Azərbaycan koronavirusla mübarizədə birinci mərhələni qələbə ilə başa vurub

Bütün dünyanı bürüyən koronavirus pandemiyası ilə mübarizə aparılsa da, hələ də infeksiyaya yoluxma halları davam edir. Artıq dünyada bu virusa yoluxanların sayı 3 932 984 nəfərə çatıb, 271 029 nəfər isə onun qurbanı olub.

Ən çox yoluxma və ölüm halları Avropda qeydə alınıb. İkinci yerdə Cənubi və Şimali Amerika qərarlaşıb. Üçüncü yeri Qərbi Sakit okean regionu tutur. Ölkələr üzrə hesabatda ən çox yoluxma halları ABŞ, İspaniya, İtaliya, Böyük Britaniya, Rusiya, Almaniya, Fransa, Türkiyə, Braziliya və İranda qeydə alınıb.

"Karantin rejimi ən azı mayın 31-nə qədər qüvvədə olacaq”

Ölkəmizdə son günlər gündəlik xəstələnmə sayının sağalma sayını üstələməsi müşahidə olunmaqdadır. Bu da ciddi narahatçılıq doğurur. Pandemiya ilə mübarizənin gedişində mənfi dinamikanın başlaması karantin qaydalarının yumşaldılması ilə əlaqələndirilir. Bir sıra məhdudiyyətlərin aradan qaldırılması ilə insanların küçələrə axışması, baş verənləri sanki unutması, sosial məsafəni gözləməməsi, maskadan istifadə etməməsi əldə olunan nailiyyətləri heçə endirir.

Ötən gün Bakıda modul tipli ilk xəstəxana kompleksinin açılışında çıxışı zamanı Prezident İlham Əliyev ölkədə koronavirusla mübarizə çərçivəsində görülən işlərdən danışarkən bu mövzuya da toxunub. Yoluxma hallarının geniş yayılmasının qarşısının alınması üçün karantin rejiminin sərtləşdirildiyini diqqətə çatdıran dövlət başçısı məqsədə nail olunduğunu və virusla mübarizədə birinci mərhələni az itkilərlə başa vurduğumuzu, qalib gəldiyimizi deyib. 3 həftə ərzində hər gün sağalanların sayının yoluxanların sayından xeyli çox olduğunu gördükdə isə ölkədə yumşalma tədbirləri görülməyə başlanıb: "Ancaq əfsuslar olsun ki, bəzi adamlar bunu karantin rejiminin ləğvi kimi qəbul etdilər. Əfsuslar olsun ki, bəzi adamlar karantin rejiminə əməl etmirlər. Yumşalma tədbirləri yalnız bir məqsədi güdürdü ki, insanların öyrəşdiyi həyat tərzi müəyyən dərəcədə bərpa olunsun. Karantin rejiminin yumşaldılması o demək deyil ki, karantin başa çatıb, xeyr. Karantin rejimi ən azı mayın 31-nə qədər qüvvədə olacaq və ondan sonra əgər lazım olarsa, uzadılacaq. Ona görə son günlərin mənzərəsi, sözün düzü, məni çox üzür və narahat edir. Çünki son 2-3 gündə xəstələnənlərin sayı sağalanların sayından çoxdur və əgər bu dinamika kəskin artarsa, - mən bunu açıq demək istəyirəm və hər kəs bunu bilsin, - biz məcbur olub karantin rejimini əvvəlki vəziyyətə gətirəcəyik, sərtləşdirəcəyik, qaydaları pozanlara qarşı da daha ciddi cəza tədbirləri görüləcək ki, biz vəziyyəti daim nəzarətdə saxlayaq”.

Maska taxmaq, məsafə saxlamaq bir qayda olmalıdır

"Azərbaycan dövlətinin siyasəti və Operativ Qərargahın bu işlərə gündəlik rəhbərlik etməsi əsas bir məqsədi güdür ki, biz vətəndaşların həyatını, sağlamlığını qoruyaq” deyən Prezidentin sözlərinə görə, bəzi məsuliyyətsiz vətəndaşlar qaydalara əməl etmirlər, maska taxmırlar, məsafə saxlamırlar, özlərini elə aparırlar ki, sanki virus artıq məhv olub. Dövlət başçısı karantin qaydalarını pozanlara qarşı ciddi tədbirlər görüləcəyinə dair xəbərdarlıq edib: "Hamı bunu bilsin və nəticə çıxarsın. Biz imkan verə bilmərik ki, hansısa məsuliyyətsiz vətəndaşlara görə insanların həyatı risk altına düşsün. Qətiyyən mümkün deyil”.

Dövlət başçısı bildirib ki, vətəndaşlar şəxsi gigiyenaya riayət etməlidirlər. Maska taxmaq, məsafə saxlamaq, gündə bir neçə dəfə sabunla əlləri yumaq, dezinfeksiya vasitələrindən istifadə etmək bir qayda olmalıdır. Koronavirusun yayılmaması üçün vətəndaşların şəxsi məsuliyyəti mühüm şərtdir: "Ona görə mən hesab edirəm ki, bütün kompleks tədbirlər, vətəndaşların məsuliyyəti və nizam-intizamı nəticəsində biz bundan sonra da bu vəziyyəti nəzarət altında saxlaya biləcəyik. Çünki burada məsələ ancaq dövlət qurumlarının fəaliyyətindən asılı deyil. Dövlət qurumları, vətəndaş cəmiyyəti, vətəndaşlar, biz bir nöqtəyə vurmalıyıq”.

Tibbi maska taxmayanlar ictimai nəqliyyata buraxılmayacaq

Dünəndən ölkə ərazisində polis əməkdaşları və Daxili Qoşunların hərbi qulluqçuları tərəfindən tibbi maskadan istifadə etməyənlərə qarşı reydlərə start verilib.

Daxili İşlər Nazirliyinin Mətbuat xidmətinin rəisi Ehsan Zahidov açıqlamasında bildirib ki, reydlər mayın 1-dən ölkə ərazisində tətbiq edilən xüsusi sanitar rejimin tələblərinə uyğun həyata keçirilir: "Reydlərdə vətəndaşlardan evdən çıxarkən, qapalı məkanlarda, xüsusilə iaşə müəssisələrində, ictimai nəqliyyatda nəfəs yollarını qoruyan tibbi maskadan mütləq qaydada istifadə etmək, insanlarla təmas zamanı 2 metrlik ara məsafəsini saxlamaq, bütövlükdə karantin rejimi dövrü üçün müəyyən edilmiş qaydalara ciddi riayət etmək tələb olunur. Bu qaydalara riayət etməyən vətəndaşlarımız barəsində inzibati qaydada tədbirlər görüləcək. Eləcə də tibbi maskadan istifadə etməyənlərin ictimai nəqliyyata və qapalı məkanlara girişinə məhdudiyyətlər qoyulacaq”.

434 sürücü karantin rejimini pozub

Koronavirus infeksiyasının yayılmasının qarşısının alınması məqsədilə tətbiq edilən xüsusi karantin rejiminin pozulmasına görə 07.05.2020-ci il saat 00:00-dan 08.05.2020-ci il saat 00:00-dək olan müddət ərzində respublikanın avtomobil yollarında nəqliyyat vasitələri ilə hərəkətdə olan 434 nəfər Azərbaycan Respublikası İnzibati Xətalar Məcəlləsinin 211-ci maddəsi ilə inzibati məsuliyyətə cəlb edilib.

Baş Dövlət Yol Polisi İdarəsinin məlumatına görə, ümumilikdə 01.04.2020-ci il tarixindən bu günədək respublikanın, o cümlədən paytaxtın avtomobil yollarında xüsusi karantin rejiminin pozulmasına görə 49435 hərəkət iştirakçısı inzibati qaydada cəzalandırılıb.

Şərtlərin yumşaldılması əhalidə arxayınlıq yaratmamalıdır

Ölkədə koronavirusun geniş vüsət almasına imkan verməmək, infeksiyaya yoluxmanın sürətini azaltmaq, vətəndaşın sağlamlığını qorumaq üçün lazımi tədbirlər həyata keçirilir. Məhz pandemiyanın təsirinin azaldılması və miqyasının məhdudlaşdırılması istiqamətində dövlət tərəfindən vaxtında atılan addımlar, eləcə də karantin rejiminin tətbiqi nəticəsində COVID-19-la bağlı sanitar-epidemioloji vəziyyət nəzarət altına alınıb, kütləvi yoluxma hallarının azaldılmasına nail olunub. Xəstəliklə bağlı müsbət tendensiya yarandığı üçün karantin rejimi yumşaldılıb, müəyyən məhdudiyyətlər aradan qaldırılıb. Lakin şərtlərin yumşaldılması heç də əhalidə arxayınlıq yaratmamalıdır. Qoyulan qaydalara riayət etmək, gərəksiz halda evdən çıxmamaq, küçədə sosial məsafəni saxlamaq, tibbi maska taxmaq, şəxsi gigiyenanı gözləmək hər birimizin şəxsi məsuliyyəti, vətəndaşlıq borcudur. Məsuliyyətli olaq, özümüzü, ailəmizi, ətrafımızı, dolayısı ilə xalqımızı gözəgörünməz düşməndən qoruyaq.

Xəyalə MURADLI

Azərbaycan.-2020.- 9 may.- S.11.