Hərbin gücü sülhün davamlılığını təmin edəcək

Dövlət siyasəti separatizmə, terrorçuluğa hesablanmış Ermənistana həddi bildirilmədən bölgədə əmin-amanlığın bərqərar olması mümkün deyil

30 il zaman üçün elə də böyük vaxt dilimi deyil, amma insan yaşamında bu 30 ilin qavramı ölçüyəgəlməz miqyasdadır...

Bizim üçünsə bu vaxt ölçüsü, 30 illik Qarabağ düyünü, ana yurda duyduğumuz bir qərinəlik həsrətin adı, vətənli xatirələrin zaman girdabında öləziyib solğunlaşma məqamıydı...

Həm də, elə sözün əsl mənasında, bir igidin ömrüydü...

Qəddarlıqla öldürülən xocalılı bir ananın qolları arasında sağ tapılan bir körpənin ömrü...

O körpə ki, indi hünər meydanında yer üzünün qatilləri erməni terrorçularına divan tutur, ədalət qılıncının altından keçməyə, 30 il əvvəl günahsız insanların qanını tökdükləri torpağa baş əyməyə məcbur edir...

Bu gün də Bakının mərkəzində ermənilərin dini məbədi, məzarlıqları qorunub saxlanılır...

Sülhsevərlik, humanizm, insanpərvərlik Azərbaycan xalqının təməl dəyərlərindən birincisidir. Bu diyarda millətindən, dilindən, dinindən asılı olmayaraq hər kəsə eyni gözlə baxılır, dini inanclarına sayğı göstərilir. Bəşəriyyətə örnək milli-mənəvi dəyərlərimizin özəlliyi, unikallığı ondadır ki, əsrlər boyu müxtəlif dinlərin, xalqların nümayəndələri Azərbaycanda bir ailə kimi sülh, əmin-amanlıq, mehribanlıq şəraitində yaşayıblar, yaşayırlar...

O da faktdır ki, Azərbaycan xalqı ona düşmənçilik edənlərə qarşı da həmişə tolerant yanaşma sərgiləyib. Ermənistan tərəfindən işğal olunan torpaqlarımızdakı dini ocaqların, məscidlərin, məzarlıqların dağıdılmasına baxmayaraq, bu gün də Bakının mərkəzində ermənilərin dini məbədi, məzarlıqları qorunub saxlanılır, onlara qarşı heç bir hörmətsizlik edilmir. Tolerantlığın, milli dözümlüyün bu fövqəlbəşər nümunəsinə isə dünyanın heç bir yerində rast gəlmək mümkün deyildir...

Bəzən sülhün bərqərar olması üçün savaşmaq lazım gəlir

Bütün bu faktlar isə onu deməyə əsas verir ki, Azərbaycan sülh diyarıdır və işlətdiyimiz bu ifadədə qətiyyən pafosa, ifrata varmamışıq.

Amma o da təəssüfləndirici faktdır ki, bəzən sülhün bərqərar olma yolu müharibədən keçir. Haqqın, ədalətin bərpa olunması üçün savaşmaq lazım gəlir...

Elə indi Qarabağda igid əsgərlərimizin savaşdığı kimi...

Yuxarıda xalqımızın ömrünə yazılmış 30 illik bir zaman dilimindən bəhs etdik, bu tarixin taleyimizdə hansı acı izlər buraxdığına dair bir neçə misal çəkdik. Onu da deməliyik ki, bu 30 il, həm də azərbaycanlıların səbir illəri, sülhə nail olmaq üçün verdiyi dözüm nümayişi kimi tarixə düşdü.

Amma heyhat, qarşımızdakı bu ali hisslərdən çox-çox uzaq düşmən, sülhün düşməni kimi davranır, hər fürsətdə azğınlığını, təcavüzkarlığını daha da artırır, təxribatlarını davam etdirirdi. Amma açıq savaşda deyil, hiyləgərliklər edərək, tələlər quraraq, müdafiəsiz mülki əhalini hədəf alaraq...

İndi hər şey gün kimi ortada idi, dövlət siyasəti separatizmə, terrorçuluğa hesablanmış Ermənistana həddini bildirmədən, yerini göstərmədən bölgədə sülhün bərqərar olması mümkün deyildi. Artıq bu həqiqəti illərdir işğalçı dövlətə havadarlıq edən, ona arxa duraraq daha da azğınlaşmasına şərait yaradan beynəlxalq aləm də anlamağa başladı.

Ermənistanın ağılsız və uğursuz cəhdi

İyul təxribatları zamanı aldığı layiqli cavabdan dərs çıxarmağı bacarmayan Ermənistan, sentyabrın 27-də yenidən Azərbaycanın sərhədində təxribat törətməyə, mülki əhalini hədəf almağa başladı. İdbar əməlləri ilə özlərinin hansısa çirkin planlarını həyata keçirmək üçün ağılsız və uğursuz bir cəhd etdi. Və elə bu ağılsız cəhdləri ilə də, həm siyasi müstəvidə, həm beynəlxalq arenada, həm də hərb meydanında məğlubiyyətlərinin altına böyük bir imza atdı.

Azərbaycan Silahlı Qüvvələrinin Ali Baş Komandanı cənab İlham Əliyevin bütün müstəvilərdə uğurlu şahmat gedişi qarşısında "mat”, Şanlı Ordumuzun ildırım sürətli hücumları ilə tar-mar oldu düşmən. Bir həmləsi ilə düşmənin murdar ayağını qarış-qarış torpağımızdan qazıyıb atan igid əsgərlərimiz xalqa zəfər müjdəsi verməyə, haqqın, ədalətin rəmzi Azərbaycanın üçrəngli müqəddəs bayrağını vətən torpağında, zirvələrimizdə dalğalandırmağa başladı...

Hayların can hayı...

Bəli, həm də bu 30 ildə bütün erməni əsgərlərinin şüuraltısına, beyninə bir həqiqət işləmişdi, "bir gün, zorla yiyələnmək istədiyimiz bu torpaqları sahibləri geri qaytaracaq və o gün bizim üçün qiyamət, haqqın hesabını verəcəyimiz sonumuz olacaq”.

Artıq erməni əsgəri özgə torpağının ayağının altından qaçdığı, Azərbaycan xalqı üçün müqəddəs günün yetişdiyini başa düşür. Silahını, postunu, döyüş bayrağını qoyub ardına baxmadan Qarabağdan qaçır...

Erməni əsgərləri qorxur, can hayındadır, amma bilməlidir ki, şücaətli Azərbaycan əsgəri onlar kimi namərd, zəif, müdafiəsiz insanların üzərində güc sınayan insafdan uzaq xain deyil.

Onların qarşısında bəşəriyyətə insanlıq dərsi verən, humanizm nümunəsi göstərən, müharibədə belə sülhsevər davranışı ilə seçilən mərd Azərbaycan oğulları dayanıb.

Düşmən hərbçilərinə həyatlarını qurtarmaq yolu göstərildi

Azərbaycan Ordusu beynəlxalq humanitar hüquqa əməl edir. Müdafiə Nazirliyinin Mətbuat xidmətinin mətbuat katibi, polkovnik-leytenant Anar Eyvazov məlumat verərək bildirdi ki, bununla bağlı Azərbaycan Ordusunun bölmələrinə, xüsusən də ön xətt bölmələrinə broşür paylanılıb. Həmin broşürlər dərs vəsaiti olaraq tədris edilir: "Həmin broşürlərin bir üzündə döyüş zamanı yaralılara, zərərçəkmişlərə ilkin tibbi yardımın göstərilməsi qaydaları əksini tapıb. Digər tərəfində isə döyüşçülərin davranış qaydaları göstərilib. Yəni hərbi qulluqçu döyüşdə necə davranmalıdır, kimləri hədəfə almalıdır və kimləri hədəfə almamalıdır kimi legitim məsələlər izah olunur”.

Anar Eyvazov onu da vurğulayıb ki, Beynəlxalq hümanitar hüquqda əksini tapan prinsiplər bizim xalqımız, Ordumuz üçün yeni deyil. Bunlar bizim milli mentalitetimizdə, dinimizdə, Ordumuzda mövcuddur: "Bunlar bizə çox yaxşı tanışdır və Azərbaycan qanunvericiliyində öz əksini tapıb. Azərbaycan Ordusunun döyüşün qızğın vaxtında belə döyüşdə iştirak etməyənlərə qarşı necə davranmalı olduğu təlimlərdə aşılanıb”.

A.Eyvazov deyib ki, Beynəlxalq Qırmızı Xaç Komitəsi, Dini Qurumlarla İş üzrə Dövlət Komitəsi və digər qurumlarla birgə əməkdaşlıq şəraitində müntəzəm olaraq hərbi qulluqçularımıza mülki əhali və əsirlərlə bağlı davranış normaları ilə bağlı məlumatlar təlimlərdə müntəzəm olaraq çatdırılıb: "Azərbaycan Ordusunun hədəfi yalnız Ermənistan silahlı qüvvələrinə məxsus legitim hərbi hədəflərdir”.

Eyni zamanda Azərbaycan humanitar dəhlizlərin açılması, beynəlxalq humanitar hüququn norma və prinsiplərinin tətbiq edilməsinə hazır olduğunu bəyan edib və bununla bağlı erməni əhalisinə müraciət edib.

Mətbuat katibi qeyd edib ki, müraciət həyatını qurtarmaq məqsədilə könüllü qaydada təslim olmaq istəyən düşmənin hərbi qulluqçularına da şamil edilib.

Azərbaycanın haqq savaşı Qafqazda təməlli sülhə yol açacaq

Onu da vurğulamalıyıq ki, Azərbaycan Ordusu əks-hücum əməliyyatı zamanı qadağan olunmuş silah növlərindən istifadə etmir. Həm də igid əsgərlərimiz Ermənistan hərbçilərindən fərqli olaraq, mülki obyektləri hədəfə almır. Hətta qarşı tərəfdəki mülki insanlara müraciət olunaraq hərbi obyektlərdən kənarda olmaları tövsiyə edilib.

Amma hərb cəbhəsində Şanlı Ordumuza uduzan Ermənistan sərhəddən kilometrlərlə uzaqda yerləşən Azərbaycan ərazilərinə, əhalinin sıx yaşadığı şəhərlərə qadağan olunmuş silahlardan atəş açır. Sonuncu çıxış yolu kimi məkrli cəhdə əl ataraq dinc əhalini hədəfə alır, insanlarda qorxu, təlaş yaratmağa çalışır. Onlar insanlığı hədəf almış bu dəhşətli planları ilə bir daha təkzibolunmaz faktlarla sübut edirlər ki, Ermənistanın terrorçu əməllərinin qarşısını yalnız müharibə ilə, ona layiqli cavab verməklə almaq mümkündür.

Bu gün Azərbaycan Qarabağı yağı tapdağından azad etməklə, təkcə öz torpaqlarının bütövlüyünü bərpa etmir, həm də Qafqazda sülhün var olmasına, Ermənistanın digər qonşu ölkələrə qarşı torpaq iddiasına da birdəfəlik son qoyur.

Əminik ki, hərb salnamələrinə qızıl hərflərlə yazılacaq Azərbaycanın bu haqq savaşının nəticələri, müasir dünyamızın əmin-amanlıq təməli üçün də böyük zəmin yaradacaq.

Yasəmən MUSAYEVA

Azərbaycan.-2020.- 10 oktyabr.- S.8.