Naftalanda Ulu Öndərin xatirəsinə ehtiram göstərilmişdir

Müasir Azərbaycan dövlətinin memarı və qurucusu, xalqımızın Ümummilli Lideri Heydər Əliyevin vəfatının 18-ci ildönümü münasibətilə Naftalanda videokonfrans keçirilmişdir.

YAP Naftalan şəhər təşkilatı nümayəndələrinin, eləcə də şəhərdə fəaliyyət göstərən idarə, müəssisə və təşkilat rəhbərlərinin iştirakı ilə keçirilən konfransın açılışında Ulu Öndərin və Vətən uğrunda canından keçmiş şəhidlərimizin əziz xatirəsi bir dəqiqəlik sükutla yad edilmişdir. Sonra Naftalan Şəhər İcra Hakimiyyətinin başçısı Vüqar Novruzov çıxış edərək diqqətə çatdırmışdır ki, hələ sovetlər birliyi dövründə Heydər Əliyevin gərgin əməyi və böyük fədakarlığı nəticəsində Azərbaycanda bütün sahələrdə uğurlar əldə edilmişdir.

Sonra söz videokonfrans iştirakçılarına verilmişdir. Onlar çıxışlarında bu dahi şəxsiyyətin şərəfli ömür yoluna nəzər salaraq Azərbaycan xalqı üçün müstəsna xidmətlərini yada salmış, gördüyü işlərlə xalqımızın yaddaşında əbədi yaşayacağını qeyd etmişlər. Ulu Öndərin layiqli davamçısı, Prezident İlham Əliyevin ata vəsiyyətini yerinə yetirərək 44 günlük Vətən müharibəsində mənfur düşmənin işğalına son qoyulmasından, bununla da Azərbaycanın ərazi bütövlüyünün bərpa edilməsindən danışmışlar.

Sonda məktəblilərin ifasında “Sən elə bir zirvəsən” adlı ədəbi-bədii kompozisiya nümayiş etdirilmişdir.

Sabir ƏLİYEV

Azərbaycan.- 2021.- 12 dekabr.- S.10.