Heç bir təzyiq Azərbaycanı yolundan döndərə bilməz

Parlamentdə Fransanın ATƏT-in Minsk qrupunun həmsədrliyindən uzaqlaşdırılması tələb edildi

"Hamımızın ürəyi cəbhə xəttində döyüşən ordumuzla döyünür. Ordumuz düşmənə qarşı uğurla əks-hücum əməliyyatı keçirir və ağır zərbələr endirir. Azərbaycan Ordusunun gücünü görən bəzi qüvvələr, vaxtilə heç nə deməyən beynəlxalq təşkilatlar indi müxtəlif bəyanatlarla çıxış edirlər. Bizə təsir göstərib haqq yolundan döndərməyə çalışırlar. Bu beynəlxalq təşkilatlara cavab olaraq Azərbaycan Prezidenti, Ali Baş Komandan İlham Əliyevin sözlərini yada salmaq yerinə düşər: "Biz işğal altında olan torpaqlarımızı bərpa edirik. Qarabağ bizim əzəli torpaqlarımızdır. Azərbaycan xalqı bu işğalla heç vaxt barışmayacaq. Demişdim ki, əgər məsələ danışıqlar yolu ilə həll olunmazsa, Azərbaycanın tam haqqı var ki, məsələ hərbi yolla öz həllini tapsın. Bu haqqı bizə Azərbaycan xalqı verib, bu haqqı bizə beynəlxalq hüquq normaları verib.

Hamımızın eyni fikri var. Ordumuzun müzəffər yürüşü sonuncu erməni əsgər torpaqlarımızdan qovulana qədər davam etməlidir. Bütün xalqımız da, biz də əminik ki, bu, belə olacaq. Bu savaş bizim qələbəmizlə başa çatacaq”.

Milli Məclisin dünənki plenar iclası parlamentin Sədri Sahibə Qafarovanın bu fikirləri ilə başladı.

ATƏT-in Minsk qrupunun formatı dəyişdirilməlidir

İclasda Ermənistanın təxribatları nəticəsində cəbhədə başlanan savaş və Azərbaycanın haqq işinə təzyiqlər göstərməyə çalışan bəzi qüvvələrin tutduğu mövqe müzakirə mövzusu oldu. Milli Məclis Sədrinin müavini Fəzail İbrahimli, Parlamentin Beynəlxalq münasibətlər və parlamentlərarası əlaqələr komitəsinin sədri Səməd Seyidov, İnsan hüquqları komitəsinin sədri Zahid Oruc, Regional məsələlər komitəsinin sədri Siyavuş Novruzov, Mədəniyyət komitəsinin sədri Qənirə Paşayeva, deputatlardan Fazil Mustafa, Arzu Nağıyev, Sevil Mikayılova, Kamal Cəfərov, Nigar Arpadarai, Tural Gəncəliyev, Razi Nurullayev, Bəhruz Məhərrəmov, Şahin İsmayılov, Naqif Həmzəyev çıxış edərək əsgər və zabitlərimizin yanında olduqlarını, onların xaqlımıza qələbə sevinci yaşadacaqları günün uzaqda olmadığını vurğuladılar.

Çıxış edənlər birmənalı olaraq Fransanın Dağlıq Qarabağ münaqişəsinin həlli istiqamətində tutduğu mövqeyə kəskin etiraz bildirdilər. Qeyd edildi ki, Fransa ATƏT-in Mİnsk qrupunun həmsədri kimi mandatına uyğun hərəkət etmir.

Komitə sədri Səməd Seyidov ATƏT-in Minsk qrupunun 3 həmsədr ölkəsinin birgə bəyanatına münasibət bildirərkən qeyd etdi ki, bu, həmsədrlər səviyyəsində deyil, 3 dövlət başçısının fikri kimi hazırlanan bəyanat idi. Ancaq bu bəyanatlar bölgədə sülhə töhfə verməyə xidmət etmir: "Fransa prezidenti Emmanuel Makronun son açıqlamaları da bu qəbildəndir. Makron deyir ki, "Qarabağın Azərbaycan tərəfindən yenidən ələ keçirilməsini qəbul etməyəcəyik”. Bu, nə deməkdir?! Qarabağ Azərbaycan torpağıdır. Azərbaycan torpağının işğalçıdan azad olunması Azərbaycan xalqının haqqıdır və beynəlxalq hüququn tələbidir. Son hadisələr göstərir ki, ATƏT-in Minsk qrupunun formatı dəyişdirilməlidir. Fransa ATƏT-in Minsk qrupunun həmsədrliyindən çəkilməlidir. Azərbaycanın bu ölkə ilə münasibətlərinə yenidən baxılmalıdır. Azərbaycanın hərbi əməliyyatları davam etdirməsi bu cür bəyanatlara ən yaxşı cavab olacaq”.

Digər çıxış edənlər də birmənalı şəkildə bildirdilər ki, Fransa prezidentinin Dağlıq Qarabağdakı vəziyyətlə bağlı son bəyanatı qeyri-adekvatdır və heç bir çərçivəyə sığmır. Beynəlxalq mandata zidd olan belə bəyanatlar sülhə deyil, balansın pozulmasına gətirib çıxarır. Fransa hökumətinin ATƏT-in Minsk qrupunun həmsədri kimi münaqişənin sülh yolu ilə həllinə deyil, daha da qızışdırılmasına, status-kvonun saxlanmasına gətirib çıxaran bəyanatlar verməsi qəbuledilməzdir. Ona görə də Minsk qrupunun formatına yenidən baxılmalı və Fransa bu məsələlərə özünün ciddi münasibətini bildirməlidir.

İki yeni medal təsis edilir

Sonra gündəlikdəki məsələlərin müzakirəsinə başlanıldı. Milli Məclisin Sədri Sahibə Qafarova bildirdi ki, gündəliyə parlamentin sentyabrın 30-da keçirilən iclasında birinci oxunuşda müzakirədən keçən 14 qanun layihəsinin ikinci oxunuşda müzakirəsi daxil edilib.

Əvvəlcə Milli Məclis Sədrinin birinci müavini, Hüquq siyasəti və dövlət quruculuğu komitəsinin sədri Əli Hüseynli "Azərbaycan Dəmir Yollarının 140 illiyi (1880-2020)” yubiley medalının təsis edilməsi ilə əlaqədar "Azərbaycan Respublikasının orden və medallarının təsis edilməsi haqqında” qanunda dəyişiklik edilməsi barədə layihəni ikinci oxunuşda müzakirəyə təqdim etdi. Qanun layihəsinə əsasən, Azərbaycan Dəmir Yollarının 140 illiyi ilə əlaqədar olaraq təsis edilən yubiley medalı ilə vəzifələrini nümunəvi icra edən, fəaliyyətində yüksək nəticələr göstərən, dəmir yolu nəqliyyatı sahəsində çalışan işçilər, dəmir yolu nəqliyyatı sahəsinin inkişafında və təkmilləşdirilməsində xüsusi xidmətləri olan şəxslər, habelə beynəlxalq tərəfdaşlar təltif ediləcək. Qanun layihəsi ikinci oxunuşda qəbul edildi.

"Azərbaycan Respublikası Səfərbərlik və Hərbi Xidmətə Çağırış üzrə Dövlət Xidmətinin 10 illiyi (2012-2022)” yubiley medalının təsis edilməsi ilə əlaqədar "Azərbaycan Respublikasının orden və medallarının təsis edilməsi haqqında” qanunda dəyişiklik edilməsi barədə qanun layihəsinə də ikinci oxunuşda baxıldı. Vurğulandı ki, bu medalla həqiqi hərbi xidmət keçən və xidməti vəzifələrini nümunəvi yerinə yetirən zabit və gizirlər, müddətdən artıq hərbi xidmət keçən hərbi qulluqçular, ehtiyatda olan və istefaya buraxılmış hərbçilər, həmin orqanda səmərəli fəaliyyət göstərən mülki işçilər, habelə bu sahədə xüsusi xidmətləri olan digər şəxslər təltif ediləcəklər. Əli Hüseynli yeni təsis edilən medalın bu sahədə fəaliyyət göstərən insanların ruh yüksəkliyinin artırılmasında xüsusi rolu olacağını dedi, sənədin birinci oxunuşda müzakirəsi zamanı səsləndirilən təkliflərə münasibət bildirdi. Layihə səsə qoyularaq təsdiqləndi.

Övladlığa götürülmüş, valideynlərini itirmiş uşaqların təhsil haqlarını dövlət ödəyəcək

İclasda Şəhərsalma və Tikinti Məcəlləsində dəyişiklik edilməsi haqqında qanun layihəsi də müzakirə edildi. Bildirildi ki, Azərbaycan Prezidenti 28 dekabr 2018-ci ildə tikinti obyektlərində tikintiyə icazə və obyektin istismarına icazə verilməsinin sadələşdirilməsi ilə bağlı tədbirlər haqqında Fərman imzalayıb. Tikintiyə dövlət nəzarəti prosedurlarında nəzərdə tutulan sadələşdirmələrlə əlaqədar müvafiq qanunların təkmilləşdirilməsi ilə əlaqədar təkliflərin hazırlanması barədə Nazirlər Kabinetinə tapşırıq verilib. Təqdim edilən qanun layihəsi həmin təkmilləşdirilməyə dair təklifləri nəzərdə tutur. Qanun layihəsi ikinci oxunuşda təsdiqləndi.

"Dövlət rüsumu haqqında” qanuna təklif edilən dəyişikliklər də ikinci oxunuşda təsdiq edildi. Qanun layihəsinə təklif olunan dəyişikliklər minik avtomobillərinin özgəninkiləşdirilməsi haqqında müqavilələrin dövlət qeydiyyatına alınmasına görə dövlət rüsumunun məbləğinin hər il üçün təsdiq olunması mexanizmindən imtina olunmasını və rüsumların daimi olaraq müəyyən edilməsini nəzərdə tutur.

Milli Məclisin İqtisadi siyasət, sənaye və sahibkarlıq komitəsinin üzvü Vüqar Bayramov "Vergi Məcəlləsində dəyişiklik edilməsi haqqında” qanun layihəsini ikinci oxunuşda təqdim etdi. Bildirildi ki, qanun layihəsi daimi qulluq tələb edən sağlamlıq imkanları məhdud uşağa və ya birinci dərəcə əlilliyi olan şəxsə baxan, onunla birlikdə yaşayan valideynin, arvadın (ərin), himayəçinin və ya qəyyumun gəlirlərinin gəlir vergisindən azad olunan hissəsinin artırılaraq 200 manat məbləğində müəyyən edilməsini, güzəşt tətbiq olunan kateqoriyaya sağlamlıq imkanları məhdud uşaqları övladlığa götürən şəxslərin də aid edilməsini nəzərdə tutur. Deputat sənədin birinci oxunuşda müzakirəsindən sonra heç bir təklif və ya iradın qeydə alınmadığını vurğuladı.

Milli Məclisin Ailə, qadın və uşaq məsələləri komitəsinin sədri Hicran Hüseynova və deputat Məlahət İbrahimqızı da bu qanun layihəsi ilə bağlı fikirlərini bildirdilər. Layihə təsdiq edildi.

Parlamentin Elm və təhsil komitəsinin sədri Bəxtiyar Əliyev "Təhsil haqqında” qanunda dəyişiklik edilməsi barədə məsələ ilə bağlı bildirdi ki, layihə "Övladlığa götürmə sahəsində idarəetmənin təkmilləşdirilməsi ilə bağlı tədbirlər haqqında” Azərbaycan Respublikası Prezidentinin 2018-ci il 10 dekabr tarixli 393 nömrəli Fərmanına uyğun olaraq hazırlanıb. Düzəliş övladlığa götürülən uşaqların təhsil xərclərinin dövlət vəsaiti hesabına ödənilməsini ehtiva edir. Bu, ölkəmizdə övladlığa götürməni, xüsusilə az və orta təminatlı ailələr tərəfindən valideyn himayəsindən məhrum olan uşaqların övladlığa götürülməsini təşviq edəcək.

Deputatlardan Əli Məsimli, Məlahət İbrahimqızı və Kəmaləddin Qafarov qanun layihəsi ilə bağlı fikirlərini bildirdilər, valideyn himayəsindən məhrum olan uşaqlarla bağlı dövlətin üzərinə götürdüyü vəzifələri yüksək humanistlik kimi dəyərləndirdilər. Layihə ikinci oxunuşda qəbul edildi.

Milli Məclisin Ailə, qadın və uşaq məsələləri komitəsinin sədri Hicran Hüseynova "Valideynlərini itirmiş və valideyn himayəsindən məhrum olmuş uşaqların sosial müdafiəsi haqqında” qanunda dəyişiklik edilməsi barədə (ikinci oxunuş) layihəni şərh edərkən vurğuladı ki, bu qanun layihəsi də valideyn himayəsindən məhrum olmuş uşaqların övladlığa götürülməsinin stimullaşdırılması məqsədi daşıyır. Təklif olunan dəyişikliklərə əsasən, övladlığa götürülmüş uşaqların dövlət, bələdiyyə və özəl ali və orta ixtisas təhsili müəssisələrində və ali məktəblərin magistratura səviyyəsində ödənişli əsaslarla təhsil aldıqları müddətdə təhsil haqqının dövlət hesabına ödənilməsi nəzərdə tutulur. Komitə sədri bildirdi ki, birinci oxunuşda müzakirələr zamanı heç bir təklif qeydə alınmayıb. Qanun layihəsi təsdiqləndi.

Pedaqoji fəaliyyətinə qadağa qoyulan şəxsləri işə götürənlər cərimələnəcək

"Sosial müavinətlər haqqında” qanuna təklif olunan dəyişikliklərlə bağlı qanun layihəsini şərh edən parlamentin Əmək və sosial siyasət komitəsinin üzvü İlham Məmmədov bildirdi ki, bu layihə də "Övladlığa götürmə sahəsində idarəetmənin təkmilləşdirilməsi ilə bağlı tədbirlər haqqında” Prezidentin 2018-ci il 10 dekabr tarixli 393 nömrəli Fərmanına uyğun olaraq, valideyn himayəsindən məhrum olmuş uşaqların övladlığa götürülməsini stimullaşdırmaq və uşaqları övladlığa götürən ailələri dəstəkləmək məqsədilə hazırlanıb.

Deputat birinci oxunuşda müzakirədən sonra heç bir irad və təklifin səsləndirilmədiyini dedi və layihə səsə qoyularaq ikinci oxunuşda da təsdiqləndi.

Deputat İlham Məmmədov həmçinin Əmək, Cinayət və İnzibati Xətalar məcəllələrinə, "Uşaq hüquqları haqqında” qanuna təklif edilən dəyişiklikləri də ikinci oxunuşda təqdim etdi. Bildirdi ki, layihə "Gənclər siyasəti haqqında” qanuna uyğunlaşdırma xarakteri daşıyır. Layihə səsvermə yolu ilə təsdiq edildi.

Qısa müzakirədən sonra Azərbaycan Respublikasının Mülki Prosessual Məcəlləsində, Azərbaycan Respublikasının Cinayət Məcəlləsində, Azərbaycan Respublikasının Miqrasiya Məcəlləsində, Azərbaycan Respublikasının İnzibati Xətalar Məcəlləsində, "Yerli (bələdiyyə) vergilər və ödənişlər haqqında” və "Nağdsız hesablaşmalar haqqında” Azərbaycan Respublikasının qanunlarında dəyişiklik edilməsi barədə və Azərbaycan Respublikasının Vergi Məcəlləsində dəyişiklik edilməsi haqqında qanun layihələri də ikinci oxunuşda təsdiq edildi.

Əmək və sosial siyasət komitəsinin üzvü İlham Məmmədov Əmək Məcəlləsində, "Sağlamlıq imkanları məhdud şəxslərin təhsili (xüsusi təhsil) haqqında”, "Hüquqi şəxslərin dövlət qeydiyyatı və dövlət reyestri haqqında”, "Təhsil haqqında”, "Məktəbəqədər təhsil haqqında”, "Peşə təhsili haqqında”, "Əlilliyi olan şəxslərin hüquqları haqqında” və "Ümumi təhsil haqqında” qanunlarda dəyişiklik edilməsi barədə qanun layihəsini təqdim etdi. Birinci oxunuşdan sonra layihə üzərində heç bir düzəlişin aparılmadığı diqqətə çatdırıldı. Qanun layihəsi səsə qoyularaq təsdiqləndi.

Hüquq siyasəti və dövlət quruculuğu komitəsinin üzvü Nizami Səfərov İnzibati Xətalar Məcəlləsində dəyişiklik edilməsi haqqında qanun layihəsini ikinci oxunuşda təqdim edərkən vurğuladı ki, məcəlləyə yeni 192.12-ci maddə əlavə olunur. Əlavəyə əsasən, qanunla pedaqoji fəaliyyətlə məşğul olması qadağan edilən şəxslərlə pedaqoji fəaliyyətlə məşğul olmaq üçün əmək müqaviləsinin bağlanılmasına görə vəzifəli şəxslər üç min manat məbləğində cərimə ediləcəklər. Layihə səsə qoyularaq qəbul edildi.

Gündəliyin sonuncu məsələsi olan "Publik hüquqi şəxslər haqqında” Qanunda dəyişiklik edilməsi barədə layihəni Milli Məclis Sədrinin birinci müavini, Hüquq siyasəti və dövlət quruculuğu komitəsinin sədri Əli Hüseynli təqdim etdi. Qeyd edildi ki, təklif olunan dəyişikliyə əsasən, publik hüquqi şəxsin təsisçisi onun strukturu və işçilərin say həddi ilə yanaşı, əməkhaqqı fondunun həcmini də təsdiq edəcək. Layihə ikinci oxunuşda təsdiqləndi.

Rəşad BAXŞƏLİYEV

Azərbaycan.-2020.- 3 oktyabr.- S.2.