Qarabağda salınan yollar bütün regionun gələcək yüksəlişinə hesablanıb

Prezident İlham Əliyev dəfələrlə bəyan edib ki, 30 il sürmüş münaqişə öz həllini tapdıqdan sonra regional əməkdaşlıq və inkişaf üçün yeni imkanlar açılıb. Azərbaycan əməkdaşlığa, düşmənçilik səhifəsini geridə qoymağa, regionda proqnozlaşdırıla bilən daha yaxşı vəziyyəti təmin etmək üçün qonşularımızla dürüst şəkildə işləməyə hazırdır.

İşğaldan azad edilmiş ərazilərimizdə həyata keçirilməsinə başlanan layihələr bu sözlərin əyani təsdiqidir. Bunların arasında yol layihələrinin öz yeri var.

İndi həmin ərazilərdə avtomobil yollarının çəkilişi də diqqət mərkəzindədir. Dövlət başçısı Füzuli və Xocavənd rayonlarına səfəri zamanı bunu bir daha vurğulamışdır. Avtomobil yolları inşasının azad edilmiş ərazilərin bərpası üçün böyük əhəmiyyət daşıdığını bildirmişdir.

Prezident bu səfər çərçivəsində Füzuli-Hadrut avtomobil yolunun təməlini qoymuşdur. Yol başlanğıcını “Zəfər yolu”ndan götürür və yeni inşa ediləcək Hadrut-Cəbrayıl-Şükürbəyli avtomobil yoluna birləşir. Uzunluğu 13 kilometr olan bu yol dörd hərəkət zolaqlı olacaq. Yol boyunca avtomobil körpüləri də inşa ediləcək.

Dövlət başçısı eləcə də Hadrut-Cəbrayıl-Şükürbəyli avtomobil yolunun təməlini qoymuşdur. Bu yol isə başlanğıcını Hadrut yaşayış məntəqəsindən götürməklə və Cəbrayıl rayonundan keçməklə Şükürbəyli kəndində Hacıqabul-Mincivan-Zəngəzur dəhlizi avtomobil yoluna birləşir. Uzunluğu 43 kilometr olacaq. Dörd hərəkət zolaqlı yol boyunca avtomobil körpüləri tikiləcək.

Azərbaycanın tarixi ərazisi olan Hadrut yaşayış məntəqəsindən başlanan həmin yol işğaldan azad olunmuş digər bölgələri birləşdirəcək. Belə ki, Cəbrayıl rayonundan keçməklə Şükürbəyli kəndinədək uzanacaq. Mütəxəssislər bu yeni yolu strateji əhəmiyyət daşıyacağına görə yüksək dəyərləndirirlər. Çünki o, Hacıqabul-Mincivan-Zəngəzur dəhlizi avtomobil yoluna birləşəcək və praktik olaraq Zəngəzur dəhlizi vasitəsilə “Şərq-Qərb” beynəlxalq nəqliyyat dəhlizinə inteqrasiya olunacaq. Bu, Naxçıvanın Azərbaycanın əsas ərazisi vasitəsilə həmin nəqliyyat dəhlizlərinə çıxışını təmin edəcək. Yol dəhliz vasitəsilə həm də Azərbaycanın qərb hissəsində və Naxçıvanda fəaliyyət göstərən iş adamları arasında əlaqələrin qurulması baxımından vacibdir. Bu, qısa vaxtda müxtəlif məhsulların daşınmasına imkan yaradacaq. Beləliklə, bunun işğaldan azad olunan ərazilərimizin, Naxçıvan Muxtar Respublikasının və ümumiyyətlə, Azərbaycanın iqtisadiyyatına müsbət təsirləri olacaq.

Prezident İlham Əliyev sözügedən səfər zamanı xatırlatmışdır ki, təməli qoyulan yeni yollar bu qəbildən olan birinci layihələr deyil: “Artıq bir neçə yol layihəsi icra edilməkdədir. Azad edilmiş torpaqların bərpası başlamışdır. Füzulidən Şuşaya yol çəkilir - “Zəfər” yolu çəkilir. Eyni zamanda Bərdə-Ağdam yolunun çəkilişi yaxın gələcəkdə icra ediləcəkdir. Horadizdən Zəngilana qədər yol çəkiləcək. Bir sözlə, müharibədən dörd ay keçməsinə baxmayaraq, böyük quruculuq işləri başlamışdır.”

Məlum olduğu kimi, işğaldan azad olunmuş bölgələrimizdə bir neçə istiqamətdə yeni yollar çəkilir. O cümlədən Tərtər-Çaylı-Suqovuşan-Talış avtomobil yolunun tikintisi aparılır. Uzunluğu 29 kilometr olan bu yolun bərpası işlərinə Prezidentin tapşırığına əsasən, Tərtər rayonunun Suqovuşan qəsəbəsi və Talış kəndi işğaldan azad edilən kimi başlanıb. 9 metr enində asfalt-beton örtüyü olan, ümumi eni isə 12 metr təşkil edən avtomobil yolu artıq tikilib. Hazırda Tərtər-Çaylı-Suqovuşan-Talış avtomobil yolunun Goranboy rayonunun Tapqaraqoyunlu kəndindən və Naftalan rayonunun Qaraqaşlı sanatoriyasından keçməklə Naftalan şəhərinədək davam etdirilməsi istiqamətində işlər aparılır. Bununla Tərtər rayonu ilə Goranboy və Naftalan rayonları arasında alternativ yeni avtomobil yolu bağlantısı yaradılacaq.

Həyata keçirilən ilkin infrastruktur layihələri sırasında Şuşa şəhərinə çəkilən yolun özünəməxsus yeri var. Belə ki, Şuşaya ənənəvi yollar hazırda bizim üçün o qədər də məqbul deyil. Bu gün oraya getmək üçün yeni yol çəkilişi mütləq lazımdır. Relyefin çətinliyinə və xüsusilə hələ havaların soyuq keçməsinə baxmayaraq, Əhmədbəyli-Alxanlı-Füzuli-Şuşa yolu inşa olunur.

Gerçəkləşəcək digər layihə Toğanalı - Kəlbəcər yoludur. Bu da çox çətin relyefdən keçən bir yoldur, çünki bəzi yerlərdə yüksəklik 3500 metrə çatır. İndiki hava şəraitində belə bir yüksəklikdə irəliləmək çətin olsa da, tunellərin tikintisi nəzərdə tutulur və bu layihə də icra edilir. Horadizdən Zəngilana, oradan Qubadlıya və Qubadlıdan Laçın rayonuna qədər yol çəkilşi nəzərdə tutulur. Toğanalıdan Kəlbəcərə çəkiləcək yol da Laçın rayonuna qədər davam etdiriləcək.

Xatırladaq ki, son 17 ilin hər birində ölkəmizdə ən azı 1000 kilometr yeni yol salınmış, yaxud əsaslı şəkildə yenidən qurulmuşdur. Yol tikintisi Azərbaycanın hər tərəfini əhatə etmişdir. Bu müddət ərzində çoxsaylı magistrallar çəkilmiş, eyni zamanda bölgələr və kəndlər arasında əlaqə yaradan yollar tikilmiş və ya tam təmir edilmişdir. İndi ən ucqar dağ kəndlərimizə də rahat yollarla çatmaq mümkündür. Prezident İlham Əliyev keçən ilin yekunlarına həsr olunmuş videoformat şəklində keçirilən müşavirədə bildirmişdir ki, yol layihələrimiz davamlıdır. Deməli, 2021-ci ildə yurdumuzun qoynunda yeni yollar açılacaq və nə xoş ki, onların xeyli hissəsi əzəli-əbədi torpaqlarımızda - Qarabağda çəkilir.

Flora SADIQLI,

Azərbaycan. - 2021.- 20 mart.- S.1; 4.