Qarabağda yeni dövr başlayır

İlham Əliyev işğaldan azad edilmiş ərazilərimizi inkişaf, əməkdaşlıq və təhlükəsizlik bölgəsinə çevirir

Vətən müharibəsində böyük qələbənin qazanılması ilə Azərbaycan tarixində həm də yeni inkişaf mərhələsinin təməli qoyuldu. 30 il düşmən tapdağı altında qalaraq dünyada “boz zona” kimi tanınan, narkotacirlərin, terrorçuların yuvasına çevrilmiş ərazilərimizdə bu gün quruculuq və bərpa işlərinə start verilib. Prezident İlham Əliyev işğaldan azad olunmuş əraziləri sülh, əməkdaşlıq və təhlükəsizlik bölgəsinə çevirir.

Qalib Sərkərdənin Qarabağ bölgəsinə 6-cı səfəri

Hazırda işğaldan azad edilmiş bütün şəhər və rayonların baş planlarının hazırlanması ilə bağlı Prezidentin tapşırığının icrası sürətlə davam etməkdədir. Hərbi əməliyyatların bitməsindən sonra İlham Əliyevin mütəmadi olaraq işğaldan azad edilmiş rayonlara səfər etməsi dövlət başçısının bu məsələlərə nə dərəcədə həssas yanaşdığının əyani sübutudur.

Növbəti səfər isə xalqımız üçün çox əlamətdar olan Novruz bayramı günlərinə, İlaxır çərşənbəyə təsadüf etdi. Qalib Ali Baş Komandan və xanımı, Birinci vitse-prezident Mehriban Əliyeva yenə də işğaldan azad edilmiş ərazilərimizə - Füzili, Xocavənd və Şuşaya tarixi səfər etdilər.

Bu dəfə Ali Baş Komandan Hadrut qəsəbəsində dövlət bayrağımızı qaldırdı, yeni avtomobil yollarının təməlini qoydu. İlham Əliyev bir daha bəyan etdi ki, azad edilmiş bütün torpaqlarda dağıdılmış şəhərlər, kəndlər yenidən qurulacaq, normal həyata qayıdacaq, infrastruktur bərpa ediləcək. Bu torpaqlar malik olduqları zəngin resurslar baxımından dünyanın diqqətində olacaq, əməkdaşlıq əlaqələrinin genişlənməsi üçün yeni imkanlar yaranacaq.

Azərbaycan Prezidenti Şuşada və digər rayonlarda görüləcək işlərlə əlaqədar tapşırıq və göstərişlərini verdi. Həmçinin reallaşacaq müxtəlif layihələr barədə məlumat verərək bölgənin gələcək inkişaf perspektivlərinin istiqamətlərini göstərdi. İlham Əliyev Şuşadakı durumu göstərərək bir daha dünyaya mesaj ünvanladı. Dağıdılan tarixi abidələrimizi, məscidlərimizi, qəbirlərimizi, Vaqifin məqbərəsini, büstünü, Pənahəli xanın sarayını göstərərək erməni vəhşiliyini bir daha ifşa etdi.

İlham Əliyev tezliklə Vaqifin məqbərəsində bərpa işlərinin başlanacağını, əvvəlki görkəminin bərpa ediləcəyini bildirdi. Layihə Heydər Əliyev Fondu tərəfindən Mehriban Əliyevanın rəhbərliyi ilə icra ediləcək.

Füzuli Hava Limanından İsa bulağına...

Bölgəmizin uzunmüddətli inkişafının və sabitliyin təmin edilməsində nəqliyyat layihələrinin xüsusi rolu var. Son illər ərzində ölkəmizdə bir çox yollar inşa edilib. 2004-cü ildən bu günə qədər 16 min kilometrdən çox avtomobil yolu çəkilib. Bu göstəriciyə görə, Azərbaycan dünyada qabaqcıl yerlərdədir. Ancaq işğaldan azad edilmiş torpaqlarımızda nəqliyyat infrastrukturunun inkişafı təkcə Azərbaycan üçün deyil, bölgədə yerləşən bütün ölkələr üçün əlverişli imkanlar yaradacaq.

Yeni yolların inşası ilə Azərbaycan Türkiyə ilə birləşəcək. Həmçinin Rusiya ilə İran arasında Naxçıvan ərazisi ilə dəmir yolu bağlantısı olacaq.

Martın 16-da Füzuli, Xocavənd rayonlarına səfəri zamanı Prezident bir daha dünyaya bəyan etdi ki, işğalçı Ermənistanın 30 il ərzində darmadağın etdiyi tarixi ərazilərini Azərbaycan qısa zamanda bərpa edib sülh-əminamanlıq mərkəzinə çevirir.

Hər dəfə yeni-yeni infrastrukturların açılışını edən İlham Əliyev bu dəfə Füzuli-Hadrut və Hadrut-Cəbrayıl-Şükürbəyli avtomobil yolunun təməlini qoydu.

Füzuli-Hadrut avtomobil yolu başlanğıcını “Zəfər” yolundan götürür və yeni inşa ediləcək Hadrut-Cəbrayıl-Şükürbəyli avtomobil yoluna birləşir. Uzunluğu 13 kilometr olan bu yol 4 hərəkət zolaqlı olacaq. Yol boyunca avtomobil körpüləri inşa ediləcək.

Hadrut-Cəbrayıl-Şükürbəyli avtomobil yolu isə başlanğıcını Hadrut yaşayış məntəqəsindən götürməklə və Cəbrayıl rayonundan keçməklə Şükürbəyli kəndində Hacıqabul-Mincivan-Zəngəzur dəhlizində avtomobil yoluna birləşir. Uzunluğu 43 kilometrdir. Dörd hərəkət zolaqlı bu yol boyunca avtomobil körpüləri tikiləcək.

Bu yollar işğaldan azad edilmiş torpaqlarda icra edilən növbəti layihələrdir. İlk layihə ötən il noyabrın 16-da start götürüb. Böyük Qələbə günündən 8 gün və Ermənistanın kapitulyasiyasından 6 gün keçəndən sonra artıq Azərbaycan quruculuq işlərinə başlayıb. Həmin gün Füzuli və Cəbrayıl rayonlarına səfər edən Prezident Füzulidən Şuşa şəhərinə aparan yeni yolun təməlini qoyaraq bu hadisəni belə qiymətləndirmişdi: “Bu gün ölkəmizin həyatında çox əlamətdar bir gündür, tarixi bir gündür. Bu gün Füzuli-Şuşa avtomobil yolunun təməli qoyulur. Bu münasibətlə bütün Azərbaycan xalqını ürəkdən təbrik edirəm. Bu yolun çox böyük əhəmiyyəti var. Çünki bu yol bizi Qarabağın tacı olan Şuşa şəhərinə aparır. Dediyim kimi, bu yol bizi Şuşaya aparır. Eyni zamanda bu layihə işğaldan azad edilmiş torpaqlarda icra edilən birinci layihədir”.

Bu il yanvarın 14-də isə Prezident Əhmədbəyli-Füzuli-Şuşa avtomobil yolunun 27-ci kilometrində Füzuli-Şuşa yolunun, həmçinin Füzuli rayonunda hava limanının təməllərini qoymuşdu. Bu dəfə Füzuli-Şuşa yolunun yeni işlənmiş layihəsinə körpü və tunellərin inşası daxil idi. Yəni çətin relyefə malik olan ərazilərdə dolama yolların yerinə körpü və tunellər tikiləcək. Bu yol Füzuli hava limanı ilə əlaqələndiriləcək və buradan İsa bulağına yeni yol çəkiləcək.

Həmin gün təməli qoyulan Füzuli Beynəlxalq Hava Limanı isə bu il istifadəyə verilməlidir. Limanın fəaliyyətə başlaması işğaldan azad edilən digər rayon və şəhərlərə xarici turistlərin gəlməsi baxımından çox əhəmiyyətlidir. Füzulidə hava limanının inşa edilməsi Qarabağın incisi sayılan və mədəniyyət paytaxtı elan edilən Şuşa şəhərinə gəlmək istəyən xarici turistlər üçün əlverişli imkan yaradacaq.

Fevralın 14-də Prezident növbəti dəfə Füzuli, Zəngilan, Laçın və Cəbrayıl rayonlarına səfər edərək Horadiz-Ağbənd dəmir yolu xəttinin təməlini qoydu. Ümumi uzunluğu 100 kilometr olan bu dəmir yolu xəttinin strateji əhəmiyyəti olduqca böyükdür. Çünki bu nəqliyyat infrastrukturu Azərbaycan vətəndaşlarının işğaldan azad olunmuş torpaqlara gediş-gəlişinin təminatında əhəmiyyətli rol oynayacaq və ən mühüm məsələ Azərbaycanın əsas hissəsi ilə Naxçıvan Muxtar Respublikası arasında birbaşa dəmir yolu nəqliyyat əlaqəsinin yaranmasına böyük töhfə verəcək.

Yeni təməli qoyulan Füzuli-Hadrut avtomobil yolu başlanğıcını “Zəfər” yolundan götürür. Dörd zollaqlı, uzunluğu 13 km olacaq bu yolun üzərində bir neçə yerdə körpülər salınacaq. Bu yol Hadrut və ətraf ərazilərin inkişafına xidmət edəcək. Dördzolaqlı, uzunluğu 43 km olan Hadrut-Cəbrayıl-Şükürbəyli avtomobil yolunun isə əhəmiyyəti ondan ibarətdir ki, bu yol son nəticədə Horadiz-Zəngilan, daha sonra isə Zəngəzura gedən yola bağlanacaq. Yaxın və orta perspektivdə regionun inkişafına böyük təsir göstərəcək. Füzuli Hava Limanı, Bərdə-Ağdam dəmiryol xətti və Horadiz-Şuşa avtomobil yolunun istifadəyə verilməsi bütün Qarabağ regionu, xüsusən də onun dağlıq bölgələri üçün iqtisadi sıçrayışa səbəb olacaq.

Böyük Qələbə Azərbaycan qarşısında yeni perspektivlər açıb

Göründüyü kimi, Azərbaycan qısa zamanda böyük infrastruktur layihələrinin icrasına başlayıb. Bölgədə bir çox ölkələri birləşdirən nəqliyyat şəbəkəsi qurulur. Azərbaycan, Türkiyə və İran bölgədə nəqliyyat layihələrinin icrası ilə bağlı vahid mövqe sərgiləyir. Ermənistan da özünü normal apararsa, bu prosesdən faydalana bilər.

Martın 4-də İqtisadi Əməkdaşlıq Təşkilatının (İƏT) XIV onlayn Zirvə toplantısında çıxışı zamanı İlham Əliyev həm qurumun üzvləri - Pakistan, Əfqanıstan, Qazaxıstan, Qırğızıstan, Tacikistan, Türkmənistan və Özbəkistanı iş birliyinə dəvət etdi, həm də məğlub Ermənistana növbəti mesajını ünvanladı. Əgər bu ölkə 10 noyabr Bəyannaməsinin şərtlərinə tam əməl edərsə, Dağlıq Qarabağda reallaşacaq layihələrə qoşula bilər.

Prezident İƏT üzvlərini Qarabağda reallaşdırılacaq layihələrdən faydalanmağa da cağırdı: “Azərbaycanın tarixi ərazisi olan Zəngəzurdan keçəcək və Azərbaycanın əsas hissəsi ilə ölkəmizin ayrılmaz hissəsi Naxçıvan Muxtar Respublikasını və Türkiyəni birləşdirəcək yeni bağlantı dəhlizi regionda nəqliyyat sektorunda yeni imkanlar yaradacaq. Biz İqtisadi Əməkdaşlıq Təşkilatının üzv dövlətlərini Zəngəzur dəhlizindən faydalanmağa dəvət edirik”.

Bu gün Azərbaycan Şərq-Qərb və Şimal-Cənub nəqliyyat dəhlizləri kimi regional bağlantı layihələrində fəal iştirak edir. Ölkəmiz Avrasiyanın əsas və etibarlı nəqliyyat və logistika mərkəzlərindən birinə çevrilib. Bütün bunlar isə Azərbaycanın iqtisadi potensialını artırmaqdadır. Ona görə də Azərbaycan yeni inkişaf mərhələsinə qədəm qoyub. Vətən müharibəsində qazandığımız Böyük Qələbə də ölkəmizin qarşısında tamamilə yeni perspektivlər açıb.

İlham Əliyevin siyasi iradəsi, verdiyi vədlərlə əməllərinin vəhdəti təsdiq edir ki, tezliklə işğaldan azad edilmiş torpaqlarda həyat yenidən qaynayacaq, bu ərazilər çiçəklənəcək, Qarabağ təkcə ölkəmizin deyil, regionun ən inkişaf etmiş mərkəzlərindən birinə çevriləcək.

Rəşad BAXŞƏLİYEV,

Azərbaycan. - 2021.- 20 mart.- S.1; 6.