Zemfira İSXAKOVA: “Azərbaycanın Qarabağda möhtəşəm Qələbəsi Prezident İlham Əliyevin müstəsna xidmətlərindən biridir”

Dekabrın 24-ü Azərbaycan xalqı üçün əlamətdar gündür - Prezident İlham Əliyevin 60 yaşı tamam olur.

Prezident İlham Əliyev bütün həyatını Azərbaycanın tərəqqisinə, bütün sahələrdə - istər iqtisadi, sosial, mədəni, istərsə də xarici siyasətdə Vətəninin mənafeyinin müdafiəsinə həsr etmiş, atası, görkəmli siyasi lider Heydər Əliyevin ideyalarının yorulmaz davamçısıdır. Təəccüblü deyil ki, bu gün Prezident İlham Əliyev dünya səhnəsində siyasi liderlik fenomenidir.

Bu barədə AZƏRTAC-a Rusiya Federasiyası Prezidenti yanında Rusiya Xalq Təsərrüfatı və Dövlət Qulluğu Akademiyasının (RXTDQA) İctimai Elmlər İnstitutunun Beynəlxalq siyasət və xarici regionşünaslıq şöbəsinin professoru, filologiya elmləri doktoru Zemfira İsxakova bildirib.

Z.İsxakovanın sözlərinə görə, Azərbaycan Prezidentinin milli kimliyin inkişafı konsepsiyasına əsaslanan, multikulturalizmlə vəhdət təşkil edən siyasəti əvvəllər Heydər Əliyevin ölkəyə rəhbərliyi dövründə olduğu kimi, sistemli şəkildə həyata keçirilir və nəzərəçarpan nəticələr verir. Son zamanlar Azərbaycan gözümüzün qarşısında dəyişir.

“Prezident İlham Əliyevin müstəsna xidmətlərindən biri Azərbaycanın İkinci Qarabağ müharibəsində möhtəşəm Qələbəsidir. Bu Zəfər Prezident İlham Əliyevin rəhbərliyi ilə ən qısa zamanda qazanıldı. Minlərlə azərbaycanlı artıq atalarının, babalarının və ulu babalarının torpağına qayıtmaq, başıbəlalı Qarabağ torpağında dağıdılmış kənd və şəhərləri bərpa etmək üçün çoxdan gözlənilən fürsəti əldə etdi. İndi dağıdılmış mədəni və dini abidələr sürətlə bərpa olunur. Qarabağ ərazisində onların sayı 2 mindən çoxdur, onların arasında dünya əhəmiyyətli abidələr var. Bununla da Azərbaycan xalqının mədəni yaddaşı qorunur, zənginləşir”, - deyə Zemfira İsxakova bildirib.

Azərbaycan.-2021.- 26 dekabr.- S.6.