Azərbaycanla Gürcüstan arasında əlaqələrinin inkişaf perspektivləri müzakirə olunub

Tbilisidə səfərdə olan Azərbaycan Respublikasının mədəniyyət naziri Anar Kərimov iyulun 7-də Gürcüstan parlamentinin sədri Kaxa Kuçava ilə görüşüb.

AZƏRTAC xəbər verir ki, görüşdə iki ölkənin parlamentləri arasındakı əlaqələr, mədəniyyət, turizm və humanitar sahələrdə əməkdaşlıq məsələləri diqqət mərkəzində olub.

Kaxa Kuçava Azərbaycanın mədəniyyət nazirinin Gürcüstana səfərini, xüsusilə də keçirilən görüşləri və müzakirə olunan məsələləri yüksək qiymətləndirib. Bildirib ki, bu cür səfərlər iki dost və qardaş ölkə olan Azərbaycan ilə Gürcüstan arasında strateji tərəfdaşlıq münasibətlərinin daha da möhkəmlənməsinə xidmət edir.

Nazir Anar Kərimov Azərbaycanın Gürcüstanla münasibətlərin bütün sahələrdə inkişafına böyük önəm verdiyini qeyd edib.

Görüşdə ölkələrimiz arasında əlaqələrin bütün sahələrdə inkişafının vacibliyi qeyd olunub, qarşılıqlı maraq doğuran digər məsələlər ətrafında fikir mübadiləsi aparılıb.

Görüşdə Azərbaycanın Gürcüstandakı səfiri Faiq Quliyev və digər rəsmi şəxslər iştirak ediblər.

Azərbaycan.-2021.- 8 iyul.- S.2.