Koronavirus Paşinyanı çıxılmaz vəziyyətə salıb

Ermənistanda sosial-iqtisadi xaos daha da dərinləşir

Ermənistanda koronavirus pandemiyası səbəbindən getdikcə ağırlaşan vəziyyət hakimiyyət üçün də əlavə problemlərə yol açmaqdadır. Hətta fikirlər səslənir ki, bu gedişlə Nikol Paşinyan yaxın tezlikdə iqtidardan devrilə bilər.

"İrates” qəzeti də ölkədə son hadisələr fonunda qeyd edir ki, hakimiyyət artıq Nikol Paşinyanın əlindən sürüşüb gedir. Bildirilir ki, baş nazir komandasında birliyi belə təmin edə bilmir. Hakimiyyətin müxtəlif qanadları arasında gərginlik yüksək həddə çatıb. Paşinyanın arxasında kölgə hökuməti fəaliyyət göstərir. Hüquq mühafizə orqanları cinayət işlərinin qarşısını arzuedilən səviyyədə ala bilmirlər.

"İrates”in yazdığına görə, Paşinyan keçmiş hakimiyyət nümayəndələrinin son qəpiyini müsadirə etməklə vəziyyətdən çıxmağa çalışır. Ermənistan baş nazirinin yaxın günlərdə keçmiş vəzifəlilərə qarşı yeni cinayət işini başladacağı gözlənilir: "Burada iki, yaxud üç variant ola bilər. Ya Ermənistan rəhbərliyi sadəcə siyasi müqavimətin bir hissəsi olan keçmiş hakim sistemin kapitalını müsadirə edib ələ keçirir, yaxud müxtəlif kompromat məlumatlara sahib insanlar olmadıqda, bu kapital ilə razılaşır. Bunlardan hansı Ermənistanın maraqları baxımından perspektivli, daha real və ya daha effektivdir? Birinci versiya ictimai cəhətdən cəlbedici görünür, amma burada özünü aldatma ehtimalı olduqca yüksəkdir.

Məsələ burasındadır ki, bəhs etdiyimiz kapital çoxdan aysberqin yalnız kiçik bir hissəsi olaraq Ermənistanda qalıb. Hazırda müsadirə etmək, götürmək, ələ keçirmək, yenidən bölüşdürmək və məsələnin həll edilmiş hesab edilməsinin mümkün olduğunu düşünmək qeyri-real və qeyri-kafi görünür”.

Ermənistanın "Alternativ” ictimai təşkilatının sədri Narek Mantaşyan da bildirib ki, vəziyyət olduqca ağırdır və Paşinyanın çıxış yolları dalana dirənib. Vurğulayıb ki, elə bu səbəbdən Ermənistan baş naziri və komendant ofisinə çağırış edirəm ki, koronavirusu iqtisadi uğursuzluqların günahkarı hesab etməsinlər. Bütün bunların yeganə günahkarı koronavirusa qarşı öz qeyri-ciddi münasibəti ilə bugünkü hakimiyyətdir.

Mantaşyan qeyd edib ki, Nikol Paşinyan nəyin bahasına olursa-olsun ölkəni ötən əsrin 90-cı illərinin əvvəlinə gətirməyə çalışır: "Nikol Paşinyan zehni qabiliyyətləri, xarizması ilə Levon Ter-Petrosyandan kifayət qədər geri qalaraq hakimiyyətdə o qədər də uzun sürə bilməyəcək və çox tez istefa verəcək”.

Elə erməni politoloq Andranik Tevanyan da məsələyə eyni prizmadan yanaşır. O, Ermənistan qarşısında əsas çağırışların Qarabağ məsələsi, koronavirus, sosial-iqtisadi və xarici siyasət, məhkəmə böhranları və aşağı səviyyəli idarəetmə olduğunu bildirib: "Baş nazir fövqəladə vəziyyətdə idarəetmə şəraitinin formasını dəyişməklə bağlı son şansından məhrum olub. O, özü ciddi böhran mənbəyinə çevrilib. Bu, Ermənistana və Qarabağa çox baha başa gəlir. 2022-ci ilə qədər böhran vəziyyətində olacağıq. Bu, yekunda təhlükəsizliklə bağlı ağır nəticələrə gətirib çıxaracaq”.

Maraqlıdır ki, məhz bu durumda Paşinyanla ciddi qarşıdurma yaşayan Ermənistan Milli Təhlükəsizlik Xidmətinin (MTX) keçmiş direktoru Artur Vanetsyan ölkədə hakimiyyət dəyişikliyinin anonsunu verib. "Rodina” İnkişaf Fondunun rəsmi "Facebook” səhifəsində yerləşdirilən bəyanatda deyilir: "Bu yaxınlarda baş verən daxili siyasi hadisələri nəzərə alaraq əminliklə deyə bilərəm ki, yaxın gələcəkdə bizi böyük siyasi hadisələr gözləyir. Sizin fəaliyyətinizə daha çox tələb olacaq və əməyiniz qiymətləndiriləcək”.

Qeyd edək ki, Vanetsyan bu fondun Qəyyumlar Şurasının sədridir. Bundan başqa, məlum olub ki, Vanetsyan Nikol Paşinyanı məhkəməyə verməyə də hazırlaşır. Onun vəkilləri olan Lusina Saayan və Aramazd Kiviryan məlumatı təsdiq ediblər. Vəkillər Ermənistan baş nazirinin mətbuat katibi Mane Gevorqyanın böhtan xarakterli ifadələrinə görə mülki iddia ərizəsinin hazırlanıb məhkəməyə təqdim olunacağını bildiriblər: "Hökumət başçısının öz sözçüsünün vasitəsilə qəsdən yalan məlumat yaymağını yolverilməz və çirkin hesab edirik. Bu, özündə birbaşa siyasi təzyiq elementlərini cəmləşdirir. Məhkəməyə müvafiq mülki iddianı təqdim edəcəyik. Qanuna görə böhtan atan hər kəs bunun üçün cavab verməlidir və Ermənistanda böhtan xarakterli mübarizə üsulu, nəhayət, rədd edilməlidir”.

Xatırladaq ki, Paşinyanın mətbuat katibi Mane Gevorqyan sabiq prezident Serj Sarkisyanın kürəkəni Mikael Minasyan və Artur Vanetsyanı bir sıra şirkətlərin rəhbərləri vasitəsilə qanunsuz olaraq səhm almaqda ittiham edib. Gevorqyan bu barədə məlumat əldə etdiyini bildirib. Vanetsyan isə bu ittihamları absurd sayır. Bundan başqa, qeyd edir ki, Nikol Paşinyan hüquq mühafizə orqanlarından ona qarşı cinayət işi açmağı tələb edib.

Hesab edilir ki, yaranmış vəziyyətdə məhz siyasi qüvvələr Vanetsyanın rəhbərliyi altında Paşinyana qarşı təşkilatlanacaq. Ölkədə yaranan sosial-iqtisadi xaos isə bu qüvvələrin istəklərini daha tez reallaşdırmağa şərait yaradır.

Elçin CƏFƏROV

Azərbaycan.-2020.- 16 may.- S.1;7.