36-cı əfv

İlham Əliyev 625 ailəyə sevinc bəxş etdi

Əsası Ümummilli Lider Heydər Əliyev tərəfindən qoyulmuş humanizmə sadiqlik ənənəsini Prezident İlham Əliyev layiqli şəkildə davam etdirir. 2003-cü ildən bu günədək İlham Əliyevin qəbul etdiyi qərarlarda, imzaladığı sənədlərdə onun siyasi iradəsinin şahidi oluruq.

İndiyədək əlamətdar günlərdə əfv sərəncamları imzalamaqla minlərlə ailəyə sevinc bəxş edən, cəmiyyətin xoş ovqatını daha yüksəldən dövlət başçısının budəfəki Novruz bayramı ərəfəsində daha 625 ailəni sevindirməsi də bunun bariz təcəssümüdür. “Məhkum edilmiş bir sıra şəxslərin əfv olunması haqqında” Azərbaycan Respublikası Prezidentinin 18 mart tarixli Sərəncamı bir daha Azərbaycan dövlətinin humanist siyasət yürütdüyünü, dövlət başçısının humanizm dəyərlərinə bağlı olduğunu göstərir.

Bu, Prezident İlham Əliyevin indiyədək imzaladığı 36-cı, ümumiyyətlə isə Azərbaycanda sayca icra olunan 67-ci əfv sərəncamıdır. Milli həmrəyliyə istiqamətlənmiş bu humanist addımlar, ümumilikdə, indiyədək 9 minə yaxın şəxsi əhatə edib. Törətdiyi cinayət əməlindən səmimi peşmançılıq keçirən, azad cəmiyyətə və normal həyata qovuşmaq istəyən məhkumların əksəriyyəti azadlıqdan məhrumetmə cəzasının çəkilməmiş hissəsindən azad olunublar.

Qeyd edək ki, budəfəki əfv sərəncamı şamil olunduğu şəxslərin sayına görə ən böyük humanist aktlardan biridir. (Ən böyük əfv sərəncamı 2018-ci il Azərbaycan Xalq Cümhuriyyətinin yaranmasının 100 illiyi ilə əlaqədar imzalanan sərəncamdır - 634 məhkuma şamil edilib). Əfv edilən 625 məhkumdan 475-i azadlıqdan məhrumetmə cəzasından azad olunub. Əfv olunmaları həmin insanlara bundan sonra həyatda öz yollarını düzgün seçməklə bağlı verilmiş çox gözəl imkan və şansdır. Bu şansın verilməsi isə Azərbaycan dövlətinin humanizm siyasətinin mahiyyətindən və məzmunundan irəli gəlir.

98 şəxsin isə azadlıqdan məhrumetmə cəzasının çəkilməmiş hissəsi yarıyadək azaldılıb. 49 nəfər isə azadlıqdan məhrumetmə ilə bağlı olmayan müxtəlif cəzalardan azad edilib. Bir neçə məhbusun isə cəzasının müddəti azaldılıb. Belə ki, ömürlük azadlıqdan məhrumetmə cəzasına məhkum edilmiş 3 nəfərin cəzası 25 il müddətinə azadlıqdan məhrumetmə cəzası ilə əvəzlənib.

Prezident İlham Əliyev tərəfindən mütəmadi olaraq imzalanan və Azərbaycan ictimaiyyəti tərəfindən olduqca yüksək qiymətləndirilən əfv sərəncamları beynəlxalq səviyyədə də təqdir olunur. Bu eyni zamanda Azərbaycanın müsbət beynəlxalq imicinə böyük töhfə verir. Azərbaycan yeganə ölkədir ki, qısa müddətdə, yəni müstəqillik dövründə 11 amnistiya aktı, 67 əfv sərəncamı imzalanıb.

Beləliklə, yüzlərlə ailə Novruz bayramını daha yüksək sevinclə qeyd edəcək. Yüzlərlə insan bayram ərəfəsində doğmalarına, qohumlarına qovuşacaq. Bu, Azərbaycan dövlətinin və onun liderinin illərdir davam etdirdiyi humanizm siyasətinin növbəti parlaq nümunəsidir.

Rəşad BAXŞƏLİYEV,

Azərbaycan. - 2021.- 20 mart.- S.2.