Serjik Ermənistanda yenə istehza hədəfi old

Samvel Baqramyan: “Sarkisyan qorxaqdır, vəzifədə olanda gücü ancaq kasıb insanlara çatırdı”

Əli günahsız azərbaycanlıların qanına batmış, Xocalı cəlladı kimi ad çıxarmış Serjik Sarkisyanın vaxtaşırı boşboğazlıq etməsi Ermənistanda da gülüş və istehza obyektidir. Çünki Serjikin ikiüzlü, alçaq, korrupsioner olduğunu Ermənistan xalqı da yaxşı bilir.

Elə bu günlər tanınmış erməni ictimai xadim, “İKM” proqramının koordinatoru Daniyel İohanisyan hərbi cinayətkar Serjik Sarkisyanla bağlı sensasion faktlar açıqlayıb.

Erməni mediasında gündəmə çevrilən bu faktlar məşhur Aprel döyüşlərinə aiddir.

Məlum olub ki, Serjik Aprel döyüşlərində özünün təbliğ etdiyi kimi “qəhrəman komandan” olmayıb. Əksinə, döyüşlərin qızğın vaxtında xaricdə istirahətindən qalmayıb. Belə ki, o, Aprel döyüşlərinin son günündə Baden-Badendə olub. İohanisyan qeyd edib: “O, Baden-Badendə olarkən hələ də cəbhə bölgəsində tank və toplardan istifadə olunurmuş, atəşkəsin perspektivi isə bəlli deyilmiş”.

Erməni ictimai xadim bildirib ki, S.Sarkisyanın niyyəti ayın 6-da Berlinə səfər etmək olsa da, eks-prezident bunun əvəzində ayın 5-i Baden-Badenə uçub: “”Beləcə, o, bir gecə istirahət edib və sonra Berlinə uçub. Məsələyə maddi tərəfdən yanaşdıqda isə Sarkisyanın bizim vergilərimiz hesabına Baden-Badenə 16 dəfə səyahət etdiyini görərik. Sarkisyan bura yalnız tətil üçün getmirmiş”.

Yeni aşkara çıxan bu faktlar sosial mediada sensasiya kimi qarşılanıb. Çünki hələ də erməni cəmiyyətində Serjikdən müharibədə xalqın yanında olan, daim ordunu düşünən “qəhrəman” obraz yaradanlar var.

Bu fonda onu da qeyd edək ki, Prezident İlham Əliyev azad edilən ərazilərə növbəti səfərində Serjikə və onun kimilərinə növbəti dəfə xəbərdarlıq edərək demişdir: “Onun qulağından tutub dartmağımıza az qalmışdı. O da yenə haradansa öyrənib, bilib və Xankəndidən qaça-qaça gedib oturub İrəvanda. Bu yaxınlarda keçirilmiş seçkilərdə görün heç beş faiz səs toplaya bilməyib. Görün erməni xalqı bu məxluqa nə qədər nifrət edir ki, hətta müharibədə günahkar sayılan iqtidara daha çox səs verdi, nəinki ona. Odur ki, bir də deyirəm, bax, mən buradayam, Suqovuşandayam, mən Şuşadayam, mən Hadrutdayam, mən Xocavənddəyəm, hər yerdəyəm. Siz haradasınız?! Cəhənnəmdə, gorbagor statusla bir yerdə. Vəssalam, qurtardı, bitdi”.

Azərbaycan Prezidentinin bu açıqlamaları Ermənistanda böyük maraqla qarşılanıb. Sosial şəbəkələrin erməni seqmentində qeyd olunur ki, keçmiş hərbi xuntanın uydurmaları daha insanlar tərəfindən qəbul olunmur. İxtisasca iqtisadçı olduğunu qeyd edən Samvel Baqramyan “Facebook” sosial şəbəkəsində yazır: “Bilmirəm fikir verirsiniz ya yox, ümumiyyətlə, İlham Əliyev çıxışlarında Koçaryan və Sarkisyana meydan oxuyur. Hər dəfə Sarkisyanı hərbi cani adlandırır. Bu dəfə də dövlətimizi, ordumuzu biabır etdi. Serjikin isə Əliyevin dediyi kimi, onun cavabını verməyə cürəti çatmaz. Çünki qorxaqdır, vəzifədə olanda gücü ancaq kasıb insanlara çatırdı”.

Simon Nalbadyan adlı istifadəçi isə “Facebook”da İlham Əliyevin son çıxışları ilə bağlı paylaşılan xəbərə rəy yazıb: “Mənim əmim Qarabağda gedən döyüşlərdə ölüb. Bu günə kimi hakimiyyət savaşlarının qurbanı olmuşuq. Keçmiş hakimiyyət nümayəndələrinin atdığı addımlardan sonra bu gün gördük ki, Qarabağ bizi parlaq gələcəyə yox, tam məhvolmaya apardı. Müharibədə uduzduq, dostlarımız həlak oldu. Torpaqları sakit şəkildə qaytarmaq olmazdımı?”

Rusiyalı ekspert Aleksandr Razuvayev isə məsələ ilə bağlı bildirib: “Ermənistanın çökməsi, müharibədəki məğlubiyyəti, kapitulyasiyası son 30 illik dövlət siyasətinin nəticəsidir. Bir düşünün, 30 il ərzində İsrail güclü iqtisadiyyat və güclü ordu yarada bildi. Modernləşdirilmiş iqtisadiyyatı, həyat şəraiti və əlbəttə ki, güclü silahlı qüvvələrini tamamilə yenidən yaradan Azərbaycana baxın. Bu, əlbəttə ki, ilk növbədə, Heydər Əliyevin və onun yolunu davam etdirən İlham Əliyevin xidmətidir”.

Qeyd olunur ki, ötən illər ərzində Ermənistan güclü korrupsiyadan başqa heç nə yaratmayıb, üstəlik, sırf turizm və əmək miqrantları üzərində dayanan iqtisadiyyat modeli qurub. Təbii ki, bu, çox qeyri-sabit iqtisadiyyatdır. Aydındır ki, pandemiya bu iqtisadiyyatı “kart evi” kimi məhv etdi. Amma yada salsaq görərik ki, məhz Koçaryan və Sarkisyan bu model iqtisadiyyatla fəxr edirdi. Bu işdə hazırkı hakimiyyəti günahlandırmaq sadəcə gülüncdür. Bu iqtisadiyyat, ordu onilliklər ərzində qurulub. Məhz “yenilməz ordu”, “güclü iqtisadiyyat” terminləri illərlə Koçaryan və Sarkisyanın vizit kartı olub.

Rusiyalı ekspert əlavə edib ki, Ermənistan iqtisadiyyatının və ordusunun dağılmasında, ilk növbədə, bu ölkənin bütün əvvəlki rəhbərləri, nazirləri, yüksək rütbəli məmurları günahkardır. Uduzmağı da bacarmağa kişilik lazımdır: “Azərbaycanda güclü lider var. Cənab Əliyevin dünyada, xüsusən MDB-də, o cümlədən Rusiyada böyük avtoriteti vardır. Ermənistanın belə lideri heç vaxt olmayıb. Təbii ki, indi Ermənistanda bütün siyasətçilər Əliyevə həsəd aparırlar. Amma səssizcə həsəd aparmaq lazımdır! Oturun, səsinizi kəsib həsəd aparın! Azərbaycanın qələbəsi güclü iqtisadiyyatın, müasir Silahlı Qüvvələrin, döyüş ruhunun bəhrəsidir ki, ordunun hər bir əsgəri şəhid olmağa, Vətənini azad etməyə hazır idi”.

Bu məzmunlu şərhlərə çoxlu əlavələr etmək olar. Amma buna ehtiyac yoxdur. Çünki onsuz da 44 günlük müharibədə Ermənistan tarixinin ən böyük zərbəsini alıb və bunu bütün dünya bilir. Üstəlik Prezident İlham Əliyevin son günlər Qarabağa səfəri zamanı səsləndirdiyi fikirlər Ermənistana məğlubiyyətinin acısını yenidən yaşadır.

Elçin CƏFƏROV

Azərbaycan.- 2021.-6 oktyabr.- S.1; 12.