Azərbaycana qələbə yaraşır

“Qarabağ zəfəri xalqımızın şanlı tarixidir”. Bunu Azərbaycan Sosial Rifah Partiyasının sədri Əsli Kazımova deyib. Onun sözlərinə görə, 2020-ci il dekabrın 10-da keçirilmiş Zəfər paradı Azərbaycan xalqının həyatında mühüm rol oynadı: “Hesab edirəm ki, həmin tarixi paradla biz şəhidlərimizin ruhuna böyük sayğını, hörməti nümayiş etdirmiş olduq. Bu isə müqəddəs bir işdir. Zəfər bayrağımızın dalğalanması Azərbaycan xalqının illərdir çəkdiyi acı və zülm üzərindəki qələbəsinin göstəricisidir.

Azərbaycan hər gün inkişaf edir. Azərbaycan bundan sonra daha sürətlə inkişaf edəcək. Bu sözü cənab Prezident İlham Əliyev də öz çıxışı zamanı deyib. Azərbaycan bütün dünyaya özünün müstəqil, nüfuzlu, iradəli və qətiyyətli bir dövlət olduğunu sübut etdi. Azərbaycan Ordusu bütün dünyaya gücünü göstərdi. Azərbaycan xalqı həmrəyliyini, “dəmir yumruq” kimi cənab Prezidentin ətrafında birləşə bildiklərini təsdiqlədi. Dövlət rəbərinin apardığı uğurlu siyasət status-kvoya son qoydu. Regionda bir sıra dövlətlərin silah ticarəti üçün nəzərdə tutduqları Qarabağ münaqişəsini ortadan götürdü. Bölgədə sülh, barış və sabitliyin təmin olunması üçün həm diplomatik baxımdan, həm hərbi baxımdan öz gücünü və müdrik siyasətini göstərməyə müvəffəq oldu. Bu, danılmaz faktdır”.

Partiya sədri deyib ki, Azərbaycan Qarabağ məsələsini həll etməklə Zəngəzura da yol açdı. Danışıqlar masasında indi Zəngəzur dəhlizi var. Bu fakt özü-özlüyündə Azərbaycanın diplomatiyadakı böyük zəfəridir: “Hesab edirəm ki, Prezident İlham Əliyevin rəhbərliyi ilə atılan hər bir addım Azərbaycanı yalnız və yalnız irəliyə aparacaq. Azərbaycan daim dinamik inkişaf edəcək. Düşünürəm ki, Azərbaycanın tarixində hələ belə qələbələr çox olacaq. Çünki Azərbaycana zəfər, Azərbaycan xalqına qələbə yaraşır!”

Partiya sədri eyni zamanda Azərbaycan Ordusunun əldə etdiyi hərbi qənimətlərin də nümayiş olunmasının müzəffər ordumuzun uğurunun göstəricisi olduğunu qeyd edib. Onun fikrincə, Hərbi Qənimətlər Parkında Vətən müharibəsi zamanı müzəffər Azərbaycan Ordusunun düşməndən ələ keçirdiyi hərbi qənimətlərin bir qisminin və Ermənistan ordusu tərəfindən qurulmuş müdafiə sədlərinin nümayiş etdirilməsi məğlub ölkənin imzaladığı kapitulyasiya aktının nəticəsidir. Qarabağ Zəfəri, Müzəffər Azərbaycan Ordusunun əldə etdiyi qələbə və hərbi qənimətlər bir daha Prezident İlham Əliyevin “dəmir yumruğ”unun bəhrəsidir.

Qarabağ Zəfərinin qazanılmasında Azərbaycan və Türkiyə qardaşlığının, dostluğunun sarsılmaz olduğunu vurğulayan Əsli Kazımova bu qardaşlığın daimi olacağına heç bir şübhə etmir: “Azərbaycan və Türkiyə əsgərlərinin paradda bərabər addımlaması nəinki işğalçı Ermənistana, illərdir ikili standartlar tətbiq edən beynəlxalq təşkilatlara və dövlətlərə ciddi bir mesaj idi. Bu, Azərbaycan üçün çox önəmlidir”.

Ülkər XASPOLADOVA

Azərbaycan.- 2021.- 10 dekabr.- S.4.