Xarici İşlər Nazirliyi 2021-ci ilin yekunlarına dair qəbul təşkil edib

Dekabrın 17-də Gülüstan Sarayında Xarici İşlər Nazirliyi ilin yekunlarına həsr edilmiş qəbul təşkil edib.

AZƏRTAC xəbər verir ki, tədbirdə Xarici İşlər Nazirliyinin rəhbər heyəti, müvafiq qurumlardan yüksək səviyyəli nümayəndələr, ölkəmizdə akkreditə olunmuş diplomatik nümayəndəlik və beynəlxalq təşkilatların ofislərinin rəhbərləri iştirak ediblər.

Tədbirdə Azərbaycan Respublikasının xarici işlər naziri Ceyhun Bayramov, Azərbaycan Respublikası Prezidentinin köməkçisi - Prezident Administrasiyasının Xarici siyasət məsələləri şöbəsinin müdiri Hikmət Hacıyev və ölkəmizdə akkreditə olunmuş diplomatik korpusun duayeni Nasser Abdul Kareem çıxış ediblər

Nazir Ceyhun Bayramov tədbir iştirakçılarını salamlayaraq, Azərbaycan Respublikasının 2021-ci il ərzində dövlət başçısının rəhbərliyi ilə həyata keçirdiyi, ölkəmizin milli maraqlarına əsaslanan, müstəqil, dönməz, açıq və praqmatik xarici siyasətindən danışıb. Zəfərimizin, Azərbaycanın ərazi bütövlüyünün bərpa edilməsinin birinci ildönümünün qeyd edildiyi cari il ərzində xarici siyasət müstəvisində atılan uğurlu addımlar, o cümlədən Azərbaycan Respublikası Prezidentinin həm milli, həm də beynəlxalq təşkilatlara sədrliyi çərçivəsində irəli sürdüyü təşəbbüslər, həyata keçirilən layihələr, bölgədə münaqişə sonrası sülh quruculuğu istiqamətində atılan konkret addımlar, habelə ikitərəfli və çoxtərəfli müstəvilərdə əməkdaşlığın daha da inkişaf etdirilməsi istiqamətində görülən işlərdən bəhs edib.

Münaqişə sonrası bölgədə yaranmış yeni reallıqlar müstəvisində Azərbaycanın gələcəyə baxışını tədbir iştirakçıları ilə bölüşən nazir, dövlət rəhbəri tərəfindən bu xüsusda bəyan edildiyi kimi, Azərbaycanın bölgədə sülh quruculuğu, sabitlik və dayanıqlı inkişafa hədəfləndiyini vurğulayıb. Azad edilmiş ərazilərdə həyata keçirilən genişmiqyaslı quruculuq işlərindən danışaraq, dost və tərəfdaş ölkələrin bərpa və quruculuq prosesində ölkəmizə dəstək olmasını minnətdarlıqla qeyd edib. Azərbaycanın bütün ölkələrlə qarşılıqlı faydalı əməkdaşlıq əlaqələrini daha da inkişaf etdirmək və beynəlxalq platformalarda fəal iştirak etmək siyasətinin qarşıdan gələn ildə də uğurla həyata keçiriləcəyini söyləyən nazir Ceyhun Bayramov diplomatik korpusa səmərəli diplomatik fəaliyyətlərinə görə təşəkkür edib və onları Yeni - 2022-ci il münasibətilə təbrik edib.

Azərbaycan Respublikası Prezidentinin köməkçisi-Prezident Administrasiyasının Xarici siyasət məsələləri şöbəsinin müdiri Hikmət Hacıyev çıxışında Azərbaycanın digər dövlətlərlə əməkdaşlıq və dostluq münasibətlərinin inkişaf etdirilməsinə daim diqqətlə yanaşdığını və geridə qoyduğumuz bir il ərzində bu əlaqələrin daha da inkişaf etdiyini bildirib.

Prezidentin köməkçisi Azərbaycan dünya dövlətləri ilə həmrəylik nümayiş etdirərək, COVID-19-a qarşı qlobal mübarizəyə öz töhfəsini verdiyini və bu gün beynəlxalq təşkilatlarda cərəyan edən proseslərin postpandemiya dövründə siyasi və iqtisadi baxımdan daha ədalətli dünya düzəninin qurulmasını zəruri etdiyini vurğulayıb. Hikmət Hacıyev çıxışında qlobal miqyasda üzləşdiyimiz hədə və təhdidlərin universal regional və beynəlxalq təşkilatların çevikliyinin artırılmasının və yeni reallığa uyğunlaşdırılmasının daha da zəruriliyini şərtləndirdiyini bildirib.

Prezidentin köməkçisi Azərbaycanın Cənubi Qafqaz regionunda 30 ilə yaxın davam edən Ermənistanın hərbi işğalına son qoyaraq yeni reallıq yaratdığını və bu gün Azərbaycanın bölgədə regional əməkdaşlıq, kommunikasiyaların açılması, dövlətlərin qarşılıqlı şəkildə bir-birinin ərazi bütövlüyünə hörmət edilməsi prinsiplərinə və məramlarına əsaslanan yeni Cənubi Qafqaz regionunun qurulmasına çalışdığını qeyd edib. Hazırda Azərbaycanın qarşısında azad edilmiş ərazilərdə bərpa və yenidənqurma işlərinin həyata keçirilməsi və məcburi köçkünlərin geri qaytarılması kimi vacib məsələlər durduğunu bildirib. Bu xüsusda, ən böyük maneələrdən birinin mina təhlükəsi olduğunu və bu təhlükənin aradan qaldırılmasında Azərbaycanın beynəlxalq ictimaiyyətin ciddi dəstəyinə ümid etdiyini vurğulayıb. Hikmət Hacıyev Yeni il münasibətilə təbriklərini tədbir iştirakçılarına çatdırıb.

Tədbirdə ölkəmizdəki diplomatik korpus adından çıxış edən diplomatik korpusun duayeni, Fələstin səfiri Nasser Abdul Kareem tədbirdə iştirak edən dövlət rəsmilərini salamlayıb və qəbulun təşkili üçün minnətdarlıq ifadə edib. Geridə qoyduğumuz ildə qlobal səviyyədə üzləşdiyimiz çağırışlardan bəhs edən səfir, qarşıdan gələn 2022-ci ilin yeni başlanğıclar üçün qapı olacağını deyib. Səfir Nasser Abdul Kareem ötən ildə baş verən uğurlara istinad edərək, ən önəmli hadisə kimi Azərbaycanın ərazi bütövlüyünün bərpa edilməsini qeyd edib. İmzalanmış üçtərəfli Bəyanatın yalnız Azərbaycan deyil, bütün bölgə üçün sülh, inkişaf və tərəqqi mərhələsinin əsasını qoyduğunu bildirib. Duayen Yeni 2022-ci il münasibətilə təbriklərini çatdırıb və Azərbaycan xalqına, hökumətinə və rəhbərliyinə sülh, əmin-amanlıq və rifah arzulayıb.

Tədbirdə Azərbaycan Respublikasının Prezidenti İlham Əliyevin çıxışları, yerli və xarici mediaya müsahibələri və iştirak etdiyi regional və beynəlxalq tədbirlər əsasında hazırlanmış video nümayiş etdirilib.

Daha sonra qəbul konsert proqramı ilə davam edib.

Azərbaycan.-2021.- 18 dekabr.- S.3.