Qarabağı azadlığa qovuşduran yolun müəllifi

Böyük Zəfər Heydər Əliyev ideyalarının məntiqi nəticəsidir

Ordun varsa, yurdun var. Yurdun varsa, gücün var. Tarixinin ən qüdrətli dövrünü yaşayan Azərbaycan bu gün dünyanın ən güclü ordularından birinə sahibdir.

Vaxtilə “milli ordumuz” deyiminin yalnız ifadəsi ilə qürrələnirdiksə, indi Qarabağı düşmən tapdağından azad edən Silahlı Qüvvələrimizlə qürur duyuruq. Azərbaycan Ordusunun müasirləşməsi, maddi-texniki təminatının yüksək səviyyədə olması, döyüş əhvali-ruhiyyəsinin daim artması və nəticə etibarilə, Azərbaycan əsgərinin Cənubi Qafqazın ən sivil, modern və hazırlıqlı hərbçisinə çevrilməsinin iftixarını yaşayırıq. Çünki bu gün Azərbaycan Silahlı Qüvvələri dövlətimizin qüdrətinin nümunəsi, xalqımızın iftixar yeridir.

Müasir Azərbaycan Ordusunun formalaşdırılması

Regionun ən qüdrətli Silahlı Qüvvələrinə çevrilmiş Azərbaycan Ordusunun 44 günlük Vətən müharibəsindəki şanlı Zəfərindən bir il ötsə belə hələ də böyük qələbənin sevincini paylaşmaqdayıq. Ötən il dekabrın 10-da Azadlıq meydanında keçirilən hərbi parad isə bir daha Azərbaycan Ordusunun qüdrətini dünyaya nümayiş etdirdi.

Qarabağı xilas edən Azərbaycan əsgəri paytaxtın baş meydanında qürurla, fəxarətlə addımladı. Bu yürüş müstəqillik dövrünün ilk Zəfər paradı idi. Dünya qalib ordunun nəyə qadir olduğuna və hansı müasir hərbi texnikalara yiyələndiyinə şahidlik etdi, məğlub, vandal Ermənistanın rəzilliyini gördü.

Bu gün Azərbaycan Cənubi Qafqazın hərbi-siyasi gücü kimi qəbul edilməkdədir. Bütün bu nailiyyətlər, uğurlar cəmi 30 il ərzində reallaşıb. Amma bu yol, bu tarix heç də asan olmayıb. Hətta bu illərdə Azərbaycan müstəqilliyini itirmək təhlükəsi ilə belə üzləşib. Tanrının bu dövlət, bu xalq üçün yetirdiyi xilaskar lider - Ulu Öndər Heydər Əliyev sayəsində Azərbaycan böyük bəlalardan, məşəqqətlərdən qurtulub.

Ümumiyyətlə, hər bir dövlətin müstəqilliyinin, suverenliyinin əsas atributlarından biri onun silahlı qüvvələridir. Azərbaycan Ordusunun keşməkeşli və şərəfli inkişaf yolu hərb tariximizin möhtəşəm salnaməsidir. Sevindirici haldır ki, zamanın sınağından alnıaçıq, üzüağ çıxan Silahlı Qüvvələrimiz istənilən hücumdan qorumağa qadir bir qüvvə kimi günümüzün danılmaz reallığına çevrilib. Bu uğuru Ümummilli Lider Heydər Əliyevin rəhbərliyi altında hazırlanan ordu quruculuğu konsepsiyasının təntənəsi kimi dəyərləndirmək olar.

Dahi şəxsiyyətin 1993-cü ildə xalqın təkidli tələbi ilə Azərbaycanda ikinci dəfə hakimiyyətə qayıdışından sonra onun müstəqil dövlət quruculuğu istiqamətində tarixi xidmətlərindən biri də Azərbaycan Silahlı Qüvvələrini ağır böhranlı vəziyyətdən çıxarması, ordunu siyasi oyunlardan kənarlaşdırması oldu. Ulu Öndər zəngin dövlətçilik təcrübəsi, qətiyyətli və ardıcıl siyasəti ilə çox mürəkkəb şəraitdə ordu quruculuğuna yeni məzmun verdi və ölkədə müasir ordu formalaşdırılmasının əsasını qoydu.

Heydər Əliyev görkəmli dövlət xadimi, böyük siyasətçi, həm də peşəkar hərbçi idi. Elə buna görə Ulu Öndərin hakimiyyətə gəlişindən sonra əsası qoyulan ordu quruculuğunun diqqət çəkən əsas tərəfi yüksək peşəkarlıqla həyata keçirilməsi idi.

Milli ordu quruculuğu sahəsində Heydər Əliyev irsinin əvəzsiz qiyməti ondadır ki, bu dəyər başlanğıcını hələ sovetlər dövründən götürdü. Müstəqil olmadığı zaman Azərbaycanın qəhrəmanlıq ənənələrinin davam etdirilməsi, zəngin hərb tarixinin canlandırılması, gənclərin qəhrəmanlıq ənənələri əsasında tərbiyə edilməsi, görkəmli hərb xadimlərinin şərəfli yolunun davam etdirilməsi Heydər Əliyevin hər zaman diqqət mərkəzində olmuşdu.

Ulu Öndər elə bir zamanda hakimiyyətə gəlmişdi ki, torpaqlarımız demək olar ki, ard-arda işğal edilirdi. Milli Orduda vahid komandanlığın olmaması, hərc-mərclik bu ağır nəticələrə səbəb olmuşdu. Amma dahi şəxsiyyət qısa zamanda vahid komandanlığa tabe olan nizami ordu formalaşdırdı və 1994-cü ildə tarixə “Horadiz döyüşləri” kimi düşən savaşda düşmənə çox ağır zərbələr endirildi. 1994-cü il mayın 12-də atəşkəs haqda müqavilə imzalandıqdan sonra Azərbaycanda ordu quruculuğu daha da sürətləndi, həyata keçirilən siyasət nəticəsində Silahlı Qüvvələrin maddi-texniki təminatının yaxşılaşdırılmasına, şəxsi heyətin mənəvi-psixoloji hazırlığının artırılmasına, döyüş ruhunun yüksəldilməsinə diqqət artırıldı.

Ordu quruculuğu ilə bağlı genişmiqyaslı islahatlara başlandı. Qısa müddətdə hərbi hissələrin, ayrı-ayrı qoşun növlərinin formalaşdırılması tam başa çatdırıldı. Dövlətçiliyi və hərbi andı hər şeydən uca tutan, hərbçi olmağı şərəf bilən zabitlər hərbi hissələrin rəhbərliyinə cəlb olundular. Ordunun mərkəzləşdirilmiş maddi-texniki təminatı əhəmiyyətli dərəcədə yaxşılaşdırıldı, maliyyə-təsərrüfat fəaliyyəti nizama salındı, şəxsi heyətin mənəvi-psixoloji hazırlığı və döyüş ruhu yüksəldildi. Silahlı Qüvvələrin mükəmməl qanunvericilik bazası yaradıldı.

Tarixi varislik ənənəsinə uyğun olaraq Ulu Öndər Heydər Əliyevin 1998-ci il mayın 22-də imzaladığı fərmanla AXC dövründə ilk əlahiddə Azərbaycan korpusunun yaradıldığı gün - iyunun 26-sı Azərbaycan Respublikasının Silahlı Qüvvələr Günü elan edildi. 1999-cu il fevralın 20-də Silahlı Qüvvələrin Hərbi Akademiyasının yaradılması, 20 avqust 2001-ci ildə respublikamızda fəaliyyət göstərən hərbi məktəblərin statusunun artırılması və nəhayət, 17 avqust 2002-ci ildə Silahlı Qüvvələrə Yardım Fondunun yaradılması haqqında imzaladığı fərmanlar bu istiqamətdə əsaslı dönüş yaratdı. Bütün bunların nəticəsidir ki, hazırda Azərbaycanda güclü maddi-tədris bazasına, müasir texnologiyalara malik, yeni tədris metodları ilə fəaliyyət göstərən, uğurları ölkəmizin sərhədlərindən də uzaqlara yayılan hərbi təhsil sistemi mövcuddur.

Cənubi Qafqazın hərbi-siyasi gücü

2020-ci ildə Azərbaycanın qüdrətli Ordusunun 30 ildən sonra Qarabağı düşmən tapdağından azad etməsi məhz Heydər Əliyevin ordu quruculuğunun təntənəsidir desək, yanılmarıq.

Ali Baş Komandan İlham Əliyev böyük Zəfəri dəyərləndirərkən dedi ki, bu savaşı müstəqillik dövründə böyüyən vətənpərvər gənclər qazanıb. O gənclər ki, məhz Ulu Öndərin yaratdığ hərbi məktəblərdə təhsil alıb yüksək hazırlıqlı zabit kimi yetişdilər. Vətən müharibəsində ən müasir, modern hazırlıqlı hərbçi kimi nəyə qadir olduğunu düşmənə göstərən Azərbaycan igidləri istənilən döyüş tapşırığını yerinə yetirməyə qadir olduqlarını dünyaya nümayiş etdirdilər.

2020-ci il Azərbaycanın tarixinə şanlı Zəfər ili kimi yazıldı. Bu il Zəfərimizin birinci ildönümünü qeyd etdik. Bu sevincimiz, qürurumuz keçilən yolun, Heydər Əliyev siyasətinin təntənəsidir desək, yanılmarıq. Müasir Azərbaycanın qurucusu Heydər Əliyevin 2003-cü ildə xalqa müraciətində əksini tapan “İnanıram ki, mənim axıra çatdıra bilmədiyim taleyüklü məsələləri, planları, işləri Sizin köməyiniz və dəstəyinizlə İlham Əliyev başa çatdıra biləcək. Mən ona özüm qədər inanıram və gələcəyinə böyük ümidlər bəsləyirəm” fikirləri reallıqda özünü təsdiqlədi.

Əgər Heydər Əliyev Azərbaycanı uçurumdan qurtarıb yeni inkişaf yoluna çıxartdısa, İlham Əliyev Azərbaycanı daha da inkişaf etdirən lider oldu və bu ölkəni tarixinin ən qüdrətli dövlətinə çevirdi.

Ulu Öndər Heydər Əliyevin düzgün müəyyənləşdirdiyi siyasətin son 18 ildə Prezident İlham Əliyev tərəfindən uğurla davam etdirməsinin nəticələri göz önündədir. Azərbaycanın iqtisadi, siyasi və hərbi gücünün artırılması, xalq-iqtidar birliyinin möhkəmləndirilməsi, torpaq, Vətən sevgisinin böyüklüyü fonunda 44 günlük İkinci Qarabağ savaşında qalib olduq. Müzəffər Ali Baş Komandan İlham Əliyevin qətiyyəti sayəsində Azərbaycan Ordusu tarix yazaraq 30 ilin işğalına son qoydu, ərazi bütövlüyümüzü təmin etdi. Azərbaycan xalqı bir daha yenilməz, məğrur xalq olduğunu dünyaya nümayiş etdirdi.

Bu gün Azərbaycana hansı istiqamətdən baxsaq inkişaf, tərəqqi ilə qarşılaşarıq. Ölkəmizdə ordu quruculuğu sahəsində atılan addımların uğurlu nəticələri də göz önündədir. 44 günlük İkinci Qarabağ müharibəsində tarix yazan Azərbaycan Ordusu dünyanın ən güclü orduları sırasında olduğunu bir daha təsdiqlədi.

Qədim qalamız Şuşa işğaldan azad edilən gün isə İlham Əliyev ata vəsiyyətini yerinə yetirən insan kimi özünü çox xoşbəxt saydı: “Mən bu gün Ulu Öndər Heydər Əliyevin məzarını ziyarət etdim, onun ruhu qarşısında baş əydim. Ürəyimdə dedim, xoşbəxt adamam ki, ata vəsiyyətini yerinə yetirdim. Şuşanı azad etdik! Bu, böyük Qələbədir! Bu gün şəhidlərimizin, Ulu Öndərin ruhu şaddır! Gözün aydın olsun, Azərbaycan! Gözünüz aydın olsun, dünya azərbaycanlıları!”

Azərbaycanı Cənubi Qafqazın liderinə, dünyada söz sahibinə çevirən İlham Əliyev bu gün Qarabağda apardığı böyük tikinti-quruculuq işlərinə görə həm xalq, həm də beynəlxalq birlik tərəfindən təqdir edilir. Tezliklə Qarabağ və Şərqi Zəngəzurda həyat qaynayacaq və məcburi köçkünlərimiz doğma yurdlarına qayıdaraq xoşbəxt həyat sürəcəklər. Bununla da İlham Əliyev ölkəmizi Heydər Əliyevin görmək istədiyi, dünyaya günəştək doğan, qüdrətli Azərbaycana çevirəcək.

Rəşad BAXŞƏLİYEV

Azərbaycan. - 2021.- 12 dekabr.- S.7.