Ermənistanda hakimiyyət uğrunda yeni savaş başlayır

Ermənistanda baş nazir Nikol Paşinyanın əleyhinə keçirilən növbəti etiraz aksiyaları siyasi gərginliyi daha da dərinləşdirməklə yanaşı, xaotik vəziyyət də yaradıb.

Belə ki, aksiya iştirakçıları hökumət binasına girməyə çalışıblar. Polisin müdaxiləsi nəticəsində 50 nəfərədək insan yaralanıb, 26 nəfər saxlanılıb, bəzilərinin isə vəziyyəti ağırdır.

Qeyd edək ki, Ermənistanın hakim “Mənim addımım” parlament fraksiyası konstitusiya dəyişiklikləri layihəsini müzakirə edərək parlamentin özünü buraxmaq hüququna sahib olmasına və növbədənkənar seçkilərin keçirilməsinə çalışır. Bu isə Ermənistan daxilində ictimai-siyasi müstəvidə gərginliyin artmasına rəvac verməklə yanaşı, həm də hakimiyyət uğrunda yeni bir savaşın başlamaqda olduğunu göstərir. Xüsusən son aylarda insanlardan dəstək ala bilməyən keçmiş hərbi xunta hakimiyyətə gəlmək üçün hərəkətə keçməyə hazırlaşır. Artıq Robert Koçaryan erkən seçkilərin keçiriləcəyi təqdirdə iştirak edəcəyini bildirib.

Seçkilərdə qalib gələcəyinə əminliyini ifadə edən R.Koçaryan deyib ki, müxalifət siyasi mübarizə yolu seçib, amma bir müddət sonra proseslər gedişatı dəyişə bilər.

O vurğlayıb ki, Ermənistanda etiraz fəallığı bu yaz arta bilər və hakimiyyət müxalifətin əvvəldən siyasi mübarizə metodlarını seçdiyinə sevinməlidir, lakin siyasi proseslərə ümid ölsə, bütün proses başqa bir yönə çevriləcək: “Ermənistan cəmiyyətində 200-300 min insan kökündən silinib. İkinci inqilab ölkə üçün problemli olacaq. Ancaq hakimiyyət dəyişikliyinə gedən siyasi yol ümidi tükənsə, yazda insanlar yenidən küçələrə axışacaq və etiraz dalğası əvvəlkindən daha güclü olacaq”.

Müharibə canisi, vaxtilə çevrilişlə hakimiyyətə gələn R.Koçaryan onu da deyib ki, indiki vəziyyətdə seçkiləri təşkil etmək olduqca təhlükəlidir, amma səlahiyyətlilər bunu anlamırsa və həyata keçirilməsində israr edirsə, müxalifət bu kampaniyada iştirak etməlidir.

Onu da qeyd edək ki, müharibədəki məğlubiyyətdən sonra Ermənistanda bütün sahələri bürüyən tənəzzül sürətlə dərinləşməkdədir. Problemli sahələrdən biri də ordudur. Belə ki, orduda baş verən cinayətlərin sayı bitib tükənmir. Ölkə rəhbərliyi ordu cinayətlərini gizlətməyə çalışsa da, mümkün olmur. Çünki dərhal sosial şəbəkələrdə orduda yaşanan insidentlərlə bağlı informasiyalar yayılır.

Son olaraq sosial şəbəkələrin erməni seqmentində məlumat yayılıb ki, əşya, əmlak, ərzaq, yanacaq sürtkü materiallarının, eləcə də tibbi ləvazimatların qıtlığı ilə üzləşən şəxsi heyət arasında oğurluq, intizamsızlıq və davalar baş verir. Məsələn, “Telegram” kanallarından birində yazılıb ki, bu günlərdə Ermənistanın Koxb yaşayış məntəqəsində yerləşən 543-cü əlahiddə motoatıcı alayda insident yaşanıb. Hərbi hissədə gənc əsgərlər və daha çox xidmət edən əsgərlər arasında kütləvi dava baş verib. Hadisəyə səbəb gənc əsgərlərə verilən təzə əşyaların əllərindən alınaraq əvəzinə köhnələrin, hətta istifadəyə yararsız olanların verilməsidir. Faktla bağlı Ermənistan ordusunun 3-cü korpusunun qərargahından bir neçə yüksəkrütbəli zabit təcili olaraq Koxb məntəqəsinə gələrək hadisə ilə bağlı araşdırma aparıb. Hadisə hüquq mühafizə orqanlarından gizlədilsə də, faktla bağlı zabitlər də daxil olmaqla bir neçə nəfərin cəzalandırıldığı bildirilir. Bir neçə əsgərin isə xidmət yerinin dəyişdirliməsi barədə göstəriş verilib.

İndi Ermənistanda belə bir fikir hakimdir ki, orduda zabitlər əsgərlərə vətənin müdafiəçiləri kimi deyil, şəxsi varlanmalarını təmin edən obyekt kimi baxırlar. Hərbi hissələrin təminatındakı problemlər isə kriminal fəsadlar yaradır.

Ermənistanda tək orduda deyil, bütün sahələrdə oğurluq, cinayətlər, çəkişmələr baş alıb gedir. Əslində, işğal siyasəti yürüdən, sivil dövlətçilik prinsiplərindən uzaq olan bir ölkənin ordusu başqa cür ola da bilməzdi.

Elçin CƏFƏROV,

Azərbaycan. - 2021.- 30 yanvar.- S.1; 7.