İnkişafa yol
açan fəaliyyət
Heydər Əliyev
Fondunun ölkədə aparılan təhsil islahatlarına
misilsiz töhfələri var
Bəşəriyyətin
keçib gəldiyi tarixi yol təhsilin fərdlər, ümumən
cəmiyyət üçün nə qədər
böyük önəm daşıdığını təsdiqləyir.
Bu gün dünyanın inkişaf etmiş bütün ölkələri
öz tərəqqilərinə görə məhz təhsilə
borcludurlar. Elm-bilik mühitinin yaradılmasına dəstək
isə hər bir şəxsiyyətin aid olduğu xalqa,
dövlətə verə biləcəyi ən böyük
töhfədir.
Son
illər iqtisadiyyatımız, elmimiz, təhsilimiz daha geniş
inteqrasiya proseslərinə cəlb olunub. Həyata keçirilən
tədbirlər sayəsində həm infrastruktur yenilənir,
həm də kadr potensialı müasir dünyanın tələblərinə
uyğun tərzdə formalaşdırılır. Ölkəmizin
iqtisadi qüdrəti gənclərimizin yeni bilik, bacarıq,
informasiya və texnologiyaları mənimsəmə qabiliyyəti
ilə bilavasitə bağlıdır. Ona görə də
Prezident İlham Əliyev intellektual potensialın zənginləşdirilməsini,
elm və təhsil ocaqlarımızın iqtisadi islahatlarla həmahəng
inkişafını öz çıxışlarında
dönə-dönə aktuallaşdırır.
Hazırda
aparılan köklü islahatlar bu sahənin müasir
standartlara cavab verən yeni bir mərhələyə
keçidini təmin edir. Reallaşdırılan prosesin əsas
amili olan kadr potensialının formalaşdırılması
missiyasını isə Azərbaycan təhsili yerinə
yetirir. Ona görə də dövlət
başçısı milli təhsil sistemimizin ölkənin
inkişaf tələblərinə
uyğunlaşdırılmasını, müasir
çağırışlara hazır olmasını
mühüm istiqamət kimi qarşıya qoyur.
Ali məqsəd
Ölkə
təhsilinin inkişafında Azərbaycanın Birinci
vitse-prezidenti Mehriban xanım Əliyevanın
gördüyü işlər maarifçilik tariximizin
böyük bir səhifəsini təşkil edir.
Birinci
xanımın xeyirxah əməlləri işığında
artıq bütöv bir nəsil yetişir. Xüsusilə gənclərdə
vətənpərvərlik ruhu güclənir. Heydər
Əliyev Fondunun yarandığı gündən
aparıcı bir fəaliyyət sahəsi mövcuddur: bu, təhsil
və geniş mənada sosial tərbiyə məsələləridir.
Həmin məsələlər, əslində,
xalqımızın gələcəyini qurmağın
mühüm yollarıdır. "Bu gün hər bir dövlətin,
hər bir cəmiyyətin bundan önəmli hədəfi
yoxdur”, deyir Mehriban xanım. İndi xeyriyyəçilik fəaliyyəti,
hansısa yaxşılıqlara vəsilə olmaq arzusu gənclər
arasında geniş yayılır. Xoş əməllər
ortaya qoymaq, başqalarına kömək göstərmək,
cəmiyyət üçün faydalı işlər görmək
istəyi getdikcə daha çox gəncimizin həyat tərzinə
çevrilir. Onlar sosiallaşırlar, nəcib niyyətlər
ətrafında bir araya gəlmələri ilə müsbət
nəticələr yaradırlar.
Bu,
çox sevindiricidir. Deməli, Mehriban xanımın illərdən
bəri fədakarlıqla gördüyü işlər öz
məqsədlərinə çatır. Cəmiyyətimizin gələcəyi
bu dəyərlər ruhunda formalaşır. Heydər
Əliyev Fondu Ulu Öndərin təməlini qoyduğu və
Azərbaycan Prezidentinin əzmlə davam etdirdiyi təhsil
islahatlarına miqyası görünməyən töhfələr
verir. İlk növbədə təhsilin maddi-texniki
bazasının inkişaf etdirilməsi, onun keyfiyyətinin
yüksəldilməsi, dünya təhsili ilə əlaqələrinin
yaradılması prosesinə daim diqqət yetirir. Ümumiyyətlə,
fondun milli maarifçilik xəttinin həyata keçirilməsi
sahəsində gördüyü işlər konkret çərçivə
ilə məhdudlaşmır - məktəb tikintisindən
tutmuş UNESKO və ICESCO ilə konkret təhsil
proqramlarının həyata keçirilməsinədək
geniş spektri əhatə edir. Qısa müddət ərzində
uğurla gerçəkləşdirilən bu layihələr
cəmiyyətdə geniş rezonansa səbəb olmuş,
böyük rəğbət və etimadla
qarşılanmışdır.
Mehriban
xanım Əliyevanın fəaliyyətinin ali məqsədlərindən
biri ölkəmizin təhsil sisteminin qabaqcıl dünya
standartları səviyyəsinə yüksəldilməsidir.
Fond fəaliyyətində bu məqsədə doğru
ardıcıl addımlar atır, ölkəmizin bu
günü və gələcəyi üçün
böyük mənəvi dəyərlər yaradır.
Cəmiyyətdə
böyük əks-səda doğuran layihə
İnkişaf
dəyişiklikdir. Mütərəqqi ənənələr
üzərində yeni dəyərlərin
yaradılmasıdır. Həyatımızdakı ən
böyük dəyişikliklər isə məhz təhsillə,
məktəblə başlanır. Heydər Əliyev Fondu
2005-ci ildə "Yeniləşən Azərbaycana yeni məktəb”
çağırışını irəli sürməklə
cəmiyyət həyatında böyük bir dəyişikliyin
əsasını qoydu. Mehriban xanım Əliyevanın bu təşəbbüsü
çox böyük ictimai dəstək qazandı. Təhsilə
insanlarımızın marağını artırdı.
"Yeniləşən Azərbaycana yeni məktəb” layihəsinin
məqsədi təhsil sahəsindəki mövcud problemlərin
həllinə kömək göstərmək, ölkə
miqyasında müasir standartlara cavab verən təhsil kompleksləri
yaratmaq, tədrisin səviyyəsinə bilavasitə təsir
edən problemləri aradan qaldırmaq, cəmiyyətin
müxtəlif təbəqələrinin, yerli və xarici
şirkətlərin, beynəlxalq təşkilatların bu sahədə
birgə əməkdaşlıq imkanlarını müəyyənləşdirərək
ümumi işin xeyrinə yönəltməkdir.
Proqram
çərçivəsində ölkənin müxtəlif
bölgələrində yüzlərlə məktəb
binası inşa olundu və yenidən quruldu. Bu məktəblərin
hər birində müasir laboratoriya, kitabxana, yeməkxana, ən
son avadanlıqla təchiz edilmiş kompüter otaqları,
emalatxana, idman zalları, geniş meydançalar və
ayrıca istilik sistemi yaradıldı. Bununla tam fərqli,
müasir, müsbət dəyişikliklərlə zəngin təhsil
mühitinin qapıları gənc nəslin üzünə
açıldı.
Heydər
Əliyev Fondu "Yeniləşən Azərbaycana yeni məktəb”
layihəsinin uğurları ilə göstərdi ki, təhsil
kimi strateji, cəmiyyət üçün həyati vacib sahələrdəki
mövcud problemlərin yoluna qoyulmasını yalnız
dövlətdən ummaq düzgün deyil. Bu sahədə
inkişafa hər kəs bacardığı dəstəyi
göstərməlidir. Çünki təhsil adına
görülən hər kiçicik bir işin nəticəsi
müəyyən müddətdən sonra çox
böyük faydalarla geri dönür.
"Yeniləşən
Azərbaycana yeni məktəb” layihəsinin xoş bəhrələrini
artıq gündəlik həyatımızda hiss etməkdəyik.
Bu layihə çərçivəsində tikilmiş, yenidən
qurulmuş məktəblərdə vaxtilə birinci siniflərə
gedənlər artıq məzun olmaq ərəfəsindədirlər.
Təhsilini müəyyən siniflərdən sonra məhz həmin
yenilənmiş məktəblərdə davam etdirmiş gənclərimizin
bir qismi isə artıq ali məktəbləri də başa
vurublar. Onlar bu məktəblərlə dövlətimizin diqqət
və qayğısını, gücünü, ali məqsədlərini
görüb hiss ediblər. Layihə yenə də davam
etdirilir. Mərkəzi şəhərlərimizdə və
ucqarlarda inşa edilən, yaxud yenidən qurulan təhsil
ocaqları ilə maarif nurunu insanlara yetirir.
Qala
qəsəbəsindəki 216, Gəncə şəhərindəki
34, 18 nömrəli, Salyanda Ərəbqardaşbəyli kənd,
Şamaxıda Məlikçobanlı kənd, Ağsu rayonunda
Bico kənd, Şamaxı rayonunda Meysəri kənd tam orta məktəblərinin
binaları və başqaları son dövrlər bu layihə
çərçivəsində uğurla yerinə
yetirilmiş işlərdir.
Bu
günlərdə isə "Yeniləşən Azərbaycana
yeni məktəb” layihəsi çərçivəsində
Yasamal rayonunda Vaqif Mustafazadə adına 2 nömrəli
Uşaq İncəsənət Məktəbi istifadəyə
verildi. Görkəmli musiqiçi-bəstəkarın
adını daşıyan bu məktəbdə
yaradılmış şərait və bütün bu işlərin
pandemiya dövründə həyata keçirilməsi bir daha
göstərdi ki, dövlətimizin əzmkarlığı,
elmə, təhsilə, sənətə qayğısı
qarşıya çıxan bütün maneələrdən
daha güclüdür. Heç bir çətinlik bizi
tutduğumuz inkişaf yolundan çəkindirə bilməz
Təhsilə dəstək
Mehriban
xanım Əliyevanın təşəbbüsü ilə
Heydər Əliyev Fondunun təhsil sahəsində
reallaşdırdığı möhtəşəm layihələrdən
biri də "Təhsilə dəstək”dir.
Bu layihə Ermənistanın Azərbaycana təcavüzü
nəticəsində daimi yaşayış yerlərini tərk
etmiş qaçqın, məcburi köçkün ailələrindən
olan birinci sinif şagirdlərinə fond tərəfindən
çanta və məktəb ləvazimatı hədiyyə
edilməsi ilə başlandı və hər il xeyirxah bir ənənəyə
çevrildi. Qısa zamandan sonra "Təhsilə dəstək”
hüdudlarını daha da genişləndirdi. Layihə
çərçivəsində Gürcüstanın azərbaycanlılar
yaşayan bölgələrindəki təhsil ocaqlarına, həmçinin
Azərbaycanın Qax, Zaqatala və Balakən rayonlarında tədrisin
gürcü dilində aparıldığı məktəblərə
mütəmadi olaraq yeni dərslik və tədris ləvazimatları
göndərilir. Bir sıra xarici təşkilat və şirkətlərin
("World Vision”, "JP Morgan”, "Exxon Mobil”, Rusiyanın
"Puşkin kitabxanası” Fondu) fonda hədiyyə etdikləri
müxtəlif adda çoxsaylı nəşrləri ölkənin
ali və ümumtəhsil məktəblərinə, uşaq
evləri və internatların kitabxanalarına paylanmağa
başlandı.
"Təhsilə
dəstək” layihəsi çərçivəsində indiyə
qədər Gürcüstan, Misir, Rumıniya, Rusiya
Federasiyası, Pakistan, Hollandiya, Vyetnamda bir sıra məktəblər
yenidən qurulub və əsaslı təmir olunub.
Pakistanın Müzəffərabad şəhərinin Rara ərazisində
zəlzələdən sonra dağılmış orta məktəb
binasının inşası bu baxımdan Heydər Əliyev
Fondunun ən uğurlu və rəğbət doğuran layihələrindən
biridir. Yada salaq ki, həmin məktəb qızlar
üçündür. Bu da bütün dünyada
qızların təhsilinin, ictimai fəallığının,
iqtisadi müstəqilliyinin təmin olunmasının Heydər
Əliyev Fondu üçün nə qədər böyük
önəm kəsb etdiyini göstərir.
Fondun
təşəbbüsü ilə Gürcüstanın Dmanisi
rayonunda yeni kompüter tədris mərkəzinin binası
inşa edilərək istifadəyə verilib. Eyni şəkildə
Marneuli şəhərindəki 7 nömrəli Azərbaycan
ümumtəhsil məktəbi, Tiflisdəki M.F.Axundzadə
adına 73 nömrəli orta məktəb, Qardabanidəkı
3 nömrəli Azərbaycan məktəbi və Dmanisidəki
2 nömrəli Azərbaycan beynəlxalq orta məktəbi əsaslı
təmir olunub. Həmçinin Bolnisi rayonunun Həsən
Xocalı və Cəfərli kəndlərində yeni məktəb
binaları inşa edilib.
Uşaq evləri və
internat məktəblərinin inkişafı
Fondun
təhsil sferasında illərdən bəridir ki,
reallaşdırdığı layihələrdən biri də
"Uşaq evləri və internat məktəblərinin
inkişafı proqramı”dır. Azərbaycanda
kimsəsiz uşaqlar üçün nəzərdə
tutulmuş müəssisələrə sığınan
körpələrin problemlərinin həlli hər zaman qurumun
qarşıya qoyduğu əsas vəzifələrdən
olmuşdur. Bu proqram bilavasitə fondun prezidentinin təşəbbüsü
ilə hazırlanmış, mövcud problemlər öyrənilmiş,
onların aradan qaldırılması üçün konkret
işlər görülmüşdür. Layihə çərçivəsində
görülən tədbirlər də Mehriban xanım
Əliyevanın təşkilatçılığı, daimi
nəzarəti ilə həyata keçirilməkdədir.
Proqramı uğurlu edən onun ciddi bir təhlil əsasında
hazırlanması və icrası gedişində hər bir sahənin
dəqiqliklə nəzərə alınmasıdır.
Bakıda, ətraf qəsəbələrdə yerləşən
uşaq evlərində və internat məktəblərdə
mövcud problemlər öyrənilmiş, onların aradan
qaldırılması üçün konkret işlər
görülmüşdür.
"Uşaq
evləri və internat məktəblərinin inkişafı
proqramı” çərçivəsində respublika üzrə
40-dan çox uşaq müəssisəsi əsaslı şəkildə
təmir edilmiş, yeni avadanlıqlarla təchiz olunmuş, əlavə
yardımçı binalar tikilmiş, kommunal şərait
yaxşılaşdırılmışdır. Müəssisələrdə
kitabxanalar yaradılmışdır. Onlar müvafiq tədris
vəsaiti və bədii ədəbiyyatla təmin
olunmuşdur. Əksər uşaq evləri və internat məktəblərində
kompüter avadanlığı
quraşdırılmışdır. Sinif otaqları interaktiv
təhsil üçün
uyğunlaşdırılmışdır. Uşaqların hərtərəfli
inkişafına müvafiq şəraitin yaradılması məqsədilə
müəssisələrdə mütəmadi olaraq treninqlər
davam etdirilməkdədir.
2009-cu
ildən başlayaraq Mehriban xanım Əliyevanın təşəbbüsü
əsasında bu müəssisələrlə bağlı
daha bir xeyirxah iş həyata keçirilir. Uşaq evlərində
tərbiyə almış, yaşı 18-ə çatandan
sonra isə müstəqil həyata atılan gənclər
üçün Bakıda və bölgələrdə
yaşayış binaları tikilir. Onlar mənzillərlə,
öz peşə bacarıqlarına uyğun iş yerləri
ilə təmin olunurlar.
Məktəbəqədər
təhsil müəssisələrinin inkişafı
Heydər
Əliyev Fondunun uğurla reallaşdırdığı
işlərdən biri də "Məktəbəqədər
təhsil müəssisələrinin inkişafı” layihəsidir.
Layihə çərçivəsində Bakıda və
ucqarlarda 100-ə yaxın məktəbəqədər təhsil
müəssisələri inşa edilmiş, yaxud yenidən
qurularaq körpələrin istifadəsinə verilmişdir. Bu
proses indi də davam etdirilməkdədir.
Son
bir neçə ayda Gəncə şəhərində istifadəyə
verilmiş 32 saylı, Binəqədi rayonundakı 141,
Sabunçu rayonundakı 260, Yasamal rayonundakı 11 saylı
körpələr evi-uşaq bağçası, Bakıda
yenidən qurulmuş "Ümid yeri” uşaq
sığınacağı, İmişlidə, Şamaxı
şəhərində və Şamaxının Meysəri kəndində
yaradılmış körpələr evi-uşaq
bağçaları bu proqramın böyük uğurla icra
olunduğunu göstərir.
Təhsil
sahəsində beynəlxalq əməkdaşlıq istiqamətində
də çoxsaylı tədbirlər həyata keçirilir.
UNESKO-nun diqqətinin ölkənin təhsil problemlərinə
cəlb olunması nəticəsində təşkilatlarla
münasibətlər daha da dərinləşmiş, bir
neçə istiqamətdə əməkdaşlıq əlaqələri
qurulmuşdur. Bu əlaqələr əsasən "Təhsil
hamı üçün” proqramını, texniki peşə
sahəsində əməkdaşlıq, inklüziv təhsil
layihəsi, ali məktəblərdə UNESKO
kafedralarının yaradılması və digər sahələri
əhatə etmişdir.
* * *
Dünyada
bir insanın təhsilinə verilən dəstək ümumən
bəşəriyyətin rifahına xidmətdir. Cəhalətə
qarşı mübarizədə böyük qələbədir.
Mehriban xanım Əliyevanın Heydər Əliyev Fondunun xətti
ilə həyata keçirdiyi təhsil layihələri də
maarif işığını bütün dünyada yayır.
Cəhalətin, biliksizliyin və bunun gətirdiyi
saysız-hesabsız problemlərin, sıxıntıların
miqyasını kiçildir.
Heydər
Əliyev Fondunun bu layihələri həm də dünyaya yeni
bir Azərbaycan təqdim edir. Ölkəmizi dünyaya elm, təhsil,
mədəniyyət işığında tanıdır. Bizə
rəğbət bəsləyənlərin, bizimlə həmrəy
olanların sırasını genişləndirir.
Bu,
Ulu Öndər Heydər Əliyevin arzularında
yaşatdığı Azərbaycandır. Bu, Prezident İlham
Əliyevin tarixin ən qüdrətli çağlarına
yetirdiyi Azərbaycandır. Bu, Mehriban xanım Əliyevanın
öz xeyirxah əməlləri ilə hər birimizə daha
da doğmalaşdırdığı Vətəndir.
Və
bu Vətənə xidmət qürurumuz, şərəfimizdir!
İradə ƏLİYEVA
Azərbaycan.- 2020.-15 sentyabr.- S.1; 5.