Türkiyənin xeyriyyə təşkilatı Gəncədə aztəminatlı ailəyə mənzil hədiyyə etmişdir

Türkiyənin “Hər zaman, hər yerə yaxşılıq” devizi ilə fəaliyyət göstərən “İnsan Hak və Hürriyətləri İnsani Yardım Vakfı” xeyriyyə təşkilatı ötən il olduğu kimi, bu il də ramazan ayında Gəncənin bir sıra aztəminatlı ailələri ilə görüşərək yardım paylamışdır.

Keçən ildən fərqli olaraq bu il təşkilat Gəncədəki aztəminatlı bir ailəyə mənzil də hədiyyə etmişdir. Bu günlərdə mənzilin açarları Solmaz Həsənovaya təqdim olunmuşdur.

Təşkilat yeni mənzildə ramazan ayı münasibətilə iftar süfrəsi də təşkil etmişdir. Ramazan süfrəsində Gəncə Şəhər İcra Hakimiyyətinin başçısı Niyazi Bayramov, Türkiyənin Gəncədəki Baş Konsulu Zəki Öztürk “İnsan Hak və Hürriyətləri İnsani Yardın Vakfı”nin Orta Asiya və Qafqaz üzrə koordinatoru Məhəmməd Həmzə Nədimoğlu və başqaları iştirak etmişlər. Niyazi Bayramov yeni mənzil münasibətilə ailə üzvlərini təbrik edərək onlara hədiyyə təqdim etmişdir. Solmaz Həsənova təşəkkürünü bildirmişdir.

S.ƏLİYEV,

Azərbaycan.-2022.- 9 aprel.- S.6.