Gəncə və qərb bölgəsi üzrə Rus İcması: Ermənistanın mülki əhalini hədəf seçməsindən narahatdır BƏYANAT

Ermənistanın mülki əhalini atəşə tutması ilə bağlı Gəncə və qərb bölgəsi üzrə Rus İcması bəyanat yayıb.

AZƏRTAC bəyanatın mətnini təqdim edir:

“Biz – Gəncə və qərb bölgəsi üzrə Rus İcması olaraq bəyan edirik ki, işğalçı Ermənistan beynəlxalq humanitar hüququn norma və prinsiplərinin, Cenevrə Konvensiyalarının, o cümlədən “Müharibə zamanı mülki əhalinin müdafiəsi haqqında” 1949-cu il 12 avqust tarixli konvensiyanın, habelə BMT-nin Uşaq Hüquqları Konvensiyasının və insan hüquqları sahəsində digər sənədlərin müvafiq müddəalarını kobud şəkildə pozmağa davam edir.

Belə ki, Azərbaycanın bir sıra şəhər və rayonları ilə yanaşı, son iki gündür döyüş bölgəsi olmayan Gəncə şəhəri də Ermənistan tərəfindən ağır artilleriya atəşinə tutulur. Bunun nəticəsində 1 mülki şəxs həlak olub, 30-dan çox dinc sakin, o cümlədən biri 10 aylıq olmaqla, 6 uşaq və biri digər millətdən olan şəxs müxtəlif dərəcəli bədən xəsarəti alıb, şəhərin infrastrukturuna böyük ziyan dəyib.

Biz - ərazidə yaşayan etnik rus əhalisi Ermənistan tərəfinin mülki əhalini hədəf seçməsindən narahatıq, Ermənistan rəhbərliyinin təcavüzkar hərəkətlərini qətiyyətlə pisləyir, Azərbaycan Respublikasının Prezidenti İlham Əliyevin Dağlıq Qarabağ münaqişəsinin nizamlanması prosesi ilə bağlı mövqeyini və fəaliyyətini tam dəstəkləyirik”.

Qeyd edək ki, Gəncədə 1500-ə yaxın rus yaşayır.

Azərbaycan.-2020.- 9 oktyabr.- S.11.