Tarixə yazılan 4 il

Müasir dünyamızın ən parlaq siyasi liderlərindən olan cənab İlham Əliyevin xalqımızın yekdil səsi ilə növbəti dəfə Azərbaycan Respublikasının Prezidenti seçilməsindən dörd il ötür.

2018-ciilin 11 aprelində xalqımız Prezident İlham Əliyevin şəxsində birdahasülhə, sabitliyə, inkişafa, tərəqqiyə, insanlarıntəhlükəsizhəyatına, cəmiyyətimizingələcəyinə səsverdi. Son onilliklərdə görülmüş işlər, ortaya qoyulan real əməllərin nəticələri ən yüksək səviyyədə və obyektiv qiymətləndirildi.

Bu seçki, bu parlaq qələbə bizi müasir tariximizdəki ən böyük nailiyyətə yetirən böyük bir yolun başlanğıcı idi. Qədirbilən Azərbaycan xalqı bu dəfə də öz müdrik seçimini etdi. Prezident İlham Əliyevə göstərilən mütləq etimadın illərdən bəri torpaqlarımızın azadlığı uğrunda aparılan fədakar mücadilənin son mərhələsini də tamamlamağa şərait yaradacağına, bizi tarixi zəfərimizə qovuşduracağına bütün qəlbi ilə inandı. Xalqımız öz inamında bu dəfə də yanılmadı.

Gələcəyə nikbin nəzərlərlə

“Biz gələcəyə baxmalıyıq və baxırıq. Növbəti illərdə görüləcək işlər haqqında bizim çox aydın təsəvvürümüz, planlarımız, proqramlarımız var... Ona görə mən əminəm ki, bütün Azərbaycan xalqı və biz hamımız gələcəyə çox böyük nikbinliklə baxırıq. Hamımızın amalı ondan ibarətdir ki, ölkəmiz daha da güclənsin, daha da qüdrətli dövlətə çevrilsin, Azərbaycan vətəndaşları daha da yaxşı yaşasınlar”. Azərbaycan Prezidenti İlham Əliyev seçkidəki qələbəsindən sonra 2018-ci il aprelin 18-də Milli Məclisdə keçirilən andiçmə mərasimindəki çıxışında belə demişdi. Aradan keçən illər bu kəlmələri real əməllərlə təsdiqlədi. Ölkə rəhbərinin milli dövlətçilik tarixinin ən qüdrətli mərhələsinə gətirib çıxardığı Azərbaycan daha da gücləndi. Ölkəmiz dörd il əvvəlkindən də qüdrətli oldu. Vətəndaşlarımızın maddi-rifah halı yüksəldi. Ölkə boyu həyata keçirilən infrastruktur layihələri ilə respublikamızın siması bir qədər də yeniləndi, müasirləşdi. Əvvəlki illərdə olduğu kimi, ötən dörd ildə də Azərbaycan böyük inkişaf yolu ilə irəlilədi. Ölkəmizdə tətbiq edilən mükəmməl islahatlar konsepsiyasının müəllifi kimi, Prezident İlham Əliyev müasir Azərbaycanın iqtisadi inkişaf modeli üzrə yeni nailiyyətlərə imza atdı.

Azərbaycan dövlətinin ümumi siyasətinin ayrılmaz tərkib hissəsi olan bu model ölkəmizin iqtisadi tərəqqisinə, dünya birliyində mövqeyinin köklü surətdə möhkəmlənməsinə, inkişaf etmiş güclü dövlətlər sırasında yer almasına zəmin yaratdı. Prezidentimizin yürütdüyü uğurlu, qətiyyətli siyasət, həyata keçirdiyi dövlət proqramları və makroiqtisadi layihələr ötən dörd ildə Azərbaycan iqtisadiyyatının yüksəlişinə güclü təkan verdi. Bu illərdə iqtisadiyyatımız daha da böyüdü, dövlətçiliyimizin əsasları möhkəmləndi.

Güclü iqtisadiyyat, müstəqil siyasət

“Ancaq iqtisadiyyatı güclü olan ölkələr müstəqil siyasət apara bilərlər”. Bu həqiqət Azərbaycan Respublikasının Prezidenti İlham Əliyevin qlobal dünyamızın reallıqlarına baxışında xüsusi yer tutur. İqtisadiyyatın davamlı şəkildə gücləndirilməsi zərurətindən çıxış edərək dövlət başçımız bu sahədə ardıcıl islahatların təşəbbüskarı kimi çıxış edir.

2018-ci il aprelin 11-də keçirilən prezident seçkiləri zamanı xalqın İlham Əliyevə göstərdiyi etimad həm də bu uğurlara verilmiş səs, siyasi kursun davamına göstərilmiş etimad idi. Cənab İlham Əliyevin həmin seçkilərə qədər də Azərbaycana rəhbərlik etdiyi 2003-2018-ci illər tariximizə möhtəşəm iqtisadi yüksəliş dövrü kimi daxil olmuşdur. Bu dövrdə ümumi daxili məhsul 3,2 dəfə, büdcə gəlirləri 13,5 dəfə artmışdır.

Bu illərdə 1 958 400 yeni iş yeri açılmış, 326.6 min nəfərə ünvanlı dövlət sosial yardımı verilmişdir. İşsizliyin səviyyəsi 9.2 faizdən 5 faizə, yoxsulluğun səviyyəsi 44.7 faizdən 5.4 faizə endirilmişdir. 245 min nəfər məcburi köçkün mənzillə təmin olunmuşdur.

Azərbaycan Prezidenti ölkəmizdə azad sahibkarlığa, biznes fəaliyyətinə əlverişli şərait yaratmışdır.

Uğurlu enerji layihələri

Bu illərdə ölkə iqtisadiyyatının neft-qaz sektoru da əsaslı şəkildə inkişaf etmişdir. Ümummilli Lider Heydər Əliyevin təməlini qoyduğu Bakı-Tbilisi-Ceyhan əsas neft ixrac boru kəməri 2006-cı ildə istifadəyə verilmiş, ölkə böyük neft gəlirləri əldə etməyə başlamışdır. Bakı-Tbilisi-Ərzurum qaz kəməri isə Azərbaycanı qaz ixrac edən ölkəyə çevirmişdir. 2014-cü il sentyabrın 20-də “Cənub qaz dəhlizi”nin təməli qoyulmuş, 2018-ci ilin 29 may tarixində Bakıda “Cənub qaz dəhlizi”nin, 12 iyun tarixində isə Əskişəhərdə bu dəhlizin mühüm hissəsi olan Trans-Anadolu (TANAP) qaz boru kəmərinin açılışı olmuşdur. “Cənub qaz dəhlizi”nə yatırılan sərmayə 40 milyard dollara bərabərdir. Bu vəsaitin böyük hissəsi xarici tərəfdaşlar, banklar tərəfindən qoyulub.

Aparılan düzgün siyasət nəticəsində 2003-2018-ci illər ərzində Azərbaycan həmçinin elektrik enerjisini idxal edən ölkədən ixrac edən ölkəyə çevrilmişdir. Bu illərdə ölkəmizdə böyük infrastruktur layihələri reallaşdırılmışdır. Ölkə daxilində enerji təminatı əsaslı şəkildə yaxşılaşmışdır. 30-dan çox elektrik stansiyası tikilmişdir. Həmçinin ölkənin sosial-iqtisadi inkişafı baxımından son dərəcə mühüm əhəmiyyət kəsb edən yol-nəqliyyat infrastrukturunda da sürətli inkişaf baş vermişdir. Təkcə 2003-2018-ci illərdə Azərbaycanda 15 min kilometr yeni yol çəkilişi təmin edilmişdir. Altısı beynəlxalq stasusa malik olmaqla yeddi aeroport tikilmişdir. Dəmir yolu infrastrukturu yenilənmişdir.

Bu illərdə su təchizatı ilə bağlı məsələlər də, demək olar ki, öz həllini tapmışdır. 2003-2018-ci illər Azərbaycanın möhtəşəm idman uğurları ilə də tarixə yazılmışdır. Azərbaycan idmançıları 15 il ərzində Olimpiya oyunlarında, dünya və Avropa çempionatlarında parlaq qələbələr qazanmışlar.

Beynəlxalq aləmdə güclənən mövqelər

2003-2018-ci illərdə Azərbaycan qlobal rəqabətlilik indeksində dünyadakı mövqeyini xeyli gücləndirmişdir. Davos Dünya İqtisadi Forumunun “2017-2018 Qlobal Rəqabətlilik Hesabatı”nda Azərbaycan 35-ci pillədə qərarlaşmış və MDB məkanında liderliyini qoruyub saxlamışdır. Azərbaycan dünyada ən çox islahat aparan 10 ölkədən biri kimi tanınmışdır. Həmçinin ölkəmiz innovasiya potensialına görə dünyada 44-cü, dövlət orqanlarında İKT-nin tətbiqi üzrə 14-cü olmuşdur. Ölkə ərazisində internetin tətbiqi genişləndirilmişdir.

İKT sektorunun iqtisadiyyatda payı 3,7 dəfə artmışdır. Azərbaycan bütün sahələrdə uğur hekayəsini əzmlə davam etdirir, müasir dünyanın çağırışlarına daha dayanıqlı iqtisadiyyat formalaşdırmaqla reaksiya verir. Yüksək texnologiyaların sürətli inkişafı, ölkəmizin dünyanın məhdud sayda üzvə malik kosmik klubuna daxil olması da bunun bariz göstəricilərindəndir.

Bu mənada xalqımızın 2018-ci ilin 11 aprel seçkisi zamanı nümayiş etdirdiyi mövqe tam məntiqli idi və qədirbilən xalqımızın qazanılan nailiyyətlərə ədalətli, obyektiv münasibətini göstərirdi. Bu inkişaf siyasəti 2018-ci ildən keçən müddət ərzində də uğurla davam etdirilməkdədir.

Bu dövrdə beynəlxalq müstəvidə də Azərbaycanın mövqeləri xeyli dərəcədə gücləndi. 2003-2018-ci illər ərzində Prezident İlham Əliyevin rəhbərliyi altında həyata keçirilən xarici siyasət və nəticəyə hesablanmış diplomatik uğurlar Azərbaycanın BMT, Avropa Şurası, ATƏT,

NATO və digər nüfuzlu beynəlxalq təşkilatların yüksək tribunasından daha qətiyyətlə çıxış etməsinə, bir çox məsələdə beynəlxalq aləmin dövlətimizin rəyinə böyük hörmətlə yanaşmasına münbit şərait yaratdı. Ötən 4 il bu istiqamətdə uğurlarımızın sırasını daha da genişləndirdi.

Bu gün bütün dünyada Azərbaycan Respublikası Prezidentinin mövqeyinə, irəli sürdüyü təşəbbüslərə xüsusi diqqət var. Beynəlxalq ictimaiyyət Prezident İlham Əliyevin fikirlərinə, yanaşmalarına, qlobal proseslər haqqında rəylərinə həssaslıqla, rəğbətlə yanaşır. Çünki Azərbaycan Prezidentinin yürütdüyü mükahimələrin, proqnozların, irəli sürdüyü təkliflərin düzgünlüyünü zaman dəfələrlə sübuta yetirib.

İnsan amili, yüksək rifah, milli maraqlar

Prezident İlham Əliyevin siyasətində insan amili hər zaman xüsusi önəm kəsb edir. Azərbaycan Prezidentinin rəhbərliyi ilə aparılan və gələcəyə hesablanmış sosial-iqtisadi siyasət sosial dövlət olaraq ölkəmizdə nəzərdə tutulmuş bütün layihələrin icrasını və islahatların dövrün reallıqlarına uyğun olaraq dərinləşməsini təmin edir. Azərbaycanın bu sahədə nüfuz qazanmasında, yeni sosial və iqtisadi çağırışların müzakirəsi üçün ideal məkan kimi qəbul olunmasında dövlətimizin təkmil sosial-iqtisadi islahatları, uğurlu siyasəti əsas rol oynayır.

2003-2018-ci illər ərzində ölkəmizdə maaşlar təxminən 7 dəfə, pensiyalar 10 dəfədən çox artıb. Sosial infrastruktur inkişaf edib. 3100-dən çox məktəb və 640-dan çox xəstəxana tikilib, yaxud təmir edilib. Bölgələrdə 43 olimpiya idman kompleksi yaradılıb. Qeyd olunan rəqəmlər onu göstərir ki, sosial siyasət daim diqqət mərkəzindədir. Ötən dörd il bu istiqamətdə əldə edilmiş nailiyyətlərin sırasını genişləndirən tarixi mərhələdir.

Prezident İlham Əliyevin ölkəmizə rəhbərlik dövrü Azərbaycan Ordusunun da sürətli inkişaf dövrüdür. Bu illərdə ordu quruculuğuna xüsusi diqqət yetirilmiş, şəxsi heyətin hazırlığı, döyüş ruhu, təchizat, silah-sursat, texnika baxımından ordumuz dünyanın ən güclü orduları sırasına daxil olmuşdur. 2016-cı ilin Aprel döyüşləri bütün dünyaya Azərbaycan Ordusunun gücünü, qələbə əzmini göstərdi. Ədalətin bərpa olunacağına ümidlərimizi artırdı. Həmin illər ərzində əldə olunmuş iqtisadi inkişaf və aparılan effektiv xarici siyasət nəticəsində Ermənistan bütün regional layihələrdən təcrid olundu. Azərbaycan diplomatiyasının uğurları sayəsində dünya münaqişə ilə bağlı həqiqətləri daha aydın görməyə, regionun əsas güc mərkəzi, lider dövləti olan Azərbaycana münasibətdə daha rasional mövqe tutmağa başladı. Azərbaycanın mədəniyyət diplomatiyasının uğurlarında ölkəmizin Birinci vitse-prezidenti, Heydər Əliyev Fondunun rəhbəri, UNESCO və ICESCO-nun xoşməramlı səfiri Mehriban xanım Əliyevanın xidmətlərini də xüsusi vurğulamalıyıq. Mehriban xanımın təşəbbüskarı olduğu layihələr sayəsində dünya Azərbaycanın mədəni dəyərlərini, mənəvi dünyasını yenidən kəşf etmiş, fərqli mədəniyyətlərin təmas məkanı, multikulturalizm prinsiplərinə sadiq, zəngin tolerantlıq ənənələrinə malik ölkə kimi Azərbaycanın mövqeləri daha da möhkəmlənmişdir.

Sağlamlıq naminə

Prezident İlham Əliyevin Azərbaycana rəhbərliyi dövrü səhiyyə sektorunda köklü islahatlarla əlamətdardər. Ölkəmizdə səhiyyə sektorunun inkişafı ilə bağlı görülən işlər dövlətin həyata keçirdiyi sosial siyasətin başlıca istiqamətlərindən birini təşkil edir. Təbii ki, bu da dövlətimizin vətəndaş amilinə verdyi dəyərdən irəli gəlir. İnsanların sağlam, əmin-amanlıq şəraitində yaşaması dövlətin siyasətində əsas yer tutur. Atılan addımlar, həyata keçirilən məqsədyönlü siyasət bu sahəni keyfiyyət və kəmiyyət göstəriciləri ilə zənginləşdirir. Səhiyyə sektoru artıq yeni mərhələdə inkişaf edir.

Səhiyyə ilə bağlı mühüm dövlət proqramlarının hazırlanaraq həyata keçirilməsi, əhalinin sağlamlığının daha etibarlı şəkildə qorunması, onların ən yüksək səviyyədə tibbi xidmətlərlə təmin olunması bu istiqamətdə həyata keçirilən siyasətin prioritetləridir. Səhiyyə müəssisələrinin təmiri və bərpası, ən müasir avadanlıqlarla təchizatı, vətəndaşların pulsuz dərman preparatları ilə təmin olunması, müalicəsi, uşaqların bütün növ tibbi xidmətlərlə əhatə olunması islahatların əsasını təşkil edir.

Azərbaycan Prezidentinin fərmanları əsasında təsdiqlənərək uğurla icra edilən regionların sosial-iqtisadi inkişafına dair dövlət proqramları çərçivəsində bölgələrdə diaqnostika mərkəzlərinin tikilib istifadəyə verilməsi də bu diqqət və qayğıdan irəli gəlir. Cənab İlham Əliyevin bölgələrə səfərləri çərçivəsində yeni səhiyyə ocaqları istifadəyə verilir. Yeni tibb müəssisələrinin təməli qoyulur. Regionlarda yaşayan əhalinin tibbi xidmətlərlə keyfiyyətli şəkildə təmin olunması üçün bütün növ müayinə və müalicə prosesləri təşkil edilir. Regionlarda ən mürəkkəb əməliyyatların həyata keçirilməsinə imkanlar yaradılır.

Prezident İlham Əliyev digər sahələr kimi, səhiyyədə də yüksəkixtisaslı kadrların yetişdirilməsinə xüsusi önəm verir. Dünya səhiyyə elminin uğurlu inkişafını insanların sağlamlığına töhfə kimi dəyərləndirən dövlət başçısı bildirir: “Biz çalışmalıyıq ki, dünyada bu sahədə gedən ən son yeniliklər, ixtiralar Azərbaycanda da tətbiq olunsun. Biz buna hazır olmalıyıq. Yaradılan maddi-texniki baza, müasir avadanlıqlar belə imkanları verir. Həkimlərin peşəkarlığı, bilikləri artmalıdır. Həkimlər daim öz fəaliyyətləri, işləri ilə elə etməlidirlər ki, daha da bilikli olsunlar. Elə edək ki, Azərbaycanda istənilən ən ağır əməliyyat aparıla bilsin. Son illərdə deyə bilərəm ki, biz buna nail ola bilmişik. Çünki bu gün Azərbaycanda ən ağır ürək-damar əməliyyatları, orqan transplantasiyaları aparılır. Ancaq sirr deyil ki, bəzi insanlar, xüsusilə imkanlı insanlar müalicə üçün hələ də daha çox xaricə üz tuturlar. Biz elə bir vəziyyət yaratmalıyıq ki, buna ehtiyac olmasın. Azərbaycanda ən yüksək tibbi xidmət, ən yüksək peşəkarlıq olmalıdır. Mən əminəm ki, birgə səylər, həm dövlət tərəfindən aparılan siyasət, yeni tibb ocaqlarının yaradılması, müasir avadanlığın mövcudluğu və həm də həkimlərin peşəkarlığı, təkmilləşməsi bizi bu məqsədə nail olmağa gətirib çıxaracaqdır”.

Azərbaycan dövləti bu istiqamətdə bütün mümkün addımları atır. Bir məqamı da qeyd edək ki, beynəlxalq təşkilatlar, o cümlədən Dünya Səhiyyə Təşkilatı Azərbaycanda həyata keçirilən islahatları yüksək dəyərləndirir. Kompleks tədbirlər qarşıya qoyulan məqsədlərə lazımi səviyyədə nail olmağa əsas yaradır. Bütün dünyanı çənginə almış koronavirus pandemiyası dövründə Azərbaycan dövlətinin həyata keçirdiyi tədbirlər, ölkə səhiyyəsinin bu qlobal bəlanı hazırlıqla qarşılaması dövlət rəhbərimizin bu sahədə gördüyü işlərin nəticəsi idi. Qısa müddətdə Azərbaycanda modul tipli xəstəxanalar quruldu. Tibbi personal koronavirus xəstələrinin müalicəsi üçün səfərbər edildi. Xəstələrin bütün qayğılarını dövlət öz üzərinə götürdü. Bunun nəticəsində Azərbaycan pandemiyadan ən az ziyan çəkən, ən az insan itkisinə məruz qalan ölkələrdən oldu. Azərbaycanda vaksinləşmə prosesi də vaxtında başlandı və qısa müddətdə geniş insan kütləsini əhatə etdi. Bütün bunlar bir tərəfdən Azərbaycanın sosial-iqtisadi imkanlarından irəli gəlir, digər tərəfdən də dövlət rəhbərimizin vətəndaşlara diqqət və qayğısının, beynəlxalq nüfuzunun, hər addımı vaxtında ata bilmək bacarığının göstəricisidir.

Azərbaycan Prezidentinin insan amilinə verdiyi yüksək önəm, atılan hər addımda bu önəmin daha qabarıq şəkildə özünü büruzə verməsi təbii ki, hər kəsdən üzərinə düşən vəzifəni yüksək səviyyədə yerinə yetirməyi bir tələb kimi qarşıya qoyur. İnsanların sağlamlığının keşiyində dayanmaq, onlara yüksək xidmət göstərmək səhiyyə işçilərinin borcudur. İyunun 17-sinin ölkəmizdə tibb işçilərinin peşə bayramı günü kimi qeyd olunması dövlətimizin bu sahədə çalışanların əməyinə verdiyi ən böyük dəyərdir. Bu diqqət və qayğı hər bir səhiyyə işçisindən məsuliyyət tələb edir. Möhtərəm Prezident İlham Əliyevin bu fikirləri insan amilinə dəyəri bir daha təsdiqləyir: “İnsanların sağlamlığı dövlətimiz üçün prioritet məsələdir. Mənim bölgələrə səfərlərim zamanı açılan xəstəxanalar, su xətləri, ekologiya ilə bağlı digər tədbirlər bir məqsədi güdür - Azərbaycanda insan sağlamlığı qorunsun, keyfiyyətli müalicə almaq üçün imkan, şərait olsun”.

Ölkəmizdə icbari tibbi sığorta sisteminin tətbiqinə başlanması, İcbari Tibbi Sığorta üzrə Dövlət Agentliyinin, Tibbi Ərazi Bölmələrini İdarəetmə Birliyinin (TƏBİB) yaradılması da vətəndaşlarımıza tibbi xidmətin ən yüksək səviyyədə təşkili və əhalinin sağlamlığı məqsədlərinə xidmət edir. Azərbaycanda bütün sahələrdə aparılan islahatlar yaşayış standartlarını dəyişir, bu kontekstdə səhiyyə xidmətinin keyfiyyətinə də tələbat yüksəlir.

Məlumat üçün bildirmək istəyirəm ki, icbari tibbi sığorta sisteminə keçilməsi “Tibbi sığorta haqqında” Azərbaycan Respublikasının Qanununda təsbit olunmuşdur. Ötən müddət ərzində yeni sistemin tətbiq edilməsi ilə əlaqədar çox ciddi islahatlar həyata keçirilmişdir. Hər şeydən əvvəl səhiyyə infrastrukturunun köklü surətdə yeniləşdirilməsini qeyd etmək yerinə düşər. Əhalinin sağlamlıq göstəriciləri yaxşılaşıb, uşaq ölümləri azalıb, orta ömür uzanıb. Bütün bunlar Prezident İlham Əliyevin xüsusi diqqət və qayğısı sayəsində mümkün olub.

İcbari tibbi sığortaya keçidlə paralel baş verən bir çox mütərəqqi yenilik, inkişaf prosesləri Azərbaycanda səhiyyə xidmətinin fəlsəfəsini dəyişir. Əhaliyə daha keyfiyyətli səhiyyə xidmətinin təmin edilməsi mümkün olur. Xidmətin keyfiyyəti artırılır.

Səhiyyə elə bir sahədir ki, orada islahatlar daimidir. Burada həyata keçirilən islahatlar bütövlükdə Prezident İlham Əliyevin modernləşmə və yeniləşmə siyasətinin tərkib hissəsi kimi qəbul edilir. İnsanlar səhiyyə islahatlarının daha ardıcıl surətdə davam etdiriləcəyinə və müsbət nəticələr verəcəyinə inanırlar.

Müstəqil siyasət

Prezident İlham Əliyev Azərbaycanın milli maraqlarına sadiq qalaraq ötən dörd il ərzində xarici aləmlə balanslaşdırma xəttini təmin etmişdir. Azərbaycanın milli dövlətçilik maraqlarının müdafiəsini uğurla həyata keçirmişdir.

Bu dörd ilin və ondan əvvəlki dönəmin müşahidələri göstərir ki, cənab İlham Əliyevin xarici siyasət kursu üçün çoxvektorluluq, çevik alyanslar strategiyası xarakterikdir. Bunlar sadəcə bəyanat deyil, Azərbaycan Prezidentinin mükəmməl diplomatik məharətlə, müdrik dövlət rəhbərinə xas uzaqgörənliklə həyata keçirdiyi xarici siyasətin sərgilədiyi real nümunələrdir. Bu siyasət əvvəlki illərdə olduğu kimi, bu gün də Azərbaycanın uzunmüddətli, dayanıqlı inkişafı üçün nəhəng potensialı təmin edir. Müstəqil xarici siyasətin həyata keçirilməsinə etibarlı təminat verir. Ölkəmizin işıqlı gələcəyinə zəmin yaradır. Azərbaycan geosiyasi qruplaşmalardan heç birinə qoşulmadan, çevik xəttə malik olmaqla bizə dost münasibəti göstərən yaxın qonşularla, eləcə də uzaq olan xarici ölkələrlə dostluq və əməkdaşlıq münasibətlərini yüksək qiymətləndirir. Bu münasibətlərdən hər kəsin faydalanmasına şərait yaradır.

Prezident İlham Əliyev cəsarətli, milli mənafelərimizin qorunmasına və ölkəmizin müstəqilliyinin gücləndirilməsinə təminat verən uzaqgörən siyasətinin nəticələrini pandemiya dövrünün gərgin vaxtlarına təsadüf edən çıxışlarının birində belə şərh etmişdir: “Baxmayaraq ki, bölgədə yaranmış böhranlı vəziyyət bizim iqtisadi maraqlarımıza ziyan vurmuşdur, ancaq Azərbaycan dövləti və xalqı bunu hiss etmədi. Yəni bu, insanların gündəlik həyatında özünü göstərmədi. Düzdür, Azərbaycanın ixrac imkanları qısa müddət müəyyən dərəcədə məhdudlaşdı, ancaq bizim çevik hərəkətlərimiz və mövcud olan bütün infrastruktur layihələrimiz və artıq güclü imkanlarımız yol verdi ki, biz bu vəziyyətdən minimum itkilərlə çıxaq. Bu, bir daha onu göstərdi ki, bizim həm güclü iqtisadi imkanlarımız var, həm çox güclü siyasi sistem mövcuddur və həm də Azərbaycanda dövlətçilik prinsipləri çox möhkəmdir. Yəni hətta bizim ərazimizin, hüdudlarımızın yaxınlığında yaşanan böhranlı vəziyyət bizə təsir etmədi. Bu, bir daha onu göstərir ki, apardığımız siyasət düzgün siyasətdir və biz yalnız və yalnız daxili resurslara istinad edərək, ölkəmizi inkişaf etdiririk. Azərbaycanda artıq çox güclü sənaye potensialı, çox güclü infrastruktur yaradılıbdır. İqtisadiyyat şaxələndirilir və beləliklə, istənilən böhranlı vəziyyət Azərbaycana az təsir edir”.

Beləliklə, insan amili, xalqın rifahı və milli maraqlar əvvəlki illərdə olduğu kimi, ötən dörd ildə də yenə dövlət siyasətinin strateji prioritetləri oldu və bunların hər biri üzrə mühüm nailiyyətlər qazanıldı.

Milli birliyimizin gücü

2018-ci ilin prezident seçkisi maraqlı bir məqamı ilə də diqqəti çəkir. Dörd il əvvəl Azərbaycan xalqının cənab İlham Əliyevə və onun şəxsində Azərbaycanın tarixi nailiyyətlərinə səs verməsi ölkəmizin siyasi həyatında da yeni bir səhifə açdı. Xalqın içindəki az sayda destruktiv qüvvələr, xaricdən maliyyələşərək bədxahlarımızın sifarişləri ilə ölkəmizin uğurlarına kölgə salmaq istəyən ziyanlı zümrələr tam iflasa uğradılar. Azərbaycan seçicilərinin mütləq əksəriyyətinin Prezident İlham Əliyevə səs verməsi xalqın ölkəmizdəki bütün destruktiv və xain qüvvələrə yox deməsinin təzahürü oldu. 2018-ci ildə keçirilmiş seçkilərin nəticələri bir daha göstərdi ki, radikalizmə, destruktiv qüvvələrə Azərbaycan siyasi səhnəsində yer yoxdur və heç zaman da olmayacaq. Xalq Azərbaycanın son onilliklərdəki tarixi uğurlarının rəhni olan islahatlar yolu ilə inkişaf xəttini alternativsiz saydığını, bu yola inandığını, güvəndiyini sərgilədi. Xarici qrantlar, ianələr hesabına fəaliyyət göstərən, öz dövlətinə qarşı çıxış edən ünsürlərə xalqımız bir daha öz yerlərini göstərdi.

Bu seçkilərlə Azərbaycan xalqı ölkəmizdə aparılan demokratik islahatlara səs verdi. Demokratik institutların inkişafı ilə bağlı siyasətin davamlı olması arzusunu ifadə etdi. Cəmiyyətimizdə artıq qaragüruh düşüncəyə yer olmadığı, dövlət müstəqilliyimiz sayəsində öz taleyinin sahibinə çevrilmiş ölkəmizdə siyasi mədəniyyət səviyyəsinin xeyli dərəcədə yüksəldiyi də təsdiqini tapdı.

Bu da Ulu Öndər Heydər Əliyevin dövlətçilik ideyalarına yüksək sadiqlik göstərən Azərbaycan Prezidenti İlham Əliyevin xalqı milli strateji hədəflər ətrafında birləşdirmək əzminin qüdrətidir. Ümummilli Liderin müstəqil Azərbaycana rəhbərlik illərində gündəmə gətirdiyi azərbaycançılıq məfkurəsi bu gün cəmiyyətimizdə tam bərqərar olub. Vətən müharibəsindəki tarixi qələbəmizi də ordumuzun qüdrəti, milli birliyimizin gücü ilə qazandıq.

Əhliman ƏMİRASLANOV,

Milli Məclisin Səhiyyə komitəsinin sədri, akademik

Azərbaycan.-2022.- 10 aprel.- S.5.