Kiyevdə Azərbaycanın İkinci Qarabağ müharibəsində qələbəsinin ildönümünə həsr edilmiş dəyirmi masa keçirilib

Kiyevdə, “Ukrainskiye Novosti” informasiya agentliyinin ofisində “İkinci Qarabağ müharibəsində Azərbaycanın qələbəsi beynəlxalq hüququn qələbəsinin və dövlətin ərazi bütövlüyünün bərpa edilməsinin mühüm presedentidir” mövzusunda dəyirmi masa keçirilib.

AZƏRTAC xəbər verir ki, 8 Noyabr - Azərbaycanın Zəfər Gününə həsr edilmiş tədbirin təşkilatçısı Bakı Beynəlxalq Multikulturalizm Mərkəzidir.

Dəyirmi masa iştirakçıları Azərbaycan ərazilərinin işğaldan azad edilməsi prosesini, Qarabağın və ona bitişik yeddi rayonun 30 il işğal altında olmasının nəticələrini, Azərbaycanın ərazi bütövlüyünün və beynəlxalq hüququn aliliyinin, işğaldan azad edilmiş ərazilərin bərpası və inkişafı, regiona sülhün və sabitliyin qaytarılması, Azərbaycan təcrübəsinin Ukrayna üçün əhəmiyyəti məsələlərini müzakirə ediblər.

Tədbirin moderatoru Bakı Beynəlxalq Multikulturalizm Mərkəzinin Ukraynadakı nümayəndəsi Marina Qonçaruk tədbiri açaraq qeyd edib ki, Ukrayna üçün mühüm strateji tərəfdaş olan Azərbaycanla hərtərəfli, o cümlədən təhlükəsizlik və müdafiə sahələrində əməkdaşlıq fəal inkişaf edir. M.Qonçarukun sözlərinə görə, Azərbaycanın ərazi bütövlüyünün bərpa edilməsi regiona sülhü və sabitliyi qaytarıb, həm Azərbaycanın, həm də bütün regionun tarixində keyfiyyətcə yeni səhifə açıb. O deyib: “Azərbaycanın yaratdığı presedent – ölkənin ərazi bütövlüyünü və beynəlxalq hüququnun aliliyini müstəqil surətdə, öz səyləri hesabına bərpa etməsi bütün dünya üçün, xüsusən öz ərazi bütövlüyünün bərpa edilməsi uğrunda mübarizə aparan Ukrayna üçün çox vacibdir”.

Tədbir çərçivəsində politoloq, jurnalist, “Pryamoy” telekanalının aparıcısı, bu yaxınlarda bir qrup jurnalist və politoloqla birlikdə Qarabağda səfərdə olmuş Taras Berezovets çıxış edib. O deyib: “Azərbaycanın nümunəsi bizim üçün ona görə maraqlıdır ki, 44 günlük müharibə başa çatandan dərhal sonra Azərbaycan öz ərazilərini bərpa etməyə başlayıb. Artıq bu ilin sentyabr ayında gördük ki, yüzlərlə kilometr yeni yollar salınıb, yolkənarı infrastruktur yaradılıb, işğal dövründə tamamilə məhv edilmiş, indi Qafqazın Hirosiması adlanan Ağdam kimi şəhərlərin bərpası planları artıq hazırdır.

Erməni xalqının indi revanşist şüarlara uyması, məğlubiyyətin əvəzini çıxmaq cəhdi çox böyük səhv olar. Radikal əhval-ruhiyyəli siyasətçilər erməni xalqını yeni hərbi münaqişəyə cəlb etmək istəyir, lakin belə cəhdlər onun üçün daha böyük fəlakət olar”.

Milli Strateji Tədqiqatlar İnstitutunun xarici siyasi araşdırmalar mərkəzinin əməkdaşı Mıkola Zamikula da bu yaxınlarda bir qrup jurnalist və politoloqla birlikdə səfərdə olub. O deyib: “Mənə Ağdam şəhərindən daha çox Cəbrayıla gedən yol güclü təsir bağışladı. Bu yolun ətrafında çoxsaylı keçmiş yaşayış məntəqələri var. Onlara baxdıqca düşünürdüm: bu evlərin yüzlərlə yaşı var. Burada kiminsə əcdadları yaşayıb və indi bu evlər dağıdılıb”.

Jurnalist, “Senzor.NET” internet portalının baş redaktoru Yuri Butusov deyib: “Mən də bu yaxınlarda Qarabağda olmuşam. Azərbaycanın çox mürəkkəb siyasi şəraitdə inkişaf etməsi məni heyrətləndirdi. Axı həmhüdud ölkələrin bəziləri ona düşmən münasibəti bəsləyir. Bütün bunlara baxmayaraq Azərbaycan öz siyasətinin reallaşması üçün çox mükəmməl strategiya qura bilib. Prioritetlər düzgün müəyyən edilib, resurslar düzgün paylanıb”.

“Den” qəzetinin siyasət şöbəsinin redaktoru jurnalist İvan Kapsamun vurğulayıb ki, Ermənistan-Azərbaycan münaqişəsinin həllinə kömək etməli olan bir sıra beynəlxalq qurumlar, o cümlədən ATƏT-in Minsk qrupu əslində yalnız status-kvonun saxlanmasına şərait yaradıblar. Onun sözlərinə görə, Azərbaycan vəziyyətdə dönüş yaradıb və beynəlxalq təşkilatlara ümid etmədən öz ərazilərini qaytara bilib.

Azərbaycanşünas tarixçi Oleq Kupçik ermənilərin Azərbaycan ərazilərinə və bütövlükdə Qafqaza köçürülməsinin ilkin tarixi şəraiti barədə məlumat verib. Ötən əsrin əvvəlində erməni millətçiliyi aktları barədə tarixi məlumatlar səslənib.

Hərbi ekspert Yuri Koçevenko öz çıxışında qeyd edib ki, Azərbaycan nümunəsi ukraynalıları ruhlandırır, Azərbaycanın qələbəsi dövlətin diplomatik, hərbi, iqtisadi, informasiya və digər səylərinin düzgün əlaqələndirilməsi nümunəsidir.

“Doktrina” siyasi araşdırmalar mərkəzində beynəlxalq siyasət istiqamətinin əlaqələndiricisi Denis Moskalik beynəlxalq tərəfdaşların Azərbaycanı dəstəkləməsinin vacibliyi, habelə Qarabağın bərpasında xarici şirkətlərin iştirakının rolu barədə söhbət açıb.

“Doktrina” siyasi araşdırmalar mərkəzinin təhlükəsizlik siyasəti departamentinin rəhbəri Qleb Parfyonov Azərbaycanın yalnız öz qüvvələrinə və tərəfdaşlarının siyasi dəstəyinə güvənərək ərazi bütövlüyünü bərpa etməsi barədə danışıb.

Azərbaycan.-2021.- 7 noyabr.- S.12.