50 faiz güzəştin verilməsi, 2020-ci ilin birinci və ikinci rübü üzrə sadələşdirilmiş vergi hesabatının və mənfəət (gəlir) və əmlak vergiləri üzrə hesabatların verilməsi və hesablanmış verginin büdcəyə ödənilməsinə cari ilin sentyabr ayının 1-dək vergi tətilinin verilməsi nəzərdə tutulur.

Müzakirələrdə çıxış edən deputatlar Əli Məsimli, Azər Badamov, Fatma Yıldırım, Vüqar Bayramov fikir və təkliflərini səsləndirdilər və sənədlər səsverməyə çıxarılaraq birinci oxunuşda qəbul edildi.

İclasda həmçinin Miqrasiya Məcəlləsində, "Turizm haqqında” qanunlarda dəyişiklik edilməsi barədə qanun layihəsi, eləcə də Vergi Məcəlləsində, "Qiymətləndirmə fəaliyyəti haqqında” və "İcra məmurları haqqında” qanunlarda dəyişiklik edilməsi barədə sənədlər birinci oxunuşda müzakirəyə çıxarılaraq təsdiqləndi.

Milli Məclisin Aparatı və İşlər idarəsinin yeni strukturu müəyyən edilib

İclasın sonunda Milli Məclisin Sədri Sahibə Qafarova parlamentdə aparılan struktur islahatları barədə məlumat verərək bildirdi ki, Prezident İlham Əliyevin təşəbbüsü ilə həyata keçirilən köklü islahatlar ölkəmizin siyasi və ictimai həyatının bütün sahələrini əhatə edib. Bu islahatların əsas məqsədlərindən biri də dövlət hakimiyyəti orqanlarının fəaliyyətini müasir dövrün çağırışları səviyyəsində qurmaqdır: "Prezident Administrasiyası və Nazirlər Kabineti ilə yanaşı Milli Məclis Aparatında da struktur və kadr islahatlarının aparılması zərurəti yaranmışdı. Bununla əlaqədar mən cari ilin aprelin 2-də sərəncam imzalamışdım. Sərəncama əsasən Milli Məclis Aparatında və İşlər idarəsində çalışan dövlət qulluqçuları ştatdankənar elan olunmuş və yeni struktura uyğun ştat cədvəli təsdiq edilənədək onların öz fəaliyyətini əvvəlki ştat cədvəlinə uyğun davam etdirməsi nəzərdə tutulmuşdur. Ötən bir ay müddətində Aparatın və İşlər idarəsinin hər bir bölməsinin fəaliyyəti, hər bir əməkdaşın işi ətraflı və dərin təhlil edilmişdir”.

Milli Məclisin Sədri artıq bu işin başa çatdığını vurğulayaraq aprelin 30-da bir neçə yeni sərəncam imzaladığını söylədi. Bu sərəncamlara əsasən Milli Məclis Aparatının və İşlər idarəsinin yeni strukturu, yeni ştat cədvəli təsdiq edilib, dövlət qulluqçularının vəzifələrə təyinatları həyata keçirilib, bir sıra dövlət qulluqçuları ixtisar olunub: "İnanıram ki, həyata keçirilən bu islahatlar parlamentin işinin daha səmərəli təşkil edilməsinə, qanun yaradıcılığı prosesinin təkmilləşməsinə kömək edəcək”.

Sədrin çıxışından sonra Milli Məclisin plenar iclası başa çatdı.

Rəşad CƏFƏRLİ,

Rəşad BAXŞƏLİYEV

Azərbaycan.-2020.- 2 may.- S.4.