Karantin rejiminin ləğvi də mümkün ola bilər

Bu həssas məqamda daha diqqətli davranaraq, sağlamlığımıza təhlükə olmayan normal həyata qayıdışı sürətləndirməliyik

Ötən il dekabrın 31-də Çin hökuməti Hubey əyalətinin Uhan şəhərində naməlum pnevmaniyanın yayılmağa başlaması barədə Ümumdünya Səhiyyə Təşkilatına məlumat verib və mütəxəssislər həmin xəstəliyə yeni növ koronavirusun səbəb olduğunu müəyyənləşdiriblər.

Ümumdünya Səhiyyə Təşkilatı tərəfindən COVID-19 adlandırılan virus infeksiyası martın 11-də pandemiya elan edildi. Artıq həmin vaxtdan yarım ildən çox müddət keçməsinə baxmayaraq, koronavirus addım-addım dünyanı zəbt etməkdə, gözlənilənin və arzuolunanın əksinə yoluxma zəncirini və ölüm sayını sürətlə artırmaqda davam edir.

BMT-nin Baş katibi Antonio Quterreş son mətbuat konfransında bildirib ki, koronavirus epidemiyası nəzarətdən çıxıb: "COVID-19 pandemiyasının yaratdığı böhran həyatımızdakı digər böhranlardan tam fərqlidir. Bu baxımdan Baş Assambleyanın bu il keçiriləcək iclası digər toplantılardan fərqli olacaq”.

O bildirib ki, tezliklə bəşəriyyətdə koronavirusdan ölən insanların sayı 1 milyonu keçəcək: "Koronavirus müasir dünyada sağlamlığımız üçün birnömrəli təhlükədir. Yalnız COVID-19-a qarşı vaksin pandemiyanın yaratdığı böhranı aradan qaldırmayacaq”.

Baş katibin sözlərinə görə, çoxları ümidini vaksinə bağlasa da, hazırda pandemiyanın qarşısını alacaq, gözləntiləri doğruldacaq vaksin əldə edilməyib. Antonio Quterreş yaxın 12 ay ərzində müalicəyə kömək edəcək, infeksiyanın yayılmasının qarşısını ala biləcək vasitələrdən istifadənin əhəmiyyətli dərəcədə vacib olduğunu vurğulayıb. COVID-19-un sərhəd tanımadığını qeyd edən Baş Katib diqqətə çatdırıb ki, bu gün hər kəs üçün əlçatan bir vaksinə ehtiyacımız var.

Hələlik vaksinlə bağlı tam nəticələr əldə edilmədiyinə görə, təhlükədən qorunmağın digər üsullarından istifadə etməyə məcburuq. Virus hava-damcı yolu ilə insandan-insana keçdiyi üçün əsas şərt sosial izolyasiya qaydalarına əməl etmək, maska taxmaq və gigiyena qaydalarına riayətdir.

Qəbul edilən qərarların arxasında əhalinin sağlamlığı və rifahının təmini dayanıb

Azərbaycanda koronavirusun yayılmağa başladığı ilk zamandan etibarən ona qarşı effektiv tədbirlərə start verilib, vətəndaşların həyatı, sağlamlığı prioritet məsələ kimi önə çıxarılıb. Pandemiya ilə mübarizədə qəbul edilən bütün qərarların arxasında məhz əhalinin sağlamlığı, rifahı, təhlükəsizliyinin etibarlı təmini dayanıb.

Prezident İlham Əliyevin rəhbərliyi altında qlobal bəlaya qarşı həyata keçirilən operativ, məqsədyönlü tədbirlər infeksiyanın yayılmasını məhdudlaşdırmağa, sanitar-epidemioloji vəziyyəti nəzarətdə saxlamağa imkan verib, kütləvi yoluxmanın qarşısını alıb. Məhz dövlət rəhbərinin tapşırığı altında pandemiyaya qarşı vaxtında görülmüş preventiv tədbirlər sayəsində Azərbaycan dünyanı bürümüş virusa qarşı mübarizədə nümunəvi ölkələr sırasında qərarlaşıb.

Müsbət dinamikanın tendensiya halını alması məhdudiyyətləri aradan qaldırır

Ölkədəki sanitar-epidemioloji vəziyyətin təhlilinə əsaslanaraq zamanında tətbiq edilən karantin rejimi və müəyyən məhdudiyyətlər hazırda koronavirusa yoluxma sayında əldə olunan nailiyyətlərə birbaşa stimul verib.

Eyni zamanda müsbət dinamikanın tendensiya halını alması pandemiya ilə bağlı tətbiq olunan xeyli məhdudiyyətin aradan qaldırılmasına səbəb olub, avqustun 5-dən etibarən sərt karantin rejimində yumşaldılmalara start verilib. Demək olar ki, əksər iş sahələri fəaliyyətini bərpa edib, rayonlararası gediş-gəliş bərpa olunub. Ən ümdəsi isə ölkə üzrə bütün təhsil müəssisələri pandemiya şərtlərinə uyğunlaşdırılmış formada fəaliyyətə başlayıb.

Təbii ki, ölkədəki sanitar-epidemioloji vəziyyətin təhlilinə uyğun olaraq, sentyabrın 30-dək müəyyən məhdudiyyətlər hələ də qüvvədə saxlanılıb.

Amma infeksiyaya yoluxma halları ilə bağlı vəziyyətdən asılı olaraq karantin rejiminin tamamilə aradan qaldırılması da mümkündür, əks təqdirdə isə, sərtləşdirmələrin tətbiqi qaçılmaz olar.

Xüsusilə də, yoluxma sayında müşahidə olunan müsbət dinamika, sağalanların sayının yüksək olması əhali arasında virusun yox olması kimi yanlış fikirlərə yol açmamalıdır.

COVID-19-la mübarizənin tam təsirli olması həm də vətəndaş məsuliyyətinə bağlıdır

Təbii ki, ölkədə koronavirusla bağlı bu kimi halların yaşanması arzuolunmazdır, şəhər və rayonlarımızda bütün sahələrdə epidemioloji vəziyyətin tələblərinə ciddi əməl olunması mütləqdir.

COVID-19-la aylardır respublikamızda aparılan mübarizənin tam təsirli olması həm də birbaşa vətəndaş məsuliyyətinə bağlıdır. Mütləq şəkildə tənəffüs yollarını qoruyan fərdi vasitələrdən istifadə etməli, insanlar arasında ara məsafəsinə dair tələblərə əməl etməli və pandemiyanın digər şərtlərini pozmamalıyıq.

O da həqiqətdir ki, dövlətimiz tərəfindən görülən zəruri tədbirlər, əhali tərəfindən qoyulan qaydalara əməl edilməsi sayəsində hazırda karantin rejiminin tamamilə ləğvinin bir addımlığındayıq. Bu həssas məqamda daha da diqqətli davranıb, sağlamlığımız üçün heç bir təhlükə olmayan normal həyata qayıtmağa çalışmalıyıq.

Yasəmən MUSAYEVA

Azərbaycan.- 2020.- 19 sentyabr.- S.1; 4.