190 ölkə arasında 28-ci

10 ən islahatçı ölkə sırasına daxil olan Azərbaycanda aparılan iqtisadi islahatları beynəlxalq qurumlar yüksək qiymətləndirirlər

Heç kəsə sirr deyil ki, ötən əsrin 80-ci illərindən bəri dünyada dövlətlər neft amilindən iqtisadi və siyasi təzyiq vasitəsi kimi istifadə edir. SSRİ dağılandan sonra məlum oldu ki, Amerika bir sıra neft ixracatçısı ərəb ölkəsi ilə birləşərək neftin qiymətini süni şəkildə aşağı salmaqla nəhəng bir imperiyanı dağıtmışdı. Bu, belə qənaətə gəlməyə əsas verir ki, hansı ölkənin iqtisadiyyatı yalnız neft amilindən asılıdırsa, onun iqtisadi çöküşü daha realdır. O üzdən təsadüfi deyil ki, indi neftin qiymətini bazarın tələbatından çox dünyanı idarə edən güclər müəyyən edir. Bir də görürsən ki, dünya bazarında heç bir mühüm dəyişiklik baş vermədiyi halda neftin qiyməti kəskin şəkildə aşağı düşür və ya sürətlə bahalaşır. Aradan xeyli vaxt keçəndən sonra məlum olur ki, bu, hansısa bir siyası oyun idi. Bu isə o deməkdir ki, iqtisadiyyatı yalnız xam neftin ixracından asılı olan ölkələr daim risk altındadır.

Məlum olduğu kimi, iqtisadi inkişafda özəl sektor mühüm rol oynayır. Odur ki, Azərbaycanda dövlət səviyyəsində bu sahəyə hər cür dəstək verilir. Hətta indiki pandemiya dövründə dövlət əlini sahibkaların üzərindən çəkmir. Bu səbəbdən Azərbaycanda sahibkarlıq subyektləri pandemiyadan minimum səviyyədə ziyan çəkir. Bu gün ölkəmizdə sənaye məhsullarının 80 faizinin özəl sektorda istehsal olunması da sahibkarlığa dövlət qayğısının nəticəsidir.

Amma bütün bunlar kifayət etmir. Odur ki, ölkədə sahibkarlığın inkişafı üçün fundamental islahatlar həyata keçirilir. İlk növbədə sahibkarların hüquqlarını qorumaq üçün yaradılmış hüquqi baza təkmilləşdirilir, özəl sektora güzəştli kreditlərin verilməsi davam edir və s. Görülən işlərin sayəsində dünyanın mühüm beynəlxalq maliyyə qurumları tərəfindən ölkəmizdə bu istiqamətdə həyata keçirilən tədbirlər yüksək qiymətləndirilir.

Prezident İlham Əliyev 2020-ci ilin yekunlarına həsr olunmuş müşavirədə ölkəmizin bu sahədə qazandığı nailiyyətlər barədə demişdir: “Dünya Bankının “Doing Business” proqramında 190 ölkə arasında Azərbaycan 28-ci yerdədir... Biznes iqlimi, investisiya iqlimi, aparılan islahatlar Dünya Bankı tərəfindən qeyd edilir. Bundan əlavə, Azərbaycan 10 ən islahatçı ölkə sırasına daxil edilmişdir”.

Bununla yanaşı, Davos Dünya İqtisadi Forumunun hesabatlarında da ölkəmizdə qazanılan iqtisadi uğurlar yüksək qiymətləndirilir. Məsələn, həmin hesabatlarda qeyd edilir ki, əhalinin elektrik təchizatı səviyyəsinə görə dünya miqyasında Azərbaycan ikinci yerdədir. Həmçinin Azərbaycan həyata keçirilən uğurlu islahatlara görə dünya miqyasında beşinci yerdə qərarlaşıb. Hökumətin uzunmüddətli strategiyasına görə 10-cu yerdəyik. Eyni zamanda hökumətin siyasi sabitliyi təmin etməsinə görə Azərbaycan 11-ci yerdə qərarlaşıb. Ölkəmizdə yaradılan mükəmməl infrastruktur layihələri də Davos Dünya İqtisadi Forumu tərəfindən yüksək qiymətləndirilib. Belə ki, dəmir yolu xidmətlərinin səmərəliliyinə görə 11-ciyik. Hava yolları xidmətlərinin səmərəliliyinə görə isə 12-ci yerdəyik. Avtomobil yollarının keyfiyyəti üzrə ölkəmiz 24-27-ci yerdə qərarlaşıb. İnklüziv inkişaf indeksi üzrə isə Azərbaycan 3-cüdür. Qeyd edək ki, bu hesabat dünyanın inkişaf etmiş 74 ölkəsi arasında aparılıb.

Dünya Bankının “Doing Business” proqramı üzrə aparılan araşdırmalarında və Davos Dünya İqtisadi Forumunun hesabatında əksini tapmış iqtisadi inkişafımızın təməlində isə, Prezident İlham Əliyevin qeyd etdiyi kimi, həyata keçirilən düzgün iqtisadi siyasət və aparılan islahatlar dayanır. Ən vacibi isə odur ki, dövlət başçısı dəfələrlə çıxışlarında qeyd etmişdir ki, bu islahatlar davamlıdır və daim çağırışlara uyğun yeni mərhələyə qədəm qoyacaq.

Rüstəm KAMAL

Azərbaycan.-2021.- 12 yanvar.- S.1;5.