2019-cu il dekabrın 23-də keçirilmiş bələdiyyə seçkilərində 6 yanvar 2020-ci il tarixli 66 saylı müraciətə baxılmasına dair

Azərbaycan Respublikası Mərkəzi Seçki Komissiyasının Qərarı

Qərar № 6/39

2019-cu il dekabrın 23-də keçirilmiş bələdiyyə seçkilərində 51 saylı Qusar seçki dairəsindən Mucuq bələdiyyəsi üzrə qeydə alınmış namizəd Rəhimxanov Alik Süvləddin oğlu 6 yanvar 2020-ci ildə Azərbaycan Respublikasının Mərkəzi Seçki Komissiyasına (Mərkəzi Seçki Komissiyası) ərizə ilə müraciət edərək həmin seçki dairəsinin 41 və 42 saylı seçki məntəqələrində səsvermə günü qanun pozuntularının araşdırılması barədə 51 saylı Qusar seçki dairəsi dairə seçki komissiyasının (dairə seçki komissiyası) qəbul etdiyi 28 dekabr 2019-cu il tarixli 24/128 saylı qərarını mübahisələndirmiş, həmin seçki məntəqələri üzrə seçkilərin nəticələrinin ləğv olunmasını xahiş etmişdir.

Müraciət Azərbaycan Respublikası Seçki Məcəlləsinin (Seçki Məcəlləsi) 112-ci və 112-1-ci maddələrinə və "Azərbaycan Respublikasının Mərkəzi Seçki Komissiyasına və dairə seçki komissiyalarına seçki hüquqlarının pozulması ilə əlaqədar şikayət və müraciətlərin verilməsi və onlara baxılması qaydaları haqqında Təlimat”ın tələblərinə uyğun olaraq Mərkəzi Seçki Komissiyasının nəzdində ekspert qrupunun üzvü tərəfindən araşdırılmış, bu barədə müvafiq rəy verilmiş və komissiyanın iclasında baxılmışdır.

Ərizəçi müraciətdə 41 və 42 saylı seçki məntəqələrində səsvermənin və səslərin hesablanmasının qanunauyğun aparılmadığını, onun maraqlarını təmsil edən müşahidəçilərə lazımi şəraitin yaradılmamasını, daşınan seçki qutusu ilə səsvermənin təşkil olunmamasını bildirmiş və şikayətinə bir ədəd elektron məlumat daşıyıcısı əlavə etmişdir.

Araşdırma prosesində müraciət etmiş qeydə alınmış namizəd A.S.Rəhimxanovla əlaqə saxlanılmış, araşdırma və iclasda iştirak etmək, digər hüquqlarının olması izah edilmiş, ona iclasın vaxtı barədə məlumat verilmişdir.

Həmçinin, dairə seçki komissiyasının mübahisələndirilən qərarı və digər sənədlər araşdırma materiallarına əlavə edilmişdir.

Dairə seçki komissiyası qərarını onunla əsaslandırmışdır ki, səsvermə günü seçki məntəqələrində baş verməsi ehtimal olunan qanun pozuntuları ilə bağlı iddia olunanlar səsvermənin keçirilməsi və ya səsvermənin nəticələrinin müəyyənləşdirilməsi zamanı 41 və 42 saylı seçki məntəqələri üzrə seçicilərin iradəsini müəyyənləşdirməyə imkan verməyən qanun pozuntuları olmadığından qeydə alınmış namizəd A.S.Rəhimxanovun müraciəti əsassız olduğundan təmin edilməməlidir.

Araşdırma zamanı müəyyən edilmişdir ki, səsvermə günü 51 saylı Qusar seçki dairəsinin 41 və 42 saylı seçki məntəqələrində seçicilər sərbəst şəkildə səs verərək öz iradələrini ifadə etmiş, səslərin sayılması prosesi düzgün aparılmış, məntəqə seçki komissiyasının səsvermənin nəticələrinə dair protokolu Seçki Məcəlləsinin tələblərinə uyğun olaraq tərtib olunmuşdur. Belə ki, səsvermə günü baş verməsi iddia edilən qanun pozuntuları öz təsdiqini tapmamış və bu hal səslərin sayılmasını müşahidə etmiş, 41 saylı seçki məntəqəsi üzrə səsvermənin nəticələrinə dair protokolun surətini almış müşahidəçilər D.E.Aslanovun, F.V.Abdıyevin, A.Ə.Əmirəliyevin, B.D.Rzayevin, Z.M.Niftiyevin, M.M.Mövlanovun, 42 saylı seçki məntəqəsi üzrə isə müşahidəçilər N.G.Əliyarovanın, P.D.Baloğlanovanın, K.A.Dadaşovun, qeydə alınmış, lakin seçilməmiş namizədlər A.N.Nurmətovun, Ş.S.Muradovun, həmçinin məntəqə seçki komissiyaları üzvlərinin izahatları ilə təsdiq olunur.

Həmçinin müəyyən edilmişdir ki, seçicilərin səsvermə otağından kənarda səs vermələri barədə adıçəkilən məntəqələrə seçicilər tərəfindən müraciət daxil olmamış və daşınan seçki qutusundan səsvermə üçün istifadə edilməmişdir.

Müraciətə əlavə olunmuş elektron məlumat daşıyıcısında olan səs yazısındakı məlumatların səsvermə günü mübahisələndirilən qanun pozuntuları ilə hər hansı bir əlaqəsinin olması öz təsdiqini tapmamışdır.

Göstərilənlərə əsasən şikayətin təmin edilməsi və dairə seçki komissiyasının 28 dekabr 2019-cu il tarixli 24/128 saylı qərarının ləğv olunması üçün hüququ əsaslar müəyyən edilmədiyindən müraciət əsassız hesab olunaraq təmin edilməməli və dairə seçki komissiyasının həmin qərarı dəyişdirilmədən saxlanmalıdır.

Yuxarıda göstərilənləri əsas götürərək Mərkəzi Seçki Komissiyası Seçki Məcəlləsinin 19.4-cü, 28.2-ci, 112-ci, 112-1-ci maddələrinə və "Azərbaycan Respublikasının Mərkəzi Seçki Komissiyasına və dairə seçki komissiyalarına seçki hüquqlarının pozulması ilə əlaqədar şikayət və müraciətlərin verilməsi və onlara baxılması qaydaları haqqında Təlimat”ın 1, 2, 4, 6, 7 və 8-ci hissələrinə əsasən qərara alır:

1. 2019-cu il dekabrın 23-də keçirilmiş bələdiyyə seçkilərində 51 saylı Qusar seçki dairəsindən Mucuq bələdiyyəsi üzrə qeydə alınmış namizəd Rəhimxanov Alik Süvləddin oğlunun 6 yanvar 2020-ci il tarixli 66 saylı müraciəti əsassız olduğundan təmin edilməsin, dairə seçki komissiyasının 28 dekabr 2019-cu il tarixli 24/128 saylı qərarı dəyişdirilmədən saxlanılsın.

2. Bu Qərar dərc edildiyi gündən qüvvəyə minir.

Sədr Məzahir Pənahov

Katib Arifə Muxtarova

Katib Mikayıl Rəhimov

08.01.2020-ci il

Azərbaycan.- 2020.- 9 yanvar.- S.7.