İlham Əliyevin yüksək beynəlxalq nüfuzunun növbəti təcəssümü

Azərbaycan Prezidenti bu dəfə Qoşulmama Hərəkatını koronavirus pandemiyasına qarşı səfərbər etdi

Dünyanı çənginə alan koronavirusla demək olar ki, bütün ölkələr mübarizə aparırlar. Bu qlobal problemə qarşı ən effektiv mübarizə aparan ölkələrdən söz açdıqda isə Azərbaycanın adı birincilər cərgəsində gəlir. Reallıq da ondan ibarətdir ki, həyata keçirilən düzgün və səmərəli qabaqlayıcı və qoruyucu tədbirlər sayəsində respublikamızda bu virusun ciddi fəsadlar törətməsinə imkan verilmədi.

Azərbaycan koronavirusa qarşı beynəlxalq əməkdaşlığın təşəbbüskarıdır

Effektiv nəticələrə görə Azərbaycanda koronavirusa qarşı aparılan mübarizə beynəlxalq səviyyədə təqdir olunur. Həyata keçirilən tədbirlər dünyanın aparıcı maliyyə-iqtisadi qurumları tərəfindən yüksək qiymətləndirilir. Lakin respublikamız koronavirusla mübarizədə yalnız yerli nümunələr yaratmaqla kifayətlənmir. Məsələ bundadır ki, Prezident İlham Əliyev virusun qlobal problemə çevrilməsini nəzərə alaraq onunla mübarizədə beynəlxalq əməkdaşlığı zəruri hesab edir. İlham Əliyevin təşəbbüsü ilə aprelin 10-da Türk Şurasının videokonfrans vasitəsilə fövqəladə Zirvə görüşünün keçirilməsində də əsas məqsəd koronavirusun yayılmasına qarşı mübarizədə beynəlxalq əməkdaşlığın həyata keçirilməsindən ibarət olub.

Türk Şurasının fövqəladə Zirvə görüşü pandemiya ilə mübarizəyə həsr olunmuş ilk beynəlxalq tədbir idi. Bu tədbir isə məhz Prezident İlham Əliyevin təşəbbüsü ilə reallaşdı. Təsadüfi deyil ki, məhz bundan sonra qlobal problemin mənfi təsirlərini azaltmaq üçün dövlətlərin birgə səy göstərmələri bütün dünyada aktuallaşmağa başladı. Mayın 4-də isə İlham Əliyevin təşəbbüsü ilə ikinci beynəlxalq tədbir - Qoşulmama Hərəkatının Təmas Qrupu formatında videokonfrans vasitəsilə "COVID-19-a qarşı birlikdəyik” mövzusunda Zirvə görüşü keçirildi.

Məlum olduğu kimi, ötən ilin oktyabrında keçirilmiş sonuncu Zirvə görüşündən sonra Qoşulmama Hərəkatına rəhbərliyi Azərbaycan həyata keçirir. Hərəkatın sədri isə Prezident İlham Əliyevdir. Çoxtərəfli diplomatiyanın təşviq edilməsi, üzv dövlətlər arasında əməkdaşlığın və həmrəyliyin gücləndirilməsi cənab İlham Əliyev tərəfindən Azərbaycanın Qoşulmama Hərəkatında rəhbərliyinin prioritetlərindən biri kimi müəyyən edilib. Eyni zamanda Azərbaycan təşkilata rəhbərliyi bütün dünya üçün həssas bir dövrdə qəbul edib və bu, müasir dünyanın çağırışlarına uyğun və effektiv reaksiyalar tələb edir.

Bu baxımdan Qoşulmama Hərəkatının videokonfrans vasitəsilə Zirvə görüşünün keçirilməsi göstərdi ki, Prezident İlham Əliyev bütün dünyanın narahat günlər yaşadığı indiki vəziyyətdə təşkilatın fəaliyyətini üzv dövlətlərin maraqları naminə uğurla təmin edir.

Etibar və etimadın göstəricisi

Qeyd edək ki, Azərbaycan Prezidentinin Zirvə görüşünün keçirilməsi ilə bağlı təşəbbüsü Qoşulmama Hərəkatına üzv dövlətlər tərəfindən də yekdilliklə dəstəklənib. BMT Baş Assambleyasından sonra dünyada ikinci ən böyük beynəlxalq təsisat olan Qoşulmama Hərəkatında 120 dövlətin təmsil olunduğunu nəzərə alaraq, Zirvə görüşü coğrafi təmsilçilik prinsipi əsasında, Avropa, Asiya, Afrika və Latın Amerikasında yerləşən ölkələrin iştirakı ilə Təmas Qrupu formatında keçirildi.

Zirvə görüşündə 40-a yaxın ölkənin dövlət və hökumət başçısının, xarici işlər nazirlərinin, o cümlədən BMT Baş Assambleyasının prezidentinin, Afrika İttifaqının sədrinin, Ümumdünya Səhiyyə Təşkilatının Baş direktorunun iştirak etdiyi Zirvə toplantısı, ilk növbədə, Azərbaycana və Prezident İlham Əliyevə olan inamın, etibarın və etimadın göstəricisi kimi tarixə düşdü. O cümlədən Zirvə görüşünə BMT Baş katibi Antonio Quterreşin və Avropa İttifaqının ali nümayəndəsi və Avropa Komissiyasının vitse-prezidenti Cozef Borelin videomüraciət ünvanlaması, habelə Zirvə görüşünü təşkil etdiyi və pandemiya ilə mübarizəyə ciddi əməli töhfələr verdiyinə görə, Azərbaycan Prezidentinin fəaliyyətinin təqdir olunması, ünvanına çoxsaylı təşəkkürlər bildirilməsi ölkəmizin və onun liderinin beynəlxalq arenada yüksək nüfuzunun növbəti əyani göstəricisidir.

Avropa İttifaqı rəsmisinin Zirvə görüşündə iştirakı və çıxışı isə Qoşulmama Hərəkatının tarixində ilk dəfə baş vermiş hadisədir. Məhz Azərbaycan daim bir-biri ilə əks-qütblərdə olan Qoşulmama Hərəkatı ilə Avropa İttifaqını koronavirus təhlükəsi zamanı bir araya gətirməyə müvəffəq oldu.

Bu tədbiri keçirməklə Azərbaycan bir daha təsdiq etdi ki, Qoşulmama Hərəkatına sədrliyi öz üzərinə götürərkən beynəlxalq arenada üzv ölkələrin maraqlarının müdafiə edilməsi üçün əməli addımlar atacağına, həmrəyliyi gücləndirəcəyinə və qarşılıqlı dəstəyi rəhbər tutacağına dair vədlərinə qətiyyətlə əməl edir. Eyni zamanda Zirvə görüşü göstərdi ki, ölkəmiz koronavirus pandemiyası ilə bağlı formalaşan yeni reallıqlara, yaranmış vəziyyətə çevik və adekvat reaksiya verir. Ən əsası isə Zirvə görüşü koronavirusla qlobal mübarizənin daha da gücləndirilməsinə təkan verəcək. Prezident İlham Əliyev Zirvə görüşündəki yekun nitqində bu barədə dedi: "Qoşulmama Hərəkatına üzv ölkələrin bir-birinin problemlərini anlayışla qarşılaması, həmrəylik nümayiş etdirməsi və çoxtərəfli əməkdaşlığa üstünlük verməsi böyük əhəmiyyət kəsb edir. Qlobal pandemiya şəraitində ölkələr və beynəlxalq təşkilatlar arasında həmrəylik və əməkdaşlıq xüsusilə aktualdır. Əminəm ki, bu gün dövlət və hökumət başçıları, beynəlxalq təşkilatların rəhbərləri tərəfindən edilən çıxışlarda səslənən dəyərli fikirlər və təkliflər koronavirus xəstəliyinə qarşı bizim birgə mübarizəmizə töhfə verəcəkdir”.

Zirvə görüşü ilə bağlı başqa bir mühüm məqam isə ondan ibarətdir ki, Qoşulmama Hərəkatının sədri olan Azərbaycanın fəal surətdə çoxtərəfli diplomatiyanı və multilateralizmi təşviq etməsi dünya birliyi tərəfindən təqdir olunur. Qəbul olunmuş yekun bəyannamədə dəyərli və vaxtında irəli sürülmüş təşəbbüsə görə Prezident İlham Əliyevə xüsusi təşəkkürün öz əksini tapması da bunun bariz göstəricisidir.

Qlobal əməkdaşlığa güclü ehtiyac duyulduğu bir şəraitdə dövlətlər, eləcə də bir sıra beynəlxalq və regional təşkilatlar adekvat reaksiya göstərə, beynəlxalq həmrəyliyin gücləndirilməsi ilə bağlı zəruri addımlar ata bilməyiblər. Azərbaycan Prezidenti İlham Əliyev isə qlobal liderliyə ehtiyac duyulan bir şəraitdə və vaxtda təşəbbüslə çıxış edərək beynəlxalq əməkdaşlığın dövlətlərə faydalı olacağını nümayiş etdirdi və dünyanın ayrı-ayrı qitələrindən müxtəlif siyasi və ideoloji quruluşlara malik ölkələri bir araya gətirməyə nail oldu. Türk Şurasından sonra Qoşulmama Hərəkatının Zirvə görüşünün keçirilməsinə nail olmaqla Prezident İlham Əliyev pandemiyaya yalnız qlobal əməkdaşlıq və həmrəylik sayəsində qalib gəlməyin mümkünlüyünü bir daha dünyaya nümayiş etdirdi.

Rəşad CƏFƏRLİ

Azərbaycan.-2020.- 7 may.- S.1;7.