“Aqrar İnkişaf Könüllüləri” yeni layihəyə start verib

"Aqrar İnkişaf Könüllüləri” təşkilatı yeni layihəyə start verib. "Gənc Əkinçilər” adlanan layihənin əsas məqsədi bitkilərə düzgün aqrotexniki qulluq, gübrələrdən istifadə qaydaları, bitki zərərvericilərinə və xəstəliklərinə qarşı mübarizə tədbirləri barədə gənclərin maarifləndirilməsinə nail olmaqdır.

Lənkəran şəhər Dövlət Aqrar İnkişaf Mərkəzində (DAİM) layihənin açılış mərasimi keçirilib. Tədbiri giriş sözü ilə açan DAİM-in direktor müavini Alim Məmmədov ölkədə aqrar sahədə aparılan islahatlar barədə məlumat verib. O, dövlət tərəfindən insan kapitalının inkişafına göstərilən dəstək fonunda gənclərin şəxsi inkişaf meyillərini, bilik və bacarıqlarını daha da artırmasının vacib olduğunu qeyd edib.

Layihənin ilk günü iştirakçılar "Toxum emalı və toxumun saxlanılması qaydaları”, "Aqrar sahəyə dövlət dəstəyi və aqrar subsidiya qaydaları” mövzularında təlimlərdə iştirak ediblər. İkinci gün isə "Əkin və suvarma sistemləri”, "Bitki zərərvericilərinə və xəstəliklərə qarşı mübarizə”, "Bitkilərə düzgün aqrotexniki qulluğun edilməsi və gübrələrin verilməsi” mövzularında təlimlər keçirilib.

Azərbaycan.- 2020.- 30 yanvar.- S. 6.