Ermənistan ekoloji terroru Almaniya şirkəti ilə birlikdə törədir

44 günlük Vətən müharibəsindəki şanlı qələbədən sonra Azərbaycan işğaldan azad edilmiş ərazilərdəki erməni vandallığını dünyaya nümayiş etdirməkdədir. Təkcə şəhər və kəndlərimiz, dini və tarixi abidələrimiz deyil, təbiətimiz də erməni terroru ilə üz-üzə qalıb.

Bu gün də ermənilər çirkin əməllərini davam etdirməkdədirlər. Ermənistan tərəfindən Zəngilan rayonu ərazisindən keçən Oxçuçayın çirkləndirilməsi, çay hövzəsinin flora və faunasının məhv edilməsi bunu təsdiqləyən reallıqdır. Artıq məsələ ölkədə geniş rezonans və ictimai narazılıq doğurub.

Oxçuçay Arazın sol qoludur. Ermənistanın Qafan rayonu və Azərbaycanın Zəngilan rayonu ərazisindən keçir. Uzunluğu 85 kilometr, hövzəsinin sahəsi 1140 kilometrdir. Başlanğıcını Zəngəzur silsiləsinin Qapıcıq dağından götürür. Çayın bir hissəsi Ermənistanın Sünik vilayətindən keçir. Bu çayın dağ-mədən sənayesinin tullantıları ilə çirkləndirilməsi hazırda fəlakət həddinə çatıb.

Çayın Araza tökülməsini nəzərə alsaq deyə bilərik ki, bu vəziyyət təkcə Azərbaycan üçün deyil, eyni zamanda İran üçün də böyük problemə çevrilib. Bu sudan məişət və kənd təsərrüfatı ehtiyacları üçün istifadə edilməsi son dərəcə mənfi nəticələrə gətirib çıxara bilər.

Oxçuçayın suyunun rəngi vaxtaşırı dəyişərək gah ağ rəngdə, gah da sarı turşu rəngində olur. 2021-ci ilin mart ayında Oxçuçayın suyunda dəmir, mis, nikel, molibden və digər ağır metalların çox olması nəticəsində balıq növlərinin kütləvi şəkildə qırılması qeydə alınıb. Çaydan götürülmüş su nümunələrinin analizinin nəticələri onun tərkibində mis, molibden, manqan, dəmir, sink və xrom kimi ağır metalların hədsiz çox olduğunu göstərib. Ağır metalların səviyyəsinin yüksək olması insan sağlamlığı üçün də təhlükəlidir. Monitorinq və analizlərin nəticələri, eyni zamanda çayda balıqların kütləvi məhv olması faktları çayın Ermənistan ərazisindəki Qacaran mis-molibden zavodunun və Qafan mis filiz saflaşdırma kombinatının toksiki tullantıları ilə çirkləndirilməsini təsdiq edir.

Bir sözlə, Ermənistan Oxçuçayda fəlakətli vəziyyət yaradıb. Amma Ermənistan bu terroru tək həyata keçirmir. Almaniyanın “CRONIMET Holding GmbH” şirkəti də bu prosesdə yaxından iştirak edir. Bu şirkət Ermənistanın ən böyük vergi ödəyicisi olan Zəngəzur mis-molibden kombinatının 60 faizlə əsas payçısıdır. Bunu xarici KİV-in araşdırmaları da təsdiqləyir. Göründüyü kimi, Ermənistanın Azərbaycana qarşı həyata keçirdiyi ekoloji terrorda xarici şirkətlərin iştirakına dair çoxsaylı faktlar mövcuddur.

Ancaq Azərbaycan mediasının Almaniya səfirliyinə müraciətinə verilən cavab yalnız bir məqsəd güdür - məsələni ört-basdır etmək və diqqəti şirkətin üzərindən yayındırmaq. Bu ölkənin Yaşıllar partiyası isə ümumiyyətlə müraciətə saymazyana cavab verərək Azərbaycana ayırmaq üçün vaxtlarının olmadığını bildirib. Bu partiya bizlərə çox yaxşı tanışdır. Azərbaycana qarşı aparılan çirkin kampaniyaların, qərəzli oyunların başında hər zaman bu partiya dayanıb.

Ermənistanın Azərbaycana qarşı həyata keçirdiyi ekoloji terrorda Almaniya şirkətinin iştirakının təsdiqini tapmasından və bu məsələnin beynəlxalq səviyyədə gündəmə gətirilməsindən sonra Almaniya hökuməti problemdən diqqəti yayındırmaq üçün mediada ölkəmizə qarşı kampaniya təşkil etməyə başlayıb. Bu həm də seçkilər ərəfəsində Almaniya hökumətinin ciddi ittihamlardan yaxa qurtarmaq cəhdidir. Əlbəttə ki, bu ölkədə təşkil olunan kampaniyaların davamlı xarakter daşıması həmin prosesdə Almaniya hökumətinin bilavasitə iştirak etdiyini göstərir.

Ermənistan Azərbaycan torpaqlarında həyata keçirdiyi bütün vandallıqlara görə cavab verməli olacaq. O cümlədən təbiətimizə qarşı edilən ekoloji terrorun hesabı sorulacaq

Rəşad BAXŞƏLİYEV

Azərbaycan.-2021.- 7 iyul.- S.1;3.