Zəfərə gedən yol milli birlik və mənəvi gücdən başladı

44 günlük Vətən müharibəsi dövlətimizin hərb tarixinə, xalqımızın isə yaddaşına qızıl hərflərlə yazıldı

2020-ci ilin payızı başqa bir ab-hava ilə başladı. İnsanlarda mübarizə əzmi, döyüş ruhu, qisas hissi baş qaldırdı. Ermənistanın ölkəmizə qarşı başladığı növbəti hərbi təcavüzünə cavab olaraq 27 sentyabrdan etibarən Azərbaycan Respublikası Silahlı Qüvvələri Ali Baş Komandanın rəhbərliyi altında torpaqlarımızın azad edilməsi məqsədilə Vətən müharibəsi başlandı.

44 gün ərzində davam edən haqq savaşımızda böyük bir qəhrəmanlıq salnaməsi yazıldı. Həmin günlərdə bütün xalqımız ayaq üstə idi, kiçikdən böyüyə hər kəs vətən adına səfərbər olmuşdu, hər bir insan öz durduğu yeri sanki özünün səngəri bilirdi, insanlardan barıt qoxusu gəlirdi. Mərdə, qəhrəmana, vətənin dar günündə atlanaraq silaha qurşanıb yağıların üstünə şimşək kimi şığıyan, nərəsi ilə tufan qoparan igidlərə ümumxalq məhəbbəti, el hörməti tükənməz idi. Bütün bu milli birliyimizi yaradan isə mənəvi gücümüz idi. Xalqımız ordumuza mənəvi cəhətdən dayaq oldu. “Ordum varsa, yurdum var” ifadəsi vətən müdafiəçilərini döyüşə ruhlandırdı.

Həqiqətən də Zəfərə aparan haqq savaşımızda xalqımızla ordumuz bir vəhdət olaraq Müzəffər Ali Baş Komandanın “Dəmir yumruğ”unun ətrafında sıx birləşdilər. Bu birlik xalqımıza Böyük Qələbə sevincini yaşatdı.

Mən də uşaqlıqdan arzusunda olduğum bir yolun yolçusu oldum. Bu yol Qarabağa uzanan yol idi. Allahıma sonsuz şükürlər edirəm ki, bu yol ilə getməyi mənə də nəsib etdi. Füzulinin mənfur düşmən tərəfindən dağıdılmış ərazilərindən keçərək, Xocavəndin yamyaşıl və sıx meşələrlə örtülmüş qayalı dağlarını aşaraq Xocalının Sığnaq kəndindən keçib Daşaltıdan ötüb, əzəmətli dağların qoynunda uzanan tarixi Zəfər yolu ilə Şuşa şəhərinə çatmaq çox qürurlu və sevincli idi. Bu yol ilə gedərkən gözəl təbiət mənzərələrinin fonunda gözümün önündə bir mənzərə də canlanırdı. Bu mənzərə qəhrəman şəhidlərimizin, qazilərimizin döyüşlərdəki şücaəti idi. Çünki bu yerlərdə şəhidlərimizin ruhları dolaşır, bu dağlarda, daşlarda onların axıdılan qanları, ayaq izləri və Qarabağın havasında nəfəsləri var. Sanki Qarabağın dumanlı dağlarında dolaşan şəhid ruhları bizləri salamlayırdı. Qəhrəmanlıq xalqımızın qanına hopmuş ali bir hissdir. Bu hiss ilə dünyadan köç edənlər isə əbədi həyat qazananlardır. Bu anlamda əbədi həyat qazanan müqəddəs şəhidlərimizin əziz xatirəsi xalqımızın yaddaşında və qəlbində daim yaşayacaqdır.

Sonda onu da xatırladım ki, qələbəyə həsr etdiyim yazımın “Zəfər” Şəhid Ailələrinə Dəstək İctimai Birliyi, Mənəvi Dəyərlərin Təbliği Fondunun dəstəyi ilə Vətən müharibəsinin birinci ildönümünə həsr olunmuş “Vətənim Azərbaycandır” adlı esse yazı müsabiqəsinin diplomuna layiq görüldüyü üçün də çox sevincliyəm.

Yusif CƏFƏRBƏYLİ,

Azərbaycan Dövlət Mədəniyyət və İncəsənət Universitetinin magistri, laçınlı

Azərbaycan.-2021.- 30 noyabr.- S.8.