İLHAM ƏLİYEV MÖCÜZƏSİ

Növbəti möcüzə isə Qarabağın cənnətə çevrilməsi olacaq

Qəfil möcüzə baş verdi!

Azərbaycan hərbi əməliyyatlara başlayaraq 44 gün ərzində qudurmuş düşməni diz üstə çökdürdü!

İpə-sapa yatmayan, sülhə gəlməyən, özünü yekəxana və yekəbaş aparan Paşinyan Müzəffər Ali Baş Komandan İlham Əliyevin bütün şərtlərini qəbul etdi, məhvolma təhlükəsindən qorxaraq Ağdam, Kəlbəcər və Laçın rayonlarını qrafik üzrə, həm də döyüşsüz təslim etdi!

Kapitulyasiya sənədinin imzalanmasının təşəbbüsçüsü və vasitəçisi olan Rusiya əslində növbəti dəfə Ermənistanın xilaskarına çevrildi.

30 il ərzində işğal etdiyi ərazilərdə özünə bunker, səngər, istehkam yaradan, yaşayış məskənlərini xarabalıqlara çevirən, meşələri qırıb faydalı qazıntı yataqlarını çapıb-talayan, torpaqları, xüsusən Şuşa şəhəri ilə Kəlbəcər və Laçın rayonlarını qaytaracağını ağlına belə gətirməyən Ermənistan İlham Əliyevin dəmir yumruğu qarşısında quzuya, müti qula çevrildi!

Bu nə möcüzə idi?!

Xalq həmin xalq, döyüşənlər həmin vətənpərvər insanlar, ərazi həmin ərazi...

Düşmən də əvvəlki kimi arxalı və hiyləgər, özünü məğlubedilməz sayan...

Bəs nə dəyişib, nə baş verib?!

Niyə Birinci Qarabağ müharibəsində uduzduq, torpaqları əldən verdik, indi isə möhtəşəm qələbə qazanmışıq?!

Əgər 44 gün ərzində münaqişəyə son qoymaq, torpaqları azad etmək (hələ qorumaq hücuma keçməkdən daha asan və əlverişli sayılır) mümkün idisə, niyə bizi 30 illik məşəqqətə salan məğlubiyyət baş verdi?!

Necə oldu ki, Qarabağda doğulub böyüyən, onu canı və qanı ilə sevənlər, gözünü qırpmadan şəhidliyə yüksələnlər torpağı qoruya bilmədilər, amma Qarabağı görməyən, doğma yurd-yuvadan kənarda doğulan gənclərdən ibarət ordu dəmir yumruq kimi düşmənin başını qısa müddətdə əzdi?

Sualı bir də təkrar edirik: nə dəyişib, nə baş verib?

Sualın cavabı həm sadə, həm mürəkkəbdir!

Həm də aydın və anlaşılandır.

Qarabağlıların təbirincə söyləsək, Birinci Qarabağ müharibəsində yiyə-vay dərdindən uduzmuşduq!

Bəli, ötən əsrin 90-cı illərində millətin əsl yiyəsi, yol göstərəni, qabağına düşəni, səfərbər edəni, ordu yaradaraq onu silahlandıranı yox idi!

Dünyanın çalxalandığı, qırmızı imperiyanın dağıldığı bir vaxtda baş verənlərdən müdrikcəsinə baş çıxardan, düzgün siyasət yürüdən, müstəqillik gəmisini təlatümlərdə, qasırğa və fırtınada məharətlə idarə edən, sualtı qayalardan qoruyaraq sağ-salamat düz istiqamətdə apararaq mənzil başına çatdıran təcrübəli kapitan yox idi!

Sualın mürəkkəb tərəfi isə “niyə yox idi” şəklində verilə biləcək növbəti sualdan doğur!

Bunun cavabı isə çox sadə və aydındır:

Çünki xalq həqiqi rəhbərindən ayrı düşmüşdü;

Çünki həmin illərdə ölkəyə maymaqlar, qorxaqlar, qətiyyətsizlər və səriştəsizlər - bir sözlə şəxsi maraqlarını ümumi mənafedən üstün tutanlar başçılıq edirdilər!

Nəticə fəlakətli oldu: 20 min şəhid verilməklə 20 faiz ərazi itirildi, üstəlik otuz il ərzində bir milyondan çox qaçqın və məcburi köçkün zillət çəkdi!

Biz millət kimi gözükölgəli, dili qısa olduq!

Bizi torpağını qoruya bilməyən, qorxaq xalq kimi tanıdılar!

Heç kim həqiqəti öyrənmək, həqiqəti dilinə gətirmək, haqqı-ədaləti müdafiə etmək fikrinə belə düşmədi!

Adımızı “vəhşi”, “qaniçən” qoydular!

Qəddar düşmənimizə isə “məzlum”, “zavallı millət”, “qədim xalq” yarlığı bağladılar!

Yanan da biz, yaman da biz olduq!

Ümidimizi ATƏT-in Minsk qrupuna bağladıq...

Gücümüzü ikili standartlarla mübarizəyə yönəltdik...

Ulu Öndər Heydər Əliyev yenidən ölkə rəhbərliyinə qayıdanda sanki üstümüzə gün doğdu.

Hər şey dəyişdi, ümidimiz yenidən cücərməyə başladı.

Heyhat, ömür vəfa etmədi, Ümummilli Liderimiz bizi siyasi varisinə əmanət edərək haqq dünyasına qovuşdu!

Xoşbəxtlikdən qoyub getdiyi siyasi kurs davamlı və uğurlu oldu!

İlham Əliyev nəinki xalqın etimadını doğrultdu, faktiki olaraq dünya səviyyəli liderə çevrildi, xalqımızın tarixinə adını qızıl hərflərlə yazdıraraq itirilmiş torpaqları qaytaran qalib Sərkərdəyə, Dağlıq Qarabağ problemini həmişəlik çözən dövlət başçısına, əslində möcüzə yaradan rəhbərə çevrildi!

***

Prezident İlham Əliyev bu möcüzəni bir gündə, bir anda yaratmayıb!

Ona addım-addım, yavaş-yavaş yaxınlaşıb.

Saysız-hesabsız problemləri həll etməklə, çətinlikləri aradan qaldırmaqla, çoxlarına xoş gəlməyən müstəqil xarici siyasət yürüdərək Azərbaycanın maraqlarını daim yüksəkdə tutmaqla, bir-birilə bağlı vəzifələri əlaqəli şəkildə həyata keçirməklə, böyük iradə, əzm, qətiyyət və fədakarlıq nümayiş etdirməklə məqsədə çatıb!

Müdrik dövlət xadimi İlham Əliyev bütün işləri sonadək “qapalı” apardı, düşməni və onun havadarlarını ayıq salmadı, son ana qədər hazırlıqlarını və etmək istədiklərini büruzə vermədi.

Nəyi, nə vaxt və necə etməyi hamıdan daha yaxşı bilməklə şanlı qələbəni təmin etdi!

***

Müzəffər Ali Baş Komandan İlham Əliyevin möcüzəsi bir neçə tərkib hissədən ibarətdir. Qısa şəkildə nəzərdən keçirək.

Ən əvvəl, cənab İlham Əliyev tarixinin ən güclü Azərbaycanını yaratdı!

Prezident İlham Əliyevin rəhbərliyi dövründə ümumi daxili məhsul istehsalının artımı sahəsində Azərbaycan daim lider dövlətlər sırasında olub!

Xəzərin karbohidrogen ehtiyatları qeyri-ənənəvi marşrutlarla dünya bazarına çıxarılıb, ölkəmiz Avropanı enerji daşıyıcıları ilə ən etibarlı şəkildə təmin edən dövlət imicini qazanıb, tərəfdaşlarına, qonşu dövlətlərə fayda gətirən transmilli layihələri uğurla, öz gücü hesabına gerçəkləşdirib, logistika mərkəzinə, Şərq-Qərb, Şimal-Cənub nəqliyyat dəhlizlərinin kəsişdiyi məkana çevrilib, qeyri-neft sektorunun, sahibkarlığın inkişafında diqqətəlayiq nailiyyətlərə imza atıb, iqtisadi imkanlarını siyasi nüfuzuna çevirməyi bacarıb.

İkinci, Azərbaycan beynəlxalq layihələrə həyat vəsiqəsi verəndə əməkdaşlıq etdiyi dövlətlərlə dostluq əlaqələrini yarada, mövcud əlaqələri və münasibətləri daha da möhkəmləndirə bilib. Haqq işi uğrunda mübarizə aparanda, ordu quruculuğunda, hərbi əməliyyatların gedişində bu əlaqə və münasibətlər ona kömək etdi. Ölkəmiz Türkiyə, İsrail, Rusiya, Ukrayna kimi dövlətlərdən müasir silahlar alaraq öz arsenalını möhkəmləndirdi. Hətta dostlarımızın bir qismi bizə satdıqları silahlardan düşmən ölkəyə vermədi.

Üçüncü, dövlət başçısı cənab İlham Əliyev torpaqların hərbi yolla azad edilməsi variantına hazırlığı təkcə ordunun gücləndirilməsi yolu ilə məhdudlaşdırmadı. Diplomatiya sahəsində də ardıcıl və məqsədyönlü addımlar atıldı.

Prezidentimizin təşəbbüsü ilə hücum diplomatiyasına start verildi, dünya ölkələrində diaspor fəaliyyəti gücləndirildi, Azərbaycan - Türkiyə diaspor qurumlarının əlbir işi təmin olundu.

Erməni diasporunun geniş əl-qol açmasına yol verilmədi.

Dördüncü, beynəlxalq qurum və təşkilatlarla aparılan iş əsaslı şəkildə gücləndirildi. Bu sahədə ən ağır yükü dövlət başçısı öz üzərinə götürdü. BMT Təhlükəsizlik Şurasının iclaslarına, Türkdilli Dövlətlərin Əməkdaşlıq Şurasına, Qoşulmama Hərəkatına sədrliyi dövründə səlahiyyətlərindən istifadə edən cənab İlham Əliyev Ermənistan-Azərbaycan Dağlıq Qarabağ münaqişəsi ilə bağlı problemləri diqqət mərkəzinə gətirərək əsl həqiqətlərin dünya ictimaiyyətinə çatdırılmasına, Azərbaycana haqq işində dəstək verənlərin sayının artırılmasına nail olmuşdur. Həmçinin yaranan bütün imkanlardan, o cümlədən “Valday” Beynəlxalq Diskussiya Klubu və Münxen Təhlükəsizlik Konfransındakı çıxışlarından bacarıqla istifadə edərək Ermənistanın işğalçı siyasətini, sülh danışıqlarından məqsədli şəkildə yayınmasını ifşa etmişdir.

Beşinci, bu möcüzənin yaranmasında qardaş Türkiyə dövlətinin yaxından dəstəyinin xüsusi əhəmiyyəti olmuşdur. Məhz cənab İlham Əliyevin səmimi, fədakar zəhməti sayəsində canbir, qanbir, dil və din bir Türkiyə ilə Azərbaycanın sarsılmaz dostluğu özünün ən yüksək, sıx qardaşlıq səviyyəsinə yüksəlmişdir. Bircə faktı yada salırıq: 1992-ci ildə Kəlbəcərin işğalı zamanı ozamankı prezident Ə. Elçibəy insanların mühasirədən çıxarılması üçün Türkiyədən bir mülki vertolyot belə ala bilməmişdi (buna görə türk qardaşlarımızdan incimirik), NATO üzvü olan Türkiyə bu addımı ata bilməmişdi. Bugünkü Ərdoğan Türkiyəsi isə müasir dünyada öz sözü, öz yeri olan, maraqlarını təmin etmək imkanına malik qüdrətli dövlətə çevrilmişdir. Qardaş Türkiyə bu savaşda daima özü, sözü, silahı, imkanları ilə yanımızda durdu, bütün səviyyələrdə Azərbaycanın dəstəkləyicisi olduqlarını birmənalı şəkildə bəyan etdi!

Altıncı, Prezident İlham Əliyev yeni vətənpərvər gənclər nəslinin yetişməsinə nail oldu. Və həmin gənclər könüllü olaraq Azərbaycan Ordusuna yazılmaqla müharibənin gedişində öz sözlərini dedilər. Milli Olimpiya Komitəsinin Prezidenti İlham Əliyev həmin gəncləri şəxsi nümunəsi əsasında, idman meydanlarında, təhsil ocaqlarında yetişdirmişdir. Müxtəlif idman yarışlarında qalib gələrək, dövlət bayrağını qaldıraraq himnini səsləndirən, mükəmməl təhsil alaraq quruculuq işlərinə qoşulan müstəqil dövlətimizin gənc vətəndaşları düşmən işğalı ilə heç cürə barışmırdılar və Ali Baş Komandanın “irəli” əmri ilə dərhal silaha sarıldılar, bu dəfə işğaldan azad edilən ərazilərdə üçrəngli bayrağımızı ucaltdılar.

Yeddinci, yeni zabitlər heyəti və xüsusi hazırlıq görmüş döyüşçülərin yetişdirilməsi də təmin olundu. Onlarla daim təlim keçirildi, yerli şəraitə uyğun əməliyyatlara hazırlıqlar aparıldı. Məhz bu uzaqgörənlik qala şəhəri olan Şuşanın yüngül silahlar və əlbəyaxa döyüşlər yolu ilə alınmasında təsdiqini tapdı!

Səkkizinci, müharibənin ilk günlərindən orduda qeyri-adi ruh yüksəkliyi müşahidə olundu. Azərbaycanın əsgər və zabitləri yüksək peşəkarlıqla, qəhrəmanlıqla çarpışır, düşmənə göz açmağa aman vermir, hətta yaralanan belə döyüş meydanını tərk etmir, digərləri yaralı əsgər yoldaşını tək qoymayaraq özü ilə aparırdı. 44 günlük müharibə dövründə bir nəfər belə fərarilik etmədi! Halbuki düşmən ordusunda öz etiraflarına görə, fərarilərin sayı on mini keçmişdi və geri qaçanların qabağını almaq üçün özləri güllələyirdilər.

Doqquzuncu, Azərbaycan Vətən müharibəsinə yeni taktika və strategiya ilə gəlmişdi. Bunu bütün dünya gördü, bildi, təsdiq etdi. Nəinki təsdiqlədi, hətta yeni müharibə nümunəsi ortaya qoyan Azərbaycanın təcrübəsindən nəticə çıxararaq öz ordularında zəruri dəyişikliklərin aparılmasının və bu təcrübədən yararlanmanın vacibliyini söylədilər. Ermənistan isə özünün olmayan qalibiyyətinə güvənərək XX əsrin ordusu və silahları ilə müharibəyə başlamışdı. Nəticədə çox qısa zaman ərzində dəmir yumruğun zərbəsindən sarsıldı, diz çökərək aman dilədi!

Onuncu, Ali Baş Komandan İlham Əliyev Azərbaycan xalqının milli birliyini də təmin etmişdi. Müharibə başlayan kimi bir-ikisi istisna olmaqla, ölkədəki bütün siyasi partiyalar və qurumlar torpaqların işğaldan azad olunması uğrunda gedən savaşda dövlət başçısını tam dəstəklədikləri barədə rəsmi bəyanat yaydılar. Bu da Azərbaycanın müstəqillik tarixində bir ilk oldu, düşmənə və onun havadarlarına qarşı mübarizədə mühüm dəstəyə çevrildi.

On birinci, müasir müharibələrin hibrid müharibəsi olduğunu gözəl bilən Ali Baş Komandan İlham Əliyev informasiya müharibəsinə də irəlicədən hazırlaşmışdı. Elektron resurslarında, xüsusən sosial şəbəkələrdə hərbi əməliyyatlar barədə, habelə hərbi sirr ola biləcək informasiyaların yayılmasının qarşısının alınması üçün qanun əsasında bütün tədbirlər görülmüşdü. Müharibə dövründə dünya KİV-inə və informasiya agentliklərinə otuzdan çox müsahibə verən cənab İlham Əliyev bu sahədə də əsas ağırlığı öz çiyinlərinə götürdü, ölkəmizə qarşı atılan böhtanlara tutarlı cavab verdi, erməni faşizminin iç üzünü açıb göstərdi, qərəzli jurnalistlərə isə jurnalistika dərsi keçdi!

On ikinci, şübhəsiz ən böyük möcüzədən biri son üç yüz il ərzində Azərbaycanın itirdiyi torpaqları geri qaytarması və iki əsr davam edən, zaman-zaman ölkəmizdən torpaq qoparılması ilə nəticələnən Ermənistan-Azərbaycan Dağlıq Qarabağ münaqişəsinə son qoyulmasıdır.

Müzəffər Ali Baş Komandan İlham Əliyev düşmənin başını dəmir yumruğu ilə elə əzdi ki, o, bir daha özünə gələrək qüdrətli Azərbaycandan ərazi qoparmaq iqtidarında olmayacaqdır!

***

Qarabağın 44 gün ərzində işğaldan azad edilməsi möcüzəsini yaradan Prezident İlham Əliyev bu zəfəri quruculuq sahəsində davam etdirməkdədir.

Eyni zamanda bir çox mühüm istiqamətlərdə dövlət başçısı yorulmadan çalışır.

Bu işlər cənab İlham Əliyevin xalqımıza verdiyi sözün - Qarabağın yenidən dirçəldilərək cənnətə çevrilməsinə xidmət göstərir!

ONLAR HANSILARDIR:

* Bütün dövlət sərhədlərinə sahib çıxan ölkəmiz hazırda həmin sərhədlərin delimitasiya və demarkasiyasını başa çatdırmaqdadır.

Bu prosesdə ermənilərin uzun illər boyu bizdən oğurladıqları ərazilər də müəyyənləşdirilərək geri qaytarılır, sərhədlərin qorunması Azərbaycan sərhədçilərinə verilir.

* Murdar düşmənin özündən sonra qoyub getdiyi “ölüm tələləri” aşkarlanaraq ləğv edilir.

Minalardan təmizlənmə prosesində türk hərbçiləri və rusiyalı sülhməramlıları da yaxından iştirak edirlər.

* İşğal və müharibə dövründə ölkəmizə dəyən ziyan, habelə xarici şirkətlərin ölkəmizdə apardıqları talançılıq işləri müəyyənləşdirilir, səlahiyyətli və təcrübəli beynəlxalq qurumlar tərəfindən sənədləşdirilir.

Azərbaycan dövləti həmin sənədlər əsasında Ermənistanı və digər şirkətləri beynəlxalq məhkəməyə verərək vurulan maddi ziyanı kompensasiya etdirəcəkdir.

* Dövlət başçısı cənab İlham Əliyev müntəzəm surətdə işğaldan azad olunan bölgələrə gedir, görülən işlərlə tanış olur, yeni layihələrin gerçəkləşdirilməsi üçün tapşırıq və göstərişlərini verir, təməlqoyma mərasimi keçirir, dirçəliş proqramının icrasının sürətləndirilməsinə çalışır.

Görülən işlərin sayı və çeşidi isə həddindən çoxdur:

* ilk növbədə yeni avtomobil yolları çəkilməli, dəmir yolları salınmalı, beynəlxalq aeroport tikilməlidir;

* əhalinin geri qayıtması üçün digər zəruri infrastrukturlar - elektrik enerjisi, içməli su, kanalizasiya xətti çəkilməli, təbii qaz verilişi təmin edilməlidir;

* ən vacib məsələlərdən biri investisiya cəlbi, bu hesaba müxtəlif layihələrin reallaşdırılmasıdır;

* geri qayıdan əhali üçün yaşayış məskənlərinin salınması, inzibati binaların inşası, yeni iş yerlərinin yaradılması, ilk növbədə, görülən işlər sırasındadır;

* kənd təsərrüfatının, sahibkarlığın, turizmin inkişafı da Qarabağın potensialını üzə çıxaracaq sahələrdir.

Qalib dövlət başçısı İlham Əliyev Şuşanı mədəniyyət paytaxtı elan edib. Bu məqsədlə görüləcək işlərə artıq start verilib.

Mədəni-tarixi abidələrin, dini məbədlərin, həm də bütün dini məbədlərin bərpası və yenidən qurulması gündəlikdəki məsələlərdəndir.

Bütövlükdə Prezidentimiz yaxın gələcəkdə Qarabağı cənnətə çevirməyi planlaşdırır!

Prezidentimizə inanırıq: sözünün sahibi olan dövlət rəhbəri kimi!

Həm də daim düşünülmüş siyasət yeridən, hesablanmış addımlar atan, xalqın maraqlarını həmişə qoruyan və üstün tutan vətənpərvər dövlət başçısı kimi!

Eyni zamanda əminik ki, cənab İlham Əliyev dediklərini gözləniləndən də tez başa gətirəcəkdir!

Axı İlham Əliyev möcüzə yaratmağı bacarır!

Budur, dünyanı çıxılmaz duruma salan, bütün sahələrdə tənəzzül yaradan, insanları fəaliyyətdən kənarda saxlayan COVID-19-un uğursuz ilə çevirdiyi 2021-ci il İlham Əliyevin qələbəsi hesabına Azərbaycan üçün tarixi zəfər ili oldu!

Həm də təkcə tarixi zəfər ili yox!

“Gallup International”ın “Xoşbəxtlik İndeksi” beynəlxalq sorğusunun nəticələrinə görə, Azərbaycan 76 faiz xoşbəxtlik indeksi ilə ən xoşbəxt ölkələrin ilk beşliyinə, Ermənistan isə 12 indekslə ən bədbəxt ölkələr siyahısında yer alıb!

Hamı üçün uğursuz ilin Azərbaycan üçün ən xoşbəxt ilə çevrilməsi bir möcüzə deyilmi?!

Bunun da müəllifi Azərbaycan xalqının sevimlisi İlham Əliyevdir!

Bəxtiyar SADIQOV

Azərbaycan.-2021.- 20 fevral.- S.1;3.