Sumqayıt Dövlət Dram Teatrı Zəfərimizlə bağlı yeni film-spot hazırlayıb

Təqdim edilən növbəti film-spot “Dərs” adlanır. Layihənin rəhbəri Əməkdar artist Mübariz Həmidov, ssenari müəllifi və quruluşçu rejissor Fuad Kazımov, quruluşçu operator Əsgər Hüsüyevdir.

Vəfa Qurbanova, Habil Xanlarov və Mələk Dadaşovun çəkdikləri filmin qayəsi, yəni verilən “Dərs”in mahiyyəti tarixi vaxtında öyrənməyi təlqin etməkdir.

Fləşh-back kimi verilən kadrlarda məktəb xadiməsi məktəb illərini xatırlayır: o, yazı taxtasında işğal olunmuş rayonların tarixini yaza bilmir, donub qalır. Müəllimin danlağını götürür. İndi o illərə qayıdır. Xəyalən özünü şagird sayır, ixtiyarsız zamanı qarışdırıb əlini qaldırır. Qaldırır ki, artıq işğal vaxtını deyil, azad olunma tarixini söyləsin. Əsgərlərimizin rəşadətindən, düşmənin işğal etdiyi torpaqlardan qaçmasından danışsın.

Filmin sloqanı kimi böyük Atatürkün kəlamını söyləmək olar: “Tarixini bilməyən coğrafiyasını itirər”. “Dərs” film-spotun geniş tamaşaçı marağına səbəb olacağı şübhəsizdir və bu səbəbdən gələcəkdə daha bir neçə belə filmin çəkilişi nəzərdə tutulur.

Akif ƏLİYEV,

Azərbaycan.-2021.- 11 iyul.- S.6.