“Sıfırdan biznes necə qurulur” mövzusunda vebinar keçirilib

Sumqayıt Şəhər Gənclər və İdman Baş İdarəsi və Gənclər İnkişaf Karyera Mərkəzinin Sumqayıt nümayəndəliyinin birgə təşkilatçılığı ilə “Sıfırdan biznes necə qurulur” mövzusunda gənclərlə vebinar formatda görüş keçirilib.

“Zoom” internet platformasında təşkil olunan görüşün məqsədi “Azərbaycan Gəncliyi 2017-2021-ci illərdə” Dövlət Proqramından irəli gələn məsələlərin həlli, gənclərin sahibkarlıq bacarıqlarının inkişaf etdirilməsi, bu sahədə biliklərə yiyələnmələri, həmçinin innovativ, startap ideyalarının reallaşdırılması istiqamətində maarifləndirmək və asudə vaxtlarının səmərəli təşkili idi.

Beynəlxalq dərəcəli təlimçi Ramil Süleymanov, eləcə də bank və biznes sektoru üzrə mütəxəssis Arzu Qafarlının konsultasiyası ilə keçirilən görüşdə gənclərin şəxsi və iş həyatında özünü reallaşdırması, düzgün biznes üçün bazarın araşdırılması, biznes planın tərtibi, komanda quruculuğu və işgüzar yanaşma mövzusunda fikir mübadiləsi aparılıb. Təlimdə iştirakçılara onlayn xidmətləri satın alan virtual proqramlara qoşulub, düzgün istifadə edərək gəlir əldə etmə kimi biliklər də aşılanıb.

Sonda iştirakçıları maraqlandıran suallar cavablandırılıb.

Akif ƏLİYEV,

Azərbaycan. - 2021.- 20 mart.- S.4.