Gədəbəyin turizm potensialı haqqında internet saytı yaradılıb

Ölkəmizin qərb bölgəsində, Kiçik Qafqaz sıra dağlarının qoynunda yerləşən Gədəbəy əsrarəngiz təbiəti ilə hər kəsi valeh edir.

Yayda yaşıl örtüyə bürünən yaylaqlar, geniş çəmənliklər, sıx meşələr, dağların zirvəsindən yamaclar boyunca axan kiçik çaylar, şəlalələr, göllər, qayalar arasından süzülüb axan buz bulaqlar, həmçinin qədim və zəngin tarixi abidələr Gədəbəyi yerli və xarici turistlər üçün əvəzolunmaz məkana çevirmişdir.

Gədəbəydə həmçinin 500-dən çox tarixi abidə, qala və qalaçalar da var ki, onlardan 106-sı qeydiyyata alınmışdır. Rayonun Söyüdlü kəndindəki Böyük Qalaça (eramızdan əvvəl II-I minilliyə aid Tunc-ilk Dəmir dövrü), Qız qalası (IX əsr ölkə əhəmiyyətli memarlıq abidəsi), Mahrasa kompleksi (atəşpərəstlik dövrünün memarlıq nümunələri), Koroğlu qalası (XVl əsr ölkə əhəmiyyətli memarlıq abidəsi), Simens körpüsü (XlX əsrin 60-cı illərinə aid tikili), Böyük Qaramurad kəndi ərazisində yerli əhəmiyyətli Alban tarixi memarlıq abidəsi (1634-cü il), Novosaratovka kəndindəki yerli əhəmiyyətli Alban tarixi memarlıq abidəsi (1535-ci il) bu yerlərin qədimliyindən xəbər verir.

Bundan başqa, 26 adda mineral suların, 100-dən çox təbii müalicəvi bitkilərin, sıx meşə massivlərinin olması rayonun füsunkar turizm imkanlarının əyani nümunələrindəndir.

İndi bütün bunlar haqqında rayonun turizm potensialını, o cümlədən tarix və mədəniyyət abidələrinin təbliği məqsədilə yaradılmış http://visitgadabay.az/ internet saytından məlumat almaq mümkündür. Saytda həmçinin rayonda fəaliyyət göstərən istirahət mərkəzləri, milli yeməklər, keçirilmiş tədbirlər, milli adət-ənənələrimiz və gəzməli-görməli yerləri haqqında ətraflı məlumatlar verilir.

Sabir ƏLİYEV

Azərbaycan.-2021.- 9 fevral.- S.5.