Paytaxt sakinlərinin növbəti arzusu reallığa çevrildi

Mərdəkan-Zuğulba yolu üzərindəki piyada keçidinin dizaynı italiyalı mütəxəssis tərəfindən hazırlanıb

Son 16 ildə Azərbaycanda nəhəng infrastruktur layihələri həyata keçirilib. Onların bir çoxu beynəlxalq və regional əhəmiyyətli layihələrdir. Bu gün Şərqlə Qərbi birləşdirən nəhəng layihələrin təşəbbüskarı da Azərbaycandır. Həmin istiqamətdə görülən işlərin sayəsində indi Çindən Avropaya və əks istiqamətə ölkəmiz üzərindən yüklər daşınır.

Bununla yanaşı, ölkə daxilində də infrastruktur layihələrinin icrasına xüsusi önəm verilir. Ötən 16 il ərzində çoxsaylı yol-nəqliyyat infrastrukturu, enerji və qaz verilişi xətlərinin çəkilməsi layihələri icra edilib. Bu gün Azərbaycanda yol infrastrukturu yüksək səviyyədə qurulub. Elə bu səbəbdən də ölkəmiz avtomobil yollarının inkişaf səviyyəsinə görə dünyada 34-cü yerdədir.

Hazırda kəndarası yolların tikintisinə başlanılıb. Bu gün Azərbaycanın ucqar dağ kəndlərinə belə, rahat asfalt yollar çəkilir. Həmin yollar kənd camaatının gediş-gəlişini asanlaşdırmaqla bərabər, istehsal olunan kənd təsərrüfatı məhsullarının bazarlara itkisiz daşınmasını da təmin edir. Bu məsələdə daha bir xoş soraq odur ki, qarşıdakı bir neçə ildə bütün kəndarası yolların asfaltlaşdırılmasının başa çatdırılacağı gözlənilir.

Prezident İlham Əliyev ölkəmizin paytaxtı Bakı şəhərində də yol infrastrukturunun yüksək səviyyədə inkişafına xüsusi diqqət yetirir. Dövlət başçısının sentyabrın 9-da Mərdəkan-Zuğulba avtomobil yolunda yerüstü piyada keçidinin açılışında iştirakı bunu bir daha təsdiq edir. Keçid Prezident İlham Əliyevin imzaladığı sərəncama əsasən, Bakı şəhərinin və onun qəsəbələrinin sosial-iqtisadi inkişafına dair Dövlət Proqramı çərçivəsində inşa edilib.

Dövlət başçısına məlumat verilib ki, ümumi uzunluğu pandustlarla birlikdə 180 metr olan keçid üç dayaq üzərində torşəkilli metal konstruksiyalardan quraşdırılıb. Onun orta hissəsinin uzunluğu 52, eni 4,5 metrdir. İtaliyalı dizaynerin təxəyyülünün məhsulu olan bu keçidin konstruksiyaları yerli mütəxəssislər tərəfindən hazırlanıb.

Yerüstü piyada keçidi tikilərkən ətrafdakı yaşayış massivi, məktəbin mövcudluğu, insanların daha çox yolun bu hissəsindən istifadəsi və digər amillər nəzərə alınıb. Keçidin istifadəyə verilməsi bu yoldan istifadə edən insanların təhlükəsizliyinin təmin edilməsində mühüm rol oynayacaq.

Xatırladaq ki, ötən 16 il ərzində ölkənin paytaxtında 113 piyada keçidi istifadəyə verilib. Onlardan 41-i yerüstü, 72-si isə yeraltı piyada keçididir. Bununla yanaşı, ölkə əhəmiyyətli magistral yollarda da 64 yeraltı və yerüstü piyada keçidi inşa edilib. Həmçinin Qəbələ, Quba, Zaqatala rayonlarının hər birində piyada keçidləri tikilərək əhalinin ixtiyarına verilib. Hazırda ölkə üzrə avtomobil yollarında 9 ərazidə yeni piyada keçidlərinin inşası həyata keçirilir.

R.KAMAL

Azərbaycan.- 2020.- 11 sentyabr.- S.5.