İnkişaf və zəfər yolu

İlham Əliyevin rəhbərliyi ilə gedilən bu yol xalqımıza möhtəşəm uğurlar və qələbələr bəxş edir

Azərbaycan Prezidenti, Müzəffər Ali Baş Komandan İlham Əliyev ömrünün 60-cı ilini Qarabağda qarşıladı. Həmin gün Xocavənd rayonunun Hadrut qəsəbəsində hərbi hissənin açılışında iştirak edən Prezident daha sonra ailə üzvləri ilə birlikdə Şuşaya səfər etdi. Bu, İlham Əliyevin 2021-ci il ərzində Şuşaya etdiyi sayca yeddinci səfər kimi tarixə düşdü.

Qətiyyətlə yerinə yetirilən tarixi missiya

İndi Şuşa da azaddır, Hadrut da. 30 ilə yaxın işğal dövründə Azərbaycan xalqı bir gün belə torpaqlarımızın azadlığa qovuşacağına olan ümidini itirmədi. Bu ümidi yaşadan Heydər Əliyevin başlatdığı və İlham Əliyevin qətiyyətlə davam etdirdiyi məqsədyönlü siyasət oldu. Bu siyasət yalnız ordu quruculuğu ilə yekunlaşmadı.

Bu yolda Prezident İlham Əliyev Azərbaycanın kompleks inkişafını təmin etdi, beynəlxalq miqyasda respublikamızın mövqelərini əhəmiyyətli dərəcədə möhkəmləndirdi, Ermənistan üzərində siyasi-diplomatik üstünlüyə nail oldu. İlham Əliyevin yürütdüyü siyasət milli həmrəyliyimizi daha da möhkəmləndirdi. Xalqımız milli amallar, torpaqlarımızın azadlığı uğrunda öz rəhbərinin ətrafında daha sıx səfərbər oldu.

İlham Əliyev torpaqlarımızın azad edilməsi üçün bütün cəbhələrdə mübarizə apardı və hər zaman bəyan etdi ki, Azərbaycan torpaqlarında ikinci erməni dövlətinin yaradılmasına imkan verməyəcək, ərazilərimiz işğaldan azad ediləcək və məcburi köçkünlər doğma yurdlarına qayıdacaqlar. Hələ 10 il əvvəl, 2011-ci il dekabrın 24-də - 50 illik yubileyi günündə Ağcabədi rayonunun Taxtakörpü ərazisində Laçın rayonundan olan məcburi köçkünlər üçün salınan yeni yaşayış qəsəbəsinin açılışında iştirak edən Prezident İlham Əliyev deyirdi: “Bu, müvəqqəti yaşayış məntəqəsidir. Torpaqlarımız işğalçılardan azad olunandan sonra bütün köçkünlər üçün Laçında, Kəlbəcərdə, Ağdamda, hələ ki, işğal altında olan digər torpaqlarda bundan da gözəl evlər tikəcəyik. Mən buna şübhə etmirəm. Biz öz ərazi bütövlüyümüzü mütləq bərpa edəcəyik. Mən bu barədə fikirlərimi dəfələrlə bildirmişəm, bir daha demək istəyirəm ki, bu, sadəcə olaraq sözlər deyil, sadəcə olaraq bizim arzularımız deyil, bu, həqiqətdir”.

Azərbaycan Prezidenti öz siyasəti, öz qətiyyəti ilə bu həqiqəti reallığa çevirdi, dünya erməniliyinə qalib gələrək tarixi missiyasını yerinə yetirdi.

Qələbəyə aparan siyasətin təntənəsi

44 günlük Vətən müharibəsi Prezident İlham Əliyevin böyük qələbəyə aparan siyasətinin təntənəsinə çevrildi. Bu Zəfər bir daha İlham Əliyevin müdrikliyini, qətiyyətini, vətərpərvərliyini dünyaya nümayiş etdirdi, dövlətinin və xalqının milli maraqları üçün mübarizəsinin məntiqi yekunu oldu. Bu Qələbə Heydər Əliyev siyasi yolunun uğuru kimi tariximizə yazıldı. Vətən müharibəsindəki Zəfərlə Azərbaycan xalqı ədalətsiz beynəlxalq münasibətlər sistemində öz milli haqqına çatmağın ən mükəmməl nümunəsini yaratdı.

Prezident İlham Əliyevin Şuşada Cıdır düzündən bəyan etdiyi kimi, bundan sonra biz bu torpaqlarda əbədi yaşayacağıq: “Bu gün biz azad Qarabağdayıq. Bu gün biz azad Zəngəzurdayıq. Biz - bu torpaqların sahibləri bu torpaqlara qayıtmışıq və bundan sonra biz bu torpaqlarda əbədi yaşayacağıq. Azərbaycan xalqının mənim sözlərimə inamı məni daha da çox inandırırdı ki, biz buna nail olacağıq. Xalqımız birləşdi, bir amal uğrunda, bir müqəddəs ideya uğrunda birləşdi və istədiyinə nail oldu”.

Bu gün işğaldan azad edilmiş bütün ərazilərimiz bərpa olunur, onlara yeni həyat verilir. Cəmi bir il ərzində Qarabağda görülən işlərin miqyası olduqca əhatəlidir. Böyük qayıdış üçün, ilk növbədə, yeni yollar çəkilir, enerji ilə təminat gücləndirilir. Artıq bir neçə şəhərin baş planı da təsdiq olunub, yaşayış məhəllələrinin, inzibati binaların təməli qoyulub. Cəmi bir neçə aya “Zəfər yolu” çəkildi, Füzulidə Beynəlxalq Hava Limanının inşası başa çatıb. Beləliklə, işğaldan azad edilmiş torpaqlarımızda möhtəşəm quruculuğun ən gözəl nümunələri yaradılmaqdadır.

50 yaşında məcburi köçkünlərlə, 60 yaşında Şuşada…

Qarabağın mirvarisi Şuşa şəhəri sürətlə bərpa olunur. Şuşa Azərbaycanın tarixidir, xalqımızın maddi-mənəvi abidəsidir. Şuşanın hər binasında, hər küçəsində, hər daşında xalqımızın keçmişi, adət-ənənələri yaşayır. Ona görə düşmən 28 illik işğal dövründə Şuşanın erməniləşdirilməsinə çalışsa da, buna nail ola bilmədi. Çünki Şuşa düşmənə boyun əymədi, onun saxta və özgə mədəniyyətlərə qucaq açması mümkün deyildi.

Şuşanı işğal edənlər 28 il onu sadəcə dağıdıblar. Şəhərin tarixini saxtalaşdıra bilmədikləri üçün ona böyük ziyan vurublar. Qəhrəman hərbçilərimizin azad etdikləri Şuşa indi sağalır, sürətlə keçmiş şöhrətini bərpa edir. Şəhərin bərpası Prezident İlham Əliyevin xüsusi nəzarətindədir. Dövlət başçısının il ərzində 7 dəfə Şuşaya səfər etməsi də bunu təsdiqləyir.

Prezident İlham Əliyevin 60 illik yubileyini Şuşada qarşılaması isə mənəvi hadisədir. 50 illik yubileyini məcburi köçkünlərlə qeyd edən Azərbaycan Prezidenti 60 illik yubileyini Şuşada qarşıladı. Aralarında canlı bağlantı olan bu iki tarix İlham Əliyevin rəhbərliyi ilə gedilən möhtəşəm yüksəliş yolunun təntənəsinin təcəssümüdür. Azərbaycanın inkişafını və torpaqlarımızın işğaldan azad olunmasını təmin edən yol bundan sonra da dövlətimizə və xalqımıza yeni nailiyyətlər gətirəcək.

Rəşad CƏFƏRLİ

Azərbaycan.- 2021.- 29 dekabr.- S.1; 5.