Gədəbəydə Vətən müharibəsi şəhidinin 30 yaşı qeyd edilib

Vətən müharibəsində qəhrəmanlıq nümunəsi göstərən oğullarımızdan biri də Həsənov Etibar Ələddin oğludur. Ölümün gözünə dik baxaraq şəhidlik zirvəsinə ucalan Etibar Həsənovun bu günlərdə 30 yaşı tamam olmuşdur.

Göstərdiyi igidliyə görə ölümündən sonra Prezident İlham Əliyevin sərəncamlarına əsasən, “Vətən uğrunda” və “Şuşanın azad olunmasına görə” medalları ilə təltif olunmuş şəhidin doğum gününü ailəsi ilə birlikdə rayon rəhbərləri də qeyd etmişlər.

Əvvəl şəhidin məzarı ziyarət olunmuş, igid Vətən oğlunun əziz ruhuna dua oxunmuşdur. Şəhidin atası Ələddin Həsənov hər zaman onlara göstərilən diqqət və qayğıya görə dövlət başçısı

İlham Əliyevə, Birinci vitse-prezident Mehriban xanım Əliyevaya minnətdarlığını bildirmiş, oğlunun doğum günündə xatirəsinin yad olunmasını bütün şəhidlərimizə olan hörmət və ehtiramın bariz nümunəsi kimi qiymətləndirmişdir.

Etibar Həsənov 1991-ci il fevralın 7-də Gədəbəy rayonunun Qarıkənd kəndində anadan olmuşdur. 1997-ci ildə Gədəbəy rayon Qarıkənd kənd ümumi orta məktəbinin 1-ci sinfinə getmiş, 2006-cı ildə rayondakı peşə liseyinə daxil olmuşdur. 2009-cu ildə həqiqi hərbi xidmətə çağırılmışdır. 2010-cu ildə Müdafiə Nazirliyinin “N” saylı hərbi hissəsində həqiqi hərbi xidmətini başa vurmuşdur. 2019-cu il may ayının 15-də “N” saylı hərbi hissədə müddətdən artıq hərbi qulluqçuların hazırlığı kursunda əsgər sürücü ixtisası almışdır. Elə həmin ildən Gədəbəy rayon “N” saylı hərbi hissəsində müddətdən artıq hərbi qulluqçu kimi işə başlamışdır. 2020-ci ilin sentyabr ayının 28-də könüllü olaraq Qarabağın müdafiəsinə yollanmışdır. Füzuli şəhərinin və bir sıra kəndlərin və yüksəkliklərin alınmasında fəal iştirak etmiş, Şuşa uğrunda gedən döyüşlər zamanı düşmənin hücumunun qarşısını alarkən qəhrəmancasına şəhid olmuşdur. 2020-ci il noyabr ayının 12-də doğulub boya-başa çatdığı kənddə dəfn olunmuşdur. Ailəli idi. Fuad və Səma adlı iki azyaşlı övladı var.

Sabir ƏLİYEV,

Azərbaycan. - 2021.- 12 fevral.- S.9.