Əhalinin 93 faizi Paşinyanın istefasını tələb edir

Ermənistandakı gərgin siyasi proseslərin gedişi hakimiyyətə qarşı tədricən etimadsızlığın formalaşdığını üzə çıxarır. Ölkədə bütün sahələrdə problemlər günbəgün artır.

Paşinyan iqtidarı isə onları həll edə bilmədiyindən ciddi çətinliklər yaranır. Bu ağır vəziyyət əhalinin hakimiyyətə qarşı narazılığını xeyli artırıb.

Media bunun əyani sübutu kimi tanınmış erməni teleqram kanallarından olan “Mediaport”un keçirdiyi sorğunu göstərir. Sorğuda Ermənistan vətəndaşlarından “Əgər bu həftə - bazar günü parlamentə növbədənkənar seçkilər keçirilsə, “Mənim addımım” fraksiyasının üzvlərinə səs verərdinizmi?” - deyə soruşulub. Ermənilərin 5 faizi “hə”, 3 faizi cavab verməkdə çətinlik çəkdiyini, 93 faizi isə “yox” deyib.

Görünən odur ki, ölkədə yaranan böhranlı vəziyyət insanları hakimiyyət barədə daha pessimist düşünməyə vadar edir. Qeyd olunur ki, çıxılmaz duruma düşməyin yaratdığı pis duyğular, Ermənistanın perspektivinə inanmamaq artıq dayanıqlı şəkil alır. Bu da insanların davranışına və əhvali-ruhiyyəsinə təsir edir.

Böhran Ermənistanda həyatın bütün sahələrini ağuşuna alıb. Yalnız iqtisadi sferada baş verənlər vəziyyətin nə qədər acınacaqlı olduğunu göstərir. Artıq iqtisadçılar dövlət borcunun həddən çox olması barədə həyəcan təbili çalırlar. Ermənistanın keçmiş sənaye və ticarət naziri Karen Çşmarityan “4rd.am” saytına verdiyi müsahibəsində bildirib ki, problem Ermənistanın ümumi iqtisadi siyasəti ilə bağlıdır. “Əgər mövcud iqtisadi geriləmə tempi daha 2 ay belə davam etsə, bundan sonra nə olacağını söyləmək çətindir. Bütün bunların necə bərpa edilə biləcəyini düşünmək qəliz məsələ olacaq. Bu gün milli, dövlət maraqlarımız təhlükə altındadırsa, hansı milli iqtisadiyyatdan danışa bilərik”, - deyə o sual edib.

Qeyd edək ki, Ermənistanda gözlənilən defolt bu ölkənin xarici borc öhdəlikləri sahəsində ciddi çətinliklərin meydana çıxmasına rəvac verəcək. Çünki defolt o deməkdir ki, dövlət borc öhdəliklərini vaxtında yerinə yetirə bilmir. Ermənistan onsuz da borc öhdəliklərini çətinliklə yerinə yetirir. Əslində, borc öhdəlikləri başqa borclar hesabına yerinə yetirildiyindən ölkənin xaricdən olan iqtisadi asılılığı da sürətlə artır.

Ermənistan hakimiyyəti üçün daha bir problem ölkədən kapital axınının artması ilə bağlı yaranıb. “Joxovurd” qəzeti etibarlı mənbələrinin təqdim etdiyi statistikaya əsasən yazır ki, Nikol Paşinyan hakimiyyətə gəldikdən sonra Ermənistandan xaricə pul axını rekord həddə artıb. Qeyd olunur ki, hökumətdə təmsil olunan oliqarx siyasətçilər və biznesmenlər digərlərinin başına gələnlərdən dərs çıxararaq Paşinyanın toruna düşməmək üçün Ermənistanı tərk etmək qərarına gəliblər. 10 ay ərzində Ermənistan kimi kiçik və büdcə kəsiri ilə dövlət borcu getdikcə artan bir ölkədən 1 milyard ABŞ dollarına yaxın pulun xaricə çıxarılması yaxşı heç nə vəd etmir. “Çünki bu, həmin oliqarx siyasətçilərin Ermənistandakı bizneslərinin bağlanması və iqtisadiyyata yatırdıqları sərmayənin geri götürülməsi deməkdir ki, nəticədə müharibədə məğlub olan bir ölkədə işsizlik və yoxsulluğun səviyyəsi daha da artacaq. Belədə zərbə Paşinyana yox, erməni xalqına dəyəcək”, - deyə qəzet yazır.

Ağır sosial-iqtisadi vəziyyət fonunda Ermənistanda miqrasiya probleminin daha da dərinləşməsi müşahidə olunur. Hadisələrin real inkişaf axarı göstərir ki, bu gedişlə miqrasiya Ermənistanda əsl demoqrafik fəlakət yaradacaq. Hakimiyyətin bu məsələnin həlli istiqamətində atdığı addımlar isə faktiki olaraq iflasa uğrayıb. Məsələnin bu tərəfinə nəzər salan etnoqraflar bildirirlər ki, ölkə rəhbərliyi indiyədək miqrasiya prosesini dayandıra, qarşısını ala bilməyib.

“İravnuk” qəzeti isə sosioloqlara istinadən yazır ki, Ermənistan əhalisinin 45 faizi tam kasıblıq həddində yaşayır. Araşdırmalar nəticəsində həmin 45 faizin 13 faizinin dilənçi vəziyyətdə yaşadığı məlum olub. “Müəyyən etdik ki, ağır sosial vəziyyətlə əlaqədar uşaqlar məktəbə getmirlər. Ailələr buna səbəb olaraq həmin uşaqların ayaqqabı və isti geyimlərinin olmamasını göstərirlər”, - deyə qəzet yazır.

Beləliklə, mövcud vəziyyət qarşıdakı dövrün Ermənistanda siyasi və sosial-iqtisadi baxımdan ağır fəsadlarla zəngin olacağını göstərir. Ona görə ekspertlər ölkədəki böhranın daha da dərinləşəcəyini labüd hesab edirlər.

Elçin CƏFƏROV,

Azərbaycan. - 2021.- 11 fevral.- S.1; 5.