Etimad ünvanı, inam mənbəyi

“Hər bir qadın üçün onun ailəsi, onun uşaqları həyatının ən vacib, ən mühüm hissəsidir. Mən özüm üç uşaq anası olaraq analıq missiyasını həyatımın ən vacib missiyası kimi dəyərləndirirəm. Mənim üçün çox vacibdir ki, həyat yoldaşım olduqca dolğun və gərgin iş günündən sonra evə gəlir və burada onu anlayır və dəstəkləyirlər, onu qiymətləndirir və sevirlər”.

Azərbaycan Respublikasının Birinci vitse-prezidenti, Heydər Əliyev Fondunun və Azərbaycan Mədəniyyət Fondunun prezidenti, Yeni Azərbaycan Partiyası Sədrinin birinci müavini, UNESCO və ICESCO-nun xoşməramlı səfiri... Amma onun bütün bunlardan başqa və böyük bir missiyası da var - ana olmaq. Ona görə də onun haqqında yazıya öz fikirləri ilə başladıq. Qadın, ilk növbədə, anadır, həyat yoldaşıdır, sonra övlad və onların ardınca bütün ictimai, siyasi, humanist missiyalar sıralanır. Qalır bunların öhdəsindən necə gəlmək...

Haqqında söhbət açdığımız xanım bütün bunların öhdəsindən layiqincə gəlməklə kifayətlənmir, fəaliyyəti bunlarla da bitmir. Hər qarşıdan gələn zaman onun çiyinlərinə başqa bir məsuliyyət qoyur. Daha doğrusu, o bu məsuliyyəti üzərinə götürür. Bəli, məsuliyyəti öz işinlə, əməlinlə şəxsiyyətinlə qazanırsan. Qazanırsan ki, dövlət, xalq yolunda daha böyük işlər görəsən. bu məsuliyyəti qazanan Mehriban xanım Əliyevadan danışırıq...

Sülh elçisi

Həyat yoluna nəzər saldıqca görürsən ki, Mehriban xanımın həyata keçirdiyi bütün layihələr, gördüyü işlər onun genetik kodundan və düşdüyü ailənin mühitindən gəlir. Səhiyyə, təhsil, mədəniyyət, ədəbiyyat sahəsində, xeyriyyəçilik işləri və nəhayət, dövlətçilik siyasəti dediklərimizə misaldır.

İnsan müəyyən bir yaşdan sonra sosial münasibətlər sisteminə daxil olur və üzərinə böyük bir ictimai məsuliyyət götürür. Bu, insan olmağın məsuliyyəti onun çiyinlərinə daha çox kamillik dönəmində düşür. Təbii ki, hamının daşıya biləcəyi yük deyil, seçilmiş bəndələrə şamil olunur. Bəlkə də, cəmiyyət özü öz içindən bu adamları seçir. Həmin adamların həyatının mənası dünyanın qaranlıqlarına bir zərrə də olsa işıq bəxş etməkdir, zülmətləri yarmaqdır. İnsan amilini ucaltdıqca ucaldan belə şəxsiyyətlər zamanla özləri ucalığın zirvəsinə yüksəlir.

Azərbaycan Respublikasının Birinci vitse-prezidenti, Heydər Əliyev Fondunun rəhbəri, UNESCO və ICESCO-nun xoşməramlı səfiri Mehriban xanım Əliyeva həmin ucalıqdadır.

İki beynəlxalq təşkilatın sülhməramlı səfiri titulunu şərəflə daşıyır. Gördüyü işlərlə bu ali statusa layiq olduğunu sübuta yetirən şəxsiyyətlərdəndir. Mehriban xanım Əliyeva dünyanın sülh elçisidir.

Mehriban xanım Əliyeva xeyirxah əməllər üçün yaranıb. Sadəlik, səmimiyyət, xeyirxahlıq, köməyə ehtiyacı olan insanlara yardım göstərmək, dünyanı yaxşılıqla xilas etmək istəyi onun xarakterik cizgiləridir. Xalqımıza xas olan bütün mənəvi keyfiyyətləri özündə daşıyır. Xeyirxahlıq, humanizm kimi xüsusiyyətlər Azərbaycan xalqına məxsus keyfiyyətlərdir. Bu xüsusiyyətləri özündə daşımaqla, Mehriban xanım həm də Azərbaycanı dünyaya tanıdır. Sərhədlərimizdən çox-çox kənarlarda onun gördüyü xeyirxah işlərin timsalında Azərbaycanın adı hallanır. Bu da vətənimizə böyük rəğbət və sevgi qazandırır.

Başqalarına təmənnasız kömək, insanlara sevgi, şəfqət göstərmək xalqımızın ruhundadır. Mehriban xanım da milli ruhun təmsilçisidir. O bu işləri fədakarlıqla yerinə yetirir.

Yaxın silahdaş

2005, 2010 və 2015-ci illərdə Azərbaycan Respublikası Milli Məclisinin deputatı seçilən Mehriban xanım Əliyevanın deputatlıq fəaliyyəti isə parlament tariximizin uğurlu səhifələrindəndir. Onun millət vəkili kimi gördüyü işlər hələ də nümunə göstərilir. Seçicilərə diqqət və qayğısı, təmsil etdiyi ərazilərin sosial problemlərinin həlli yönündə gördüyü misilsiz işlərlə əsl millət vəkilliyinin nümunəsini yaradan Mehriban xanım Milli Məclisin müzakirəsinə təqdim etdiyi layihələrlə qanunvericiliyimizin təkmilləşməsinə böyük töhfələr verib.

Prezident İlham Əliyevin ən yaxın silahdaşı kimi Mehriban xanım Əliyevanın xalqa göstərdiyi xidmət missiyası Azərbaycan qadınının cəmiyyətdəki rolunun ən real təcəssümüdür.

Mehriban xanım cəmiyyətdəki sosial problemləri öz problemi hesab edir. Onların həlli yollarını axtarır, tapır və aradan qaldırır. Prezidentin bu yönümdə verdiyi göstərişlərin yerinə yetirilməsinə yardımçı olur, qayğıya ehtiyacı olan insanları xüsusi nəzarətdə saxlayır. Onun fiziki qüsurlu insanlara, şəhid və qazi ailələrinə, kimsəsiz qocalara və uşaq evində böyüyənlərə diqqət və qayğısının hər biri ayrı mövzunun söhbətidir. Bir yazıya sığmaz.

Təhsillə bağlı gördüyü işlər, rəhbərlıiyi və göstərişi ilə həyata keçirilən layihələrin uğurlu nəticələri onu sübut edir ki, insanlara ən böyük kömək onlara savad vermək, hansısa sənət öyrətmək, əldə etdikləri müasir bilik və bacarıqlarla əmək bazarının bir hissəsinə çevrilmələrinə istiqamət göstərməkdir.

Mehriban xanım Əliyeva deyəndə onun ilk yada düşən işlərindən biri də milli-mənəvi dəyərlərimizin qorunmasına və dünyada təbliğinə verdiyi töhfədir. Heydər Əliyev Fondunun prezidenti, Azərbaycan Mədəniyyətinin Dostları Fondunun rəhbəri kimi gördüyü dəyərli işlər Azərbaycan mədəniyyətini, tarixini, ədəbiyyatını dünyada tanıdır, Azərbaycan xarakterini göstərir.

Mehriban xanım Azərbaycan muğamına sahib çıxaraq onun dünyanın musiqi xəzinəsində misilsiz inci kimi parlamasına nail oldu. Bakının mərkəzində “Beynəlxalq Muğam Mərkəzi” kimi mədəniyyət məbədi yaratdı. “Qarabağ xanəndələri” musiqi albomu, hər il Bakıda keçirilən beynəlxalq caz festivalları, Qəbələ Musiqi Festivalı və digər mədəniyyət hadisələri ilə tariximizdə yeni səhifələr açdı.

Mehriban Əliyevanın respublikamızın Birinci vitse-prezidenti təyin olunması uzun zaman deyil, amma bu zaman ərzində gördüyü işlər çox böyükdür.

2016-cı ilin Aprel döyüşlərində yaralanmış əsgər və zabitlərin yüksək texnologiyalı protezlərlə təmin edilməsi, ölkəmizin evsahibliyi etdiyi beynəlxalq tədbirlərin layiqincə təşkili, müxtəlif ölkələrin və təşkilatların rəhbərləri ilə ikitərəfli görüşlərin keçirilməsi, orta məktəblərin, uşaq bağçalarının, mədəniyyət ocaqlarının təmiri və yenidən qurulması və sadalamaqla bitməyən digər mühüm işlər bu müddətdə Mehriban Əliyevanın fəaliyyətində prioritet təşkil edib.

44 günlük müharibə zamanı Mehriban xanım Əliyevanın xalqla bir olması, şəhid anaları ilə görüşləri, şəhidləri öz övladı adlandırması, yaralılara baş çəkməsi, sosial şəbəkələrdəki fəaliyyəti onu xalqa daha da sevdirdi, daha çox “Bizim Mehriban” etdi.

Xüsusi həssas əhali qruplarından olan hər kəsin güvənc yeridir Mehriban xanım. İnsanlar ona inanır, ümidlə ünvanına üz tuturlar. Bilirlər ki, Mehriban xanımın qayğıkeş münasibətindən kənarda qalmayacaqlar və qayğı ilə əhatə olunacaqlar. El arasında “Mehribana yaz” deyilən ikicə kəlmə çox çarəsizin son çarəsi olub.

Heydər Əliyev Fondunun həyata keçirdiyi “Yeniləşən Azərbaycana - yeni məktəb”, “Təhsilə dəstək” kimi layihələr sayəsində respublikamızın bütün bölgələrində yeni məktəblər inşa olunur, təmir edilir, müasir avadanlıqlarla təchiz edilir. Hər yeni tədris ilində Heydər Əliyev Fondu aztəminatlı ailələrin birinci sinif şagirdlərinə çanta və məktəb ləvazimatları hədiyyə edir. O, bunu da qazanıb, çox yaxşı müəllimdir. Onun bütün ölkəboyu tikdirdiyi məktəblər evlərdə, ailələrdə, düşüncələrdə maarif işığını artırır.

Mehriban xanımın təşəbbüsü ilə inşa olunmuş səhiyyə müəssisələri minlərlə insana həyat bəxş edib.

Məhz Mehriban xanımın sayəsində Azərbaycanda Avropa səviyyəli Talassemiya, Daun, Psixonevroloji Uşaq mərkəzləri və bu qəbildən olan digər əhəmiyyətli tibb ocaqları istifadəyə verilib. O ən şəfalı həkimdir.

Göründüyü kimi, həyatımızın bütün sahələrində Mehriban xanım Əliyevanın əməli işi var, altında da imzası - “Sizin Mehriban”.

Ramilə QURBANLI,

Azərbaycan.-2021.- 26 avqust.- S.12.