Ermənistanda generallar bir-birini ifşa edirlər

Orduda həbs dalğası yüksəkrütbəli hərbçilər arasında ciddi təşviş yaradıb

Bu günlərdə Ermənistanda orduya bağlı şəxslərin həbs olunması ölkədə yeni daxili qarşıdurmaya gətirib çıxarmaqdadır.

Ermənistanın “4rd.am” nəşri yazır ki, baş verənlər hakimiyyət və müxalifət arasında, eləcə də iqtidarın öz daxilində çəkişmələrə səbəb olub. Belə ki, məşhur bloger Roman Baqdasaryanın yaydığı videolar əsasında hərbi cinayətlərlə bağlı növbəti qalmaqal yaşanıb. Separatçı rejim generallarının əleyhinə ciddi ittihamların səsləndiyi kifayət qədər qalmaqallı açıqlama Milli Təhlükəsizlik Xidmətinə göndərilib.

Erməni döyüşçülər bir-birini ifşa ediblər: “General və polkovniklərimiz fərari idi.

44 günlük müharibə zamanı keçmiş qondarma rejimin “müdafiə ordusu”nun zabit və generalları qətllər törədiblər”.

Vurğulanır ki, ordu rəhbərliyi elə əmrlər verib ki, bunun nəticəsində yüzlərlə, hətta minlərlə əsgər həlak olub. O cümlədən təkcə Suqovuşan istiqamətində cinayətkar əmrlər nəticəsində 250 hərbçi ölüb. Onların ölümündə isə yüksəkrütbəli hərbçilər günahkardırlar. Prokurorluq bəyan edib ki, Baqdasaryan bu videoçıxışında cinayətlə bağlı məlumat verib. Buna əsasən materialın sonrakı müzakirəsi üçün videonun Milli Təhlükəsizlik Xidmətinə təqdim edilməsi qərara alınıb.

Müəllif xatırlatma edib ki, Roman Baqdasaryan Paşinyanın rəhbərlik etdiyi “Vətəndaş razılaşması”nın fəalı və hakimiyyətin qatı tərəfdarıdır. O, 2021-ci il seçkiləri zamanı Nikol Paşinyanın qərargahında da görüntülənib.

Xatırladaq ki, Ermənistanda silah tədarükü ilə bağlı açılmış cinayət işi çərçivəsində dörd nəfər - keçmiş müdafiə naziri David Tonoyan, silah tədarükçüsü David Qalstyan, keçmiş aviasiya rəisi Avetik Muradyan və Baş Qərargah rəisinin müavini Stepan Qalstyan da həbs olunub. Lakin bu həbslər Ermənistanın yüksəkçinli məmurları arasında getdikcə alovlanan yeni qarşıdurmaya səbəb olub. Belə ki, hazırkı müdafiə naziri Suren Papikyan və Milli Təhlükəsizlik Xidmətinin rəhbəri Armen Abazyan arasında narazılıq yaranıb. Müdafiə naziri bu cür səs-küylü işdə Ermənistan ordusunun rüsvay edilməsini qəbul etməyib. Həmçinin cinayət işində Milli Təhlükəsizlik Xidmətinin də əməkdaşlarının adları hallanıb. Lakin iki qurum arasında rəqabət, sadəcə, bir tərəfin cəzalandırılması ilə nəticələnib. Bu ədavətdə Armen Abazyanın mövqeyi daha üstün olub və cinayət işi çərçivəsində yalnız müdafiə nazirliyində çalışmış şəxslər həbs ediliblər.

Baş verənlər erməni ordusunda yüksəkrütbəli hərbçilər arasında ciddi təşviş yaradıb. Erməni generaliteti hesab edir ki, bu proseslərdə Ermənistan ordusu itirəcək. İddia olunur ki, uzun illər böyük təcrübəyə malik hərbçilər artıq həmin postları tutmayacaq, əvəzində mövcud siyasi hakimiyyətə bağlı olan şəxslər hərbi qurumlarda yüksək vəzifəyə gətiriləcək, nəticədə ordu daha da zəifləyəcəkdir. Hesab edilir ki, Ermənistanın siyasi hakimiyyəti özünü ayaqda tutmaq üçün davamlı olaraq generallardan “günah keçisi” kimi istifadə edir.

Amma kiçik Ermənistanın ordusunun general yetişdirmək imkanları o qədər də böyük deyil. Bəzən eyni şəxs bir neçə dəfə vəzifədən atılıb, sonra kadr çatışmazlığı səbəbindən yenidən vəzifəyə təyin edilib. Bunlardan biri də Ermənistanın sabiq müdafiə naziri Arşak Karapetyandır. Ermənistanın sabiq prezidenti Serj Sarkisyan hələ 2016-cı ilin aprelindən sonra müdafiə nazirinin müavinləri ilə bərabər bir neçə idarə rəisini, o cümlədən Ermənistan Silahlı Qüvvələri Baş Qərargahının kəşfiyyat idarəsinin rəisi Arşak Karapetyanı vəzifədən azad etmişdi. 2016-cı ilin mayın sonunda Arşak ilə yaxın münasibətlərdə olan general Mels Çilingəryan, polkovnik Mqer Papyan və Armen Marqaryan tutulmuşdular.

Karapetyanın açılan iki müxtəlif cinayət işindən biri üzrə saxlanılması nəzərdə tutulurdu. Söhbətin alınan texniki kəşfiyyat vasitələrinin aşağı keyfiyyətə malik olmasına baxmayaraq, baha qiymətə rəsmiləşdirilməsindən getdiyi ehtimal olunurdu. Lakin hansısa qüvvə o zaman Arşak Karapetyanı cinayət məsuliyyətindən azad edə bilmişdi. Ötən ayın ortalarında isə o, müdafiə naziri postundan uzaqlaşdırılmışdı.

Bütün bunlar Ermənistanın yenə qarışmasını istisna etmir.

Elçin CƏFƏROV

Azərbaycan.- 2021.- 4 dekabr.- S.1; 5.