Qürur duyuram ki...

Vətənə gərək oğullar

Vətən - Ana qədər əziz, candan da şirindir. Canını Vətən uğrunda qıyan övladlar birdimi, mindimi?! Sevinirəm ki, mən də o minlərdən biriyəm.

Uşaqlıqdan Vətən sevgisi qəlblərində boy atanlarımızın bir nisgili vardı - Qarabağı düşməndən azad etmək. Ermənilər xalqımızın minillik tarixə malik ulu yurd yerlərini işğal edəndə düşünməmişdilər ki, onlar burada kök atıb, qollu-budaqlı ola bilməyəcəklər?! Çünki Qarabağ tarixi Azərbaycan ərazisidir, Vətən övladları işğalla barışmayacaqlar.

Xəyallarımda Qarabağı bəlkə də teleekranlarda gördüyüm dünyanın əlçatmaz, qeyri-adiliklərlə məşhur olan gözəlliklər diyarı ilə müqayisə edirdim. Amma gözlərimlə görmədiyim, torpağına ayaq basa bilmədiyim üçün xəyallarım nağıllardakı kimi ağ-qara rəngli olardı. Sən demə, heç də elə deyilmiş.

Getdim və gözlərimlə gördüm ki, cənnət-məkandır Qarabağ! Bu gözəl diyar öz sahiblərini gözləyirdi.

18 sentyabr 1999-cu ildə Göygöl rayonunun Pənahlılar kəndində anadan olmusam. Orta məktəbi bitirdikdən sonra uşaqlıqdan musiqiyə olan həvəsimin arxasınca getmişəm: 2015-ci ildə Gəncə Musiqi Kollecinə daxil olub, təhsilimi başa vurmuşam. Qarşıda bir borcum vardı: Vətənə xidmət göstərmək. 2019-cu il iyulun 4-də “N” saylı hərbi hissədə xidmətə başladım. Zenit Raket Diviziyasında xidmət edirdim.

Torpaqlarımızda talançılıq edən düşmənə layiqli cavab vermək üçün fürsət və əmr gözləyənlərdən biri də mən idim. Nəhayət, vaxt, zaman yetişdi və biz həmin əmri aldıq. Füzuli, Cəbrayıl, Qubadlı və Laçın uğrunda gedən döyüşlərdə iştirak etdim.

Döyüş günlərində yaddaqalan, unudulması mümkün olmayan hadisələr az olmadı. Bir faktı xüsusi qeyd edim. 2020-ci il oktyabrın 29-da Qubadlının Xəndək kəndi ətrafında gedən şiddətli döyüşlər zamanı ermənilərə məxsus raketi götürərək, “SU-25” tipli döyüş təyyarəsini məhv etdik. Bu, düşmənin öz silahı ilə özünə ağır zərbə demək idi.

Mən hələ düşmənin neçə-neçə ağır artilleriya silahını, hərbi texnikasını, tank və BTR, BMP, qrad qurğularını işlək vəziyyətdə qənimət kimi ələ keçirdiyimizi demirəm. Bunlardan bir qismi Bakıdakı Hərbi Qənimətlər Parkında nümayiş etdirilir.

Nəhayət, Zəfər çaldıq! Bu Qələbənin müəllifi Silahlı Qüvvələrin Müzəffər Ali Baş Komandanı İlham Əliyevdir! Məhz Azərbaycan Prezidentinin qətiyyətli iradəsi, xalq-hakimiyyət-ordu birliyinin yaratdığı “Dəmir yumruğ”un düşmənin başına enməsi ilə tarixi ərazilərimizi bərpa etdik.

Xidməti vəzifəmdən 2021-ci il 2 iyul tarixində təxris olunmuşam. İkinci Qarabağ savaşındakı döyüş yoluma görə “Vətən uğrunda” medalı ilə təltif edilmişəm. Bununla qürur duyuram, axı bu Zəfərin əldə edilməsində mənim də xidmətim olub.

Elvin HÜSEYNZADƏ,

Vətən müharibəsinin qazisi

Azərbaycan.- 2021.- 5 dekabr.- S.5.