Keçmiş ekoloji fəlakət zonasında yaradılan nəhəng sənaye parkı

Burada Peşə Təhsil Mərkəzinin fəaliyyətə başlaması iqtisadi inkişafın növbəti göstəricisidir

Azərbaycan sənayesində daha bir ilkə imza atıldı. Ölkədəki sənaye parkında ilk dəfədir Peşə Təhsil Mərkəzi yaradıldı. Sumqayıt Kimya Sənaye Parkında açılan bu mərkəz, ümumiyyətlə, Azərbaycan iqtisadiyyatının inkişaf tendensiyasının növbəti göstəricisidir.

Çünki bununla bir neçə strateji hədəfə nail olunur. Əvvəla, mərkəzin müasir infrastruktura malik olması tələbələrə dövrün tələblərinə uyğun bacarıq və peşə vərdişi qazanmağa imkan verəcək. İkincisi, təlim-tədris prosesində onlara bu bilgiləri elə parkın özünün yüksəkixtisaslı mütəxəssisləri aşılayacaq. Daha bir üstünlük tələbələrin bilavasitə Sumqayıt Kimya Sənaye Parkının müəssisələrində təcrübə keçmək imkanıdır. Nəhayət, onların iş yeri əldə etmək şansı olacaq.

Prezident İlham Əliyevin sözügedən mərkəzin açılışında iştirak etməsi bu hadisənin necə önəmli olduğuna bir daha dəqqət çəkir. Belə ki, bu cür müasir bir Peşə Təhsil Mərkəzinin məhz Sumqayıt Kimya Sənaye Parkında açılması təsadüfi deyil. Dövlətimizin iqtisadi siyasətinin mühüm tərkib hissəsi olan sənayeləşmədə bu parkın özünəməxsus rolu var. İndi ölkə iqtisadiyyatının qarşısında dayanan əsas məqsədlərdən biri tələbatın ödənilməsində yerli məhsulların payının artırılması, ixrac potensialının yüksəldilməsi, ümumilikdə, neft-qaz amilindən asılılığın daha da azaldılmasıdır. Sumqayıt Kimya Sənaye Parkı bu yolda inam və uğurla addımlayır.

Burada məhsul istehsalı və ixracı istiqamətində müsbət dinamika mövcuddur. Keçən il parkda 823 milyon manatlıq məhsul istehsal edilib və bunun təqribən 33 faizi ixrac olunub. Cari ilin birinci yarısında isə 534 milyon manatlıq məhsul buraxılıb. Bununla da Sumqayıt Kimya Sənaye Parkının ölkə sənayesinin qeyri-neft sektorunda xüsusi çəkisi 9,3 faiz təşkil edib. Qeyri-neft sənaye məhsullarının ixracında parkın xüsusi çəkisi 20 faiz olub. Daha bir mühüm göstərici hazırda parkda fəaliyyət göstərən müəssisələrdə 5500-dən çox insanın daimi işdə çalışmasıdır.

Prezident İlham Əliyev Peşə Təhsil Mərkəzinin açılışında bu barədə demişdir: "Biz daxili tələbatı nə qədər mümkünsə, yerli məhsullar hesabına təmin etməliyik. Burada Sumqayıt şəhərinin və xüsusilə Kimya Sənaye Parkının mühüm rolu var. Çünki biz son illərdə bu işləri görməklə buna böyük dərəcədə müvəffəq olmuşuq. İndi əsas işimiz ondan ibarətdir ki, baxmalıyıq, harada bizdə idxaldan asılılıq daha böyükdür və bunu əvəzləmək mümkündürsə, bunun üçün xammal varsa, yaxud da texniki-iqtisadi əsaslandırma buna imkan verirsə, mütləq həmin sahələrə böyük diqqət göstərilməlidir. Belə təşəbbüs göstərən şirkətlərə həm rezident statusu verilməlidir, eyni zamanda dövlət tərəfindən onlara kömək göstərilməlidir, güzəştli kreditlər ayrılmalıdır ki, biz idxaldan asılılığımızı maksimum dərəcədə azaldaq. Çünki hər bir ölkə buna çalışır və xüsusilə əhalisi artan ölkə - Azərbaycan buna mütləq çalışmalıdır”.

Sumqayıt Kimya Sənaye Parkında ixracyönümlü və idxalı əvəzləyə biləcək istehsalat sahələrinin yaradılmasına önəm verilir. Məsələn, burada Siqaret fabriki fəaliyyətə başlayıb və artıq statistikadan görünür ki, idxaldan asılılıq getdikcə azalır. 300 milyon manata qənaət etmək mümkün olub.

Fabrikin inkişaf potensialı da var. Prezident müəssisədə ikinci, üçüncü xətlərin də qurulmasını, istehsalın artırılmasını və buraxılacaq məhsulun hamısının ixraca getməsini tövsiyə edib. Müəssisənin genişləndirilməsi kənd təsərrüfatının tütünçülük sahəsinin inkişafına da təkan verəcək. Çünki hazırda siqaret istehsalında emal olunmuş tütün xaricdən alınır.

Sumqayıt Kimya Sənaye Parkı qısa müddətdə uğurlu yol keçib. Yeniləşən, güclənən Azərbaycanı onun da timsalında aydın görmək mümkündür.

Xatırladaq ki, İqtisadiyyat Nazirliyinin tabeliyində fəaliyyət göstərən "Sumqayıt Kimya Sənaye Parkı” MMC Prezident İlham Əliyevin 21 dekabr 2011-ci il tarixli fərmanına əsasən yaradılıb. 2013-cü il oktyabrın 3-də isə dövlət başçısının iştirakı ilə parkın təməlqoyma mərasimi keçirilib.

Sumqayıt şəhərində yerləşən və nəhəng infrastruktura malik parkın ərazisi 508 hektardan çoxdur. Əvvəllər burada ömrünü başa vurmuş, köhnəlib dağılmış müəssisələr yerləşib. Yaxın keçmişdə ekoloji fəlakət zonası olan bu ərazidə indi neçə-neçə gərəkli müəssisə yaradılıb.

2015-ci il oktyabrın 25-də parkın rezidentləri olan "Azertexnolayn” MMC-nin Texniki avadanlıqlar zavodunun açılışı və "SOCAR Polymer” MMC-nin Yüksək sıxlıqlı polietilen zavodunun təməlqoyma mərasimi keçirilib. 2017-ci il dekabrın 15-də 3 müəssisənin təməli qoyulub və 4 müəssisə açılıb. 2018-ci il iyulun 18-də "SOCAR Polymer” MMC-nin Polipropilen istehsalı zavodu istifadəyə verilib. Həmin il noyabrın 16-da isə parkda yerləşən Ferroərintilər zavodunun, Siqaret fabrikinin və İnşaat Kimyəviləri zavodunun açılışı olub. 2019-cu il yanvarın 16-da Karbamid zavodu, 2019-cu il fevralın 18-də "SOCAR Polymer” MMC-nin Yüksək sıxlıqlı polietilen istehsalı zavodu istismara daxil edilib. Nəhayət, bu il aprelin 6-da "Bakı Tekstil Fabriki” MMC tərəfindən yaradılan tibbi maska istehsalı müəssisəsinin açılışı olub.

Beləliklə, parkın ərazisinin 80 faizdən çoxunda artıq müəssisələr fəaliyyət göstərir. Yaxın iki-üç ildə qalan sahənin də dolacağı gözlənilir. Odur ki, Prezident qarşıya yeni vəzifələr qoymuşdur: "Yeni ərazilər lazımdır. Burada, Sumqayıtın ətrafında belə ərazilər çoxdur. Siz bəlkə o ərazilər üçün də artıq indidən plan işləyib tərtib edəsiniz ki, - o yerlərin təmizlənməsi, kommunikasiyaların çəkilməsi və digər lazımi məsələlər, - bu iş dayanmasın. Çünki xarici investorların ölkəmizə marağı artır, mən yerli investorları da istiqamətləndirmişəm ki, Azərbaycana pul qoysunlar. Beləliklə, burada inkişaf o qədər sürətli olmalıdır ki, həm işsizlik aşağı səviyyədə olsun, həm idxaldan asılılıq minimuma endirilsin, həm də ixrac qabiliyyətli məhsullar istehsal edilsin”.

Flora SADIQLI

Azərbaycan.- 2020.- 16 sentyabr.- S.1; 6.