Böyük Zəfərin
diplomatik davamı
Terror xislətli Ermənistan həm 30 ilə yaxın işğal dövründə, həm də Vətən müharibəsi gedişində torpaqlarımıza yüz minlərlə mina basdırıb. Bu gün piyada və tank əleyhinə minalar işğaldan azad edilmiş torpaqlarda əsas problem olsa da, Azərbaycan Prezidentinin qətiyyəti və uğurlu diplomatiyası nəticəsində Ermənistan onların basdırıldığı yerlərin xəritələrini Azərbaycana verməyə məcbur edilir. Ağdamdan sonra Füzuli və Zəngilan rayonları üzrə də minalanmış ərazilərin xəritələri Azərbaycana təhvil verildi.
Ardıcıl diplomatik nailiyyətlər strateji hədəflərimizə çatmağa imkan verir
Siyavuş NOVRUZOV,
Milli Məclisin Regional məsələlər komitəsinin sədri:
- Torpaqlarını işğaldan azad edərək öz ərazi bütövlüyünü və tarixi ədaləti bərpa edən Azərbaycan dövləti postkonflikt dövründə də qətiyyətli mövqeyini davam etdirir və mühüm diplomatik nailiyyətlər qazanır. Prezident İlham Əliyevin rəhbərliyi ilə həyata keçirilən uğurlu diplomatiya sayəsində ölkəmizin milli maraqları təmin olunur, yeni mərhələdə nəzərdə tutulan hədəflərə çatmağa nail olunur.
Hazırda Azərbaycan ötən il noyabrın 10-da imzalanmış üçtərəfli Bəyanatın tam icrası, sərhədlərin delimitasiyası, regionda kommunikasiyaların bərpası, sülh və təhlükəsizliyin təmin olunması istiqamətində prinsipial yanaşma ortaya qoyur. Ölkəmiz minalanmış ərazilərin xəritələrinin verilməsi ilə bağlı ardıcıl mövqe sərgiləyir. Yeri gəlmişkən, Ağdamdan sonra Füzuli və Zəngilan rayonları ərazisində mina xəritələrinin əldə edilməsi Azərbaycan dövlətinin növbəti strateji nailiyyətidir. Dövlət başçısı, Müzəffər Ali Baş Komandan İlham Əliyev yüksək diplomatik məharət nümayiş etdirərək Azərbaycanın bu istiqamətdə davamlı uğurlar qazanmasını təmin edir.
Əlbəttə, minalanmış ərazilərin xəritələrinin alınması bir çox cəhətdən müstəsna əhəmiyyətə malikdir. Birincisi, xəritələrin əldə edilməsi insan itkisinin qarşısının alınması baxımından olduqca önəmlidir. Buna görə də on minlərlə vətəndaşımızın, eləcə də minatəmizləyənlərin həyatı təhlükədən xilas ediləcək. İkincisi, işğaldan azad olunmuş ərazilərimizdə Prezident İlham Əliyev və Birinci vitse-prezident Mehriban xanım Əliyevanın rəhbərliyi ilə zəruri infrastrukturun yaradılması və bərpa işləri üzrə mühüm addımlar atılır, əhəmiyyətli layihələr reallaşdırılır. Təbii ki, minalanmış ərazilərin xəritələrinin alınması ilə işğaldan azad edilmiş ərazilərimizdə abadlıq, bərpa və yenidənqurma işləri daha intensiv xarakter alacaq. Bu da Böyük Qayıdışı, daha dəqiq desək, soydaşlarımızın öz yurd-yerlərinə qovuşması prosesini sürətləndirəcək. Üçüncüsü, Ağdamdan sonra ən böyük infrastruktur layihələrinin Füzulidə reallaşdırılması nəzərdə tutulur. Füzulinin strateji önəmini, bölgədə bütün yol-nəqliyyat infrastrukturunun bu ərazidən keçməsini nəzərə alsaq, minalanmış ərazilərin xəritələrinin alınmasının necə böyük əhəmiyyət kəsb etdiyini bir daha anlayarıq.
Beləliklə, postmüharibə dövründə əldə olunan diplomatik nailiyyətlər Azərbaycan dövlətinin strateji hədəflərinə çatmağa imkan verir. Reallıqlar onu deməyə əsas verir ki, prinsipial mövqeyini davamlı sərgiləyən, öz şərtlərini diktə edən qalib Azərbaycan dövləti Böyük Qayıdışı ən yüksək səviyyədə təmin etmək və işğaldan azad olunmuş əraziləri cənnətə çevirmək iqtidarındadır.
Azərbaycanın beynəlxalq nüfuzunun növbəti təsdiqi
Fazil MUSTAFA,
Milli Məclisin deputatı,
Böyük Qurtuluş Partiyasının sədri:
- Ermənistan işğal dövründə Füzuli və Zəngilan rayonlarında basdırdığı tank və piyada əleyhinə təqribən 92 min minaya dair xəritələri iyulun 3-də Rusiya Federasiyasının təşəbbüsü ilə Azərbaycan tərəfinə təqdim edib. Ağdamdan sonra Füzuli və Zəngilan ərazisində mina xəritələrinin əldə edilməsi Prezident İlham Əliyevin müdrik və uzaqgörən siyasətinin məntiqi nəticəsi, Azərbaycan diplomatiyasının növbəti uğurudur.
Füzuli və Zəngilanda işğal dövründə basdırılmış təqribən 92 min mina xəritəsinin ermənilərdən alınması Prezident İlham Əliyevin israrla və qətiyyətlə Ermənistan qarşısında qaldırdığı bütün məsələlərin bundan sonra da həll ediləcəyinə bir işarədir. Mina xəritələrinin Ermənistandan alınması Azərbaycan dövlətinin nüfuzu ilə bağlı məsələdir. Çünki bu gün Azərbaycan qalib ölkə, regionda söz sahibidir və bölgədə baş verən proseslər onun diktəsi ilə həyata keçirilir. Müharibə bitən gündən biz bu məsələni beynəlxalq səviyyədə daim qaldırdıq və bu da öz bəhrəsini verdi. Mina xəritələrinin Ermənistandan alınması böyük diplomatik uğurdur. Hesab edirəm ki, bunun ardınca digər hədəflərimizə, o cümlədən Zəngilan dəhlizinin açılmasına da çatacağıq.
Xəritələrin növbəti partiyasının verilməsi Azərbaycanın gələcəyi üçün olduqca önəmli hadisədir. Bu eyni zamanda Ermənistanın müəyyən dərəcədə inad savaşından uzaqlaşmaq və məsələlərə yeni formada yanaşmaq istəyinin bir işarəsidir. Azərbaycan bu xəritələri əldə edəndən sonra ərazilərin təmizlənməsini daha çevik və sürətlə həyata keçirəcək. Ona görə də bu istiqamətdə işlərin davam etdirilməsi olduqca vacibdir. Əminik ki, bütün bunlar Müzəffər Ali Baş Komandan İlham Əliyevin rəhbərliyi ilə Azərbaycanın Qarabağa Böyük Qayıdış hərəkatını da sürətləndirəcək.
Mina xəritələrinin verilməsi infrastruktur işlərinin gedişinə müsbət təsir göstərəcək
Tamam
CƏFƏROVA,
Milli Məclisin deputatı:
- İyulun 3-də Ermənistan
işğal zamanı
Füzuli və Zəngilan rayonlarında basdırdığı tank və
piyada əleyhinə təqribən 92 min minanın
xəritələrini Azərbaycana
verdi. Ağdam rayonundan sonra
Füzuli və Zəngilanda minalanmış
ərazilərin xəritələrinin
alınması Prezident
İlham Əliyevin uzaqgörən xarici siyasətinin və diplomatiyamızın növbəti
uğuru kimi dəyərləndirilməlidir.
Mina xəritələrinin təqdim olunması məskunlaşma prosesinin proqnozlaşdırıldığından daha qısa müddətə reallaşacağına
imkan verəcək. Hazırda bərpa
və yenidənqurma işləri üçün
ən ciddi əngəllərdən biri
məhz işğal dövründə həmin
ərazilərdə ermənilər
tərəfindən kifayət
qədər çox sayda minaların basdırılmasıdır. Xəritələrin təqdim edilməsi
ərazilərin minalardan
təmizlənməsini sürətləndirməklə
yanaşı, infrastruktur
işlərinin gedişinə
də müsbət təsir göstərəcək.
Bu, məcburi köçkünlərin doğma
torpaqlarına qayıdışı
prosesinə və infrastruktur layihələrinin
reallaşmasına təkan
verəcək.
Minaların xəritəsinin Azərbaycana
verilməsi onların
aşkarlanması üçün
sərf olunan xərclərin azalmasına
da gətirib çıxaracaq. Ermənistan bir müddət
əvvəl 15 əsir
qarşılığında Ağdamın minalanmış
ərazilərinin xəritələrini
Azərbaycana vermişdi.
Füzuli və Zəngilanda
92 min mina ilə bağlı
xəritələrin əldə
olunması həmin uğurun davamıdır.
Hazırda Ağdamdan sonra ən böyük infrastruktur layihələri Füzuli
rayonunda həyata keçirilir.
Burada yeni hava limanı, dəmir yolu
xətləri və avtomobil yolları inşa olunur. Bu baxımdan Füzuli xüsusi strateji əhəmiyyət
kəsb edir. Xəritələrin əldə
olunması bu layihələrin daha tez zamanda
icra olunmasına böyük
töhfə verəcək.
Azərbaycan.-2021.- 8 iyul.- S.4.